Job
35 Ta̱ Elihú ni̱ka̱ʼa̱nkara ña̱yóʼo:
2 “¿Á ni loʼo kǒo xíka-iniún ña̱ va̱ása va̱ʼa íyo ña̱ ndákanixi̱níún ta káʼún ña̱yóʼo
‘Nda̱kúka íyo ña̱ kéʼé yi̱ʼi̱ nu̱úka ña̱ kéʼé Ndióxi̱’?
3 Saáchi káchiún: ‘¿Ndáaña ndóʼún* tá kéʼíi̱ ña̱ va̱ʼa?
¿Á íyo iin ña̱ va̱ʼa ndákiʼii̱n xa̱ʼa̱ ña̱ va̱ása níki̱ʼvii̱ ku̱a̱chi?’.
4 Yi̱ʼi̱ ndakuiin yuʼún ta saátu ndakuii̱n yuʼú na̱ kítáʼan xíʼún.
5 Ndaniʼi nu̱ún ta koto chí ndiví,
koto vi̱kó ña̱ súkunní níndoso.
6 Tá ná ki̱ʼviún ku̱a̱chi, ¿ndáaña va̱ása va̱ʼa kéʼún xíʼinra?
Tá ku̱a̱ʼání ná nduu ku̱a̱chiún, ¿ndáaña ndóʼora xíʼin ña̱yóʼo?
7 Tá kéʼún ña̱ nda̱kú, ¿á xíʼin Ndióxi̱ kúú ña̱ kéʼún ña̱ va̱ʼa?
¿Á xa̱a̱ káʼa̱n Ndióxi̱ xíʼún ña̱ chindeétáʼún xíʼinra?
8 Tá kéʼún ña̱ va̱ása va̱ʼa, miívaún kúú ta̱ xóʼvi̱* ta saátu inka na̱ yiví,
ta tá kéʼún ña̱ nda̱kú, na̱ yivíva kúú na̱ ndákiʼin ña̱ va̱ʼa.
9 Na̱ yiví kána kóʼóna* ña̱ chindeétáʼanna xíʼinna tá sáxo̱ʼvi̱nana;
xákundáʼvina ña̱ ná ndatavánana ndaʼa̱ na̱ ndakúní na̱ íxandi̱va̱ʼa xíʼinna.
10 Soo nda̱a̱ ni iinna va̱ása káʼa̱nna ña̱yóʼo: ‘¿Ndáa míí íyo Ndióxi̱ ta̱ káʼnuní ta̱ i̱xava̱ʼa yi̱ʼi̱,
ta̱ táxi ña̱ kata na̱ yiví yaa ña̱ ndasakáʼnunara tá ñuú?’.
11 Sánáʼa̱ra miíyó ña̱ va̱ʼa ndíchika kooyó nu̱ú kití tí íyo nu̱ú ñuʼú
ta saátu ña̱ va̱ʼa ndíchika kooyó nu̱ú tí saa tí ndáchí chí ndiví.
12 Na̱ yiví kána kóʼónara ña̱ chindeétáʼanra xíʼinna
soo kǒo ndákuiinra yuʼúna xa̱ʼa̱ ña̱ ni̱nuní kúnina ta ndi̱va̱ʼaní-inina.
13 Ndióxi̱ va̱ása xíniso̱ʼora tá kána kóʼó na̱ káʼa̱n ña̱ vatá* xíʼinra,
Ndióxi̱ ta̱ kúúmií ndiʼi ndee̱ va̱ása xíniso̱ʼora tá káʼa̱n na̱yóʼo.
14 Kachikaví tá káʼún ña̱ va̱ása xíínra kuniso̱ʼora yóʼó.
Ña̱kán xíniñúʼu kundatún ña̱ ndatiinra ku̱a̱chi xíʼún.
15 Saáchi ta̱yóʼo va̱ása nísa̱a̱ra xíʼún ta va̱ása nítaxira castigo ndaʼún,
ta saátu tá ku̱taaní-iniún va̱ása níkiʼinra kuenta xíʼin ña̱yóʼo.
16 Va̱ása ndáyáʼvi ña̱ káʼún Job;
ku̱a̱ʼáníva ña̱ káʼún soo va̱ása kúnda̱a̱-iniún xíʼin ña̱yóʼo”.