Jeremías
14 Ña̱yóʼo kúú ña̱ ni̱ka̱ʼa̱n Jehová xíʼin ta̱ Jeremías xa̱ʼa̱ ña̱ va̱ása kuun sa̱vi̱:
2 Ñuu Judá kúsuchíní-iniña ta yéʼéña ndi̱ʼi-xa̱ʼa̱ ndiʼiña.
Ni̱ko̱yoña nu̱ú ñuʼú ta kúsuchíní-iniña,
ta nda̱a̱ ñuu Jerusalén íyo iin na̱ ndeéní kána xa̱ʼa̱ ña̱ xóʼvi̱na.*
3 Na̱ xíʼin veʼe chíndaʼána na̱ káchíñu nu̱úna* ña̱ ku̱ʼu̱nna xa̱ʼa̱ ti̱kui̱í.
Ku̱a̱ʼa̱nna nda̱a̱ nu̱ú ñúʼu ti̱kui̱í* soo kǒorá ndáni̱ʼína.
Vichí* ki̱sina ndíkóna.
Kúkaʼan nu̱úna ta ndákava-inina,
ta ndákasina xi̱nína.
4 Nda̱a̱ ni̱yi̱chi̱ nu̱ú ñuʼú
xa̱ʼa̱ ña̱ kǒo sa̱vi̱ kúun,
na̱ chíʼi iin ku̱a̱ʼa̱n-inina ta ndákasina xi̱nína.
5 Nda̱a̱ tí yusu síʼi tí íyo chí yuku̱ sándakoorí se̱ʼe loʼorí tí sa̱kán ka̱ku
saáchi kǒo ku̱ʼu̱ kaxírí.
6 Tí burro yukú nda̱kutáʼanrí chí xi̱ní xi̱kí nu̱ú kǒo nda̱a̱ ni iin ña̱ʼa.
7 Ndiʼi ña̱ va̱ása va̱ʼa ke̱ʼéndi̱ náʼa̱ña ña̱ ni̱ki̱ʼvindi̱ ku̱a̱chi,
Jehová, chindeétáʼan xíʼinndi̱ xa̱ʼa̱ ki̱vi̱ún.
Ku̱a̱ʼání yichi̱ va̱ása nda̱kú níxi̱yo inindi̱ xíʼún,
ta ni̱ki̱ʼvindi̱ ku̱a̱chi nu̱ún.
8 Yóʼó kúú ta̱ ndáa-ini na̱ ñuu Israel, yóʼó kúú ta̱ sakǎkuna tiempo ña̱ xóʼvi̱na,
¿nda̱chun kéʼún nda̱a̱ táki̱ʼva kéʼé na̱ ke̱e inka ñuu?
¿Nda̱chun kéʼún nda̱a̱ táki̱ʼva kéʼé na̱ yáʼa ña̱ ku̱su̱nna iin ñuú kuití?
9 ¿Nda̱chun kéʼún nda̱a̱ táki̱ʼva kéʼé iin ta̱a ta̱ sa̱na̱ xi̱ní?
¿Nda̱chun kéʼún nda̱a̱ táki̱ʼva kéʼé iin ta̱a ta̱ ndakúní ta̱ kǒo kívi sakǎku inkana?
Miíún Jehová íyoún xíʼinndi̱
ta ndi̱ʼi̱ níʼindi̱ ki̱vi̱ún.
Va̱ása sandákoondaʼún ndi̱ʼi̱.
10 Ña̱yóʼo kúú ña̱ káʼa̱n Jehová xa̱ʼa̱ na̱ ñuu yóʼo: “Kútóonína ku̱ʼu̱nna chí yóʼo ta ku̱ʼu̱nna chí káa; kǒo xíín xa̱ʼa̱na kundoo táxi̱nña. Xa̱ʼa̱ ña̱kán va̱ása kúsi̱í-ini Jehová xíʼinna. Vitin ndakaʼánra xa̱ʼa̱ ña̱ va̱ása va̱ʼa ke̱ʼéna ta ndatiinra ku̱a̱chi xíʼinna”.
11 Tasaá ni̱ka̱ʼa̱n Jehová xíʼi̱n: “Va̱ása ka̱ʼún xíʼi̱n ña̱ taxii̱ ña̱ va̱ʼa kundoo na̱ ñuu yóʼo. 12 Tá kǒo xíxina iníí ki̱vi̱,* yi̱ʼi̱ va̱ása xíniso̱ʼi̱ ña̱ xákundáʼvina nu̱úi̱; tá xáʼmina kití* ta sóko̱narí nu̱úi̱* ta saátu tá sóko̱na harina, yi̱ʼi̱ kǒo ndákiʼii̱n ña̱yóʼo. Kuniñúʼi̱ ku̱a̱chi, so̱ko xíʼin kue̱ʼe̱ ña̱ sandíʼi-xa̱ʼíi̱na”.
13 Tasaá ni̱ka̱ʼi̱n: “Táta káʼnu Jehová, ña̱yóʼo káʼa̱n na̱ profeta xíʼinna: ‘Ndóʼó kǒo kunivíndó ku̱a̱chi ni so̱ko chi yi̱ʼi̱ taxii̱ ña̱ viíní kundoondó yóʼo’”.
