Job
34 Tasaá ni̱ka̱ʼa̱nka ta̱ Elihú ta ka̱chira:
2 “Ndóʼó na̱ ndíchi, kuniso̱ʼondó ña̱ ka̱ʼi̱n;
ndóʼó na̱ xíni̱ní, kuniso̱ʼondó.
3 Saáchi nda̱a̱ táki̱ʼva xíniñúʼuyó yáa̱yó* ña̱ va̱ʼa kotondosóyó ña̱ xíxiyó,
saá ndóʼoyó tá xíniso̱ʼoyó ña̱ káʼa̱n na̱ yiví, chi kivi kunda̱a̱-iniyó á ña̱ va̱ʼa kúúña á ña̱ va̱ása va̱ʼa kúúña.
4 Ná ka̱ʼa̱n miíyó ndáaña kúú ña̱ nda̱kú;
ná ndaka̱xin miíyó ndáaña kúú ña̱ va̱ʼa.
5 Saáchi ta̱ Job ni̱ka̱ʼa̱nra ña̱yóʼo: ‘Ña̱ nda̱a̱ kúú ña̱ káʼi̱n,
soo Ndióxi̱ kúú ta̱ va̱ása xíín nda̱kú ndatiin ku̱a̱chi xíʼi̱n.
6 ¿Á xíniñúʼu ka̱ʼi̱n ña̱ vatá* ta ka̱ʼi̱n ña̱ va̱ása xíniñúʼu nda̱kú ndatiinna ku̱a̱chi xíʼi̱n?
Kǒoví ña̱ va̱ása va̱ʼa níkeʼíi̱ soo ndeéní xóʼvi̱i̱’.*
7 ¿Á íyo inka ta̱a ta̱ íyo nda̱a̱ táki̱ʼva íyo ta̱ Job,
chi ta̱yóʼo va̱ʼaní kúnira tá kúsi̱kindaanara nda̱a̱ táki̱ʼva va̱ʼaní kúnira tá xíʼira ti̱kui̱í?
8 Kítáʼanra xíʼin na̱ kéʼé ña̱ va̱ása va̱ʼa
ta kítáʼanra xíʼin na̱ ndi̱va̱ʼa-ini.
9 Saáchi ni̱ka̱ʼa̱nra ña̱yóʼo: ‘Kǒoví ña̱ va̱ʼa ndákiʼin na̱ yiví
na̱ kúni̱ sakúsi̱í-ini Ndióxi̱’.
10 Ña̱kán, kuniso̱ʼo ndóʼó na̱ ta̱a na̱ va̱ʼaní ndákanixi̱ní:
ni loʼo va̱ása xíniñúʼu ndakanixi̱níyó ña̱ kéʼé Ndióxi̱ ta̱ nda̱a̱ ña̱ va̱ása va̱ʼa,
va̱ása xíniñúʼu ndakanixi̱níyó ña̱ kéʼé Ndióxi̱ ta̱ kúúmií ndiʼi ndee̱ ña̱ va̱ása nda̱kú.
11 Saáchi nda̱a̱ táki̱ʼva íyo ña̱ kéʼé iin tá iin na̱ yiví, saá koo ña̱ taxira ndaʼa̱na,
ta xa̱ʼa̱ ña̱ kéʼéna ña̱ va̱ása va̱ʼa, ndakiʼinna ña̱ xíniñúʼu ndakiʼinna.
12 Kúnda̱a̱ káxi iniyó ña̱ kǒo kéʼé Ndióxi̱ ña̱ va̱ása va̱ʼa;
ta ndiʼi tiempo kéʼé Ndióxi̱ ta̱ kúúmií ndiʼi ndee̱ ña̱ nda̱kú.
13 ¿Ndáana ni̱ka̱ʼa̱n xíʼinra ña̱ kuisochíñura xíʼin ñuʼú,
ta ndáana ni̱ka̱ʼa̱n xíʼinra ña̱ kundaara na̱ ndóo nu̱ú iníísaá nu̱ú ñuʼú?
14 Tá ná kotora ña̱ kéʼé na̱ yiví,
ta ná ndakiʼinra ña̱ tákuna ta saátu ndee̱na,
15 inkáchi kuvi ndiʼi na̱ yiví,
ta ndiʼina ndikóna nduuna yáká.*
16 Ña̱kán tá kúnda̱a̱-iniún, viíní kuniso̱ʼún ña̱yóʼo,
viíní kuniso̱ʼún ña̱ ka̱ʼi̱n xíʼún.
17 ¿Á kivi kaʼndachíñu iin na̱ kǒo kútóo keʼé ña̱ nda̱kú?
¿Á chika̱ún ku̱a̱chi iin na̱ xáʼndachíñu na̱ kéʼé ña̱ nda̱kú?
18 ¿Á ka̱ʼún xíʼin iin ta̱ xáʼndachíñu ‘Ni kǒo kúchiñún keʼún nda̱a̱ ni iin ña̱ʼa’?
¿Á ka̱ʼún xíʼin iin ta̱ kúúmií chiñu ña̱ ndáyáʼvi ‘Ndi̱va̱ʼaní-iniún’?
