Jeremías
17 “Ku̱a̱chi ña̱ ni̱ki̱ʼvi na̱ ñuu Judá ni̱ka̱ʼyi̱ña xíʼin ña̱ʼa* ña̱ hierro.
Ku̱a̱chi ña̱ ni̱ki̱ʼvina ni̱ka̱ʼyi̱ña níma̱na xíʼin ka̱a ña̱ kúúmií diamante nu̱ú,
ta saátu ni̱ka̱ʼyi̱ña ndiki̱ altarna,
2 ta na̱ se̱ʼena ndákaʼánna xa̱ʼa̱ altarna
ta saátu xa̱ʼa̱ yitu̱n tú xi̱ndasakáʼnuna* tú xi̱ndita síi̱n* yitu̱n tú ndokoní ndaʼa̱ chí xi̱ní xi̱kí ña̱ súkun,
3 chí xi̱ní yuku̱.
Ndataxii̱ ndiʼi ña̱ʼa ña̱ va̱ʼa ña̱ kúúmiíún xíʼin ña̱ʼa ña̱ ndáyáʼvi ña̱ kúúmiíún ndaʼa̱ inkana;
ndataxii̱ nu̱ú ndásakáʼnún ndióxi̱ún* ndaʼa̱ inkana xa̱ʼa̱ ku̱a̱chi ña̱ ni̱ki̱ʼviún nu̱ú iníísaá ñuʼú.
4 Miíún ndaka̱xin ña̱ sandákoún herencia ña̱ ta̱xii̱ ndaʼún.
Ta ixandúxai̱ xíʼún kachíñún nu̱ú na̱ sáa̱-ini xíni yóʼó nu̱ú iin ñuʼú ña̱ va̱ása xíni̱ún,
chi ndóʼó sa̱sáa̱níndó yi̱ʼi̱ ta ña̱ sái̱ nda̱a̱ táki̱ʼva íyo iin ñuʼu̱ saá íyoña.
Ndiʼi tiempo kokoña”.*
5 Ña̱yóʼo kúú ña̱ káʼa̱n Jehová:
“Na̱ yiví na̱ ndáa-ini inka na̱ yiví ná ndakiʼinna chiʼña,
saátu na̱ ndátu ña̱ ná chindeétáʼan inka na̱ yiví xíʼinna,
ta níma̱na kúxíkáña nu̱ú Jehová.
6 Koona nda̱a̱ táki̱ʼva íyo iin yitu̱n tú íyo chí nu̱ú ñuʼú yi̱chí.
Tá ná kixaa̱ ña̱ va̱ʼa, kǒo kuninaña,
chi koona nu̱ú ñuʼú yi̱chí nu̱ú kǒo nda̱a̱ ni iin ña̱ʼa íyo,
nu̱ú ñuʼú nu̱ú íyoní ñi̱i̱ ta kǒo nda̱a̱ ni iin ña̱ʼa kívi kana.
7 Na̱ yiví na̱ kándíxa Jehová ná ndakiʼinna bendición,
na̱ yiví na̱ ndáa-ini Jehová ná ndakiʼinnaña.
8 Koona nda̱a̱ táki̱ʼva íyo iin yitu̱n tú níndichi yatin nu̱ú yáʼa ti̱kui̱í,
tú káa̱ ti̱oʼo* nda̱a̱ nu̱ú yáʼa ku̱a̱ʼání ti̱kui̱í.
Tá ná kixaa̱ tiempo kaʼní, kǒo ña̱ kundoʼonú chi ndokoní koo ndaʼa̱nú.
Tá ná kixaa̱ tiempo ña̱ yi̱chí, kǒo ña̱ kundoʼonú chi ndakundeénú taxinú ku̱i̱ʼi.
9 Níma̱ na̱ yiví va̱ʼaníka sándaʼviña* nu̱ú inkaka ña̱ʼa ta nda̱a̱ kivi chikaa̱ñana nu̱ú tu̱ndóʼo.
¿Ndáana kivi kunda̱a̱-ini xíʼinña?
