Job
32 Ña̱kán, xa̱ʼa̱ ña̱ xi̱kandíxaní ta̱ Job ña̱ nina ña̱ nda̱kú kúú ña̱ kéʼéra, u̱ni̱ saá na̱ ta̱a yóʼo va̱ása níndakuiinkana yuʼúra. 2 Soo ni̱sa̱a̱ní ta̱ Elihú se̱ʼe ta̱ Barakel ta̱ buzita, ta̱ ke̱e ti̱xin na̱ veʼe ta̱ Ram. Ni̱sa̱a̱níra xíʼin ta̱ Job, saáchi xi̱kuni̱níra na̱ʼa̱ra ña̱ nda̱kúka íyo ña̱ kéʼé miíra nu̱úka ña̱ kéʼé Ndióxi̱. 3 Saátu ni̱sa̱a̱níra xíʼin u̱ni̱ saá na̱ xi̱kitáʼan xíʼin ta̱ Job, saáchi xa̱ʼa̱ ña̱ kǒo níndani̱ʼína ndáaña va̱ʼa ka̱ʼa̱nna xíʼinra, ni̱ka̱ʼa̱nna ña̱ ta̱ ndi̱va̱ʼa-ini kúú Ndióxi̱. 4 Ta̱ Elihú xi̱ndatura ña̱ va̱ʼa ndakuiinra yuʼú ta̱ Job saáchi na̱ chéeka xi̱kuu na̱yóʼo nu̱úra. 5 Tá xi̱ni ta̱ Elihú ña̱ kǒoka ña̱ níkivika ka̱ʼa̱n u̱ni̱ saá na̱ ta̱a yóʼo, ni̱sa̱a̱níra. 6 Tasaá ta̱ Elihú se̱ʼe ta̱ Barakel ta̱ buzita ki̱xáʼara káʼa̱nra ta ka̱chira:
“Ta̱ loʼova kúú yi̱ʼi̱ ta xa̱a̱ na̱ chéeva kúú ndóʼó.
Ña̱kán va̱ása níka̱ʼi̱n nda̱a̱ ni iin ña̱ʼa xa̱ʼa̱ ña̱ íxato̱ʼíi̱ ndóʼó,
ta va̱ása níka̱ʼi̱n xíʼinndó xa̱ʼa̱ ña̱ xíni̱i̱.
7 Nda̱kanixi̱níi̱ ña̱yóʼo: ‘Ná ka̱ʼa̱n na̱ xa̱a̱ chée, na̱ xa̱a̱ ku̱a̱ʼání ku̱i̱ya̱ táku,
ná ka̱ʼa̱nna nda̱a̱ táki̱ʼva káʼa̱n na̱ ndíchi’.
8 Soo espíritu santo ña̱ táxi Ndióxi̱ ndaʼa̱ na̱ yiví,
ta ndee̱ Ndióxi̱ ta̱ kúúmií ndiʼi ndee̱ kúú ña̱ táxi ña̱ ndíchi ndaʼa̱na.
9 Su̱ví xa̱ʼa̱ ña̱ ku̱a̱ʼání ku̱i̱ya̱ táku iin na̱ yiví kúú ña̱ ndíchina,
ta su̱ví xa̱ʼa̱ ña̱ xa̱a̱ chée iin na̱ yiví kúú ña̱ kúnda̱a̱-inina ndáaña kúú ña̱ va̱ʼa.
10 Ña̱kán káʼi̱n ña̱yóʼo: ‘Kuniso̱ʼo ña̱ káʼi̱n,
chi ka̱ʼa̱ntu yi̱ʼi̱ xíʼún xa̱ʼa̱ ña̱ xíni̱i̱’.
11 Kuniso̱ʼondó, kǒo ña̱ níka̱ʼi̱n tá ni̱ka̱ʼa̱nndó;
xi̱niso̱ʼi̱ xa̱ʼa̱ ndiʼi ña̱ ndákanixi̱níndó tá xi̱nandukúndó ndáaña ka̱ʼa̱nndó.
12 Viíní xi̱niso̱ʼi̱ ña̱ ni̱ka̱ʼa̱nndó
soo nda̱a̱ ni iinndó va̱ása níkuchiñundó na̱ʼa̱ndó ña̱ va̱ása va̱ʼa íyo ña̱ ni̱ka̱ʼa̱n ta̱ Job,
ni va̱ása níkuchiñundó vií ndakuiinndó yuʼúra.
13 Ña̱kán va̱ása ka̱ʼa̱nndó ña̱yóʼo: ‘Na̱ ndíchiva kúúndi̱;
chi Ndióxi̱ kúú ta̱ náʼa̱ ña̱ va̱ása va̱ʼa íyo ña̱ káʼa̱nra, su̱ví iin na̱ yiví’.
14 Su̱ví contra yi̱ʼi̱ níka̱ʼa̱n ta̱ Job,
ña̱kán va̱ása ndakuii̱n yuʼúra nda̱a̱ táki̱ʼva ni̱ka̱ʼa̱n ndóʼó.
15 Iin nda̱kanda̱-ini* na̱ ta̱a yóʼo, kǒoka ña̱ ndakuiinna;
ni kǒoka ña̱ kivi ka̱ʼa̱nna.
16 Xi̱ndatui̱ ná ka̱ʼa̱nkana soo ni kǒo níka̱ʼa̱nna;
na̱ ndíta kuitíva kúúna ta ni kǒo ña̱ káʼa̱nna.
17 Ña̱kán ndakuiintu yi̱ʼi̱va,
ka̱ʼa̱ntu yi̱ʼi̱va xa̱ʼa̱ ña̱ kúnda̱a̱-inii̱ xa̱ʼa̱,
18 saáchi íyoní ña̱ ka̱ʼi̱n;
espíritu santo Ndióxi̱ chíndaʼáña yi̱ʼi̱ ña̱ ka̱ʼi̱n.
19 Kúni̱níi̱ ka̱ʼi̱n chi tá ná va̱ása ka̱ʼi̱n,
kundoʼi̱ nda̱a̱ táki̱ʼva ndóʼo ñii̱* nu̱ú ñúʼu vino xa̱á ña̱ xa̱a̱ ku̱nu̱mí nda̱tá.
20 Taxindó ná ka̱ʼi̱n ña̱ va̱ʼa ndi̱ko-inii̱.
Kixáʼíi̱ ka̱ʼi̱n ña̱ va̱ʼa ndakuii̱n.
21 Inkáchi keʼíi̱ xíʼin ndiʼina,
ni va̱ása ka̱ʼa̱n va̱ʼi̱ xa̱ʼa̱ nda̱a̱ ni iinna ña̱ va̱ʼa taxina ña̱ʼa ndaʼíi̱,
22 saáchi ni va̱ása xínii̱ ka̱ʼa̱n va̱ʼi̱ xa̱ʼa̱ inkana ña̱ va̱ʼa taxina ña̱ʼa ndaʼíi̱;
chi tá saá ná keʼíi̱, ta̱ i̱xava̱ʼa yi̱ʼi̱, kama sandíʼi-xa̱ʼa̱ra yi̱ʼi̱.