14 Tasaá ni̱ka̱ʼa̱n Jehová xíʼi̱n: “Na̱ profeta yóʼo xíniñúʼuna ki̱víi̱ ña̱ ka̱ʼa̱nna ña̱ vatá.* Su̱ví yi̱ʼi̱ níchindaʼána ni va̱ása níxaʼndai̱ chiñu nu̱úna ña̱ keʼéna ña̱yóʼo, ni kǒo níka̱ʼi̱n nda̱a̱ ni iin ña̱ʼa xíʼinna. Visión ña̱ káʼa̱n na̱ profeta yóʼo xa̱ʼa̱ ña̱ vatáva kúúña ta ña̱ káʼa̱nna xíʼinna kuu su̱ví ña̱ ndixaví kúúña, chi ña̱ vatá ña̱ ñúʼu níma̱vana káʼa̱nna xíʼinna. 15 Xa̱ʼa̱ ña̱kán ña̱yóʼo kúú ña̱ káʼa̱n Jehová xa̱ʼa̱ na̱ profeta na̱ xíniñúʼu ki̱víi̱ ña̱ ka̱ʼa̱nna xa̱ʼa̱ ña̱ kuu (ni su̱ví yi̱ʼi̱ kúú ta̱ níchindaʼána) ta káʼa̱nna ña̱ va̱ása koo ku̱a̱chi ni so̱ko ñuu yóʼo: ‘Ku̱a̱chi xíʼin so̱ko sandíʼi-xa̱ʼa̱ña na̱ profeta yóʼo. 16 Ta na̱ yiví na̱ xíniso̱ʼo ña̱ káʼa̱n na̱yóʼo kuvina kundoona chí calle ñuu Jerusalén xa̱ʼa̱ ña̱ koo so̱ko xíʼin ku̱a̱chi. Kǒo na̱ sandúxu̱nñaʼá (ni miína ni ná síʼina ni se̱ʼeta̱ana ni se̱ʼe-síʼina), saáchi chindaʼíi̱ iin tu̱ndóʼo nu̱úna xa̱ʼa̱ ña̱ ke̱ʼéna’.
17 ”Ka̱ʼa̱n tu̱ʼun yóʼo xíʼinna:
‘Ná ndakutú ti̱kui̱í nduchúnu̱úi̱ ta ñuú xíʼin káʼñu* ndeéní ná kuakui̱,
saáchi ñá loʼo kúa̱an se̱ʼe ñui̱ ndi̱ʼi-xa̱ʼa̱ñá;
ndeéní sa̱túkue̱ʼe̱nañá.
18 Tá ku̱a̱ʼi̱n chí yuku̱,
xítoi̱ ña̱ ndóo na̱ ni̱xi̱ʼi̱ nu̱ú ku̱a̱chi.
Tá ku̱a̱ʼi̱n chí ñuu,
xítoi̱ ña̱ ku̱a̱ʼánína kúúmiína kue̱ʼe̱ xa̱ʼa̱ ña̱ íyo so̱ko.
Ta nda̱a̱ na̱ profeta xíʼin na̱ su̱tu̱ ku̱a̱ʼa̱nna inka ñuu ña̱ kǒo xíni̱na’”.
19 ¿Á kǒo kúni̱kaún xíniún ñuu Judá? ¿Á sáa̱-iniún xíniún Sion?
¿Nda̱chun ka̱niún ndi̱ʼi̱? Vitin kǒo nda̱a̱ ni iin na̱ kivi chindeétáʼan xíʼinndi̱.
Xi̱ndatundi̱ va̱ʼaní kundoondi̱, soo kǒo ña̱ va̱ʼa níkuu;
xi̱ndatundi̱ ña̱ chindeétáʼanna xíʼinndi̱, soo nu̱úka ña̱yóʼo na̱ yíʼviva kúúndi̱.
20 Jehová, ndákunivandi̱ ña̱ ndi̱va̱ʼaní ni̱xi̱yo inindi̱
ta saátu ña̱ va̱ása va̱ʼa íyo ña̱ ke̱ʼé na̱ táʼanndi̱ na̱ xi̱ndoo xi̱naʼá,
saáchi ni̱ki̱ʼvindi̱ ku̱a̱chi nu̱ún.
21 Xa̱ʼa̱ ki̱vi̱ún, kǒo kundasíún kuniún ndi̱ʼi̱;
kǒo kundasíún kuniún tronoún tú ndáyáʼviní.
Ndakaʼún xa̱ʼa̱ trato ña̱ ke̱ʼún xíʼinndi̱ ta va̱ása sandíʼi-xa̱ʼúnña.
22 ¿Á kuchiñuví ndióxi̱ ña̱ va̱ása ndáyáʼvi ña̱ ndásakáʼnu na̱ inka ñuu taxiña ña̱ kuun sa̱vi̱?
¿Á kuchiñu mií ndiví taxiña ña̱ ndeéní kuun sa̱vi̱?
Jehová Ndióxi̱ndi̱, ¿á su̱ví iinlá yóʼó kúú ta̱ kuchiñu keʼé ña̱yóʼo?
Yóʼó kúú ta̱ ndáa-inindi̱,
saáchi yóʼó kúú ta̱ kuchiñu keʼé ndiʼi ña̱yóʼo.