Jeremías
20 Ta̱ Pasjur se̱ʼe ta̱ Imer, ta̱ xi̱kuu su̱tu̱ ta xi̱kiʼintura kuenta xíʼin ndiʼi chiñu ña̱ xi̱keʼéna veʼe Jehová, xi̱niso̱ʼora tá ni̱ka̱ʼa̱n ta̱ Jeremías xa̱ʼa̱ ndiʼi ña̱ kundoʼona. 2 Ña̱kán ta̱ Pasjur ka̱nira ta̱ profeta Jeremías ta ka̱túnrara xíʼin iin yitu̱n tú xi̱xiniñúʼuna ña̱ xi̱taxina castigo, tú ni̱xi̱yo chí Yéʼé ta̱ Benjamín ña̱ súkunka, ña̱ ni̱xi̱yo chí veʼe Jehová. 3 Soo tá inka ki̱vi̱, tá xa̱a̱ nda̱xín ta̱ Pasjur ta̱ Jeremías nu̱ú xi̱nuʼnira, ta̱ Jeremías ni̱ka̱ʼa̱nra xíʼinra:
“Jehová na̱samara ki̱vi̱ún, va̱ása kunaníkaún Pasjur, chi ki̱vi̱ ña̱ kuumiíún vitin kúni̱ kachiña Ña̱ sáyi̱ʼví ndiʼi táʼví.* 4 Saáchi ña̱yóʼo kúú ña̱ káʼa̱n Jehová: ‘Xa̱ʼa̱ ña̱ keʼíi̱ xíʼún, yi̱ʼvíún kuniún miíún ta saátu ndiʼi na̱ migoún yi̱ʼvína kunina yóʼó. Na̱ sáa̱-ini xíniñaʼá kaʼnínana xíʼin espada ta kuninu̱ún ña̱yóʼo. Ndataxii̱ ndiʼi na̱ ñuu Judá ndaʼa̱ ta̱ rey ñuu Babilonia, ta ta̱yóʼo ndakiʼinrana ku̱ʼu̱n xíʼinra chí ñuu Babilonia ta kaʼnírana xíʼin espada. 5 Ta ndataxii̱ ndiʼi ña̱ ku̱i̱ká ña̱ íyo ñuu yóʼo ndaʼa̱ na̱ sáa̱-ini xíni ndóʼó, ndiʼi ña̱ va̱ʼa ña̱ kúúmiíndó, ndiʼi ña̱ʼa ña̱ ndáyáʼvi ña̱ kúúmiíndó ta saátu ndiʼi ña̱ ku̱i̱ká ña̱ kúúmií na̱ rey ñuu Judá. Ta na̱ sáa̱-ini xíni ndóʼó ndakiʼinna ndiʼi ña̱ʼa ña̱ kúúmiíndó ta ku̱ʼu̱nña xíʼinna chí ñuu Babilonia. 6 Soo yóʼó ta̱ Pasjur xíʼin ndiʼi na̱ íyo veʼún, ku̱ʼu̱nndó kundoondó inka ñuu. Ku̱ʼún chí ñuu Babilonia, kán kuviún ta kán sandúxu̱nna yóʼó xíʼin ndiʼi na̱ migoún saáchi ndiʼi ña̱ ni̱ka̱ʼún xíʼinna kuu, ña̱ vatáva* xi̱kuuña’”.
7 Jehová, sa̱ndáʼviún yi̱ʼi̱ ta ka̱ndíxavai̱ yóʼó.
Ni̱na̱ʼún ña̱ ndakúníkaún nu̱úi̱ ta ku̱chiñuvaún xíʼi̱n.
Vitin iníí ki̱vi̱ xáku̱ndaana yi̱ʼi̱;
ndiʼi na̱ yiví kúsi̱kindaana yi̱ʼi̱.
8 Saáchi ndiʼi yichi̱ tá káʼi̱n, xíniñúʼu ndeéní ka̱ʼi̱n ta kachii̱:
“Va̱xi na̱ ndi̱va̱ʼaní-ini ta sandíʼi-xa̱ʼa̱na ñuu Judá”.
Ta xa̱ʼa̱ ña̱ káʼi̱n xa̱ʼa̱ tu̱ʼun miíún Jehová, na̱ yiví kúsi̱kindaana yi̱ʼi̱ ta xáku̱ndaana yi̱ʼi̱ iníí ki̱vi̱.