19 Nu̱ú Ndióxi̱ inkáchi íyo na̱ nda̱ʼví xíʼin na̱ ku̱i̱ká saátu na̱ kúúmií chiñu ña̱ ndáyáʼvi, saáchi miíra i̱xava̱ʼa ndiʼina.
20 Iin sana kivi kuvina savañuú;*
ndeéní kísina ta xíʼi̱na;
nda̱a̱ na̱ kúúmiíní ndee̱, ndíʼi-xa̱ʼa̱vana
soo su̱ví na̱ yiví sándiʼi-xa̱ʼa̱ na̱yóʼo.
21 Saáchi Ndióxi̱ xítora ña̱ kéʼé na̱ yiví,
ndiʼi ña̱ kéʼéna, xítoraña.
22 Kǒo iin nu̱ú naaní nu̱ú kivi koose̱ʼé* na̱ kéʼé ña̱ va̱ása va̱ʼa.
23 Saáchi Ndióxi̱ va̱ása níchindúʼúra iin ki̱vi̱ nu̱ú iin na̱ yiví
ña̱ va̱ʼa ku̱ʼu̱nna nu̱úra ña̱ ndatiinra ku̱a̱chi xíʼinna.
24 Sándiʼi-xa̱ʼa̱ra na̱ ndakúní ta va̱ása xíniñúʼu nandukúra xa̱ʼa̱ ña̱ ke̱ʼéna,
ta táxira chiñu ña̱ xi̱kuumií na̱yóʼo ndaʼa̱ inkana.
25 Saáchi ta̱yóʼo xíni̱vara ndáaña kéʼéna;
tá ñuú kúchiñura xíʼinna ta ndíʼi-xa̱ʼa̱na.
26 Xa̱ʼa̱ ña̱ ndi̱va̱ʼa-inina, kánirana nu̱ú ndiʼina,
27 saáchi va̱ása ndíku̱nkanara
ta va̱ása ndíku̱nna nda̱a̱ ni iin leyra.
28 Ku̱a̱chi na̱yóʼo, kána kóʼó* na̱ nda̱ʼví ña̱ chindeétáʼanna xíʼinna,
ña̱kán xíniso̱ʼora tá xáku na̱ kǒo na̱ ndakiʼin tu̱ʼun.
29 Tá va̱ása káʼa̱nka Ndióxi̱, ¿ndáana kivi ka̱ʼa̱n xíʼinra xa̱ʼa̱ ña̱yóʼo?
Tá chíse̱ʼéra nu̱úra, ¿ndáana kivi koto nu̱úra?
Ni ná chise̱ʼéra nu̱úra nu̱ú iin ñuu á nu̱ú iin ta̱a kuití, ña̱yóʼo kúú ña̱ kúu:
30 iin na̱ ndi̱va̱ʼa-ini va̱ása kívi kaʼndachíñuna,
ni va̱ása kívi ixandi̱va̱ʼana xíʼin na̱ ñuu ta sandíʼi-xa̱ʼa̱nana.
31 ¿Á kivi ka̱ʼa̱n iinna ña̱yóʼo xíʼin Ndióxi̱?:
‘Ta̱xina castigo ndaʼíi̱ ni kǒo ña̱ va̱ása va̱ʼa níkeʼíi̱;
32 na̱ʼa̱ nu̱úi̱ ña̱ va̱ása xíni̱i̱;
tá ke̱ʼíi̱ iin ña̱ va̱ása va̱ʼa, va̱ása keʼékai̱ña’.
33 ¿Á xíniñúʼu taxira ña̱ va̱ʼa ndaʼún nda̱a̱ táki̱ʼva kúni̱ miíún ni kǒo kútóún ki̱ʼva ña̱ ndátiinra ku̱a̱chi?
Miíún kúú ta̱ ndaka̱xin ndáaña keʼún, su̱ví yi̱ʼi̱;
ña̱kán, natúʼun xíʼi̱n xa̱ʼa̱ ña̱ xíni̱ún.
34 Na̱ ta̱a na̱ kúnda̱a̱ va̱ʼa ini ta saátu na̱ ndíchi, ka̱ʼa̱nna ña̱yóʼo xíʼi̱n:
35 ‘Kǒo xíni̱ ta̱ Job ndáaña káʼa̱nra,
ta xíʼin ña̱ káʼa̱nra, náʼa̱ra ña̱ va̱ása kúúmiíra ña̱ ndíchi’.
36 Ná ya̱ʼa ta̱ Job nu̱ú tu̱ndóʼo ña̱ ndeéní,
saáchi nda̱a̱ táki̱ʼva káʼa̱n na̱ ndi̱va̱ʼa-ini saá káʼa̱nra.
37 Kíʼvira ku̱a̱chi ta saátu íxaso̱ʼora.
Kúndasíra xínira ndi̱ʼi̱ ta kánindaʼa̱ra,
káʼa̱nra ku̱a̱ʼání ña̱ va̱ása va̱ʼa xa̱ʼa̱ Ndióxi̱ ta̱ nda̱a̱”.