Jeremías
11 Jehová ni̱ka̱ʼa̱nra ña̱yóʼo xíʼin ta̱ Jeremías: 2 “Ndóʼó na̱ ñuu, kuniso̱ʼondó trato yóʼo.
”Kúáʼan* nu̱ú na̱ ta̱a na̱ ñuu Judá xíʼin na̱ yiví na̱ ndóo chí ñuu Jerusalén 3 ta ka̱ʼún xíʼinna: ‘Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: “Na̱ ta̱a na̱ kǒo kándíxa trato yóʼo ná ndakiʼinna chiʼña 4 ña̱ ni̱ka̱ʼi̱n xíʼin na̱ táʼanndó na̱ xi̱ndoo xi̱naʼá tá ta̱vái̱na chí ñuu Egipto, ña̱ ni̱xi̱yo táki̱ʼva íyo horno* nu̱ú ndúta ka̱a, tá ni̱ka̱ʼi̱n xíʼinna: ‘Kuniso̱ʼondó ndiʼi ña̱ káʼi̱n xíʼinndó ta keʼéndó ndiʼi ña̱ xáʼndai̱ nu̱úndó; ta ndóʼó koondó na̱ ñui̱ ta yi̱ʼi̱ koi̱ Ndióxi̱ndó, 5 ña̱ va̱ʼa saxínui̱ ña̱ ki̱ndoi̱ xíʼin na̱ táʼanndó na̱ xi̱ndoo xi̱naʼá, ña̱ taxii̱ iin ñuʼú nu̱ú íyoní leche xíʼin ñu̱ñú ndaʼa̱na, nda̱a̱ táki̱ʼva íyo ña̱ xa̱a̱ ndóondó nu̱ú vitin’”’”.
Ta yi̱ʼi̱ nda̱kuii̱n: “Saá koo, Jehová”.
6 Tasaá ni̱ka̱ʼa̱n Jehová xíʼi̱n: “Ka̱ʼa̱n xa̱ʼa̱ ndiʼi ña̱yóʼo chí ñuu Judá ta saátu chí calle ñuu Jerusalén: ‘Kuniso̱ʼondó ña̱ káʼa̱n trato yóʼo ta saxínundóña. 7 Saáchi nda̱a̱ tá ki̱vi̱ ña̱ ta̱vái̱ na̱ táʼanndó na̱ xi̱ndoo xi̱naʼá chí ñuu Egipto, xi̱kaʼi̱n xíʼinna: “Kuniso̱ʼondó ña̱ káʼi̱n xíʼinndó”. Ta ndákundeíi̱ káʼi̱n ña̱yóʼo nda̱a̱ kivi vitin. 8 Soo na̱kán kǒo níxiniso̱ʼona ta ni kǒo níkandíxana; nu̱úka ña̱yóʼo, nda̱kundeéna ke̱ʼéna ña̱ va̱ása va̱ʼa ndíkaa̱ níma̱na. Xa̱ʼa̱ ña̱kán ta̱xii̱ ña̱ kundoʼona ndiʼi ña̱ xi̱kaʼa̱n trato yóʼo, ña̱ xa̱ʼndai̱ nu̱úna saxínuna soo kǒo níxiinna saxínunaña’”.
9 Jehová ni̱ka̱ʼa̱nra ña̱yóʼo xíʼi̱n: “Na̱ ta̱a na̱ ñuu Judá xíʼin na̱ yiví na̱ ndóo ñuu Jerusalén inkáchi nda̱kutáʼanna ña̱ kǒo kandíxakana yi̱ʼi̱. 10 Na̱yóʼo ki̱xáʼana kéʼéna ña̱ va̱ása va̱ʼa nda̱a̱ táki̱ʼva xi̱keʼé na̱ táʼanna na̱ xi̱ndoo xi̱naʼá, na̱ kǒo níxiin kuniso̱ʼo ña̱ ni̱ka̱ʼi̱n xíʼinna. Ta saátu ki̱xáʼana ndíku̱nna inka ndióxi̱ ta ndásakáʼnunaña. Na̱ ñuu Israel xíʼin na̱ ñuu Judá sa̱ndíʼi-xa̱ʼa̱na trato ña̱ ke̱ʼíi̱ xíʼin na̱ táʼanna na̱ xi̱ndoo xi̱naʼá. 11 Xa̱ʼa̱ ña̱kán, ña̱yóʼo kúú ña̱ káʼa̱n Jehová: ‘Chindaʼíi̱ iin tu̱ndóʼo nu̱úna ña̱ kǒo kuchiñuna ka̱kuna nu̱ú. Ta tá ná ka̱ʼa̱n-ndáʼvina xíʼi̱n ña̱ chindeétáʼi̱n xíʼinna, va̱ása kuniso̱ʼi̱ ña̱ ka̱ʼa̱nna. 12 Ña̱kán na̱ ndóo ñuu ña̱ íyo chí Judá xíʼin na̱ ndóo ñuu Jerusalén ku̱ʼu̱nna kuakundáʼvina nu̱ú ndióxi̱ ña̱ sóko̱na ña̱ʼa nu̱ú* ña̱ ná chindeétáʼanña xíʼinna, soo ña̱yóʼo ni loʼo kǒo kuchiñuña sakǎkuñana nu̱ú tu̱ndóʼo ña̱ kixi nu̱úna. 13 Saáchi yóʼó Judá, ku̱a̱ʼání ni̱xa̱a̱ ndióxi̱ún ku̱uña nda̱a̱ táki̱ʼva ku̱a̱ʼání kúú ñuu ña̱ kúúmiíún, ta saátu ku̱a̱ʼání kúú altar ña̱ ke̱ʼéndó ña̱ so̱kóndó ña̱ʼa nu̱ú* ña̱ Baal, ndióxi̱ ña̱ va̱ása ndáyáʼvi, ku̱a̱ʼání kúúña nda̱a̱ táki̱ʼva ku̱a̱ʼání kúú calle ñuu Jerusalén’.
