Jeremías
9 Va̱ʼaníví tá iin pozo nu̱ú ñúʼu ku̱a̱ʼání ti̱kui̱í ná koo xi̱níi̱
tasaá ku̱a̱ʼání ti̱kui̱í kee nduchúnu̱úi̱.
Tasaá ñuú xíʼin káʼñu* kuakui̱ xa̱ʼa̱ na̱ ñui̱ na̱ ni̱xi̱ʼi̱.
2 Va̱ʼaní tá ná koo iin veʼe loʼo nu̱ú kíndo̱o na̱ ku̱a̱ʼa̱n inka ñuu chí nu̱ú ñuʼú yi̱chí nu̱ú kivi koi̱.
Tasaá kúú ña̱ sandákoi̱ na̱ ñui̱ ta kuxíkái̱ nu̱úna,
saáchi ndiʼina kísi̱na xíʼin na̱ kǒo nítindaʼa̱ xíʼinna,
ta ndiʼina kúúna na̱ sándaʼvi.
3 Sándeena yáa̱na* nda̱a̱ táki̱ʼva kéʼéna xíʼin iin kuxu̱n;*
na̱ ñuu yóʼo ta̱ʼán na̱ʼa̱na ña̱ nda̱kú íyo inina.
“Tuku ta tuku ña̱ va̱ása va̱ʼa kéʼéna,
ta kǒo xíínna kuniso̱ʼona ña̱ káʼi̱n xíʼinna”, káchi Jehová.
4 “Ndiʼina ná kiʼinnína kuenta xíʼin na̱ táʼanna
ta ni ná kǒo kundaa-inina na̱ ñanina.
Saáchi ndiʼi na̱ ñanina sándaʼvivana
ta ndiʼi na̱ táʼanna káʼa̱nna tu̱ʼun síkí.
5 Ndiʼina sándaʼvina na̱ táʼanna
ta nda̱a̱ ni iinna va̱ása káʼa̱n ña̱ nda̱a̱.
Sa̱náʼa̱na yáa̱na ña̱ ka̱ʼa̱nña ña̱ vatá.*
Nda̱a̱ ku̱naana xa̱ʼa̱ ña̱ kéʼéna ku̱a̱ʼání ña̱ va̱ása va̱ʼa.
6 Íyoún nu̱ú ndóo na̱ yiví na̱ vatá.
Xa̱ʼa̱ ña̱ vatánína kǒo níxiinna sakúaʼana xa̱ʼíi̱”, káchi Jehová.
7 Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:
“Ndasandii̱* ndóʼó ta kotoi̱ ndáa ki̱ʼva íyondó,
¿saáchi ndáaka ña̱ kivi keʼíi̱ xíʼin ñá loʼo se̱ʼe na̱ ñui̱?
8 Yáa̱na nina ña̱ vatá káʼa̱nña, ta íyoña nda̱a̱ táki̱ʼva íyo iin flecha tú xáʼní.
Nu̱ú yáa̱ kuitína kána ña̱ káʼa̱nna ña̱ va̱ʼa xíʼin na̱ táʼanna;
soo chí inina ndákanixi̱nína ndáa ki̱ʼva kaʼnínana”.
9 “¿Á va̱ása xíniñúʼu ndatii̱n ku̱a̱chi xíʼinna xa̱ʼa̱ ña̱yóʼo?”, káchi Jehová.
“¿Á va̱ása xíniñúʼu ndatii̱n ku̱a̱chi xíʼin iin ñuu káʼnu xa̱ʼa̱ ña̱yóʼo?
10 Kuakui̱ ta kusuchí-inii̱ xa̱ʼa̱ yuku̱,
katai̱ iin yaa xa̱ʼa̱ ña̱ kúsuchí-inii̱ xa̱ʼa̱ yita* ña̱ íyo chí nu̱ú ñuʼú yi̱chí;
saáchi xa̱ʼminaña ta kǒoka na̱ yáʼa nu̱úña,
ta ni va̱ása táku̱ka xíka kití.
Kití tí ndáchí chí ndiví xíʼin inkaka kití xi̱nuvarí; ku̱a̱ʼa̱nvarí.
11 Iin koʼndo yu̱u̱ ndasai̱ ñuu Jerusalén, ndasai̱ña iin ya̱vi̱ nu̱ú ñúʼu ti̱na* yukú,*
ta ndiʼi ñuu ña̱ íyo chí Judá kindo̱o miíña, kǒoka na̱ kundoo nu̱úña.
12 ¿Ndáana kúú na̱ ndíchi va̱ʼaka na̱ kivi kunda̱a̱-ini xíʼin ña̱yóʼo?
¿Ndáana ni̱ka̱ʼa̱n Jehová xíʼin ña̱ ka̱ʼa̱nna xa̱ʼa̱ ña̱yóʼo?
¿Nda̱chun ni̱xi̱ʼi̱ ñuʼú yóʼo?
¿Nda̱chun ni̱yi̱chi̱ ndiʼiña nda̱a̱ táki̱ʼva íyo ñuʼú yi̱chí,
ta kǒoka na̱ yáʼa nu̱úña?”.
