Job
38 Tasaá nda̱kuiin Jehová yuʼú ta Job ma̱ʼñú iin ta̱chí ña̱ ndeéní káni:
2 “¿Nda̱chun násamaún ña̱ nda̱kaxii̱n keʼíi̱
ta káʼún xa̱ʼa̱ ña̱ va̱ása xíni̱ún xa̱ʼa̱?
3 Ixaún ña̱ ma̱ní, koo tu̱ʼvaún ta ndakú koo iniún.
Nda̱ka̱tu̱ʼíi̱n yóʼó ta xíniñúʼu ndakuiún yuʼíi̱.
4 ¿Ndáa míí ndíka̱ún tá chi̱ndúʼi̱ xa̱ʼa̱ ñuʼú?
Ndakuiin yuʼíi̱ tá ndixa kúnda̱a̱-iniún.
5 ¿Ndáana ni̱ka̱ʼa̱n ndáa ki̱ʼva káʼnu koo ñuʼú tá ndixa xíni̱ún?
¿Á ndáana sa̱ndákaa̱ yoʼo̱ sa̱táña ña̱ tavána ki̱ʼvaña?
6 ¿Ndáa míí kánuu xa̱ʼa̱ña?
¿Ndáana chi̱ndúʼú yu̱u̱ ña̱ nu̱ú va̱ʼa nu̱ú ka̱na xa̱ʼa̱ña
7 tá inkáchi ni̱nda̱ʼyi̱ ki̱mi tí kée tá xi̱ta̱a̱n* xa̱ʼa̱ ña̱ kúsi̱í-inirí
ta ndiʼi na̱ ángel* ki̱xáʼana ndáʼyi̱ kóʼóna* ta nda̱sakáʼnuna Ndióxi̱?
8 ¿Ndáana nda̱kasi tá mar?
¿Ndáana nda̱kasi nu̱úrá tá sa̱kán ki̱xáʼará íyorá?
9 ¿Ndáa míí ndíka̱ún tá nda̱chisúkúi̱* tá mar xíʼin vi̱kó ndáá,
10 tá xa̱kii̱n ki̱ʼva nu̱ú xa̱a̱rá ta nda̱kasii̱rá,
11 ta ni̱ka̱ʼi̱n xíʼinrá: ‘Nda̱a̱ yóʼo kuití kivi xa̱ún; va̱ása kivi ya̱ʼakaún chí káa;
nda̱a̱ yóʼo kuití xa̱a̱ nu̱ú yóʼó tá mar tá súkunní ndákundichi’?
12 ¿Á xa̱a̱ xáʼndaún chiñu nu̱ú ñu̱ʼu* ña̱ ná kitaña ña̱ va̱ʼa tu̱vi?
¿Á xa̱a̱ sánáʼún ñu̱ʼu ndáa míí kitaña?
13 ¿Á yóʼó kúú ta̱ xa̱ʼnda chiñu ña̱ ná ndaye̱ʼe̱ tá xi̱ta̱a̱n iníísaá nu̱ú ñuʼú
ta ná taváña na̱ ndi̱va̱ʼa-ini?
14 Tá ndáye̱ʼe̱, nása̱ma ki̱ʼva ña̱ náʼa̱ ñuʼú nda̱a̱ táki̱ʼva násama iin sello ki̱ʼva ña̱ náʼa̱ nda̱ʼyi̱ tá káninaña nu̱úña,
ta nda̱a̱ táki̱ʼva náʼa̱ ña̱ ndíxi ti̱ko̱to̱ ña̱ liviní color saá náʼa̱ña.
15 Soo va̱ása ndaye̱ʼe̱ka nu̱ú na̱ ndi̱va̱ʼa-ini
ta va̱ása saxóʼvi̱kana* na̱ yiví.
16 ¿Á xa̱a̱ ni̱xa̱ʼún nda̱a̱ nu̱ú kána tá mar?
¿Á xa̱a̱ xáʼún nda̱a̱ nu̱ú ñúʼu ti̱kui̱í tá kúnúní?
17 ¿Á xa̱a̱ ni̱na̱ʼa̱na ya̱vi̱ nu̱ú ñúʼu na̱ ni̱xi̱ʼi̱ nu̱ún?
¿Á xa̱a̱ xi̱niún nu̱ú naaní?
18 ¿Á xa̱a̱ kúnda̱a̱-iniún ndáa ki̱ʼva káʼnuní ñuʼú?
Ka̱ʼa̱n xíʼi̱n tá ndixa xíni̱ún xa̱ʼa̱ ndiʼi ña̱yóʼo.
19 ¿Ndáa míí sava kúú nu̱ú íyo ña̱ yéʼe̱?
