Jeremías

19 Ña̱yóʼo kúú ña̱ ni̱ka̱ʼa̱n Jehová: “Kúáʼan ta satáún* iin ki̱si loʼo nu̱ú ta̱ íxava̱ʼa ña̱ʼa xíʼin nda̱ʼyi̱. Ná ku̱ʼu̱n sava na̱ níʼi yichi̱ nu̱ú na̱ ñuu* xíʼún ta saátu sava na̱ níʼi yichi̱ nu̱ú na̱ su̱tu̱ 2 ta kúáʼan chí yoso̱ ña̱ Hinón, chí nu̱ú íyo Yéʼé ta̱ íxava̱ʼa ña̱ʼa xíʼin nda̱ʼyi̱. Ta kán ka̱ʼún xa̱ʼa̱ ña̱ ka̱ʼi̱n xíʼún. 3 Ña̱yóʼo kúú ña̱ ka̱ʼún: ‘Kuniso̱ʼo ndóʼó na̱ rey ñuu Judá ta saátu ndiʼi ndóʼó na̱ ñuu Jerusalén ña̱ káʼa̱n Jehová. Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel:

”’“Taxii̱ ña̱ ná kixi iin tu̱ndóʼo ña̱ sandíʼi-xa̱ʼa̱ lugar yóʼo ta ndiʼi na̱ ná kuniso̱ʼo xa̱ʼa̱ña yi̱ʼvínína. 4 Keʼíi̱ ña̱yóʼo xa̱ʼa̱ ña̱ sa̱ndákoondó yi̱ʼi̱, ta xa̱ʼa̱ ña̱ kininí kéʼéndó va̱ása ndákunikai̱ lugar yóʼo. Yóʼo xáʼníndó kití ta sóko̱ndórí nu̱ú inkaka ndióxi̱ ña̱ va̱ása níxi̱xini̱ndó, ni na̱ táʼanndó na̱ xi̱ndoo xi̱naʼá, ni na̱ rey na̱ xi̱ndoo tá ya̱chi̱, ta iin sa̱kútúndó lugar yóʼo xíʼin ni̱i̱ na̱ kǒo ku̱a̱chi kúúmií. 5 I̱xava̱ʼandó nu̱ú* ndasakáʼnundó ña̱ Baal ña̱ va̱ʼa kaʼmindó se̱ʼendó ta so̱kóndóna nu̱ú* ña̱ Baal, soo yi̱ʼi̱ va̱ása níxaʼndai̱ chiñu nu̱úndó ña̱ keʼéndó ña̱yóʼo ta ni kǒo níndakanixi̱níi̱ ña̱ ka̱ʼi̱n xíʼinndó ña̱ keʼéndóña”’.

6 ”‘“Xa̱ʼa̱ ña̱kán, xa̱a̱ ku̱yatin ki̱vi̱, káchi Jehová, ña̱ va̱ása kunaníkaña Tófet ni yoso̱ ña̱ Hinón chi ndakunaníña yoso̱ nu̱ú Xáʼnína. 7 Taxii̱ ña̱ va̱ása vií kana ña̱ ndákanixi̱ní na̱ ñuu Judá xíʼin na̱ ñuu Jerusalén keʼéna lugar yóʼo, ta ndataxii̱na ndaʼa̱ na̱ sáa̱-ini xíniñaʼá ña̱ ná kaʼnínana xíʼin espada ta saátu ndataxii̱na ndaʼa̱ ndiʼi na̱ kúni̱ kaʼní-ñaʼá. Ta taxii̱ ku̱ñuna kaxí kití tí ndachí chí ndiví xíʼin kití tí íyo nu̱ú ñuʼú. 8 Ta ndasai̱ ñuuna iin ñuu ña̱ kundasí inkana kunina ta kusi̱kindaanaña. Ndiʼi na̱ ná ya̱ʼa kán yi̱ʼvínína tá ná kuninaña ta kusi̱kindaanaña xa̱ʼa̱ ndiʼi tu̱ndóʼo ña̱ ndo̱ʼoña. 9 Ta taxii̱ ña̱ ná kaxína ku̱ñu se̱ʼeta̱ana xíʼin se̱ʼe-síʼina ta saátu kaxína ku̱ñu táʼanna, saáchi kixáʼana ndi̱ʼiní-inina tá ná ka̱va̱nduu na̱ sáa̱-ini xíniñaʼá sa̱tá ñuuna ta saátu ndiʼi na̱ kúni̱ kaʼní-ñaʼá”’.

10 ”Tasaá taʼvíún ki̱si loʼo nu̱ú ndiʼi na̱ ta̱a na̱ ku̱a̱ʼa̱n xíʼún 11 ta ka̱ʼún xíʼinna: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Nda̱a̱ táki̱ʼva kéʼéna tá sákuachi válína iin ki̱si ña̱ ku̱vaʼa xíʼin nda̱ʼyi̱ ta kǒo kívika sandáʼanaña, saá keʼíi̱ xíʼin na̱ ñuu yóʼo; ta sandúxu̱nna ndiʼi na̱ ni̱xi̱ʼi̱ chí Tófet nda̱a̱ ná kutútuunña”’.

12 ”‘Ña̱yóʼo kúú ña̱ keʼíi̱ xíʼin lugar yóʼo ta saátu xíʼin na̱ ndóo nu̱úña, káchi Jehová, ña̱ va̱ʼa ná xa̱a̱ña kooña nda̱a̱ táki̱ʼva íyo Tófet. 13 Ta veʼe ña̱ íyo chí Jerusalén xíʼin veʼe na̱ rey ñuu Judá, kooña ña̱ yaku̱a̱* nda̱a̱ táki̱ʼva íyo Tófet, ndiʼi veʼe ña̱ nda̱ana xi̱ní ta ni̱so̱kóna ña̱ʼa nu̱ú ndiʼi ña̱ʼa ña̱ íyo chí ndiví ta ni̱so̱kótuna vino nu̱ú inkaka ndióxi̱’”.

14 Tá ndi̱kó ta̱ Jeremías ña̱ ni̱xa̱ʼa̱nra chí Tófet, nu̱ú ni̱ka̱ʼa̱n Jehová xíʼinra ña̱ ku̱ʼu̱nra ka̱ʼa̱nra xa̱ʼa̱ iin profecía, saá ni̱xa̱ʼa̱nra chí yéʼé veʼe Jehová ta ni̱ka̱ʼa̱nra xíʼin ndiʼi na̱ ñuu: 15 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Chindaʼíi̱ tu̱ndóʼo ña̱ xa̱a̱ ni̱ka̱ʼi̱n xa̱ʼa̱ nu̱ú na̱ ñuu yóʼo ta saátu nu̱ú ndiʼi ñuu válí ña̱ íyo yatin yóʼo, saáchi so̱ʼoní* ni̱xi̱yona ta kǒo níxiinna kandíxana ña̱ ni̱ka̱ʼi̱n xíʼinna’”.