13 Jehová nda̱kuiinra: “Saáchi na̱kán kǒo níxiinna kunina ley ña̱ ta̱xii̱ ndaʼa̱na,* va̱ása níxiinna kundiku̱nnaña ta ni kǒo níkandíxana ña̱ ni̱ka̱ʼi̱n xíʼinna. 14 Nu̱úka ña̱yóʼo, so̱ʼoní* ni̱xi̱yona ta ke̱ʼéna ña̱ kúni̱ miína ta nda̱kundiku̱nna ña̱ Baal, nda̱a̱ táki̱ʼva sa̱náʼa̱ na̱ yivánana. 15 Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Taxii̱ ña̱ kaxí na̱ yiví yóʼo yu̱ku̱ o̱va̱ ta koʼona ti̱kui̱í tá kúúmií veneno. 16 Taxii̱ ña̱ xa̱a̱ síín síín ñuu ná ku̱ʼu̱nna kundoona, ñuu ña̱ kǒo níxi̱xini̱na ni na̱ yivána, ta chindaʼíi̱ na̱ kuniʼi iin espada ku̱ʼu̱n sa̱tána nda̱a̱ ná sandíʼi-xa̱ʼa̱na ndiʼina’.
17 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:
‘Na̱ʼa̱ndó ña̱ ndíchi íyondó.
Kanandó ná ñaʼá ná xíni̱ kata yaa ña̱ suchí-ini,
kanandó mií ná xíni̱va̱ʼa,
18 ña̱ va̱ʼa kama ná kixiná ta kataná iin yaa ña̱ suchí-ini,
ña̱ va̱ʼa iin ná ndakutú nduchúnu̱úyó xíʼin ti̱kui̱í
ta iin kutikaará nu̱úyó.
19 Saáchi táku̱ ña̱ xákunína chí Sion ta káʼa̱nna ña̱yóʼo:
“Sa̱ndíʼi-xa̱ʼa̱vana miíyó.
Sa̱kúkaʼankavína nu̱úyó.
Saáchi sa̱ndákooyó ñuuyó ta sa̱ndíʼi-xa̱ʼa̱na veʼeyó”.
20 Ndóʼó ná ñaʼá, kuniso̱ʼondó tu̱ʼun Jehová.
Kuniso̱ʼondó ña̱ káʼa̱nra ta kandíxandóña.
Sanáʼa̱ndó se̱ʼe-síʼindó xa̱ʼa̱ ña̱ suchí-ini yóʼo,
ta sanáʼa̱ táʼanndó yaa ña̱ xítana tá kúsuchí-inina.
21 Saáchi ña̱ xáʼní ni̱ki̱ʼviña chí ventana veʼeyó;
ni̱ki̱ʼviña ini veʼe súkun ña̱ kútu̱ní ndási
ña̱ va̱ʼa ndakiʼinña na̱ va̱lí se̱ʼeyó na̱ xíka chí calle ku̱ʼu̱n xíʼinña
ta saátu na̱ va̱lí kúa̱an na̱ xíka chí nu̱ú ndákutáʼan ku̱a̱ʼá na̱ yiví’.
22 Ka̱ʼa̱n: ‘Ña̱yóʼo kúú ña̱ káʼa̱n Jehová:
“Na̱ yiví na̱ ni̱xi̱ʼi̱ koona nda̱a̱ táki̱ʼva íyo si̱ʼví ña̱ ndóo nu̱ú ñuʼú nu̱ú chíʼina,
nda̱a̱ táki̱ʼva íyo trigo ña̱ sa̱kán xa̱ʼndana ña̱ iin yiku̱n ndóo,
ta kǒo na̱ ndakayaña”’”.
23 Ña̱yóʼo kúú ña̱ káʼa̱n Jehová:
“Na̱ ndíchi ná kǒo kuta̱a-inina xa̱ʼa̱ ña̱ ndíchi ña̱ kúúmiína,
na̱ ndakúní na̱ kǒo kuta̱a-inina xa̱ʼa̱ ndee̱ ña̱ kúúmiína
ta na̱ ku̱i̱ká ná kǒo kuta̱a-inina xa̱ʼa̱ ña̱ ku̱i̱ká ña̱ kúúmiína”.
24 “Soo na̱ kúta̱a-ini ná keʼénaña xa̱ʼa̱ ña̱yóʼo:
xa̱ʼa̱ ña̱ kúúmiína ña̱ ndíchi ta kúnda̱a̱-inina xa̱ʼíi̱,
ña̱ yi̱ʼi̱ kúú Jehová, ta náʼi̱ ña̱ ndixaní kúʼvi̱-inii̱* xínii̱ inkana ta nda̱kúní íyo ña̱ kéʼíi̱ nu̱ú ñuʼú,
saáchi ndiʼi ña̱ʼa yóʼo kúú ña̱ kútói̱”, káchi Jehová.
25 “Koto, xa̱a̱ ku̱yatin ki̱vi̱, káchi Jehová, ña̱ ndatii̱n ku̱a̱chi xíʼin ndiʼi na̱ ni̱ta̱ʼnda̱ nu̱ú yi̱i̱,* soo mií ña̱ nda̱a̱ va̱ása níta̱ʼnda̱ví nu̱ú yi̱i̱na, 26 ndatii̱n ku̱a̱chi xíʼin na̱ ñuu Egipto, na̱ ñuu Judá, na̱ ñuu Edom, na̱ ammonita, na̱ ñuu Moab ta saátu xíʼin ndiʼika na̱ ni̱ta̱ʼnda̱ ixí* xa̱ʼa̱-sóʼo ta ndóona chí nu̱ú ñuʼú yi̱chí; saáchi ndiʼi na̱ ñuu va̱ása níta̱ʼnda̱ nu̱ú yi̱i̱na, ta ndiʼi na̱ ñuu Israel ni̱ta̱ʼnda̱va nu̱ú yi̱i̱na soo va̱ása kéʼéna nda̱a̱ táki̱ʼva kéʼé na̱ ni̱ta̱ʼnda̱ nu̱ú yi̱i̱”.