Job
39 ”¿Á xíni̱ún ama káku se̱ʼe ti̱xúʼú* yukú?
¿Á xa̱a̱ xíniún káku se̱ʼe yusu síʼi?
2 ¿Á káʼvíún yo̱o̱ ña̱ ñúʼu se̱ʼerí?
¿Á xíni̱ún ama kaku se̱ʼerí?
3 Ndáku̱ndeerí* ña̱ va̱ʼa kaku se̱ʼerí
tasaá va̱ása xáʼndaka se̱ʼerí.
4 Xáʼnu se̱ʼerí chí yuku̱ ta ndúndakúrí;
tándi̱ʼi, ku̱a̱ʼa̱nrí ta va̱ása ndíkókarí.
5 ¿Ndáana ta̱xi ná kaka mií burro yukú?
¿Ndáana nda̱xín yoʼo̱ burro yukú?
6 Ta̱xii̱ ná kundoorí yoso̱ yi̱chí
ta ta̱xitui̱ ná kundoorí nu̱ú ñuʼú nu̱ú íyo ñi̱i̱.
7 Tí burro kúxíkárí ñuu nu̱ú ndóo ku̱a̱ʼání na̱ yiví,
kǒo na̱ ndáʼyi̱ nu̱úrí ña̱ ná kachíñurí.
8 Ndiʼi yuku̱ xíkarí ndúkúrí yita* kaxírí,
xíkarí ndúkúrí ndiʼi nu̱ú ku̱ʼu̱ kúii̱.
9 ¿Á kandíxa iin si̱ndi̱ki̱ yukú kachíñurí nu̱ún?
¿Á kandíxarí ku̱su̱nrí ini veʼe nu̱ú ñúʼu kití sa̱na̱ún?
10 ¿Á kuchiñún katún iin si̱ndi̱ki̱ yukú ña̱ va̱ʼa taʼvírí?
¿Á kundiku̱nrí ku̱ʼu̱nrí sa̱táún nda̱a̱ yoso̱ nu̱ú taʼvírí?
11 ¿Á kundaa-iniúnrí xa̱ʼa̱ ña̱ ndakúnírí?
¿Á taxiún ña̱ keʼérí chiñu ve̱e?
12 ¿Á kundaa-iniúnrí ña̱ kuisorí ña̱ chi̱ʼún?
¿Á ndakayarí ña̱ chi̱ʼún nu̱ú ndátivina trigo?
13 Tí avestruz síʼi kúsi̱íkaví-inirí kísirí ndi̱xi̱nrí,
¿soo á kivi chitáʼanyó ndi̱xi̱nrí xíʼin ndi̱xi̱n tí cigüeña?
14 Tíyóʼo xákinrí ndi̱vi̱ nu̱ú ñuʼú,
táanríña ti̱xin yu̱ti ña̱ va̱ʼa niʼní ná kooña.
15 Ta va̱ása ndíʼi̱-inirí ña̱ ku̱a̱ñi̱* na̱ yiví ña̱yóʼo ta ta̱ʼvíña,
á ña̱ ku̱a̱ñi̱ iin kití yukú ña̱yóʼo.
16 Ndi̱va̱ʼaní kéʼérí xíʼin se̱ʼerí,
ni va̱ása ndákunirírí ña̱ kúúrí se̱ʼerí;
va̱ása ndíʼi̱-inirí xa̱ʼa̱ se̱ʼerí.
17 Saáchi va̱ása nítaxi Ndióxi̱ ña̱ ndíchi koorí,
ni va̱ása nítaxira ña̱ kunda̱a̱-inirí.
18 Soo tá ndákundichirí ta kísirí ndi̱xi̱nrí,
xáku̱ndaarí tí kuáyi̱ ta saátu ta̱ yósórí.*
19 ¿Á yóʼó kúú ta̱ táxi ndee̱ ndaʼa̱ tí kuáyi̱?
¿Á kuchiñún sakúaʼnún ixí si̱kírí ña̱ liviní kánda̱?*
20 ¿Á kuchiñún sandávaúnrí nda̱a̱ táki̱ʼva ndáva ti̱ka?
Nda̱a̱ yíʼvi na̱ yiví tá ndeéní tívirí si̱ti̱nrí.
21 Kéexa̱ʼa̱rí chí yoso̱, kúsi̱íkaví-inirí ta ndakúkavírí;
xínurí ku̱a̱ʼa̱nrí nu̱ú ku̱a̱chi.
22 Va̱ása yíʼvirí xínirí nda̱a̱ ni iin ña̱ʼa
ta nda̱a̱ táki̱ʼva íyo tí kúsi̱kindaa ña̱ i̱yo saá íyorí.
Va̱ása xínurí nu̱ú na̱ níʼi espada.
23 Su̱kún tí kuáyi̱ tíkaa ña̱ʼa nu̱ú ñúʼu flecha ta̱ yósórí*
ta káxanña tá xínurí ku̱a̱ʼa̱nrí,
ndáye̱ʼe̱ yuʼú lanza xíʼin jabalina tú níʼira.
24 Nda̱a̱ kísirí xa̱ʼa̱ ña̱ kúni̱nírí ku̱ʼu̱nrí, ta xínurí ku̱a̱ʼa̱nrí,
va̱ása kívi koo táxi̱nrí tá xíniso̱ʼorí tívina ndiki̱.
25 Tá tívina ndiki̱, ndáʼyi̱rí.
Nda̱a̱ xíká táʼmirí nu̱ú íyo ku̱a̱chi
ta xíniso̱ʼorí ndáʼyi̱ na̱ níʼi yichi̱ nu̱ú na̱ soldado
ta saátu xíniso̱ʼorí ndáʼyi̱ na̱ kánitáʼan.
26 ¿Á sa̱náʼún tí halcón ña̱ ndachírí?
¿Á sa̱náʼúnrí ña̱ ndachírí ku̱ʼu̱nrí chí sur?
27 ¿Á yóʼó kúú ta̱ xáʼnda chiñu nu̱ú tí ta̱sú* ña̱ ndachí súkunnrí
ta ixava̱ʼarí chi̱ʼyo̱rí nda̱a̱ nu̱ú súkun?
28 Kándíka iin taʼvi̱ kísi̱rí tá ñuú;
kǒo ña̱ ndóʼorí ndíkaa̱rí kándíka iin yu̱u̱ káʼnu.
29 Nda̱a̱ kán kánuurí nándukúrí ña̱ kaxírí;
va̱ʼa xítorí nda̱a̱ nu̱ú xíkání.
30 Se̱ʼe válírí, xíʼirí ni̱i̱,
ta miírí xáʼa̱nrí nu̱ú ni̱xi̱ʼi̱ na̱ yiví”.*