Job
6 Tasaá nda̱kuiin ta̱ Job ta ka̱chira:
2 “Tá ña̱ kívi kúúña ná katana ndiʼi ña̱ sáxo̱ʼvi̱* yi̱ʼi̱,
ta ná katanaña xíʼin ndiʼi tu̱ndóʼo ña̱ ndóʼi̱.
3 Saáchi ve̱eka ña̱yóʼo nu̱ú ndiʼi yu̱ti tá mar.
Ña̱kán va̱ása níkiʼii̱n kuenta xíʼin ña̱ ni̱ka̱ʼi̱n.
4 Saáchi nda̱a̱ táki̱ʼva íyo ta̱ ki̱ní Ndióxi̱ ta̱ kúúmiíní ndee̱ xíʼin flecha tú kúúmií veneno saá íyoi̱
ta nda̱a̱ táki̱ʼva íyo ta̱ xíʼi veneno yóʼo saá íyoi̱;
Ndióxi̱ kúú ta̱ kánitáʼan xíʼi̱n ta yíʼviníi̱.
5 ¿Á kuaku burro yukú tá íyo ku̱ʼu̱ ña̱ kixáʼanrí?*
¿Á nda̱ʼyi̱ iin si̱ndi̱ki̱ che̱e tá íyo ku̱ʼu̱ ña̱ kixáʼanrí?
6 ¿Á ya̱si̱n ña̱ xíxiyó tá kǒo ñi̱i̱ ndíkaa̱ xíʼinña?
¿Á kúsi̱í-iniyó tá xáxiyó iin ña̱ʼa ña̱ va̱ása ya̱si̱n?
7 Va̱ása xííi̱n tii̱n nda̱a̱ ni iin ña̱yóʼo,
saáchi íyoña nda̱a̱ táki̱ʼva íyo ña̱ʼa ña̱ xíxiyó ña̱ xa̱a̱ ndi̱ʼi-xa̱ʼa̱.
8 Á va̱ʼakaví ná saxínu Ndióxi̱ ña̱ xa̱a̱ ndúkúníi̱ nu̱úra,
á va̱ʼaví ná saxínura ña̱ kúni̱níi̱.
9 Á va̱ʼakaví ná kandíxa Ndióxi̱ sandíʼi-xa̱ʼa̱ra yi̱ʼi̱,
á va̱ʼaví miíra ná kaʼní yi̱ʼi̱.
10 Chi nda̱a̱ ña̱yóʼo sandíkoña-inii̱;
ta iin kanditani̱nui̱ chi kusi̱í-inii̱ ni xóʼvi̱níi̱,
saáchi yi̱ʼi̱ va̱ása níkundasíi̱ tu̱ʼun Ndióxi̱ ta̱ yi̱i̱.
11 Va̱ása kúndeéka-inii̱ chi kǒoka ndeíi̱.
¿Á íyo ña̱ va̱ʼa ndátui̱ ndakiʼii̱n ta xa̱ʼa̱ ña̱kán xíniñúʼu kutakukai̱?
12 ¿Á xíʼin yu̱u̱va ku̱vaʼi̱?
¿Á ña̱ ka̱ava kúú ku̱ñui̱?
13 ¿Á íyo iin ña̱ kivi keʼíi̱ xa̱ʼíi̱ chi kooka nda̱a̱ ni iinna chindeétáʼan xíʼi̱n?
14 Nda̱a̱ ndáaka na̱ va̱ása náʼa̱ ña̱ ndixaní kúʼvi̱-inina* xínina inka na̱ yiví
va̱ása íxato̱ʼókana Ndióxi̱ ta̱ kúúmiíní ndee̱.
15 Nda̱a̱ na̱ kítáʼan va̱ʼa xíʼi̱n va̱ása kívika kundaa-inii̱na
chi íyona nda̱a̱ táki̱ʼva íyo iin yu̱ta tá kána tá ndúta nieve soo tá yáʼa loʼo tiempo yíchi̱vará.
16 Ndákutú hielo ña̱ ndu̱ta xíʼin yu̱ta yóʼo.
17 Soo tá yáʼa tiempo, yíchi̱vará ta ndáñúʼurá;
tá kíxáʼa ndúniʼní, yíchi̱rá.
