Jeremías
10 Kuniso̱ʼo ndóʼó na̱ israelita ña̱ káʼa̱n Jehová xíʼinndó.
2 Ña̱yóʼo kúú ña̱ káʼa̱n Jehová:
“Kǒo keʼéndó nda̱a̱ táki̱ʼva kéʼé na̱ inka ñuu,
ta va̱ása yi̱ʼvíndó kunindó señal ña̱ kána chí ndiví
xa̱ʼa̱ ña̱ yíʼvi na̱ inka ñuu xíninaña.
3 Saáchi costumbre ña̱ kúúmií na̱ inka ñuu ña̱ vatáva* kúúña.*
Iin na̱ xíni̱ní keʼé ña̱ʼa, xáʼndana iin yitu̱n chí yuku̱ ta íxava̱ʼana iin ndióxi̱ xíʼin túyóʼo.
4 Ndásalivinaña xíʼin plata ta saátu xíʼin oro,
ta xíniñúʼuna martillo xíʼin clavo ña̱ va̱ʼa chiti̱inna ndióxi̱ ña̱ i̱xava̱ʼana tasaá kǒo ndakavaña.
5 Nda̱a̱ táki̱ʼva íyo ña̱ sáyi̱ʼví saa nu̱ú chi̱ʼina pepino saá íyo ndióxi̱na; kǒo kívi ka̱ʼa̱nña.
Xíniñúʼu kuisonaña chi kǒo kívi kakaña.
Va̱ása yi̱ʼvíndó kunindóña, saáchi kǒo nda̱a̱ ni iin ña̱ʼa ña̱ va̱ása va̱ʼa keʼéña xíʼinndó
ta ni kǒo kivi keʼéña nda̱a̱ ni iin ña̱ʼa ña̱ va̱ʼa xa̱ʼa̱ndó”.
6 Kǒo nda̱a̱ ni iinna íyo nda̱a̱ táki̱ʼva íyo yóʼó Jehová.
Yóʼó káʼnuníún ta ki̱vi̱ún káʼnuníña ta náʼa̱ña ndee̱ ña̱ kúúmiíún.
7 ¿Ndáana kúú na̱ va̱ása xíniñúʼu yi̱ʼví kuni yóʼó ta̱ kúú Rey nu̱ú ndiʼi na̱ ñuu? Ña̱yóʼo kúú ña̱ xíniñúʼu keʼévana.
Saáchi nu̱ú ndiʼika na̱ ndíchi xíʼin na̱ chíñu na̱ íyo inka ñuu,
kǒo nda̱a̱ ni iinna íyo nda̱a̱ táki̱ʼva íyo yóʼó.
8 Ndiʼi na̱yóʼo va̱ása vií ndákanixi̱nína ta kíʼvínína.
Ña̱ sánáʼa̱ ndióxi̱ ña̱ i̱xava̱ʼana xíʼin yitu̱n sándaʼviña na̱ yiví.*
9 Ku̱a̱ʼa̱nna xa̱ʼa̱ lámina ña̱ plata chí Tarsis ta saátu ku̱a̱ʼa̱nna xa̱ʼa̱ oro chí Ufaz.
Iin na̱ xíni̱ní keʼé ña̱ʼa kúú na̱ i̱xava̱ʼa ndióxi̱ yóʼo, iin na̱ xíni̱ní keʼé ña̱ʼa xíʼin ka̱a kúú na̱ ke̱ʼéña.
Sándakundixinaña xíʼin ti̱ko̱to̱ ña̱ ku̱vaʼa xíʼin yi̱ʼva̱ azul ta saátu xíʼin ixí* sa̱tá ndikachi* ña̱ color ndíʼí.*
Na̱ xíni̱ní ixava̱ʼa ña̱ʼa kúú na̱ ke̱ʼé ndiʼi ña̱yóʼo.
10 Soo Jehová kúú Ndióxi̱ ta̱ nda̱a̱.
Ta̱kán kúú Ndióxi̱ ta̱ táku ta kúúra Rey ndiʼi tiempo.
Nda̱a̱ ñuʼú kanda̱ tá ná sa̱a̱ra,
ta kǒo nda̱a̱ ni iin na̱ ñuu kundeé-ini tá ná sa̱a̱ra.
11* Ña̱yóʼo kúú ña̱ xíniñúʼu ka̱ʼa̱nndó xíʼinna:
“Ndióxi̱ ña̱ kǒo ní ixava̱ʼa ndiví xíʼin ñuʼú
kǒokaña koo nu̱ú ñuʼú yóʼo”.
12 Ndióxi̱ kúú ta̱ ke̱ʼé ñuʼú yóʼo, ke̱ʼéraña xíʼin ndee̱ ña̱ kúúmiíra,
xa̱ʼa̱ ña̱ ndíchiníra i̱xava̱ʼara ñuʼú nu̱ú kána ña̱ʼa ta xa̱ʼa̱ ña̱ xíni̱níra i̱xava̱ʼara ndiví.
13 Tá káʼa̱nra,
ti̱kui̱í tá íyo chí ndiví kánda̱rá,
ta sándaara vi̱kó* nda̱a̱ chí táʼví ña̱ xíkáva̱ʼa kíndo̱o nu̱ú ñuʼú yóʼo.
