Job
21 Ta̱ Job nda̱kuiinra ta ni̱ka̱ʼa̱nra ña̱yóʼo:
2 “Viíní kuniso̱ʼondó ña̱ ka̱ʼi̱n;
ña̱yóʼo kúú ña̱ kivi keʼéndó ña̱ va̱ʼa sandíkondó-inii̱.
3 Kundatu loʼondó nani káʼi̱n;
tá ná sandíʼii̱ ka̱ʼi̱n kivi kusi̱kindaavandó yi̱ʼi̱.
4 Su̱ví xíʼin na̱ yiví káʼa̱nkúáchii̱* xa̱ʼa̱ ña̱ ndóʼi̱.
Chi tá xíʼin na̱kán níka̱ʼa̱nkúáchii̱, xa̱a̱ ni̱sa̱a̱vai̱.
5 Kotondó yi̱ʼi̱ ta ndakanda̱ka-inindó;*
xíʼin ndaʼa̱ndó ndakasindó yuʼúndó.
6 Iin ku̱a̱ʼa̱n-inii̱ tá ndákanixi̱níi̱ xa̱ʼa̱ ña̱yóʼo,
ta nda̱a̱ kísini̱nui̱.
7 ¿Nda̱chun tákuka na̱ ndi̱va̱ʼa-ini, kúchéena ta ndúkúikána?
8 Ndiʼi tiempo ndóo na̱ se̱ʼena nu̱úna,
ku̱a̱ʼákaví tiempo tákuna ta xínina na̱ se̱ʼeñánina.
9 Kǒo tu̱ndóʼo nu̱úna tá ndóona ini veʼena,
va̱ása yíʼvina ta va̱ása táxi Ndióxi̱ castigo ndaʼa̱na.
10 Ku̱a̱ʼání se̱ʼe si̱ndi̱ki̱ che̱e sa̱na̱na íyo;
saáchi va̱ása núu se̱ʼe si̱ndi̱ki̱ síʼi sa̱na̱na.
11 Nda̱a̱ táki̱ʼva xínu iin tiʼvi ndikachi* saá xínu na̱ va̱lí se̱ʼena xíkana
ta kúsi̱íkaví-ini na̱ va̱lí se̱ʼena xíkana sísikína.
12 Xítana tá káʼa pandereta xíʼin arpa,
ta kúsi̱íkaví-ini na̱ ndi̱va̱ʼa-ini tá xíniso̱ʼona ña̱ tívina tú flauta.
14 Soo káʼa̱nna ña̱yóʼo xíʼin Ndióxi̱ ta̱ nda̱a̱: ‘Va̱ása keʼún ndi̱ʼi̱.
Kǒo kúni̱ndi̱ kunda̱a̱-inindi̱ xa̱ʼún.
15 ¿Ndáa ta̱ kúú Ndióxi̱ ta̱ kúúmií ndiʼi ndee̱ ña̱ va̱ʼa kachíñundi̱ nu̱úra?
¿Ndáaña va̱ʼa ndakiʼinndi̱ tá ná sakúaʼandi̱ xa̱ʼa̱ra?’.
16 Soo kúnda̱a̱-inii̱ ña̱ va̱ása kúúmií na̱yóʼo ndee̱ ña̱ vií kana ndiʼi ña̱ kéʼéna.
(Va̱ása ndákanixi̱níi̱ nda̱a̱ táki̱ʼva ndákanixi̱ní na̱ ndi̱va̱ʼa-ini).
17 ¿Nda̱saa yichi̱ ndáʼva̱ ñuʼu̱* ña̱ túu̱n nu̱ú na̱ ndi̱va̱ʼa-ini?
¿Nda̱saa yichi̱ va̱xi tu̱ndóʼo nu̱úna?
¿Nda̱saa yichi̱ sándiʼi-xa̱ʼa̱ Ndióxi̱ na̱yóʼo xa̱ʼa̱ ña̱ sáa̱níra?
18 ¿Á xa̱a̱ íyona nda̱a̱ táki̱ʼva íyo xe̱ʼe̱* ña̱ ndáchí xíʼin ta̱chí?