¿Ta ndáa míí sava kúú nu̱ú íyo ña̱ naa?
20 ¿Á xíni̱ún ku̱ʼún xíʼinña nda̱a̱ veʼeña?
¿Á xíni̱ún yichi̱ ña̱ ku̱a̱ʼa̱n veʼeña?
21 ¿Á xíni̱ún xa̱ʼa̱ ña̱yóʼo chi xa̱a̱ ka̱kún tá i̱xava̱ʼi̱ ndiʼi ña̱ʼa yóʼo?
22 ¿Á xa̱a̱ kíʼviún nda̱a̱ nu̱ú táanva̱ʼi̱* nieve?,
¿á xa̱a̱ xíniún míí táanva̱ʼi̱ ñíí*
23 ña̱ kuniñúʼi̱ tá ná kixi tu̱ndóʼo,
tá ná kixaa̱ ki̱vi̱ ña̱ koo ku̱a̱chi?
24 ¿Ndáa míí va̱xi ña̱ yéʼe̱
ta ndáa míí kée ta̱chí niʼní* ña̱ káni sa̱tá ñuʼú?
25 ¿Ndáana kuchiñu kaan iin chi̱chi nu̱ú ku̱ʼu̱n ndiʼi ti̱kui̱í tá íyo chí ndiví?
¿Ndáana káʼa̱n xíʼin sa̱vi̱ ndáa mií nda̱ʼyi̱rá
26 ña̱ va̱ʼa kuunrá nu̱ú kǒo na̱ yiví ndóo,
nu̱ú ñuʼú yi̱chí nu̱ú kǒo nda̱a̱ ni iin na̱ yiví?
27 ¿Ndáana sa̱ndáxi* ñuʼú yi̱chí ña̱ ndi̱ʼi-xa̱ʼa̱
ta sa̱kúaʼnuna ku̱ʼu̱ nu̱úña?
28 ¿Á íyo yivá sa̱vi̱?
¿Ndáana kúú yivá yúyú?
29 ¿Ndáana i̱xava̱ʼa hielo?
¿Ndáana i̱xava̱ʼa nieve ña̱ kée chí ndiví
30 ña̱ sánduvi̱xin nu̱ú ti̱kui̱í ta ndútéʼérá* nda̱a̱ táki̱ʼva téʼé iin yu̱u̱
ta ti̱kui̱í tá kúnúní ñúʼu ndúurá hielo?
32 ¿Á kuchiñún taváún tiʼvi ki̱mi mií tiempo ña̱ xíniñúʼu kanarí?
¿Á kuchiñún kuniʼún yichi̱ nu̱ú tiʼvi ki̱mi tí naní Ash?*
33 ¿Á xíni̱ún ndáa ley kúú ña̱ xáʼndachíñu nu̱ú ña̱ʼa ña̱ íyo chí ndiví?*
¿Á kivi kuniñúʼún ley yóʼo ña̱ va̱ʼa kaʼndachíñuña nu̱ú ñuʼú?
34 ¿Á kivi kaʼndaún chiñu nu̱ú vi̱kó ña̱ ná sakúunña sa̱vi̱ sa̱táún?
35 ¿Á kuchiñún chindaʼún taxa?
¿Á kixiña nu̱ún ta ka̱ʼa̱nña xíʼún: ‘Xa̱a̱ yóʼo íyondi̱’?
36 ¿Ndáana ta̱xi ña̱ ndíchi ndaʼa̱ vi̱kó?*
¿Ndáana ta̱xi ña̱ ndíchi ndaʼa̱ ña̱ʼa ña̱ íyo chí ndiví?
37 ¿Á íyo na̱ ndíchiní na̱ kivi ndakaʼvi vi̱kó?
¿Ndáana kivi kata ti̱kui̱í tá íyo chí ndiví
38 tasaá yáká* nduuña nda̱ʼyi̱
ta ndakutáʼan ñuʼú ña̱ ku̱téʼé?
39 ¿Á kivi kaʼníún kití kaxí tí ndikaʼa?*
¿Á kivi taxiún ña̱ kaxí tí ndikaʼa yúta̱* nda̱a̱ ná xa̱a̱-inirí*
40 tá ndákandúʼúrí* ini ya̱vi̱rí
tá xíko̱o tu̱ʼvarí ini ya̱vi̱rí ña̱ tiinrí iin kití?
41 ¿Ndáana táxi ña̱ kaxí se̱ʼe tí saa ndáá*
tá xáku se̱ʼerí nu̱ú Ndióxi̱ xa̱ʼa̱ ña̱ kaxírí
ta iníí xíkarí ndúkurí ña̱ kaxírí?