9 Tasaá ni̱ka̱ʼi̱n: “Kǒo ka̱ʼa̱nkai̱ xa̱ʼa̱ra ta ni va̱ása ka̱ʼa̱nkai̱ xa̱ʼa̱ ña̱ ni̱ka̱ʼa̱nra xíʼi̱n ka̱ʼi̱n”.
Soo chí níma̱i̱, tu̱ʼunra ni̱xa̱a̱ña ndu̱uña nda̱a̱ táki̱ʼva íyo iin ñuʼu̱ ña̱ xíxi̱ ña̱ ndíkaa̱ ini lekei̱,
ta nda̱a̱ ku̱nai̱ ña̱ sásii̱ ña̱yóʼo;
kǒo níkundeéka-inii̱ nu̱úña.
10 Saáchi xi̱niso̱ʼi̱ ña̱ ku̱a̱ʼánína káʼa̱nna ña̱ va̱ása va̱ʼa xa̱ʼíi̱;
ndeéní ki̱xáʼíi̱ yíʼvii̱.
Xi̱kachina: “Ná ka̱ʼa̱nkúáchiyó* xa̱ʼa̱ra, ná ku̱ʼu̱nyó ka̱ʼa̱nkúáchiyó xa̱ʼa̱ra”.
Ndiʼi na̱ xi̱kaʼa̱n ña̱ viíva xi̱kitáʼanna xíʼi̱n, xi̱kuni̱na ña̱ ná keʼíi̱ iin ña̱ va̱ása va̱ʼa, ta xi̱kachina:
“Sana keʼévara iin ña̱ va̱ása va̱ʼa
tasaá kuchiñuyó xíʼinra ta ixandi̱va̱ʼayó xíʼinra”.
11 Soo Jehová ni̱xi̱yovara xíʼi̱n, nda̱a̱ táki̱ʼva kéʼé iin ta̱a ta̱ ndakúní ta̱ xáʼa̱n nu̱ú ku̱a̱chi.
Xa̱ʼa̱ ña̱kán, na̱ ndíku̱n sa̱tái̱ ko̱yovana ta kǒo kuchiñuna.
Kukaʼanní nu̱úna saáchi va̱ása vií kana ña̱ kúni̱na keʼéna.
Ta ndiʼi tiempo kukaʼan nu̱úna.
12 Soo miíún Jehová ta̱ xáʼndachíñu nu̱ú na̱ ángel, kíʼún kuenta xíʼin na̱ kéʼé ña̱ va̱ʼa;
xítoún ña̱ ndákanixi̱nína* xíʼin ña̱ ñúʼu níma̱na.
Taxi ná kotoi̱ ña̱ keʼún xíʼinna,
saáchi yóʼó kúú ta̱ ndáa-inii̱ ña̱ viíní ndatiún ku̱a̱chi xa̱ʼíi̱.
13 Katandó nu̱ú Jehová. Ndasakáʼnundó Jehová.
Saáchi ta̱kán sa̱kǎkura na̱ nda̱ʼví nu̱ú na̱ ndi̱va̱ʼaní-ini.
14 Va̱ʼaníví tá kǒo níkakui̱.
Va̱ʼaníví tá kǒo nísakáku siʼíi̱ yi̱ʼi̱.
15 Ta̱a ta̱ ni̱xa̱ʼa̱n na̱túʼun xa̱ʼa̱ ña̱yóʼo xíʼin yivái̱ ná ndakiʼinra chiʼña saáchi ka̱chira:
“Ka̱ku iin se̱ʼún, iin ta̱a loʼo kúúra”,
ta xa̱ʼa̱ ña̱yóʼo ni̱kusi̱íní-ini yivái̱.
16 Ta̱ ta̱a kán ná koora nda̱a̱ táki̱ʼva íyo ndiʼi ñuu ña̱ sa̱ndíʼi-xa̱ʼa̱ Jehová, ña̱ ni loʼo kǒo níkundáʼvi-inira kunira.
Ná kuniso̱ʼora ña̱ ndeéní ndáʼyi̱ kóʼóna* xa̱ʼa̱ ña̱ xóʼvi̱na* tá xi̱ta̱a̱n* ta saátu ña̱ ndeéní ndáʼyi̱na ña̱ va̱ʼa kixáʼana kanitáʼanna tá káʼñu.*
17 ¿Nda̱chun va̱ása níxaʼníra yi̱ʼi̱ tá ndíka̱i̱ ti̱xin siʼíi̱?
Tasaá, ti̱xin siʼíi̱ kooña nda̱a̱ táki̱ʼva íyo nu̱ú ndu̱xu̱i̱n
ta kǒo sakákuvíñá yi̱ʼi̱.
18 ¿Nda̱chun ki̱tai̱ ti̱xin siʼíi̱
ta xítoi̱ ña̱ íyoní tu̱ndóʼo xíʼin ña̱ suchí-ini,
ta kukaʼan nu̱úi̱ ndiʼi tiempo nda̱a̱ ná kuvii̱?