Jeremías
15 Tasaá ni̱ka̱ʼa̱n Jehová xíʼi̱n: “Ni ná kixi ta̱ Moisés xíʼin ta̱ Samuel nu̱úi̱ ña̱ ka̱ʼa̱nna xa̱ʼa̱ na̱ ñuu yóʼo, kǒo chindeétáʼanvíi̱ xíʼinna. Tavána nu̱úi̱. Ná ku̱ʼu̱nna. 2 Tá ná nda̱ka̱tu̱ʼunna yóʼó ‘¿Ndáaña kundoʼondi̱?’, yóʼó xíniñúʼu ka̱ʼún xíʼinna ‘Ña̱yóʼo kúú ña̱ káʼa̱n Jehová:
“Savandó kuvindó xíʼin kue̱ʼe̱ ña̱ ndeéní.
Savandó kuvindó xíʼin espada.
Savandó kuvindó xíʼin so̱ko.
Ta savandó ndakiʼinna ndóʼó ku̱ʼu̱n xíʼinna inka ñuu”’.
3 ”‘Yi̱ʼi̱ chindaʼíi̱ ku̱mí tu̱ndóʼo nu̱úndó,* káchi Jehová: kuvindó xíʼin espada, kañuu* ti̱na* ku̱ñundó, kití tí ndáchí chí ndiví kaxírí ndóʼó ta kití tí íyo nu̱ú ñuʼú kúú tí kaxí ku̱ñundó ña̱ ná kindo̱o. 4 Ta xa̱ʼa̱ ña̱ keʼíi̱, ndiʼi na̱ ñuu na̱ ndóo nu̱ú ñuʼú yóʼo kundasína kunina ndóʼó xa̱ʼa̱ ku̱a̱chi ta̱ Manasés se̱ʼe ta̱ Ezequías, ta̱ xi̱kuu rey ñuu Judá, xa̱ʼa̱ ña̱ ke̱ʼéra chí Jerusalén.
5 ¿Ndáana na̱ʼa̱ ña̱ kúndáʼvi-inina xínina yóʼó ñuu Jerusalén?
¿Ndáana kusuchí-ini kuni yóʼó?
¿Ndáana kundichi ta nda̱ka̱tu̱ʼunna yóʼó á íyo va̱ʼún?’.
6 ‘Sa̱ndákoún yi̱ʼi̱’, káchi Jehová.
‘Ta ña̱ kéʼún kúú ña̱ ndákundeún kúxíkáún nu̱úi̱.*
Xa̱ʼa̱ ña̱kán chindaʼíi̱ tu̱ndóʼo nu̱ún ta sandíʼi-xa̱ʼíi̱ yóʼó.
Xa̱a̱ ku̱nai̱ ña̱ kúndáʼvi-inii̱ xínii̱ yóʼó.
7 Nda̱a̱ táki̱ʼva kéʼéna tá ndátivina* trigo chí yéʼé ñuu, saá keʼíi̱ xíʼinndó ta xíkání katai̱ ndóʼó.
Kindai̱ na̱ se̱ʼendó ndaʼa̱ndó.
Sandíʼi-xa̱ʼíi̱ na̱ ñui̱,
saáchi na̱yóʼo kǒo níxiinna sandákoona yichi̱ ña̱ ki̱ʼinna ku̱a̱ʼa̱nna.
8 Ku̱a̱ʼáníka koo ná ñaʼá ná ni̱xi̱ʼi̱ yii̱ ñuu yóʼo nu̱úka yu̱ti ña̱ íyo yuʼú tá mar.
Tá káʼñu* chindaʼíi̱ iin ta̱ sandíʼi-xa̱ʼa̱ na̱yóʼo, sandíʼi-xa̱ʼa̱ra ná ñaʼá ná íyo se̱ʼe ta saátu na̱ ta̱a kúa̱an.
Iin kama sakái̱ xi̱nína ta va̱ása kunda̱a̱ka-inina ndáaña keʼéna ta yi̱ʼvínína.
9 Ñaʼá ñá ka̱ku u̱xa̱ se̱ʼe xíʼi̱tóoñá;*
ni kǒo kívika ndakiʼinñá ta̱chíñá.
Ni kánuukava ñu̱ʼu,* soo xa̱a̱ ñuúva kúúña túviñá,
ta ña̱yóʼo sa̱kúkaʼanníña nu̱úñá ta ku̱sikindaanañá’.
‘Ta ndiʼika na̱ kíndo̱o,
ndataxii̱na ndaʼa̱ na̱ sáa̱-ini xíniñaʼá ña̱ sandíʼi-xa̱ʼa̱nana’, káchi Jehová”.
10 Siʼí miíi̱, ndáʼviníi̱ xa̱ʼa̱ ña̱ sa̱kákún yi̱ʼi̱.
Nina xa̱ʼa̱ yi̱ʼi̱ kúú ña̱ kánitáʼanna ta íyoní ku̱a̱chi ñuu yóʼo.
Kǒo nítaxi tói̱* ña̱ʼa ndaʼa̱ inkana ta ni kǒo níndukú tói̱ ña̱ʼa nu̱úna,
soo ndiʼina chíkaa̱na chiʼña yi̱ʼi̱.
