Job
37 ”Xa̱ʼa̱ ña̱yóʼo ndeéní kánda̱ níma̱i̱,
iin kánditani̱nuña ndíkaa̱ña kándíkai̱.
2 Viíní kuniso̱ʼondó ña̱ káʼa̱n Ndióxi̱ chi íyoní ndee̱ tu̱ʼunra,
kuniso̱ʼondóra chi nda̱a̱ táki̱ʼva níʼi tá ndáʼyi̱ sa̱vi̱ saá níʼi tá káʼa̱nra.
3 Nda̱a̱ chí ndiví chíndaʼára taxa,
iníísaá nu̱ú ñuʼú ndáye̱ʼe̱ tá chíndaʼára taxa.
4 Tándi̱ʼi, ndeéní níʼi;
nda̱a̱ táki̱ʼva níʼi taxa saá níʼi tá káʼa̱n Ndióxi̱,
iin ndáye̱ʼe̱ káni taxa tá káʼa̱nra.
5 Ndeéní níʼi tá káʼa̱n Ndióxi̱ ta ndákanda̱ní-iniyó* xíʼinña;
kéʼéra ña̱ʼa ña̱ ndáyáʼviní, ña̱ va̱ása kúnda̱a̱-iniyó xíʼin.
6 Xáʼndara chiñu nu̱ú nieve ña̱ ná ko̱yoña nu̱ú ñuʼú,
ta xáʼndara chiñu nu̱ú sa̱vi̱ ña̱ ndeé ná kuunrá.
7 Va̱ása táxi Ndióxi̱ sandíʼi na̱ yiví ña̱ kéʼéna
ña̱ va̱ʼa ná kunda̱a̱-ini ndiʼina xa̱ʼa̱ ña̱ kéʼéra.
8 Kití yukú ndíʼvirí-ini kavá
ta ñúʼurí ini ya̱vi̱rí.
9 Va̱xi ta̱chí ta kániña
ta xíʼin ta̱chí ña̱ vi̱xin, va̱xi kaxin.
10 Ta̱chí vi̱xin ña̱ sákani Ndióxi̱ ndásatéʼeña ti̱kui̱í ta ndúurá hielo.
11 Táanra ti̱kui̱í ini vi̱kó,
iin ndáye̱ʼe̱ taxa tá táváraña ma̱ʼñú vi̱kó.
12 Káva̱ña chí nu̱ú kúni̱ra ná ku̱ʼu̱nña,
kéʼéña ndiʼi chiñu ña̱ xáʼndara nu̱úña sa̱tá iníísaá ñuʼú.
13 Xíniñúʼura vi̱kó ña̱ va̱ʼa taxira castigo,
ña̱ va̱ʼa sakúunra sa̱vi̱ nu̱ú ñuʼú
á ña̱ va̱ʼa na̱ʼa̱ra ña̱ ndixaní kúʼvi̱-inira* xínira na̱ yiví.
14 Kuniso̱ʼo ña̱yóʼo Job;
kundatu loʼún ta viíní ndakanixi̱níún xa̱ʼa̱ ndiʼi ña̱ ndáyáʼviní ke̱ʼé Ndióxi̱.
15 ¿Á kúnda̱a̱-iniún ndáa ki̱ʼva xáʼnda Ndióxi̱ chiñu nu̱ú vi̱kó?
¿Á kúnda̱a̱-iniún ndáa ki̱ʼva sándaye̱ʼe̱ra taxa ma̱ʼñú vi̱kó?
16 ¿Á xíni̱ún nda̱chun va̱ʼa níndoso mií vi̱kó?
Ndiʼi ña̱yóʼo kúú ña̱ʼa ña̱ ndáyáʼviní ña̱ ke̱ʼe ta̱ xíni̱ xa̱ʼa̱ ndiʼi ña̱ʼa.
17 ¿Nda̱chun ndúniʼní ti̱ko̱to̱ún tá íyo táxi̱n ñuʼú yóʼo xa̱ʼa̱ ña̱ káni ta̱chí ña̱ va̱xi chí sur?
18 Ta̱kán téʼéní* i̱xava̱ʼara ndiví, ¿á kuchiñún keʼún táʼan ña̱yóʼo?
19 Ka̱ʼa̱n xíʼinndi̱ ndáaña xíniñúʼu ka̱ʼa̱nndi̱ xíʼinra;
ndi̱ʼi̱ va̱ása kívi ndakuiinndi̱ saáchi va̱ása kúnda̱a̱-inindi̱ xa̱ʼa̱ nda̱a̱ ni iin ña̱ʼa.
20 ¿Á xíniñúʼu ka̱ʼi̱n xíʼin Ndióxi̱ ña̱ kúni̱i̱ ka̱ʼi̱n xíʼinra?
¿Á íyo iin na̱ ni̱ka̱ʼa̱n iin ña̱ ndáyáʼviní ña̱ xíniñúʼu kuniso̱ʼora xa̱ʼa̱?
21 Na̱ yiví ni loʼo va̱ása kívi kunina ñu̱ʼu* tá ndákasi vi̱kó nu̱úña, ni yéʼe̱níña kánuuña,
soo xítonaña tá káni ta̱chí ta ndákiʼinña vi̱kó ku̱a̱ʼa̱n xíʼinña.
22 Chí táʼví norte kíta iin ña̱ ndáye̱ʼe̱ nda̱a̱ táki̱ʼva yéʼe̱ oro;
káʼnuní Ndióxi̱ ta ndákanda̱ní-iniyó xíʼinra.
23 Ni loʼo va̱ása kívi kunda̱a̱-iniyó xa̱ʼa̱ ndiʼi ña̱ kéʼé Ndióxi̱ ta̱ kúúmiíní ndee̱;
íyoní ndee̱ra, nina ña̱ nda̱kú kúú ndiʼi ña̱ kéʼéra ta ña̱ va̱ʼa kúúña.
24 Ña̱kán xíniñúʼu ixato̱ʼó na̱ yiví miíra,
saáchi va̱ása kíndo̱o-inira xíʼin na̱ yiví na̱ ndákanixi̱ní ña̱ ndíchinína”.