Íxava̱ʼara taxa ña̱ va̱ʼa kuun sa̱vi̱,
íyo nu̱ú ndátaánva̱ʼara* ta̱chí ta kán táváraña.
14 Nda̱a̱ ni iin na̱ ta̱a va̱ása vií ndákanixi̱nína ta kǒo kúnda̱a̱-inina xa̱ʼa̱ nda̱a̱ ni iin ña̱ʼa.
Ndiʼi na̱ íxava̱ʼa ña̱ʼa xíʼin ka̱a kukaʼan nu̱úna xíʼin ña̱ʼa ña̱ i̱xava̱ʼana,
saáchi ña̱ʼa ña̱ ka̱a ña̱ íxava̱ʼana ña̱ vatáva kúúña,
ta ni kǒo kívi ndakiʼinña ta̱chíña.
15 Ña̱ vatáva kúúña ta kúsi̱kindaanaña.
Tá ná kixaa̱ ki̱vi̱ ña̱ ndatiin Ndióxi̱ ku̱a̱chi, ndiʼi-xa̱ʼa̱vaña.
16 Soo Ndióxi̱ ta̱ Jacob su̱ví saáví íyora,
saáchi ta̱kán kúú ta̱ ke̱ʼé ndiʼi ña̱ʼa,
ta táʼví mií ña̱ ndáyáʼvi va̱ʼaka ña̱ kúúmiíra kúú ta̱ Israel.
Jehová ta̱ xáʼndachíñu nu̱ú na̱ ángel kúú ki̱vi̱ra.
17 Yóʼó ñá ñaʼá, ndakaya ña̱ʼa ña̱ kúúmiíún ña̱ va̱ʼa ku̱ʼún
saáchi na̱ sáa̱-ini xíni yóʼó xa̱a̱ sa̱sina yóʼó.
18 Ña̱yóʼo kúú ña̱ káʼa̱n Jehová:
“Xíkáva̱ʼa chindaʼíi̱ na̱ ndóo nu̱ú ñuʼú yóʼo ku̱ʼu̱nna
ta taxii̱ ña̱ ná xo̱ʼvi̱na”.*
19 Ndáʼviníi̱, ndeéní tu̱ndóʼo ña̱ ndo̱ʼi̱.
Nu̱ú tu̱kue̱ʼi̱ va̱ása kívika ndaʼaña.
Ta yi̱ʼi̱ ka̱chii̱: “Ña̱yóʼo kúú ña̱ kundoʼovai̱ ta xíniñúʼu kundeé-inii̱ xíʼinña.
20 Sa̱ndíʼi-xa̱ʼa̱na veʼe válíi̱ ta xa̱ʼndana yoʼo̱ ña̱ núʼniña.
Na̱ se̱ʼi̱ sa̱ndákoondaʼa̱na yi̱ʼi̱ ta kǒokana.
Kǒoka na̱ ixava̱ʼa veʼe loʼi̱ ta chinúuna ti̱ko̱to̱ sa̱táña.
21 Na̱ ndáa ndikachi ni loʼo va̱ása va̱ʼa ndákanixi̱nína
ta kǒo nínda̱ka̱tu̱ʼunna Jehová.
Xa̱ʼa̱ ña̱kán kíʼvíní íyo ña̱ ke̱ʼéna
ta ndiʼi ndikachi ni̱ta̱ni̱rí* ku̱a̱ʼa̱nrí”.
22 Kuniso̱ʼo, íyo iin ña̱ káʼa̱nna xa̱ʼa̱, chí káa va̱xiña.
Ndeéní ta̱an chí nu̱ú ñuʼú ña̱ íyo chí norte,
ta sandíʼi-xa̱ʼa̱ña ñuu ña̱ íyo chí Judá ta kǒoka na̱ kundoo nu̱úña ta nduuña ya̱vi̱ nu̱ú ñúʼu ti̱na* yukú.*
23 Jehová, kúnda̱a̱va-inii̱ ña̱ kǒo kívi ndaka̱xin na̱ yiví ndáa yichi̱ kúú ña̱ ku̱ʼu̱nna.
Na̱ yiví kǒo nda̱yí* kúúmiína ña̱ kuniʼina yichi̱ nu̱ú miína.
24 Jehová, tá na̱ ka̱ʼún xíʼi̱n xa̱ʼa̱ ña̱ va̱ása va̱ʼa kéʼíi̱ viíní keʼúnña,
soo kǒo keʼúnña tá sáún ña̱ va̱ʼa ná kǒo sandíʼi-xa̱ʼún yi̱ʼi̱.
25 Na̱ʼa̱ ña̱ sáún xíʼin na̱ ñuu na̱ kǒo xíín ixato̱ʼó yóʼó
ta saátu xíʼin na̱ familia na̱ kǒo xíniñúʼu ki̱vi̱ún ña̱ ka̱ʼa̱nna xíʼún.
Saáchi ka̱nitáʼanna xíʼin ta̱ Jacob ta nda̱a̱ xi̱kuni̱na sandíʼi-xa̱ʼa̱nara
ta sa̱ndákoo vichína* nu̱ú ñuʼúra.