Job
4 Tasaá ni̱ka̱ʼa̱n ta̱ Elifaz ta̱ temanita ña̱yóʼo:
2 “Tá ná kuni̱ iinna ka̱ʼa̱nna xíʼún, ¿á kundeé-iniún?
Soo yi̱ʼi̱ va̱ása xíniñúʼu kasi yuʼíi̱ chi xíniñúʼu ka̱ʼi̱n.
3 Ndixava, yóʼó xi̱taxiún consejo ndaʼa̱ ku̱a̱ʼánína,
ta xi̱ndasandakún-ini na̱ xi̱ndakava-ini.
4 Xíʼin tu̱ʼun ña̱ xi̱kaʼún xi̱chika̱ún ndee̱ xíʼin na̱ xi̱ndakava-ini,
ta xi̱ndasandakún-ini na̱ xi̱xiniñúʼu ña̱ chindeétáʼún xíʼinna.
5 Soo vitin, yóʼó kúú ta̱ ndóʼo ña̱yóʼo ta kúnaún;
yóʼó kúú ta̱ nda̱kiʼinña ta ndíʼi̱ní-iniún.
6 Xa̱ʼa̱ ña̱ íxato̱ʼóníún Ndióxi̱, ¿á va̱ása ndáa-iniúnra?
Xa̱ʼa̱ ña̱ xa̱a̱ ku̱a̱ʼání tiempo nda̱kú íyo iniún xíʼinra, ¿á kǒo ña̱ ndátún ndakiʼún?
7 Ixaún ña̱ ma̱ní, ndakanixi̱ní xa̱ʼa̱ ña̱yóʼo: ¿á xa̱a̱ xíniún ña̱ kamaní xíʼi̱ na̱ kǒo ku̱a̱chi kúúmií?
¿Á xa̱a̱ xíniso̱ʼún ña̱ xíʼi̱ na̱ kéʼé ña̱ nda̱kú?
8 Xa̱a̱ kíʼii̱n kuenta ña̱ na̱ ndákanixi̱ní keʼé ña̱ va̱ása va̱ʼa
ta saátu na̱ kéʼéña, mií na̱yóʼo kúú na̱ ndóʼovaña.
9 Xíʼi̱na tá ndeéní sákani Ndióxi̱ ta̱chí sa̱tána
ta xíʼi̱na tá ndeéní sáa̱ra.
10 Tí ndikaʼa* ndáʼyi̱rí ta tí ndikaʼa yúta̱* ndúkue̱ʼe̱rí,
soo nda̱a̱ nu̱ʼu tí ndikaʼa tí ndakúka cháchiña.
11 Xíʼi̱ tí ndikaʼa xa̱ʼa̱ ña̱ kǒo kití tiinrí kaxírí
ta xa̱a̱ síín síín nu̱ú ku̱a̱ʼa̱n se̱ʼe válírí.
12 Tasaá se̱ʼé se̱ʼé ku̱yatin iinna ta ni̱ka̱ʼa̱nna xíʼi̱n,
ya̱a̱ ya̱a̱ ni̱ka̱ʼa̱nna xa̱ʼa̱ so̱ʼi̱.
13 Tá ñuú tá kísi̱ naa na̱ yiví,
xi̱nii̱ visión ta ni̱ndi̱ʼiní-inii̱,
14 ndeéní ki̱xáʼíi̱ kísii̱ xa̱ʼa̱ ña̱ yíʼvii̱,
ta nda̱a̱ lekei̱ ki̱xáʼa kísi.
16 Tasaá xi̱kundichi ña̱ʼa yóʼo,
soo va̱ása níndakunii̱ ndáaña kúúña;
xi̱nii̱ iin ku̱nda̱ti̱;*
tasaá ku̱táxi̱n ta xi̱niso̱ʼi̱ tu̱ʼun iinna:
17 ‘¿Á nda̱kúka íyo ña̱ kéʼé na̱ yiví nu̱úka ña̱ kéʼé Ndióxi̱?
¿Á va̱ʼaka íyo ña̱ kéʼé na̱ yiví nu̱úka ña̱ kéʼé ta̱ i̱xava̱ʼa miína?’.
18 Koto, ta̱yóʼo va̱ása ndáa-inira na̱ káchíñu nu̱úra
ta nda̱a̱ na̱ ángel ndáni̱ʼíra ku̱a̱chi.
19 Tá saá kéʼéra xíʼin na̱yóʼo, kachikaví na̱ yiví na̱ ku̱vaʼa xíʼin nda̱ʼyi̱,*
chi yáká* kuitíva kúúna,
nda̱a̱ táki̱ʼva va̱ása yo̱ʼvi̱ sácho̱ʼma̱na iin ti̱ki̱va.
20 Xi̱ta̱a̱n* tákuna ta xi̱kuaá xa̱a̱ xíʼi̱na;
ndíʼi-xa̱ʼa̱ va̱ʼana ta kǒo na̱ kíʼin kuenta.
21 Íyona nda̱a̱ táki̱ʼva íyo iin veʼe loʼo ña̱ ndu̱va ña̱ ki̱ndaana yoʼo̱ ña̱ tíinña.
Xíʼi̱na nda̱a̱ táki̱ʼva xíʼi̱ na̱ kǒo ña̱ ndíchi kúúmií.