Jeremías
16 Tuku ni̱ka̱ʼa̱n Jehová xíʼi̱n, ta ka̱chira: 2 “Kǒo ndukún ñá síʼún ta ni va̱ása koo se̱ʼeta̱ún xíʼin se̱ʼe-síʼún ñuu yóʼo. 3 Saáchi ña̱yóʼo kúú ña̱ káʼa̱n Jehová xa̱ʼa̱ se̱ʼeta̱a na̱ yiví xíʼin se̱ʼe-síʼina na̱ ka̱ku ñuu yóʼo, ta saátu xa̱ʼa̱ yivána xíʼin siʼína na̱ sa̱kákuñaʼá: 4 ‘Kuvina xíʼin kue̱ʼe̱ ña̱ ndeéní, soo kǒo ni iin na̱ kusuchí-ini xa̱ʼa̱na ta ni kǒo sandúxu̱nnana; xa̱a̱na koona nda̱a̱ táki̱ʼva íyo si̱ʼví ña̱ ndóo nu̱ú ñuʼú. Kuvina nu̱ú ku̱a̱chi ta saátu xíʼin so̱ko ta kití tí ndáchí chí ndiví xíʼin kití tí íyo nu̱ú ñuʼú kúú tí kaxí ku̱ñuna’.
5 Ña̱yóʼo kúú ña̱ káʼa̱n Jehová:
‘Va̱ása ki̱ʼviún nda̱a̱ ni iin veʼe nu̱ú nda̱kutáʼan na̱ ndóo xíxi xa̱ʼa̱ ña̱ ni̱xi̱ʼi̱ iin na̱ veʼena,
ta kǒo ku̱ʼún kán kuakún ta ka̱ʼún xíʼinna ña̱ kúsuchí-iniún xíʼinna’.
‘Saáchi yi̱ʼi̱ va̱ása taxikai̱ ña̱ vií kundoo na̱ ñuu yóʼo, káchi Jehová,
ni va̱ása na̱ʼa̱kai̱ ña̱ ndixaní kúʼvi̱-inii̱* xínii̱na ni ña̱ kúndáʼvi-inii̱ xínii̱na.
6 Ndiʼi na̱ xi̱kuaʼa̱ xíʼin na̱ va̱lí kuvina ñuu yóʼo.
Va̱ása ndu̱xu̱nna,
kǒo na̱ kusuchí-ini xa̱ʼa̱na
ta kǒo nda̱a̱ ni iin na̱ kaʼnda mií ni va̱ása xa̱tána xi̱nína xa̱ʼa̱ na̱yóʼo.*
7 Kǒo nda̱a̱ ni iin na̱ taxi ña̱ kuxu na̱ kúsuchí-ini
ña̱ va̱ʼa sandíkona-inina xa̱ʼa̱ ña̱ ni̱xi̱ʼi̱ na̱ veʼena;
ta kǒo nda̱a̱ ni iin na̱ taxi copa tá vino koʼona
xa̱ʼa̱ ña̱ ni̱xi̱ʼi̱ yivána á siʼína ña̱ va̱ʼa sandíkona-inina.
8 Va̱ása ki̱ʼviún veʼe nu̱ú íyo vikó
ña̱ kuxún ta koʼún xíʼin na̱ yiví kán’.
9 ”Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Nani tákukandó, kuninu̱úndó ña̱ kǒo taxikai̱ ña̱ nda̱ʼyi̱ kóʼó* na̱ yiví xa̱ʼa̱ ña̱ kúsi̱í-inina ñuu yóʼo, ta ni kǒo kuniso̱ʼokandó ta̱chí ta̱ ti̱ndaʼa̱ ni ñá ti̱ndaʼa̱’.
10 ”Tá ná ka̱ʼún tu̱ʼun yóʼo xíʼin na̱ ñuu yóʼo, na̱yóʼo nda̱ka̱tu̱ʼunna yóʼó: ‘¿Nda̱chun ni̱ka̱ʼa̱n Jehová ña̱ chindaʼára ndiʼi tu̱ndóʼo yóʼo nu̱úndi̱? ¿Ndáaña va̱ása va̱ʼa ke̱ʼéndi̱ ta ndáa ku̱a̱chi ni̱ki̱ʼvindi̱ nu̱ú Jehová Ndióxi̱ndi̱?’. 11 Yóʼó xíniñúʼu ka̱ʼún xíʼinna: ‘“Saáchi na̱ yivándó sa̱ndákoona yi̱ʼi̱, káchi Jehová, ta kǒo nísandákoona ña̱ ndasakáʼnuna inka ndióxi̱ ni ña̱ kachíñuna nu̱úña ta kuxítína nu̱úña. Soo sa̱ndákoovana yi̱ʼi̱ ta kǒo níxiniso̱ʼona ley ña̱ ta̱xii̱ ndaʼa̱na. 12 Ta ndóʼó kininíka kéʼéndó nu̱ú na̱ táʼanndó na̱ xi̱ndoo xi̱naʼá; nu̱úka ña̱ kandíxandó yi̱ʼi̱, so̱ʼoníndó* ta kéʼéndó ña̱ va̱ása va̱ʼa ña̱ ndíkaa̱ níma̱ndó. 13 Xa̱ʼa̱ ña̱kán tavái̱ ndóʼó ta xíkání chindaʼíi̱ ndóʼó ku̱ʼu̱nndó, nu̱ú iin ñuʼú ña̱ va̱ása xíni̱ndó ta ni na̱ táʼanndó na̱ xi̱ndoo xi̱naʼá va̱ása níxi̱xini̱naña ta kán kachíñundó nu̱ú inka ndióxi̱ ñuú xíʼin káʼñu,* saáchi yi̱ʼi̱ va̱ása chindeétáʼankai̱ xíʼinndó”’.