11 Jehová ni̱ka̱ʼa̱nra xíʼi̱n: “Chindeétáʼanvai̱ xíʼún;
ndakiʼinvai̱ tu̱ʼún nu̱ú na̱ sáa̱-ini xíni yóʼó
tá ná kixi tu̱ndóʼo nu̱ún, tá ná xo̱ʼvi̱ún.
12 ¿Á kuchiñu iin na̱ yiví sakúachi válína hierro,
hierro ña̱ ke̱e chí norte? ¿Á kuchiñuna sakúachi válína cobre?
13 Ndataxii̱ ña̱ʼa ña̱ kúúmiíún ta saátu ña̱ʼa ña̱ ndáyáʼvi ña̱ kúúmiíún ndaʼa̱ inkana,
ta kǒo nda̱a̱ ni iin ña̱ʼa ndakiʼii̱n xa̱ʼa̱ ña̱yóʼo,
xa̱ʼa̱ ndiʼi ku̱a̱chi ña̱ ni̱ki̱ʼviún iníí nu̱ú ñuʼú yóʼo.
14 Ndataxii̱ña ndaʼa̱ na̱ sáa̱-ini xíni yóʼó
ña̱ va̱ʼa ná ndakiʼinnaña ku̱ʼu̱n xíʼinna nu̱ú iin ñuʼú ña̱ va̱ása xíni̱ún.
Saáchi ña̱ sái̱ xíʼinndó íyoña nda̱a̱ táki̱ʼva íyo iin ñuʼu̱ ña̱ xíxi̱ contrandó”.
15 Xa̱a̱ kúnda̱a̱va-iniún xa̱ʼa̱ ña̱yóʼo, Jehová.
Ndakaʼún xa̱ʼíi̱ ta kiʼin va̱ʼún kuenta xíʼi̱n.
Ka̱ʼa̱n ku̱a̱chi xa̱ʼíi̱ xíʼin na̱ ndíku̱n sa̱tái̱.
Xa̱ʼa̱ ña̱ kúee íyo iniún,* va̱ása taxiún ña̱ kuvii̱.
Kúnda̱a̱va-iniún ña̱ xa̱ʼa̱ miíún kúú ña̱ kúndeé-inii̱ tá káʼa̱n-ndi̱va̱ʼana xíʼi̱n.
16 Nda̱ni̱ʼíi̱ tu̱ʼún ta xa̱xíi̱ña;
ta tu̱ʼún yóʼo sa̱kúsi̱íníña-inii̱, sa̱kúsi̱íníña níma̱i̱,
saáchi yi̱ʼi̱ níʼii̱ ki̱vi̱ún, Jehová Ndióxi̱ ta̱ xáʼndachíñu nu̱ú na̱ ángel.
17 Va̱ása íyoi̱ xíʼin na̱ kúni̱ kuití kusi̱í-ini ta ni va̱ása kúsi̱í-inii̱ xíʼinna.
Xa̱ʼa̱ ña̱ miíún kúú ta̱ níʼi yichi̱ nu̱úi̱, iinlá miívai̱ íyo,
saáchi ta̱xiún ña̱ ndeéní ná sa̱íi̱ xíʼinna xa̱ʼa̱ ña̱ kéʼéna.
18 ¿Nda̱chun ndiʼi tiempo xóʼvi̱i̱* ta kǒo kívi ndaʼa nu̱ú tu̱kue̱ʼi̱?
Va̱ása xíínña ndaʼaña.
¿Á xa̱ún koún nda̱a̱ táki̱ʼva íyo nu̱ú kána ti̱kui̱í ña̱ va̱ása kívi kundaa-inina chi kǒo ti̱kui̱í kána?
19 Xa̱ʼa̱ ña̱kán, ña̱yóʼo kúú ña̱ káʼa̱n Jehová:
“Tá ná ndikóún nu̱úi̱, yi̱ʼi̱ sandáʼavai̱ yóʼó
ta kundichiún nu̱úi̱.
Tá ná ndataʼvíún ña̱ʼa ña̱ ndáyáʼvi nu̱ú ña̱ va̱ása ndáyáʼvi,
xa̱ún koún nda̱a̱ táki̱ʼva íyo yuʼíi̱.*
Mií na̱kán ndaka̱xin á ndikóna nu̱ún,
soo yóʼó va̱ása ndikóún nu̱úna”.
20 “Yi̱ʼi̱ taxii̱ ña̱ ná xa̱ún koún nda̱a̱ táki̱ʼva íyo iin nama̱ ña̱ cobre ña̱ kútu̱ní ndási nu̱ú na̱ ñuu yóʼo.
Na̱yóʼo kanitáʼanvana xíʼún,
soo kǒo kuchiñuna xíʼún,
saáchi yi̱ʼi̱ íyoi̱ xíʼún ña̱ va̱ʼa sakǎkui̱ yóʼó ta ndatavái̱ yóʼó ndaʼa̱na”, káchi Jehová.
21 “Yi̱ʼi̱ ndatavái̱ yóʼó ndaʼa̱ na̱ kéʼé ña̱ va̱ása va̱ʼa ta sakǎkui̱ yóʼó nu̱ú na̱ ndi̱va̱ʼa-ini”.