Jeremías
12 Miíún Jehová nda̱kúní íyo ña̱ kéʼún tá táxii̱ ku̱a̱chi ndaʼún,
tá káʼi̱n xíʼún ña̱ ndatiún ku̱a̱chi.
¿Soo nda̱chun va̱ʼaní kána ña̱ kéʼé na̱ yiví na̱ ndi̱va̱ʼa-ini?
¿Ta nda̱chun va̱ʼaní ndóo na̱ sándaʼvi inkana?
2 Chi̱ʼúnna ta ka̱nava ti̱oʼona.*
Xa̱ʼnuna ta ta̱xina ku̱i̱ʼi.
Na̱yóʼo káʼa̱n kuitína xa̱ʼún, soo ña̱ ndákanixi̱nína* xíkáníva íyoña nu̱ún.
3 Soo miíún Jehová xíni̱va̱ʼavaún yi̱ʼi̱ ta xítoún ña̱ kéʼíi̱;
xi̱toún ndáa ki̱ʼva íyo níma̱i̱ ta ki̱ʼún kuenta ña̱ iinlá yóʼó nda̱kú íyo inii̱ xíʼin.
Nda̱a̱ táki̱ʼva ndátaʼvína ndikachi* tí kaʼnína saá keʼún xíʼin na̱ yiví kán,
chindoo síúnna nda̱a̱ ná kixaa̱ ki̱vi̱ ña̱ kuvina.
4 ¿Nda̱a̱ ama va̱ása yi̱chi̱ka ña̱ʼa ña̱ íyo nu̱ú ñuʼú yóʼo xíʼin ña̱ íyo chí yuku̱?
Xa̱ʼa̱ ña̱ va̱ása va̱ʼa ke̱ʼé na̱ ndóo nu̱úña,
kití tí íyo nu̱ú ñuʼú xíʼin kití tí ndáchí kǒokarí íyo.
Saáchi na̱kán káchina: “Va̱ása kívi kunira ña̱ kundoʼoyó”.
5 Tá kúnaún xa̱ʼa̱ ña̱ inkáchi xínún xíʼin iin ta̱a,
¿ndáa ki̱ʼva inkáchi kunún xíʼin iin kuáyi̱?
Sana va̱ʼava kuniún tá ná koún nu̱ú iin ñuʼú nu̱ú kǒo ku̱a̱chi,
¿soo ndáaña kuniún tá ná koún chí nu̱ú íyoní ku̱ʼu̱ chí yu̱ta Jordán?
6 Saáchi nda̱a̱ na̱ ñani miíún, na̱ veʼe yiváún sa̱ndáʼvina yóʼó.
Ndeéní ni̱nda̱ʼyi̱na nu̱ún.
Xa̱ʼa̱ ña̱kán kǒo kandíxaún na̱yóʼo
ni ná ka̱ʼa̱nna xa̱ʼa̱ ña̱ va̱ʼa xíʼún.
7 “Xa̱a̱ sa̱ndákoi̱ veʼi̱ ta xa̱a̱ sa̱ndákoi̱ ña̱ xi̱kuu herenciai̱;
xa̱a̱ nda̱taxii̱ ñá kúni̱níi̱ xínii̱ ndaʼa̱ na̱ sáa̱-ini xíniñaʼá.
8 Nda̱a̱ táki̱ʼva íyo iin ndikaʼa* tí íyo chí yuku̱ saá ni̱xa̱a̱ herenciai̱ ndu̱uña nu̱úi̱
ta ndáʼyi̱ndaaña yi̱ʼi̱.
Xa̱ʼa̱ ña̱kán kúú ña̱ sáa̱ní-inii̱ xínii̱ña.
9 Nda̱a̱ táki̱ʼva íyo pilo* tí táxaní* tu̱mi saá íyo herenciai̱ nu̱úi̱;
inkaka pilo káva̱nduurí sa̱tárí ta kánirírí.
Ndiʼi kití tí íyo chí yuku̱ ndakutáʼanndó;
kixindó kixáʼanndó.*
10 Ku̱a̱ʼání na̱ ndáa kití sa̱ndíʼi-xa̱ʼa̱na nu̱ú íyo tú uvai̱;
ni̱xa̱ñi̱na* nu̱ú iin táʼví ñuʼíi̱.
Nda̱a̱ táki̱ʼva íyo iin ñuʼú yi̱chí ña̱ kǒo nda̱a̱ ni iin ña̱ʼa nu̱ú, saá nda̱sana iin táʼví ñuʼíi̱ ña̱ ndáyáʼviní nu̱úi̱.
11 Ni̱xa̱a̱ña ndu̱uña iin lugar ña̱ sa̱ndákondaʼa̱na.
Ni̱yi̱chi̱vaña;*
ki̱ndoo miívaña.
Iníí ñuu yóʼo ndi̱ʼi-xa̱ʼa̱ña,
soo kǒo na̱ ndíʼi̱-ini xa̱ʼa̱ña.
12 Na̱ sándiʼi-xa̱ʼa̱ ña̱yóʼo va̱xina ndiʼi yichi̱ válí* ña̱ íyo chí nu̱ú ñuʼú yi̱chí,
saáchi espada Jehová sandíʼi-xa̱ʼa̱ña ndiʼi na̱ ndóo ñuu yóʼo.
Va̱ása va̱ʼa kundoo nda̱a̱ ni iinna.
13 Chi̱ʼina trigo soo tú iñúva ka̱na.
Ndeéní ku̱naana soo kǒo ña̱ va̱ʼa níndakiʼinna.
Xa̱ʼa̱ ña̱ sáa̱ní Jehová xíʼinna, sákukaʼanra nu̱úna
chi va̱ása kánaka ña̱ʼa nu̱ú ñuʼúna”.
14 Ña̱yóʼo kúú ña̱ káʼa̱n Jehová xíʼin na̱ ndóo yatin xíʼin na̱ ndi̱va̱ʼaní-ini, na̱ kúni̱ ndakiʼin herencia ña̱ ta̱xii̱ ndaʼa̱ na̱ ñui̱ Israel: “Tavái̱na nu̱ú ñuʼú yóʼo ta saátu tavái̱ na̱ ñuu Judá xíʼinna. 15 Soo tá ná ndiʼi tavái̱na, kundáʼvi-inii̱ kunii̱na ta taxii̱ ná ndikó iin tá iinna nu̱ú herenciana ta saátu nu̱ú ñuʼúna”.
16 “Tá ná sakúaʼana keʼéna nda̱a̱ táki̱ʼva kéʼé na̱ ñui̱ ta chinaʼána* xa̱ʼa̱ ki̱víi̱ ta kachina: ‘Chínaʼíi̱ xa̱ʼa̱ Jehová, Ndióxi̱ ta̱ táku’, nda̱a̱ táki̱ʼva sa̱náʼa̱na na̱ ñui̱ ña̱ chinaʼána xa̱ʼa̱ ña̱ Baal, saá kúú ña̱ kivi kutáʼanna kundoona xíʼin na̱ ñui̱. 17 Soo tá va̱ása xíín na̱ ñuu kán kuniso̱ʼona; tavái̱na ta sandíʼi-xa̱ʼíi̱na”, káchi Jehová.