10 Yi̱ʼi̱ Jehová kúú ta̱ kúnda̱a̱-inii̱ ndáaña kúú ña̱ ndíkaa̱ níma̱na,
saátu ña̱ ndákanixi̱nína,*
nda̱a̱ táki̱ʼva íyo ña̱ kéʼéna saá koo ña̱ taxii̱ ndaʼa̱na,
nda̱a̱ táki̱ʼva íyo ña̱ kéʼéna saá koo ña̱ ndakiʼinna.
11 Nda̱a̱ táki̱ʼva kéʼé iin saa* tí ndákaya ndi̱vi̱ ña̱ va̱ása níxakinrí,
saá kéʼé na̱ yiví na̱ sándaʼvi ña̱ va̱ʼa kuumiína ku̱a̱ʼá ña̱ ku̱i̱ká.
Soo loʼova tiempo kooña xíʼinna ta ya̱ʼaña ku̱ʼu̱nvaña
ta tándi̱ʼi kunaʼa̱ ña̱ na̱ kíʼvíva kúúna”.
12 Nu̱ú ndásakáʼnuyó Ndióxi̱yó íyoña nda̱a̱ táki̱ʼva íyo iin trono tú ndáyáʼviní tú ndu̱káʼnu nda̱a̱ tá xa̱ʼa̱.
13 Jehová, yóʼó kúú ta̱ ndáa-ini na̱ ñuu Israel,
ndiʼi na̱ sándakoo yóʼó kukaʼan nu̱úna.
Na̱ kúxíká nu̱ún* ndañúʼuna nda̱a̱ táki̱ʼva ndáñúʼu ña̱ káʼyi̱ nu̱ú yáká,*
saáchi sa̱ndákoona yóʼó Jehová, ta̱ táxi ti̱kui̱í tá taxi ña̱ kutakuna.
14 Tá ná sandáʼún yi̱ʼi̱ Jehová, ndaʼavai̱.
Tá ná sakǎkún yi̱ʼi̱, ka̱kuvai̱;
saáchi yóʼó kúú ta̱ ndásakáʼnui̱.
15 Koto, savana káʼa̱nna xíʼi̱n:
“¿Ndáa míí ku̱a̱ʼa̱n ña̱ ni̱ka̱ʼa̱n Jehová?
Ná xi̱nu loʼoña”.
16 Soo yi̱ʼi̱ kǒo nísandákoi̱ ña̱ koi̱ iin pastor ta kundiku̱i̱n yóʼó
ta ni kǒo níkuni̱i̱ ña̱ kixaa̱ ki̱vi̱ ña̱ koo tu̱ndóʼo.
Yóʼó kúnda̱a̱ va̱ʼa iniún xa̱ʼa̱ ndiʼi ña̱ ni̱ka̱ʼi̱n.
Xi̱niún tá ku̱u ndiʼi ña̱yóʼo.
17 Va̱ása sayíʼviún yi̱ʼi̱.
Yóʼó kúú ta̱ kivi chindeétáʼan xíʼi̱n ki̱vi̱ ná koo tu̱ndóʼo.
18 Na̱ táxín yi̱ʼi̱ ná kukaʼan nu̱úna,
soo ná kǒo sakúkaʼanna nu̱úi̱.
Ná yi̱ʼvína,
soo yi̱ʼi̱ ná va̱ása yi̱ʼvíi̱.
