Job
33 ”Ixaún ña̱ ma̱ní Job, kuniso̱ʼo ña̱ ka̱ʼi̱n xíʼún vitin;
kuniso̱ʼo ndiʼi ña̱ ka̱ʼi̱n xíʼún.
2 Ixaún ña̱ ma̱ní, viíní kuniso̱ʼún.
Chi xíniñúʼu ka̱ʼi̱n vitin.
3 Ña̱ ka̱ʼi̱n náʼa̱ña ña̱ nina ña̱ va̱ʼa ndíkaa̱ níma̱i̱
ta va̱ása ka̱ʼi̱n ña̱ vatá* tá ná ka̱ʼi̱n xa̱ʼa̱ ña̱ xíni̱i̱.
4 Ndióxi̱ i̱xava̱ʼara yi̱ʼi̱ xíʼin ndee̱ra.
Ndióxi̱ ta̱ kúúmií ndiʼi ndee̱ kúú ta̱ ta̱xi ndee̱ ndaʼíi̱ ña̱ kutakui̱.
5 Ndakuiin yuʼíi̱ tá íyo iin ña̱ ka̱ʼún, ndakiʼin tu̱ʼún;
xa̱a̱ koo tu̱ʼvaún ña̱ keʼún ña̱yóʼo.
6 Inkáchiva íyoyó nu̱ú Ndióxi̱ ta̱ nda̱a̱;
ta̱ ku̱vaʼa xíʼin ñuʼú kúútu yi̱ʼi̱va.
7 Ña̱kán va̱ása xíniñúʼu yi̱ʼvíún kuniún yi̱ʼi̱,
ni va̱ása ndakava-iniún xíʼin tu̱ʼun ña̱ ka̱ʼi̱n chi va̱ása saxóʼvi̱ña* yóʼó.
8 Soo xi̱niso̱ʼi̱ ña̱ ni̱ka̱ʼún,
ku̱a̱ʼání yichi̱ xi̱niso̱ʼi̱ ni̱ka̱ʼún ña̱yóʼo:
9 ‘Kǒo níkeʼíi̱ ña̱ yaku̱a̱, kǒo ku̱a̱chi kúúmiíi̱;
ña̱ ndiiva* kúú ña̱ kéʼíi̱, kǒoví ña̱ va̱ása va̱ʼa níkeʼíi̱.
10 Soo Ndióxi̱ ndáni̱ʼíra ku̱a̱chii̱ ña̱ va̱ʼa koora contrai̱,
nda̱a̱ táki̱ʼva íyo ta̱ sáa̱-ini xíni yi̱ʼi̱ saá íyora.
11 Táxira castigo ndaʼíi̱;*
xítova̱ʼara ndiʼi ña̱ kéʼíi̱’.
12 Soo su̱ví ña̱ nda̱a̱ kúú ña̱ káʼún Job;
ña̱kán kúú ña̱ káʼi̱n ña̱yóʼo xíʼún:
ndíchiníka Ndióxi̱ nu̱ú na̱ yiví.
13 ¿Nda̱chun kánitáʼún xíʼinra?
¿Á xa̱ʼa̱ ña̱ va̱ása níndakuiinra ndiʼi ña̱ ni̱ka̱ʼún kúúña?
14 Ku̱a̱ʼáva yichi̱ káʼa̱n Ndióxi̱,
soo nda̱a̱ ni iinna kǒo xíniso̱ʼona ña̱ káʼa̱nra.
15 Kéʼéra ña̱yóʼo ti̱xin iin xa̱ni,
kéʼéra ña̱yóʼo ti̱xin iin visión tá ñuú tá kísi̱ naa na̱ yiví,
tá kánduʼúna* nu̱ú xi̱tona.
16 Tasaá táxira ná kuniso̱ʼona ta sánáʼa̱rana,
17 ña̱ va̱ʼa sakúxíkára na̱ yiví nu̱ú ña̱ va̱ása va̱ʼa
ta chindeétáʼanra xíʼinna ña̱ va̱ása ni̱nu kunina.
18 Ndióxi̱ sáka̱kurana ña̱ va̱ása kuvina,
sáka̱kurana ña̱ va̱ása kuvina xíʼin espada.
19 Íyo ña̱ kivi sakúaʼa na̱ yiví tá xóʼvi̱na kánduʼúna nu̱ú xi̱tona
tá ndiʼi tiempo kúʼvi̱ lekena,
20 kíxáʼana kúkini-inina xínina ña̱ xíxina
ta nda̱a̱ kúndasína kuxuna ña̱ʼa ña̱ va̱ʼa.
21 Kúkuéʼé ndiʼina ta ndátu̱vi lekena.
22 Xa̱a̱ ku̱nu̱mí kuvina;
kúyatinna nu̱ú na̱ xáʼní.
23 Soo tá ti̱xin mil na̱ ángel ka̱na iinra ta va̱xira nu̱úna ña̱ ndakiʼinra tu̱ʼunna,
ta káʼa̱nra xíʼinna ndáaña kúú ña̱ va̱ʼa,
24 tasaá kúndáʼvi-ini Ndióxi̱ xínirana ta káchira:
‘Sakǎkuna ta va̱ása taxiún kuvina.
Nda̱ni̱ʼíi̱ ndáaña chaʼvii̱ ña̱ va̱ʼa sakǎkui̱na.
25 Ná nduyúta̱ka* ku̱ñuna nda̱a̱ táki̱ʼva ni̱xi̱yoña tá válína;
ná kuumií tukuna ndee̱na nda̱a̱ táki̱ʼva ni̱xi̱yona tá válína’.
26 Kuakundáʼvina nu̱ú Ndióxi̱ ta ndakiʼinvarana;
nda̱ʼyi̱ kóʼóna* xa̱ʼa̱ ña̱ kúsi̱í-inina tá ná kunina Ndióxi̱,
ta tuku ka̱ʼa̱n Ndióxi̱ xa̱ʼa̱na ña̱ nda̱kú íyo ña̱ kéʼéna.
27 Na̱yóʼo ka̱ʼa̱nna xíʼin inkana:
‘Ni̱ki̱ʼvii̱ ku̱a̱chi ta va̱ása níkeʼíi̱ ña̱ nda̱kú,
soo va̱ása níndakiʼii̱n castigo xa̱ʼa̱ ña̱yóʼo.
28 Sa̱kǎkura yi̱ʼi̱ ña̱ va̱ása kuvii̱,
ta kutakukavai̱’.
29 Ku̱a̱ʼání yichi̱ kéʼé Ndióxi̱ ña̱yóʼo xa̱ʼa̱ na̱ yiví,
30 tasaá va̱ása kuvina
ta kivi kusi̱í-inina kutakuna.
31 Viíní kuniso̱ʼún Job. Kuniso̱ʼo ña̱ ka̱ʼi̱n.
Va̱ása ka̱ʼún, ña̱ va̱ʼa ka̱ʼa̱nkai̱.
32 Tá íyo iin ña̱ kúni̱ún ka̱ʼún, ndakuiin yuʼíi̱.
Ka̱ʼa̱n saáchi kúni̱i̱ na̱ʼi̱ ña̱ káʼún ña̱ nda̱a̱.
33 Soo tá kǒo ña̱ ka̱ʼún, kuniso̱ʼo ña̱ ka̱ʼi̱n;
va̱ása ka̱ʼún, ta sanáʼi̱ yóʼó xa̱ʼa̱ ña̱ ndíchi”.