¿Á xa̱a̱ ñúunana* nda̱a̱ táki̱ʼva ñúu ta̱chí iin xe̱ʼe̱?
19 Ndióxi̱ taxira castigo ndaʼa̱ na̱ se̱ʼe na̱ ndi̱va̱ʼa-ini xa̱ʼa̱ ku̱a̱chi na̱yóʼo.
Soo ná taxitu Ndióxi̱ castigo ndaʼa̱ mií na̱ ndi̱va̱ʼa-ini yóʼo, ña̱ va̱ʼa kunda̱a̱-inina ña̱ su̱ví ña̱ va̱ʼa kúú ña̱ ke̱ʼéna.
20 Ná koto na̱ se̱ʼena tá ná ndiʼi-xa̱ʼa̱na
ta ná xo̱ʼvi̱na tá ná sa̱a̱ Ndióxi̱ ta̱ kúúmií ndiʼi ndee̱ xíʼinna.
21 Tá iin kama ná kuvina, ¿á kundi̱ʼi-inina xa̱ʼa̱ ña̱ kundoʼo se̱ʼena?
22 Tá Ndióxi̱ kúú ta̱ ndátiin ku̱a̱chi xíʼin nda̱a̱ na̱ kúúmií chiñu ña̱ ndáyáʼviní,
¿á íyo iin na̱ kivi sanáʼa̱ Ndióxi̱?
23 Iin ta̱a xíʼi̱ra tá ndakúkara,
tá kǒo nda̱a̱ ni iin ña̱ sándi̱ʼi-inira,
24 tá nduʼúka xa̱ʼa̱-si̱ʼinra
ta ndakúka lekera.
25 Soo inka ta̱a ndíʼi̱ní-inira ta xíʼi̱ra,
tá nda̱a̱ ni iin yichi̱ ta̱ʼán kotondosóra ña̱ va̱ʼa.
26 Saáchi ñuʼú nduu u̱vi̱ saána,
ta kaxí ti̱kuxí* u̱vi̱ saána.
27 Kúnda̱a̱ va̱ʼa inii̱ ndáaña ndákanixi̱níndó
ta káʼa̱n-táʼanndó ña̱ keʼéndó ña̱ va̱ása va̱ʼa xíʼi̱n.
28 Saáchi ndóʼó káʼa̱nndó ‘¿Ndáa míí íyo veʼe ta̱a ta̱ ndáyáʼviní
ta ndáa míí íyo veʼe nu̱ú íyo ta̱ ndi̱va̱ʼa-ini?’.
29 ¿Á ta̱ʼán nda̱ka̱tu̱ʼunndó na̱ xíka ku̱a̱ʼání ñuu?
¿Á kǒo kándíxandó ña̱ káʼa̱n na̱yóʼo
30 ña̱ va̱ása xíʼi̱ ta̱ kéʼé ña̱ va̱ása va̱ʼa tá va̱xi tu̱ndóʼo nu̱úra
ta sáka̱kuna ta̱yóʼo tá sáa̱ní Ndióxi̱?
31 ¿Ndáana ka̱ʼa̱n xíʼinra ña̱ va̱ása va̱ʼa íyo ña̱ kéʼéra?
¿Ndáana taxi castigo ndaʼa̱ra xa̱ʼa̱ ña̱ ke̱ʼéra?
32 Tá ná ku̱ʼu̱nna xíʼinra nu̱ú ndu̱xu̱nra,
koo iin na̱ kundaa nu̱ú ni̱ndu̱xu̱nra.
33 Va̱ʼaní ndakindee̱ra chí yoso̱,
ta ndiʼi na̱ yiví kundiku̱nna ku̱ʼu̱nna sa̱tára
nda̱a̱ táki̱ʼva ke̱ʼé na̱ siʼna ku̱a̱ʼa̱n nu̱úra.
34 ¿Nda̱chun kúni̱ndó sandíkondó-inii̱ xíʼin tu̱ʼun ña̱ va̱ása ndáyáʼvi?
Ña̱ vatá* kúú ndiʼi ña̱ káʼa̱nndó xíʼi̱n”.