14 ”‘Xa̱ʼa̱ ña̱kán xa̱a̱ ku̱yatin kixaa̱ ki̱vi̱, káchi Jehová, ña̱ va̱ása ka̱ʼa̱nkana: “Chínaʼíi̱* xa̱ʼa̱ Jehová Ndióxi̱ ta̱ táku, ta̱ ta̱vá na̱ ñuu Israel chí Egipto”. 15 Nu̱úka ña̱yóʼo, ka̱ʼa̱nna: “Chínaʼíi̱ xa̱ʼa̱ Jehová Ndióxi̱ ta̱ táku, ta̱ sa̱ndándikó na̱ ñuu Israel na̱ ni̱xa̱ʼa̱n xi̱ndoo nu̱ú ñuʼú ña̱ íyo chí norte ta saátu nu̱ú ndiʼika ñuʼú nu̱ú ni̱xa̱ʼa̱nna xi̱ndoona”. Taxii̱ ña̱ ndikóndó nu̱ú ñuʼúndó, ñuʼú ña̱ ta̱xii̱ ndaʼa̱ na̱ táʼanndó na̱ xi̱ndoo xi̱naʼá’.
16 ‘Kanai̱ ku̱a̱ʼání na̱ tíin ti̱a̱ká, káchi Jehová,
ta na̱kán tiinna ndóʼó.
Tándi̱ʼi kanai̱ ku̱a̱ʼání na̱ xáʼní kití,
ta na̱kán kaʼnína ndóʼó chí yuku̱, chí xi̱kí
ta saátu nu̱ú ni̱ndu̱va̱ kavá.
17 Saáchi xítovai̱ ndiʼi ña̱ kéʼéna.
Kǒo kivi koose̱ʼéna nu̱úi̱,
ta ni kǒo kivi chise̱ʼéna ña̱ va̱ása va̱ʼa ña̱ kéʼéna nu̱úi̱.
18 Siʼna taxii̱ castigo ndaʼa̱na xa̱ʼa̱ ña̱ va̱ása va̱ʼa ke̱ʼéna ta saátu xa̱ʼa̱ ku̱a̱chi ña̱ ni̱ki̱ʼvina nu̱úi̱,
saáchi i̱xayaku̱a̱na ñuʼíi̱ xíʼin ndióxi̱ ña̱ kini ña̱ i̱xava̱ʼana ña̱ va̱ása táku
ta sa̱kútúna nu̱ú herenciai̱ xíʼin ña̱ʼa ña̱ kini’”.
19 Jehová, yóʼó kúú ta̱ táxi ndee̱ ndaʼíi̱, ta nda̱a̱ táki̱ʼva íyo iin ñuu ña̱ kútu̱ní ndási saá íyoún,
kán kúú nu̱ú kivi kunui̱ ku̱ʼi̱n tá ná kixaa̱ tu̱ndóʼo,
nu̱ú yóʼó kúú ña̱ kixi ndiʼi na̱ ñuu na̱ xíkáva̱ʼa ndóo, na̱ íyo nu̱ú ñuʼú yóʼo
ta ka̱ʼa̱nna: “Herencia ña̱ ni̱ndo̱o ndaʼa̱ na̱ táʼanndi̱ na̱ xi̱ndoo xi̱naʼá kúú ña̱ ndasakáʼnuna ndióxi̱ vatá,*
ña̱ʼa ña̱ va̱ása ndáyáʼvi ña̱ kǒo chiñu”.
20 ¿Á kivi ixava̱ʼa iin ta̱a ndióxi̱ra?
Ña̱ íxava̱ʼara su̱ví ndixa ndióxi̱ví kúúña.
21 “Xa̱ʼa̱ ña̱kán taxii̱ ña̱ ná kunda̱a̱-inina,
kunda̱a̱-inina ña̱ ndakúníi̱ ta kúúmiíníi̱ ndee̱,
ta kunda̱a̱-inina ña̱ ki̱víi̱ kúú Jehová”.