18 Nása̱ma yichi̱ nu̱ú ku̱a̱ʼa̱nrá;
ta tá xáa̱rá nu̱ú ñuʼú yi̱chí, yíchi̱vará.
19 Na̱ ñuu Temá na̱ inkáchi kítáʼan xíka, nándukúna yu̱ta yóʼo;
ta saátu na̱ ke̱e chí ñuu Saba, nándukúna yu̱ta yóʼo.
20 Kúkaʼan nu̱úna chi xi̱ndakanixi̱nína ña̱ ndani̱ʼívana ti̱kui̱í;
tá xáa̱na kán ndákava-inina chi kǒorá ndáni̱ʼína.
21 Nda̱a̱ táki̱ʼva íyo yu̱ta yóʼo saá íyo ndóʼó nu̱úi̱, chi va̱ása sándi̱kondó-inii̱;
ndóʼó xi̱nindó ña̱ ndeéní íyo tu̱ndóʼo ña̱ ndóʼi̱ ta ni̱yi̱ʼvíndó.
22 ¿Á xa̱a̱ ndúkúvai̱ iin ña̱ʼa nu̱úndó?
¿Á xa̱a̱ káʼa̱nvai̱ xíʼinndó ña̱ ná taxindó loʼo ña̱ ku̱i̱ká ña̱ kúúmiíndó ndaʼíi̱?
23 ¿Á xa̱a̱ káʼi̱n xíʼinndó ña̱ ná ndatavándó yi̱ʼi̱ ndaʼa̱ na̱ sáa̱-ini xíni yi̱ʼi̱?
¿Á xa̱a̱ káʼi̱n xíʼinndó ña̱ sakǎkundó yi̱ʼi̱ nu̱ú na̱ kánitáʼan xíʼi̱n?
24 Ka̱ʼa̱nndó xíʼi̱n ndáaña kúú ña̱ ke̱ʼíi̱ ta va̱ása ka̱ʼa̱nkai̱;
chindeétáʼanndó xíʼi̱n ña̱ kunda̱a̱-inii̱ ndáaña kúú ña̱ va̱ása va̱ʼa ke̱ʼíi̱.
25 Va̱ása xóʼvi̱yó tá káʼa̱nna ña̱ nda̱a̱ xíʼinyó.
¿Soo ndáa ki̱ʼva chíndeétáʼan ña̱ káʼa̱nndó xíʼi̱n?
26 ¿Á kúni̱ndó nda̱ʼyi̱ndó nu̱úi̱ xa̱ʼa̱ ña̱ káʼi̱n?
Saáchi yi̱ʼi̱ va̱ása xíni̱kai̱ ndáaña keʼíi̱ ta nda̱a̱ táki̱ʼva íyo ña̱ ku̱a̱ʼa̱n xíʼin ta̱chí saá íyo tu̱ʼun ña̱ káʼi̱n.
27 Ndóʼó, nda̱a̱ chikaa̱ndó suerte* xa̱ʼa̱ iin na̱ ni̱xi̱ʼi̱ yivá ña̱ va̱ʼa kunda̱a̱-inindó ndáa ndóʼó ndakiʼinna ña̱ kachíñundáʼvina nu̱úndó
ta nda̱a̱ kivi xa̱a̱ndó xi̱íkondó* iin na̱ migondó.
28 Ña̱kán, ndakotondó nu̱úi̱ chi va̱ása sandáʼvivíi̱ ndóʼó.
29 Ixandó ña̱ ma̱ní, viíní ndakanixi̱níndó,
kǒo ndakanixi̱níndó ña̱ va̱ása va̱ʼa xa̱ʼíi̱;
va̱ása sakúiso ku̱a̱chindó yi̱ʼi̱ chi kéʼékavai̱ ña̱ nda̱kú.
30 ¿Á ta̱ sándaʼvi kúi̱ káʼánndó?
¿Á va̱ása kúnda̱a̱va-inii̱ ndáa xa̱ʼa̱ kúú ña̱ xóʼvi̱i̱ túvindó?