Taxiún ña̱ ná kixaa̱ ki̱vi̱ ña̱ koo tu̱ndóʼo nu̱úna,
sakúachi válíúnna ta sandíʼi-xa̱ʼa̱ va̱ʼúnna.*
19 Ña̱yóʼo kúú ña̱ ni̱ka̱ʼa̱n Jehová xíʼi̱n: “Kúáʼan ta kundichiún chí yéʼé ñuu nu̱ú kíʼvi na̱ rey ñuu Judá ta kéena, ta saátu ku̱ʼún kundichiún ndiʼika yéʼé ñuu Jerusalén. 20 Ta ka̱ʼún ña̱yóʼo xíʼinna: ‘Ndiʼi ndóʼó na̱ rey ñuu Judá, ndiʼi ndóʼó na̱ ñuu Judá ta saátu ndiʼi na̱ ndóo chí ñuu Jerusalén, na̱ kíʼvi chí yéʼé ñuu yóʼo kuniso̱ʼondó ña̱ káʼa̱n Jehová. 21 Ña̱yóʼo kúú ña̱ káʼa̱n Jehová: “Kiʼin va̱ʼandó kuenta ña̱ va̱ása kundisondó ña̱ʼa ta ni kǒo ki̱ʼvindó xíʼinña chí yéʼé ñuu Jerusalén ki̱vi̱ sábado. 22 Kǒo tavándó nda̱a̱ ni iin ña̱ʼa veʼendó ki̱vi̱ sábado, ta kǒo keʼéndó nda̱a̱ ni iin chiñu. Yi̱i̱ ná koo ki̱vi̱ sábado nu̱úndó nda̱a̱ táki̱ʼva ni̱ka̱ʼi̱n xíʼin na̱ táʼanndó na̱ xi̱ndoo xi̱naʼá. 23 Soo na̱kán kǒo níxiinna kuniso̱ʼona ni ña̱ kandíxana, ta xa̱ʼa̱ ña̱ so̱ʼoní* ni̱xi̱yona va̱ása níkandíxana ta ni kǒo níxíínna ndakiʼinna consejo ña̱ ta̱xii̱ ndaʼa̱na”’.
24 ”‘“Soo tá ndóʼó viíní ná kundiku̱nndó ña̱ káʼi̱n xíʼinndó, káchi Jehová, ta va̱ása kíʼvindó xíʼin nda̱a̱ ni iin ña̱ʼa chí yéʼé ñuu yóʼo ki̱vi̱ sábado, ta ni kǒo kéʼéndó nda̱a̱ ni iin chiñu ki̱vi̱ sábado ña̱ va̱ʼa na̱ʼa̱ndó ña̱ kúúña iin ki̱vi̱ ña̱ yi̱i̱ nu̱úndó, 25 saá na̱ rey xíʼin na̱ se̱ʼena na̱ kundoo nu̱ú trono ta̱ David kundósona sa̱tá carreta ta kosona* kuáyi̱ ki̱ʼvina chí yéʼé ñuu yóʼo (na̱ rey, na̱ se̱ʼe na̱ rey, na̱ ta̱a ñuu Judá ta saátu ndiʼika na̱ ñuu Judá xíʼin na̱ ñuu Jerusalén), ta ndiʼi tiempo kundoo na̱ yiví ñuu yóʼo. 26 Ta kixi na̱ yiví na̱ ndóo chí ñuu Judá, na̱ ndóo ñuu ña̱ íyo yatin ñuu Jerusalén xíʼin na̱ ndóo nu̱ú ñuʼú na̱ tribu ta̱ Benjamín, na̱ ndóo chí nu̱ú ñuʼú nu̱ú íyo xi̱kí válí, na̱ ndóo chí nu̱ú íyo yuku̱ ta saátu chí Négueb.* Kixina ña̱ kaʼmina kití* ta so̱kónarí,* so̱kóna inkaka ña̱ʼa, so̱kóna harina, olíbano ta so̱kótuna ña̱ʼa ña̱ taxina tíxa̱ʼvi chí veʼe Jehová.
27 ”’”Soo tá kǒo kándíxandó ña̱ káʼi̱n xíʼinndó ta va̱ása íxato̱ʼóndó ki̱vi̱ sábado, ta xíkóndó ña̱ʼa ki̱vi̱ sábado ta kíʼvindó xíʼinña chí yéʼé ñuu Jerusalén, kaʼmii̱ yéʼé ñuu yóʼo ta ñuʼu̱ kaʼmiña veʼe súkun ña̱ kútu̱ní ndási ña̱ íyo ñuu Jerusalén ta va̱ása nda̱ʼva̱ña”’”.