14 ”Ta yóʼó,* va̱ása ka̱ʼún xíʼi̱n xa̱ʼa̱ na̱ ñuu yóʼo. Kǒo ka̱ʼa̱n-ndáʼviún xíʼi̱n xa̱ʼa̱na ta ni kǒo keʼún oración xa̱ʼa̱na, saáchi va̱ása kuniso̱ʼi̱ tá ná ka̱ʼa̱nna xíʼi̱n ña̱ chindeétáʼi̱n xíʼinna tá ná kixi tu̱ndóʼo nu̱úna.
15 ¿Nda̱chun va̱xika na̱ ñui̱ na̱ kúni̱níi̱ xínii̱ ini veʼi̱, ta xa̱a̱ ku̱a̱ʼání kúú na̱ kéʼé ña̱ va̱ása va̱ʼa?
Tá ná kixaa̱ tu̱ndóʼo nu̱ún,
¿á kuchiñuna kasina ña̱yóʼo xíʼin ku̱ñu yi̱i̱ ña̱ sóko̱na?*
¿Á kusi̱í-iniún tá ná kixaa̱ña?
16 Tá ya̱chi̱, Jehová xi̱kaʼa̱nra xíʼún ña̱ kúún iin tú olivo tú ndokoní ndaʼa̱,
tú liviní, tú táxi ku̱i̱ʼi tí va̱ʼaní.
Ndeéní ni̱ni̱ʼi ta chi̱kaa̱ra ñuʼu̱nú,
ta na̱kán ni̱xa̱ʼnu̱na ndaʼa̱nú.
17 ”Jehová ta̱ xáʼndachíñu nu̱ú na̱ ángel, ta̱ chi̱ʼi yóʼó ni̱ka̱ʼa̱nra ña̱ kixi iin tu̱ndóʼo nu̱ún xa̱ʼa̱ ndiʼi ña̱ va̱ása va̱ʼa ña̱ ke̱ʼé na̱ ñuu Israel xíʼin na̱ ñuu Judá, na̱ sa̱sáa̱ yi̱ʼi̱ xa̱ʼa̱ ña̱ ni̱so̱kóna ña̱ʼa nu̱ú ña̱ Baal”.
18 Jehová kúú ta̱ ni̱ka̱ʼa̱n xíʼi̱n ña̱ va̱ʼa kunda̱a̱-inii̱ xa̱ʼa̱ ña̱ kéʼéna;
yóʼó kúú ta̱ ni̱na̱ʼa̱ nu̱úi̱ ndáaña kúú ña̱ kéʼéna.
19 Yi̱ʼi̱ ni̱xi̱yoi̱ nda̱a̱ táki̱ʼva íyo iin ndikachi* loʼo tí másoní tí ku̱a̱ʼa̱nna kaʼnína.
Kǒo níxi̱kunda̱a̱-inii̱ ña̱ íyona contra xíʼi̱n tá xi̱kachina:
“Ná sandíʼi-xa̱ʼa̱yó yitu̱n yóʼo ta saátu ku̱i̱ʼi ña̱ táxinú,
ná sandíʼi-xa̱ʼa̱ va̱ʼayónú nu̱ú ñuʼú yóʼo
ña̱ va̱ʼa kǒo ndakaʼánkana xa̱ʼa̱ ki̱vi̱nú”.
20 Jehová ta̱ xáʼndachíñu nu̱ú na̱ ángel nda̱kúní ndátiinra ku̱a̱chi;
kúnda̱a̱-inira xa̱ʼa̱ ña̱ ndákanixi̱nína* xíʼin ña̱ ñúʼu níma̱na.
Taxi ná kotoi̱ ña̱ keʼún xíʼinna,
saáchi yóʼó kúú ta̱ ndáa-inii̱ ña̱ viíní ndatiún ku̱a̱chi xa̱ʼíi̱.
21 Xa̱ʼa̱ ña̱kán, ña̱yóʼo kúú ña̱ káʼa̱n Jehová xa̱ʼa̱ na̱ ta̱a na̱ ñuu Anatot na̱ kúni̱ kaʼní yóʼó, ta káchina: “Kǒo kuniñúʼún ki̱vi̱ Jehová ña̱ ka̱ʼún xíʼinndi̱ xa̱ʼa̱ ña̱ kuu chi tá ná keʼúnña kaʼníndi̱ yóʼó”; 22 ña̱kán ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Ndatiinvai̱ ku̱a̱chi xíʼinna. Kaʼnína na̱ va̱lí xíʼin espada ta se̱ʼeta̱ana xíʼin se̱ʼe-síʼina kuvina so̱ko. 23 Ta kǒo nda̱a̱ ni iin na̱ kindo̱o, saáchi chindaʼíi̱ iin tu̱ndóʼo nu̱ú na̱ ta̱a ñuu Anatot ku̱i̱ya̱ tá ná ndatii̱n ku̱a̱chi xíʼinna”.