Job
31 ”Xa̱a̱ chi̱kaa̱-inii̱* ña̱ ni loʼo va̱ása ndakanixi̱níi̱ keʼíi̱ ña̱ va̱ása va̱ʼa xíʼin iin ñá loʼo kúa̱an.
2 Tá ná keʼíi̱ ña̱yóʼo, ¿ndáaña taxi Ndióxi̱ ta̱ íyo chí ndiví ndaʼíi̱?
¿Ndáaña taxi Ndióxi̱ ta̱ kúúmií ndiʼi ndee̱ ndaʼíi̱?
3 ¿Á va̱ása kixi tu̱ndóʼo nu̱ú na̱ kéʼé ña̱ va̱ása va̱ʼa?
¿Á va̱ása kixi tu̱ndóʼo nu̱ú na̱ íxandi̱va̱ʼa xíʼin inkana?
4 ¿Á va̱ása xíto Ndióxi̱ ña̱ kéʼíi̱
ta xítova̱ʼara ndiʼi ña̱yóʼo?
5 ¿Á xa̱a̱ káʼi̱n ña̱ vatá?*
¿Á xa̱a̱ sándaʼvii̱ inkana?
6 Tá vií va̱ʼa ná koto Ndióxi̱ ña̱ kéʼíi̱;
saá kúú ña̱ ndakunira ña̱ kéʼíi̱ ña̱ nda̱kú.
7 Tá ki̱tai̱ yichi̱ va̱ʼa
tá ni̱ki̱ʼvi ña̱ va̱ása va̱ʼa níma̱i̱ xa̱ʼa̱ ña̱ xítoi̱,
á tá ku̱yaku̱a̱ ndaʼíi̱ xíʼin ña̱ va̱ása va̱ʼa,
8 inkana ná kuxu ña̱ chi̱ʼii̱,
ta inkana ná tuʼun ña̱ chi̱ʼii̱.
9 Tá ki̱xáʼíi̱ kútói̱ inka ñaʼá,
tá xi̱ndatui̱ yéʼé ta̱ íyo yatin xíʼi̱n ña̱ ki̱ʼvii̱ ku̱a̱chi xíʼin ñá síʼira,
10 ná ndiko ñá síʼi̱ trigo kuxu inka ta̱a
ta inka ta̱a ná ku̱su̱n xíʼinñá.
11 Saáchi iin ña̱ kaʼan nu̱ú kúú ña̱yóʼo tá ná keʼíi̱ña
iin ku̱a̱chi ña̱ xíniñúʼu ndakiʼii̱n castigo xa̱ʼa̱ kúúña nu̱ú na̱ ndátiin ku̱a̱chi.
12 Nda̱a̱ táki̱ʼva koo iin ñuʼu̱ ña̱ sándiʼi-xa̱ʼa̱ saá kooña,
nda̱a̱ táki̱ʼva koo ña̱ kaʼmi ndiʼi ña̱ʼa ña̱ kúúmiíi̱ saá kooña.
13 Tá va̱ása nda̱kú níndatii̱n ku̱a̱chi xíʼin ta̱ káchíñu nu̱úi̱ á xíʼin ñá káchíñu nu̱úi̱
tá xi̱chikaa̱na ku̱a̱chi yi̱ʼi̱ xa̱ʼa̱ iin ña̱ʼa,
14 ¿ndáaña keʼíi̱ tá ná ndatiin Ndióxi̱ ku̱a̱chi xíʼi̱n?
¿Ndáaña ndakuii̱n yuʼúra tá ná nda̱ka̱tu̱ʼunra yi̱ʼi̱?
15 ¿Á su̱ví ta̱ ke̱ʼé yi̱ʼi̱ ti̱xin siʼíi̱ kúútu ta̱ ke̱ʼé na̱yóʼova?
¿Á su̱ví ta̱yóʼo kúú ta̱ ní ixava̱ʼa ndi̱ʼi̱ tá kúma̱níka kakundi̱?
