Jeremías
18 Jehová ni̱ka̱ʼa̱nra xíʼin ta̱ Jeremías: 2 “Kúáʼan chí veʼe ta̱ íxava̱ʼa ña̱ʼa xíʼin nda̱ʼyi̱ ta kán ka̱ʼi̱n xíʼún xa̱ʼa̱ ña̱ kúni̱i̱”.
3 Xa̱ʼa̱ ña̱kán ni̱xa̱ʼi̱n veʼe ta̱ íxava̱ʼa ña̱ʼa xíʼin nda̱ʼyi̱, ta ta̱kán íyora íxava̱ʼara iin ki̱si. 4 Soo ki̱si ña̱ íxava̱ʼara ndi̱ʼi-xa̱ʼa̱ña. Xa̱ʼa̱ ña̱kán, ta̱yóʼo nda̱kava tukura nda̱ʼyi̱ ta ki̱xáʼara íxava̱ʼara inka ki̱si nda̱a̱ táki̱ʼva kúni̱ miíra.
5 Tasaá ni̱ka̱ʼa̱n Jehová xíʼi̱n. Ña̱yóʼo kúú ña̱ ni̱ka̱ʼa̱nra: 6 “‘¿Á kǒo kivi keʼíi̱ xíʼin ndóʼó na̱ ñuu Israel nda̱a̱ táki̱ʼva ke̱ʼé ta̱ íxava̱ʼa ña̱ʼa xíʼin nda̱ʼyi̱?, káchi Jehová. Kotondó, nda̱a̱ táki̱ʼva íyo nda̱ʼyi̱ ña̱ xíniñúʼu ta̱ íxava̱ʼa ña̱ʼa saá íyo ndóʼó na̱ ñuu Israel ndaʼíi̱. 7 Tá káʼi̱n ña̱ tuʼi̱n iin ñuu, sandúvai̱ña ta sandíʼi-xa̱ʼíi̱ña, 8 soo na̱ ñuu kán sándakoona ña̱ va̱ása va̱ʼa kéʼéna ña̱ ni̱ka̱ʼi̱n xa̱ʼa̱, yi̱ʼi̱ nasamai̱ ña̱ ndákanixi̱níi̱* ta va̱ása chindaʼákai̱ tu̱ndóʼo ña̱ nda̱kanixi̱níi̱ chindaʼíi̱ nu̱úna. 9 Tá ná ka̱ʼi̱n ña̱ chiʼii̱ ta sakúaʼnui̱ iin ñuu, 10 soo na̱ ñuu kán kíxáʼana kéʼéna ña̱ va̱ása va̱ʼa nu̱úi̱ ta kǒo kándíxakana ña̱ káʼi̱n, va̱ása taxikai̱ ña̱ va̱ʼa ña̱ nda̱kanixi̱níi̱ taxii̱ ndaʼa̱na’.
11 ”Vitin ixaún ña̱ ma̱ní ka̱ʼún ña̱yóʼo xíʼin na̱ ta̱a na̱ ñuu Judá ta saátu xíʼin ndiʼi na̱ yiví na̱ ndóo chí Jerusalén: ‘Ña̱yóʼo kúú ña̱ káʼa̱n Jehová: “Xa̱a̱ ndákanixi̱níi̱ ndáa tu̱ndóʼo kúú ña̱ taxii̱ ndaʼa̱ndó ta saátu ndáa castigo kúú ña̱ taxii̱ ndaʼa̱ndó. Ixandó ña̱ ma̱ní, sandákoondó yichi̱ ña̱ va̱ása va̱ʼa ña̱ ki̱ʼinndó ku̱a̱ʼa̱nndó, nasamandó ki̱ʼva ña̱ íyondó xíʼin ña̱ kéʼéndó”’”.
12 Soo na̱kán ni̱ka̱ʼa̱nna: “Kǒo kivika keʼéndi̱ ña̱yóʼo. Saáchi ndakundeévandi̱ keʼéndi̱ ña̱ xa̱a̱ nda̱kaxin miíndi̱ ta ndiʼindi̱ kundiku̱nndi̱ ña̱ va̱ása va̱ʼa ndíkaa̱ níma̱ndi̱”.
13 Xa̱ʼa̱ ña̱kán, ña̱yóʼo kúú ña̱ káʼa̱n Jehová:
“Ixandó ña̱ ma̱ní, kúáʼanndó nda̱ka̱tu̱ʼunndó na̱ inka ñuu.
¿Ndáana xa̱a̱ xi̱niso̱ʼo xa̱ʼa̱ táʼan ña̱yóʼo?
Ñá loʼo kúa̱an ñuu Israel ke̱ʼéñá iin ña̱ kininí...
