Job
7 ”Ndiʼi tiempo ña̱ táku na̱ yiví, ndeéní xíniñúʼu kachíñuna,
ndiʼi ki̱vi̱ ña̱ tákuna íyona nda̱a̱ táki̱ʼva íyo na̱ káchíñu táti̱.*
2 Nda̱a̱ táki̱ʼva kúni̱ní na̱ káchíñundáʼvi ná ndiʼi ki̱vi̱ ña̱ káchíñuna,
nda̱a̱ táki̱ʼva ndátu iin na̱ káchíñu táti̱ ña̱ ná chaʼvinana saá íyona.
3 Xa̱a̱ ku̱a̱ʼání yo̱o̱ ni va̱ása ndáyáʼviví ña̱ tákui̱
ta xa̱a̱ ku̱a̱ʼání ñuú ndíʼi̱ní-inii̱.
4 Tá ndákandúʼi̱,* ndákanixi̱níi̱: ‘¿Amaví tu̱vi?’.
Yáʼa ñuú ku̱a̱ʼa̱nña ta va̱ása kívi ku̱su̱i̱n, tasaá túviva.
6 Kamaní yáʼa ki̱vi̱ ña̱ tákui̱, nda̱a̱ táki̱ʼva kamaní kánda̱ tíku* ña̱ kúkuna*
ta ni kǒo ña̱ ndátui̱ ndakiʼii̱n.
7 Ndióxi̱ miíi̱, ndakaʼán chi nda̱a̱ táki̱ʼva íyo ta̱chí ña̱ kamaní yáʼa saá íyo ki̱vi̱ ña̱ tákui̱,
ndakaʼán ña̱ nda̱a̱ ni iin ki̱vi̱ va̱ása kusi̱í-inii̱.
8 Na̱ xíto yi̱ʼi̱ vitin va̱ása kunikana yi̱ʼi̱;
yóʼó nandukún yi̱ʼi̱ soo va̱ása ndani̱ʼún yi̱ʼi̱.
9 Nda̱a̱ táki̱ʼva yáʼa vi̱kó ku̱a̱ʼa̱nña,
saá ndóʼo na̱ xíʼi̱ chi va̱ása ndíkókana.
10 Va̱ása ndikókana veʼena,
ta na̱ veʼena nandóso-inina xa̱ʼa̱na.
11 Xa̱ʼa̱ ña̱kán, va̱ása kasikai̱ yuʼíi̱.
Ka̱ʼi̱n ndiʼi ña̱ ndíkaa̱ níma̱i̱ xa̱ʼa̱ ña̱ xóʼvi̱níi̱.
Ka̱ʼi̱n xa̱ʼa̱ ndiʼi ña̱ sándi̱ʼiní-inii̱.
12 ¿Á íyoi̱ nda̱a̱ táki̱ʼva íyo tá mar á iin kití káʼnuní tí ndíkaa̱ inirá,
ta xa̱ʼa̱ ña̱kán ndaka̱xiún iin na̱ yiví na̱ kundaa yi̱ʼi̱?
13 Tá káʼi̱n ña̱yóʼo: ‘Tá ná ndakandúʼi̱, ndi̱kova-inii̱,
tá ná ndakandúʼi̱ nu̱ú xi̱toi̱ va̱ása xo̱ʼvi̱níkavíi̱’,*
14 tá kísi̱i̱, sáyi̱ʼvíún yi̱ʼi̱ xíʼin xa̱ni,
ta saátu sáyi̱ʼvíún yi̱ʼi̱ xíʼin visión.
15 Xa̱ʼa̱ ña̱kán, va̱ʼaka ná ndiʼi ta̱chíi̱ ta kuvii̱;
va̱ʼaníka tá ná kuvii̱ nu̱úka ña̱ kutakui̱.
16 Kúndasíi̱ xínii̱ ña̱ tákui̱, va̱ása kúni̱kai̱ kutakui̱.
Va̱ása keʼékaún yi̱ʼi̱, saáchi kamaní yáʼa ki̱vi̱ ña̱ tákui̱ nda̱a̱ táki̱ʼva kamaní yáʼa ta̱chí.
17 ¿Á ta̱ ndáyáʼviní kúú ta̱ ta̱a ña̱ va̱ʼa kundi̱ʼi-iniún xa̱ʼa̱ra?,
¿á ta̱ ndáyáʼviní kúú ta̱ ta̱a ña̱ va̱ʼa kundaúnra?
18 ¿Nda̱chun xítoún ña̱ kéʼéndi̱ ki̱vi̱ tá ki̱vi̱ ta tuku ta tuku xítondosóún ndi̱ʼi̱?
19 ¿Nda̱chun xítokaún yi̱ʼi̱ ta nda̱a̱ ni loʼo va̱ása xíún sandákoo miíún yi̱ʼi̱?
20 Yóʼó ta̱ xíto ña̱ kéʼé ndiʼi na̱ yiví, tá ni̱ki̱ʼvii̱ ku̱a̱chi nu̱ún, ¿á yóʼó kúú ta̱ xóʼvi̱ xíʼin ña̱yóʼo?
¿Nda̱chun iinlá yi̱ʼi̱ kúú ta̱ kánitáʼún xíʼi̱n?
¿Á xa̱a̱ ku̱naavaún nu̱úi̱ vitin?
21 ¿Nda̱chun va̱ása xíún ixakáʼnu-iniún xa̱ʼíi̱?
Saáchi xa̱a̱ ku̱nu̱mí kuvii̱ ta ndui̱ ñuʼú;
yóʼó nandukún yi̱ʼi̱ soo kǒokai̱ ndani̱ʼún”.