16 Tá va̱ása níxi̱taxii̱ ña̱ xi̱kuni̱ na̱ nda̱ʼví
á tá va̱ása níxi̱taxii̱ ña̱ ndakiʼin ñá ni̱xi̱ʼi̱ yii̱ ña̱ xi̱ndatuñá ndakiʼinñá,
17 tá xi̱xixi iinlá miíi̱ ta kǒo níxi̱taxii̱ ña̱ kuxu na̱ ni̱xi̱ʼi̱ yivá
18 (saáchi tá loʼoka kúnii̱ sa̱kúaʼnui̱ na̱ kǒo yivá ta nda̱a̱ táki̱ʼva ni̱xi̱yo yivána saá ni̱xi̱yoi̱,
ta nda̱a̱ tá loʼovíi̱ chíndeétáʼi̱n xíʼin ná ni̱xi̱ʼi̱ yii̱),
19 tá xi̱xinii̱ ña̱ vi̱xinní xi̱xiʼi̱ iin na̱ yiví xa̱ʼa̱ ña̱ kǒo ti̱ko̱to̱ kundixina
á tá xi̱xinii̱ ña̱ kǒo ti̱ko̱to̱ sa̱ʼvi na̱ nda̱ʼví,
20 tá va̱ása nítaxii̱ ti̱ko̱to̱ ña̱ ku̱vaʼa xíʼin ixí* tí ndikachi* kundixina
ta va̱ása nítaxina tíxa̱ʼvi ndaʼíi̱,
21 tá i̱xandi̱va̱ʼi̱ xíʼin na̱ ni̱xi̱ʼi̱ yivá na̱ xi̱niñúʼu chindeétáʼi̱n xíʼin chí yéʼé ñuu.
22 tá saá ke̱ʼíi̱, ná ta̱ʼnu̱ so̱ko̱i̱
ta ná ta̱ʼnu̱ koʼndo ndaʼíi̱.
23 Saáchi xi̱yiʼvíníi̱ ña̱ chindaʼá Ndióxi̱ iin tu̱ndóʼo nu̱úi̱
ta ni va̱ása kundeé-inii̱ kundichii̱ nu̱úra xa̱ʼa̱ ña̱ káʼnuníra.
24 Tá oro kúú ña̱ xi̱ndaa-inii̱
á tá nda̱ka̱nixi̱níi̱ ña̱ oro ña̱ va̱ʼaní kúú ña̱ chindeétáʼan xíʼi̱n ña̱ va̱ʼa kunii̱,
25 tá xi̱kusi̱í-inii̱ xa̱ʼa̱ ña̱ xi̱kuumiíi̱ ku̱a̱ʼá ña̱ ku̱i̱ká,
xa̱ʼa̱ ña̱ xi̱kuumiíi̱ ku̱a̱ʼání ña̱ʼa,
26 tá xi̱nii̱ ña̱ ndáye̱ʼe̱ ñu̱ʼu*
á tá xi̱nii̱ ña̱ livikaví yéʼe̱ yo̱o̱
27 ta ki̱xáʼa níma̱i̱ sándaʼviña yi̱ʼi̱
ta chi̱tói̱* ndaʼíi̱ ña̱ va̱ʼa ndasakáʼnui̱ña,
28 iin ku̱a̱chi kooña tá ke̱ʼíi̱ ña̱yóʼo, ta xíniñúʼu taxi iin ta̱ ndátiin ku̱a̱chi castigo ndaʼíi̱,
chi ña̱yóʼo kúni̱ kachiña ña̱ va̱ása nda̱kú níxi̱yo inii̱ xíʼin Ndióxi̱ ta̱ nda̱a̱ ta̱ íyo chí ndiví.
29 ¿Á xa̱a̱ ku̱si̱í-inii̱ xa̱ʼa̱ ña̱ ndi̱ʼi-xa̱ʼa̱ iin na̱ sáa̱-ini xíni yi̱ʼi̱?
