Job
3 Tándi̱ʼi ku̱u ña̱yóʼo, ta̱ Job ki̱xáʼara káʼa̱nra ta ki̱xáʼara sákuisochiʼñara* ki̱vi̱ ña̱ ka̱kura.
2 Ta̱ Job ka̱chira:
3 “Va̱ʼaníka tá va̱ása níkixaa̱ ki̱vi̱ ña̱ kakui̱,
ta saátu ñuú tá ni̱ka̱ʼa̱nna ‘Iin ta̱a loʼo kúú ta̱ ka̱ku’.
4 Ná kunaa ki̱vi̱ kán.
Ná nandóso-ini Ndióxi̱ xa̱ʼa̱ ki̱vi̱ kán.
Ná va̱ása ndaye̱ʼe̱ ki̱vi̱ kán.
5 Ndeéní ná kunaa ki̱vi̱ kán.
Ná ndakunúu iin vi̱kó ndáá sa̱tá ki̱vi̱ kán.
Ndeéní ná kunaa tá káʼñu.*
6 Ndeéní ná kunaa ñuú kán...., ná va̱ása kusi̱í-inina,
ná va̱ása ndakaʼvina ki̱vi̱ kán xíʼin nda̱a̱ ni iin yo̱o̱.
7 Va̱ʼaníka tá va̱ása níkaku nda̱a̱ ni iinna ñuú saá,
va̱ʼaníka tá kǒo na̱ ndáʼyi̱ kóʼó* xa̱ʼa̱ ña̱ kúsi̱í-inina.
8 Na̱ sákuisochiʼña káʼñu ná sakúisochiʼñana ñuú,
9 Ná va̱ása ndaye̱ʼe̱ ki̱mi ñuú saá,
ná va̱ása kundatuña ndaye̱ʼe̱ chi va̱ása kuuví ña̱yóʼo
10 Nda̱chunví sa̱káku siʼíi̱ yi̱ʼi̱ ki̱vi̱ saá,
ta vitin yáʼi̱ nu̱ú tu̱ndóʼo.
11 ¿Nda̱chun va̱ása níxi̱ʼi̱i̱ tá ka̱kui̱?
¿Nda̱chun va̱ása níxi̱ʼi̱i̱ ti̱xin siʼíi̱?
12 ¿Nda̱chun nda̱kiʼin siʼíi̱ yi̱ʼi̱ nu̱ú si̱ʼinñá ta nda̱chun sa̱chíchínñá yi̱ʼi̱?
13 Tá níxi̱ʼi̱i̱ ki̱vi̱ saá ya̱a̱ ya̱a̱ kandúʼi̱* ta kǒo na̱ keʼé yi̱ʼi̱,
ku̱su̱i̱n ta kǒo ña̱ sandíʼi̱-inii̱,
14 ndakindei̱ nda̱a̱ táki̱ʼva ndákindee̱ na̱ xi̱xaʼndachíñu nu̱ú ñuʼú xíʼin na̱ xi̱taxi consejo ndaʼa̱na,
na̱ i̱xava̱ʼa nu̱ú kundoona soo vitin xa̱a̱ ndi̱ʼi-xa̱ʼa̱ña;
15 á ndakindei̱ xíʼin na̱ xi̱kuumií chiñu ña̱ ndáyáʼvi na̱ xi̱kuumií oro,
na̱ xi̱chutú veʼe xíʼin plata.
16 ¿Á va̱ʼaka nínui̱ tá ndíka̱i̱ ti̱xin siʼíi̱?
¿Nda̱chun va̱ása níxi̱ʼi̱i̱ tá ka̱kui̱?
17 Nda̱a̱ na̱ ndi̱va̱ʼa-ini va̱ása sákakukana ku̱a̱chi tá xíʼi̱na.
Nda̱a̱ na̱ ku̱naa ndákindee̱na tá xíʼi̱na.
18 Nda̱a̱ na̱ ndási ñúʼu ini ya̱vi̱ nu̱ú ñúʼu na̱ ni̱xi̱ʼi̱, va̱ʼaní ndóona,
ta kǒo na̱ íxandúxa xíʼinna ña̱ kachíñuna.
19 Na̱ ku̱i̱ká xíʼin na̱ nda̱ʼví inkáchi íyona tá xa̱a̱ ni̱xi̱ʼi̱na
ta sáña̱ na̱ káchíñundáʼvi ndaʼa̱ na̱ xi̱kachíñuna nu̱ú.
20 ¿Nda̱chun táxi Ndióxi̱ tákuka na̱ xóʼvi̱* ta nda̱chun táxira táku na̱ kúsuchíní-ini?
21 ¿Nda̱chun va̱ása xíʼi̱ na̱ kúni̱ní kuvi?
Na̱ nándukú ña̱yóʼo nda̱a̱ táki̱ʼva nándukúna ña̱ʼa ña̱ ndáyáʼviní.
22 Kusi̱íní-ini na̱yóʼo,
kusi̱íní-inina tá ná kuvina.
23 ¿Nda̱chun táxi Ndióxi̱ táku ta̱a ta̱ kǒo kúnda̱a̱-ini ndáa yichi̱ ku̱ʼu̱nra?
Ta̱a ta̱ va̱ása táxi Ndióxi̱ kita chi nda̱kasirara.
24 Saáchi nu̱úka ña̱ kuxui̱, ta̱ kúsuchí-iniva kúi̱,
nda̱a̱ táki̱ʼva ku̱a̱ʼa̱n yu̱ta saá ku̱a̱ʼa̱n ti̱kui̱í nu̱úi̱ xa̱ʼa̱ ña̱ xákuníi̱.
25 Saáchi ña̱ xi̱yiʼvíníi̱ kundoʼi̱, ña̱kán kúú ña̱ ndo̱ʼovai̱,
ta ña̱ xi̱yiʼvíníi̱ kuu, ña̱kán kúú ña̱ ku̱uva.
26 Ndíʼi̱ní-inii̱ ta ni va̱ása kívi ndakindei̱ nu̱ú tu̱ndóʼo...
Tuku ta tuku tu̱ndóʼo va̱xi nu̱úi̱”.