Job
40 Ña̱yóʼo ni̱ka̱ʼa̱nka Jehová xíʼin ta̱ Job:
2 “¿Á xíniñúʼu natúʼunkúáchi* iin ta̱a xíʼin Ndióxi̱ ta̱ kúúmií ndiʼi ndee̱
xa̱ʼa̱ ña̱ ndákanixi̱níra ña̱ va̱ása va̱ʼa íyo ña̱ kéʼé Ndióxi̱?
Ná ndakuiin na̱ kúni̱ nda̱ʼyi̱ nu̱ú Ndióxi̱”.
3 Tasaá nda̱kuiin ta̱ Job yuʼú Jehová:
4 “Nda̱a̱ ni loʼoví va̱ása ndáyáʼvii̱,
kǒoví ña̱ kivi ndakuii̱n yuʼún.
Ña̱kán va̱ása ka̱ʼa̱nkai̱.
5 Tuku ta tuku ni̱ka̱ʼi̱n soo va̱ása ndakuiinkai̱ ta ni va̱ása ka̱ʼa̱nkai̱ vitin”.
6 Tasaá nda̱kuiin Jehová yuʼú ta Job ma̱ʼñú iin ta̱chí ña̱ ndeéní káni:
7 “Ixaún ña̱ ma̱ní, koo tu̱ʼvaún ta ndakú koo iniún.
Nda̱ka̱tu̱ʼíi̱n yóʼó ta xíniñúʼu ndakuiún yuʼíi̱.
8 ¿Á va̱ása kándíxaún ña̱ kéʼíi̱ nina ña̱ nda̱kú?
¿Á sakúiso ku̱a̱chiún yi̱ʼi̱ ña̱ va̱ʼa na̱ʼún ña̱ káʼún ña̱ nda̱a̱?
9 ¿Á íyoní ndeún nda̱a̱ táki̱ʼva íyoní ndee̱ Ndióxi̱?
Ndeéní níʼi tá káʼa̱n Ndióxi̱ nda̱a̱ táki̱ʼva níʼi tá káni taxa, ¿á saá níʼi tá káʼún?
10 Ixaún ña̱ ma̱ní, na̱ʼa̱ ña̱ kúúmiíníún ndee̱ ta ndakúníún;
na̱ʼa̱ ña̱ káʼnuníún ta xíniñúʼu ixato̱ʼóna yóʼó.
11 Na̱ʼa̱ ña̱ ndeéní sáún;
koto na̱ ni̱nuní kúni ta sakúkaʼan nu̱úna.
12 Koto ndiʼi na̱ kúta̱a-ini ta sakúkaʼan nu̱úna,
ku̱a̱ñi̱* na̱ ndi̱va̱ʼa-ini nu̱ú ndóona.
13 Sandúxu̱nna ti̱xin ñuʼú;
ta katúnna ini ya̱vi̱ nu̱ú ñúʼu na̱ ni̱xi̱ʼi̱.
14 Tá saá ná keʼún, nda̱a̱ yi̱ʼi̱ ndakunivai̱ ña̱ kuchiñún sakǎkún miíún.
15 Ndakanixi̱ní xa̱ʼa̱ tí hipopótamo,*
yi̱ʼi̱ kúú ta̱ ke̱ʼé tíyóʼo ta saátu yi̱ʼi̱ kúú ta̱ ke̱ʼé yóʼó.
Xáxirí yita* nda̱a̱ táki̱ʼva xáxi si̱ndi̱ki̱ yita.
16 Koto, ndakúní xa̱ʼa̱-si̱ʼinrí ta ndakúní ti̱xinrí.
17 Nda̱a̱ táki̱ʼva téʼéní* yitu̱n tú cedro saá téʼéní si̱ʼma̱rí;*
nda̱a̱ táki̱ʼva íyo ña̱ ka̱túnna saá íyo tu̱chu xa̱ʼa̱-si̱ʼinrí.
18 Nda̱a̱ táki̱ʼva íyo ña̱ ku̱vaʼa xíʼin ka̱a ña̱ cobre saá íyo lekerí;
nda̱a̱ táki̱ʼva íyo ña̱ ku̱vaʼa xíʼin hierro saá íyo xa̱ʼa̱rí.
19 Siʼna tíyóʼo i̱xava̱ʼa Ndióxi̱;
iinlá ta̱ i̱xava̱ʼa tíyóʼo kúú ta̱ kivi kaʼnírí xíʼin espada.
20 Chí yuku̱ xáʼnu ña̱ xíxáʼan* tíyóʼo,
chí yuku̱ nu̱ú sísikí ndiʼi kití yukú.
22 Yitu̱n tú naní loto táxinú ku̱nda̱ti̱* sa̱tárí
ta yitu̱n tú naní álamo tú íyo chí yoso̱ ndítanú iníí síi̱nrí.*
23 Ni ndeéní ná kunu yu̱ta va̱ása yíʼvirí.
Ni ndeéní ná kani yu̱ta Jordán nu̱úrí va̱ása yíʼvirí.
24 ¿Ndáana kivi tiinrí tá xitorí nu̱úna?
¿Á ndáana kivi kaan iin ya̱vi̱ si̱ti̱nrí xíʼin iin ka̱a ña̱ xi̱ín* nu̱ú?