¿Á ku̱si̱í-inii̱ tá ndo̱ʼona iin ña̱ va̱ása va̱ʼa?
30 Nda̱a̱ ni iin yichi̱ va̱ása nísakúisochiʼñai̱* na̱ sáa̱-ini xíni yi̱ʼi̱ ña̱ va̱ʼa kuvina
nda̱a̱ ni iin yichi̱ ta̱ʼán ki̱ʼvii̱ ku̱a̱chi yóʼo.
31 Na̱ ta̱a na̱ ndóo veʼi̱ xi̱kaʼa̱nna:
‘Ndiʼi na̱ va̱xi veʼe ta̱ Job kivi kuxuna nda̱a̱ xa̱a̱-inina’.*
32 Va̱ása nítaxii̱ ku̱su̱n nda̱a̱ ni iin na̱ ke̱e inka ñuu chí ke̱ʼe* tá ñuú;
ta xi̱taxii̱ ná kindo̱o na̱ ku̱a̱ʼa̱n inka ñuu veʼi̱.
33 ¿Á xa̱a̱ chíse̱ʼíi̱ ña̱ va̱ása va̱ʼa kéʼíi̱ nda̱a̱ táki̱ʼva kéʼé inka na̱ ta̱a?
¿Á xa̱a̱ chíse̱ʼíi̱ ku̱a̱chii̱ nu̱ú inkana?
34 ¿Á xa̱a̱ yíʼvii̱ xínii̱ ku̱a̱ʼánína?
¿Á xa̱a̱ yíʼvii̱ ña̱ sakúkaʼan inka familia nu̱úi̱?
¿Á xa̱ʼa̱ ña̱ yíʼvii̱ va̱ása káʼi̱n ta va̱ása kítai̱ ini veʼi̱?
35 Á va̱ʼaví ná kuniso̱ʼo iinna yi̱ʼi̱.
Chinaʼíi̱* ña̱ ndiʼi ña̱ káʼi̱n ña̱ nda̱a̱ kúúña.
Ná ndakuiin Ndióxi̱ ta̱ kúúmií ndiʼi ndee̱ yuʼíi̱.
Va̱ʼaní kúúña tá na̱ chíkaa̱ ku̱a̱chi yi̱ʼi̱ ná kaʼyina nu̱ú iin tutu ndáa ku̱a̱chi kúú ña̱ chíkaa̱na yi̱ʼi̱.
36 Saá kivi kunúuña so̱ko̱i̱ kakai̱
ta nda̱a̱ táki̱ʼva koo iin corona saá kooña kunúuña xi̱níi̱.
37 Ndataxii̱ kuenta ndaʼa̱ Ndióxi̱ xa̱ʼa̱ iin tá iin ña̱ kéʼíi̱;
va̱ása yi̱ʼvíi̱ kuyatii̱n nu̱úra.
38 Tá nda̱kiʼii̱n ñuʼú inkana ña̱ kooña kuentai̱ ta káʼa̱n ku̱a̱china xa̱ʼa̱ña xíʼi̱n,
ta na̱ kéʼé chi̱chi nu̱úña inkáchi xáku kóʼóna nu̱úi̱ xa̱ʼa̱ ña̱ kéʼíi̱ xíʼinna,
39 tá xa̱xíi̱ ku̱i̱ʼina ta va̱ása níchaʼvii̱ xa̱ʼa̱rí
á tá sa̱ndíʼi̱-ini na̱ xíʼin kuentarí,
40 ná kuaʼnu tú iñú nu̱ú ñuʼíi̱ nu̱úka ña̱ kuaʼnu trigo nu̱úña,
ná kuaʼnu yu̱ku̱ ña̱ kininí xáʼa̱n nu̱úka ña̱ kuaʼnu cebada nu̱úña”.
Yóʼo ndi̱ʼi ña̱ ni̱ka̱ʼa̱n ta̱ Job.