Jeremías
13 Ña̱yóʼo kúú ña̱ ni̱ka̱ʼa̱n Jehová xíʼi̱n: “Kúáʼan satáún* iin cinturón ña̱ lino ta katúnña tokóún, soo kǒo chika̱únña ti̱kui̱í”. 2 Ña̱kán ke̱ʼíi̱ nda̱a̱ táki̱ʼva ni̱ka̱ʼa̱n Jehová xíʼi̱n, sa̱tái̱ iin cinturón ta ka̱túi̱nña tokói̱. 3 Tasaá tuku ni̱ka̱ʼa̱n Jehová xíʼi̱n, ka̱chira: 4 “Kiʼin cinturón ña̱ sa̱táún ña̱ ndíkaa̱ tokóún, ta kúáʼan chí yu̱ta Éufrates ta kán chise̱ʼúnña nu̱ú ni̱ndu̱va̱ kavá”. 5 Ña̱kán ni̱xa̱ʼi̱n ta chi̱seʼíi̱ña yatin yu̱ta Éufrates, nda̱a̱ táki̱ʼva xa̱ʼnda Jehová chiñu nu̱úi̱.
6 Soo tá ni̱ya̱ʼa ku̱a̱ʼání ki̱vi̱, Jehová ni̱ka̱ʼa̱nra xíʼi̱n: “Kúáʼan chí yu̱ta Éufrates ña̱ va̱ʼa ndakiʼún cinturón ña̱ ni̱ka̱ʼi̱n xíʼún chise̱ʼún kán”. 7 Xa̱ʼa̱ ña̱kán ni̱xa̱ʼi̱n chí yu̱ta Éufrates ta ta̱vái̱ cinturón nu̱ú chi̱kaa̱ se̱ʼíi̱ña. Tasaá ki̱ʼii̱n kuenta ña̱ ndi̱ʼi-xa̱ʼa̱ va̱ʼa cinturón kán; ni loʼo va̱ása va̱ʼakaña.
8 Tasaá ni̱ka̱ʼa̱n tuku Jehová xíʼi̱n, ka̱chira: 9 “Ña̱yóʼo kúú ña̱ káʼa̱n Jehová: ‘Nda̱a̱ táki̱ʼva sa̱ndíʼi-xa̱ʼíi̱ ña̱yóʼo saá sandíʼi-xa̱ʼíi̱ ña̱ ni̱nu kúni na̱ ñuu Judá ta saátu sandíʼi-xa̱ʼíi̱ ña̱ ni̱nuní kúni na̱ ñuu Jerusalén. 10 Na̱ yiví na̱ ndi̱va̱ʼaní-ini yóʼo kundoʼona nda̱a̱ táki̱ʼva ndo̱ʼo cinturón ña̱ ni loʼo va̱ása va̱ʼaka, chi na̱yóʼo kǒo xíínna kandíxana ña̱ káʼi̱n ta xa̱ʼa̱ ña̱ so̱ʼonína* ndákundeéna kéʼéna ña̱ kúni̱ miína, ndíku̱nna inka ndióxi̱, káchíñuna nu̱úña ta xíkuxítína nu̱úña’. 11 ‘Saáchi nda̱a̱ táki̱ʼva kútu̱ní núʼni iin cinturón tokó iin ta̱a, saá ni̱xi̱yo ndiʼi na̱ ñuu Israel xíʼin ndiʼi na̱ ñuu Judá nu̱úi̱ chi va̱ʼaní xi̱kitáʼanna xíʼi̱n, káchi Jehová, ña̱ va̱ʼa xa̱a̱na koona na̱ ñui̱, ña̱ va̱ʼa natúʼunna xíʼin inka na̱ yiví xa̱ʼa̱ ki̱víi̱, ña̱ va̱ʼa ndasakáʼnuna yi̱ʼi̱ ta saátu ña̱ va̱ʼa xa̱a̱na koona iin ña̱ʼa ña̱ liviní nu̱úi̱. Soo kǒo níkandíxana ña̱ ni̱ka̱ʼi̱n xíʼinnaʼ.
12 ”Xíniñúʼu ka̱ʼún ña̱yóʼo xíʼinna: ‘Ña̱yóʼo kúú ña̱ káʼa̱n Jehová Ndióxi̱ na̱ ñuu Israel: “Ndiʼi ki̱si náʼnu sákutúnaña xíʼin vino”’. Ta na̱kán ndakuiinna yuʼún: ‘¿Á va̱ása xíni̱vandi̱ ña̱ ndiʼi ki̱si náʼnu sákutúnaña xíʼin vino?’. 13 Ta yóʼó xíniñúʼu ka̱ʼún xíʼinna: ‘Ña̱yóʼo kúú ña̱ káʼa̱n Jehová: “Nda̱a̱ táki̱ʼva chútú ki̱si náʼnu xíʼin vino saá keʼíi̱ xíʼin ndiʼi na̱ ndóo ñuu yóʼo, na̱ rey na̱ ndóo nu̱ú trono ta̱ David, na̱ su̱tu̱, na̱ profeta xíʼin ndiʼi na̱ ñuu Jerusalén nda̱a̱ ná xi̱niina. 14 Ta sakánitáʼi̱nna, nda̱a̱ táki̱ʼva keʼíi̱ xíʼin na̱ íyo se̱ʼe saátu keʼíi̱ xíʼin mií se̱ʼena, káchi Jehová. Kǒo na̱ʼi̱ ña̱ kúndáʼvi-inii̱ xínii̱na, ni va̱ása va̱ʼa koo inii̱ xíʼinna ta ni kǒo kusuchí-inii̱ xa̱ʼa̱na; nda̱a̱ ni iin ña̱ʼa kǒo kasi nu̱úi̱ ña̱ sandíʼi-xa̱ʼíi̱na”’.