14 ¿Á ndáñúʼuva nieve ña̱ íyo sa̱tá yu̱u̱ náʼnu chí kándíka Líbano?
¿Á yi̱chi̱ ti̱kui̱í vi̱xin tá xíkání va̱xi?
15 Soo na̱ ñui̱ na̱ndósova-inina xa̱ʼíi̱.
Saáchi ki̱xáʼana sóko̱na kití nu̱ú* ña̱ʼa ña̱ va̱ása ndáyáʼvi
ta xa̱ʼa̱ ña̱ kéʼéna yóʼo nda̱a̱ na̱ yiví na̱ ku̱a̱ʼa̱n yichi̱ yatá sándakoonaña
ña̱ va̱ʼa ku̱ʼu̱nna yichi̱ ña̱ va̱ása vií íyo ta ni va̱ása nda̱kúña,
16 tasaá ndasana ñuʼúna iin ña̱ʼa ña̱ kundasí inkana kunina
ta kusi̱kindaanaña ndiʼi tiempo.
Ndiʼi na̱ ná ya̱ʼa kán yi̱ʼvínína tá ná kuninaña ta sakúikóna* xi̱nína.
17 Nda̱a̱ táki̱ʼva kéʼé ta̱chí ña̱ va̱xi chí este,* saá ndataʼvíi̱ ndóʼó nu̱ú na̱ sáa̱-ini xíni ndóʼó.
Ki̱vi̱ tá ná kixaa̱ tu̱ndóʼo nu̱úndó, kundasínu̱úvai̱ kunii̱ ndóʼó ta va̱ása chindeétáʼi̱n xíʼinndó”.
18 Ta na̱kán ka̱china: “Naʼandó ta ná kotoyó ndáaña keʼéyó xíʼin ta̱ Jeremías, saáchi na̱ su̱tu̱va kúú na̱ ndakundeé sanáʼa̱ miíyó xa̱ʼa̱ ley, ta na̱ ta̱a na̱ ndíchi kúú na̱ ndakundeé taxi consejo ndaʼa̱yó, ta na̱ profeta kúú na̱ ndakundeé ka̱ʼa̱n xíʼinyó xa̱ʼa̱ ña̱ káʼa̱n Ndióxi̱. Naʼandó ná ka̱ʼa̱nyó contrara ta va̱ása keʼéyó ña̱ káʼa̱nra”.
19 Kuniso̱ʼo ña̱ káʼi̱n xíʼún Jehová,
ta saátu kuniso̱ʼún ña̱ káʼa̱n na̱ sáa̱-ini xíni yi̱ʼi̱.
20 ¿Á ña̱ va̱ʼa kúú ña̱ xíniñúʼu ndakiʼin na̱ kéʼé ña̱ va̱ása va̱ʼa?
Saáchi xa̱a̱ i̱xava̱ʼana iin ya̱vi̱ nu̱ú chikaa̱na yi̱ʼi̱.
Ndakaʼún ña̱ ni̱xi̱yoi̱ nu̱ún ta nina ña̱ va̱ʼa ni̱ka̱ʼi̱n xíʼún xa̱ʼa̱ na̱yóʼo,
ña̱ va̱ʼa kǒo sa̱a̱kaún xíʼinna.
21 Xa̱ʼa̱ ña̱kán taxiún ña̱ ná kuvi se̱ʼena xíʼin so̱ko,
taxiún ña̱ ná kuvina xíʼin espada.
Ná kuvi se̱ʼe ná ñaʼá ta saátu yii̱ná.
Ná kuvi na̱ ta̱a xíʼin kue̱ʼe̱ ña̱ ndeéní
ta na̱ ta̱a na̱ válí ná kuvina nu̱ú ku̱a̱chi xíʼin espada.
22 Ná kutaku̱ ña̱ nda̱ʼyi̱ kóʼóna* chí veʼena
tá iin kama ná chindaʼún na̱ ixakuíʼná ndiʼi ña̱ʼana.
Saáchi xa̱a̱ i̱xava̱ʼana iin ya̱vi̱ nu̱ú tiinna yi̱ʼi̱
ta chi̱ndoona trampa nu̱ú ti̱in xa̱ʼíi̱.
23 Soo yóʼó Jehová,
kúnda̱a̱ va̱ʼava iniún xa̱ʼa̱ ña̱ kúni̱na keʼéna ña̱ kaʼnína yi̱ʼi̱.
Va̱ása koo káʼnu-iniún xa̱ʼa̱ ña̱ va̱ása va̱ʼa kéʼéna
ta va̱ása ndakataún ku̱a̱chi ña̱ ni̱ki̱ʼvina.
Taxiún ña̱ ná ko̱yona nu̱ún
tá ná ndatiún ku̱a̱chi xíʼinna xa̱ʼa̱ ña̱ sáa̱níún.