15 Kuniso̱ʼondó ta kandíxandó.
Va̱ása ni̱nu kunindó, saáchi Jehová kúú ta̱ ni̱ka̱ʼa̱nña.
16 Ndasakáʼnundó Jehová Ndióxi̱ndó
tá kúma̱níka chindaʼára ña̱ naa
ta saátu tá kúma̱níka kachiʼi* xa̱ʼa̱ndó chí yuku̱ tá xa̱a̱ ku̱ñuú.
Ndóʼó kundatundó ña̱ ná taxira ña̱ ndaye̱ʼe̱
soo ta̱kán taxira ku̱nda̱ti̱* ña̱ naa;
ña̱ yéʼe̱ní ndasaraña ña̱ naaní.
17 Soo tá ndóʼó kǒo xíínndó kuniso̱ʼondó,
kuakuse̱ʼíi̱ xa̱ʼa̱ ña̱ ni̱nuní kúnindó.
Kuakuníi̱ ta iin ndakutú ti̱kui̱í nduchúnu̱úi̱,
saáchi xa̱a̱ nda̱kiʼinna na̱ kúú ndikachi* sa̱na̱ Jehová ku̱a̱ʼa̱n xíʼinna kundoona inka ñuu.
18 Ka̱ʼa̱n ña̱yóʼo xíʼin ta̱ rey ta saátu xíʼin siʼíra: ‘Kúánuundó nu̱ú trono nu̱ú ndóondó,
saáchi corona ña̱ liviní kánuu xi̱níndó ndakavavaña’.
19 Yéʼé ñuu ña̱ íyo chí sur ndásiña ta kǒo na̱ kívi ndakunáña.
Nda̱kiʼinna ndiʼi na̱ ñuu Judá ku̱a̱ʼa̱n xíʼinna inka ñuu, nda̱kiʼinna ndiʼina ku̱a̱ʼa̱nna kundoona inka ñuu.
20 Ndaniʼi nu̱ún ta kotoún ndiʼi na̱ va̱xi chí norte.
¿Ndáa míí ku̱a̱ʼa̱n ndiʼi kití tí ta̱xina ndaʼún, ndikachi tí ndáyáʼviní ta̱xina ndaʼún?
21 ¿Ndáaña ka̱ʼún tá ná taxina castigo ndaʼún,
ta na̱ keʼé ña̱yóʼo kúú na̱ migoún na̱ va̱ʼaní xi̱kitáʼan xíʼún tá ya̱chi̱?
¿Á kǒo xo̱ʼvi̱níún* nda̱a̱ táki̱ʼva xóʼvi̱ iin ñaʼá ñá káku se̱ʼe?
22 Tá ná ndakanixi̱níún ‘¿Nda̱chun kúú ña̱ ndo̱ʼi̱ ndiʼi ña̱yóʼo?’,
saá kunda̱a̱-iniún ña̱ ndo̱ʼún ña̱yóʼo xa̱ʼa̱ ku̱a̱chi ña̱ ni̱ki̱ʼviún,
ña̱kán kúú ña̱ ta̱vána si̱yoún ta i̱xandi̱va̱ʼanína xíʼin si̱ʼndi̱-xa̱ʼún.
23 ¿Á kivi nasama na̱ cusita* ki̱ʼva ña̱ náʼa̱ ñii̱na?
¿Á kivi nasama tí leopardo ki̱ʼva ña̱ náʼa̱ ñii̱rí?
Tá ná kuu ña̱yóʼo, ndóʼó kiviva keʼéndó ña̱ va̱ʼa,
ndóʼó na̱ va̱ʼaní sa̱kúaʼa keʼé ña̱ va̱ása va̱ʼa.
24 Xíkání taxii̱ ku̱ʼu̱nndó nda̱a̱ táki̱ʼva ndóʼo yita* yi̱chí ña̱ ndániʼi ta̱chí ña̱ kée chí nu̱ú ñuʼú yi̱chí.
25 Ña̱yóʼo kúú ña̱ ndakiʼún ta xa̱a̱ chu̱ʼii̱nña, káchi Jehová,
saáchi na̱ndóso-iniún xa̱ʼíi̱ ta nina ña̱ vatá* kúú ña̱ kándíxaún.
26 Xa̱ʼa̱ ña̱kán ndaniʼii̱ si̱yoún nda̱a̱ xi̱níún ta ndakasiña nu̱ún,
ta ndiʼina kunina ña̱ cháláún,
27 kunina ña̱ xi̱kisi̱ún xíʼin na̱ kǒo nítindaʼa̱ xíʼún, ña̱ ndeéní xi̱ndaʼyi̱ún xi̱xikaún nda̱a̱ táki̱ʼva kéʼé iin kuáyi̱ tí kúni̱ní ku̱i̱n,
ña̱ kininí xi̱keʼún* saáchi ni̱ki̱si̱ún xíʼin ku̱a̱ʼánína.
Xi̱nii̱ ña̱ kininí ni̱xi̱yo ña̱ xi̱keʼún
chí xi̱kí ta saátu chí yuku̱.
Ndáʼviní yóʼó ñuu Jerusalén.
¿Nda̱a̱ amaví ndakundeún keʼún ña̱ kini?”.