Jeremías

27 Tá sa̱kán ki̱xáʼa xáʼndachíñu ta̱ Jehoiaquim se̱ʼe ta̱ Josías, ta̱ xi̱kuu rey ñuu Judá, Jehová ni̱ka̱ʼa̱nra ña̱yóʼo xíʼin ta̱ Jeremías: 2 “Ña̱yóʼo kúú ña̱ ni̱ka̱ʼa̱n Jehová xíʼi̱n: ‘Katún yoʼo̱ sava yókó* ta chindósoúnnú si̱kíún.* 3 Tándi̱ʼi ka̱ʼún xíʼin ndiʼi na̱ ki̱xaa̱ ñuu Jerusalén ña̱ kotona ta̱ rey Sedequías ta̱ ñuu Judá, ña̱ ná kuniʼinanú taxina ndaʼa̱ ta̱ rey ñuu Edom, ta̱ rey ñuu Moab, ta̱ rey na̱ ammonita, ta̱ rey ñuu Tiro xíʼin ta̱ rey ñuu Sidón. 4 Ka̱ʼa̱n xíʼinna ña̱ ná ka̱ʼa̱nna ña̱yóʼo xíʼin na̱ rey na̱ káchíñuna nu̱ú:

”’“Ña̱yóʼo kúú ña̱ xíniñúʼu ka̱ʼa̱nndó xíʼin na̱ káchíñundó nu̱ú, káchi Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: 5 ‘Xa̱ʼa̱ ña̱ íyoní ndeíi̱ ta ndakúníi̱ i̱xava̱ʼi̱ ñuʼú, na̱ yiví xíʼin kití tí íyo nu̱ú ñuʼú; ta ta̱xii̱ña ndaʼa̱ na̱ kúni̱ miíi̱ taxii̱ña ndaʼa̱. 6 Ta vitin nda̱taxii̱ ndiʼi ñuu yóʼo ndaʼa̱ ta̱ rey Nabucodonosor ta̱ ñuu Babilonia ta̱ káchíñu nu̱úi̱; ta nda̱a̱ kití yukú nda̱taxii̱ ndaʼa̱ra ña̱ kachíñurí nu̱úra. 7 Ndiʼi na̱ ñuu kachíñuna nu̱ú miíra, nu̱ú se̱ʼera ta saátu nu̱ú na̱ se̱ʼeñánira nda̱a̱ ná kixaa̱ hora ña̱ sandíʼi-xa̱ʼíi̱ ñuura; tasaá ku̱a̱ʼání na̱ ñuu xíʼin na̱ rey na̱ ndáyáʼviní ndasanara ta̱ kachíñundáʼvi nu̱úna’.

8 ”’”‘Tá na̱ ndóo iin ñuu loʼo á iin ñuu káʼnu va̱ása xíínna kachíñuna nu̱ú ta̱ rey Nabucodonosor ta̱ ñuu Babilonia ta ni kǒo xíínna kunúu yókóra si̱kína, castigo ña̱ taxii̱ ndaʼa̱ na̱ ñuu kán kúú ña̱ kuvina xíʼin espada, xíʼin so̱ko ta saátu xíʼin kue̱ʼe̱, káchi Jehová, ta kuniñúʼi̱ ta̱yóʼo ña̱ sandíʼi-xa̱ʼíi̱na’.

9 ”’”‘Xa̱ʼa̱ ña̱kán kǒo kuniso̱ʼondó ña̱ káʼa̱n na̱ profeta, na̱ ndáku,* na̱ káʼa̱n xa̱ʼa̱ xa̱ni, na̱ kéʼé magia á na̱ tási na̱ káʼa̱n ña̱yóʼo xíʼinndó: “Kǒo kachíñuvíndó nu̱ú ta̱ rey ñuu Babilonia”. 10 Saáchi ña̱ vatáva* kúú ña̱ káʼa̱nna xíʼinndó ta tá ná kuniso̱ʼondó ña̱yóʼo, taxii̱ ña̱ ndakiʼinna ndóʼó ku̱ʼu̱nndó xa̱a̱ síín síín ñuu ta kán kuvivandó.

11 ”’”’Soo na̱ ñuu na̱ ná taxi ña̱ kunúu yókó ta̱ rey ñuu Babilonia si̱kína ta kachíñuna nu̱úra, taxii̱ ña̱ ná kindo̱ona nu̱ú ñuʼúna, káchi Jehová, ña̱ va̱ʼa chiʼina nu̱úña ta kundoona nu̱úña’”’”.

12 Ta saátu ni̱ka̱ʼi̱n xíʼin ta̱ rey Sedequías ta̱ ñuu Judá: “Taxindó ña̱ ná kunúu yókó ta̱ rey ñuu Babilonia si̱kíndó ta kachíñundó nu̱ú miíra xíʼin nu̱ú na̱ ñuura, tasaá va̱ása kuvindó. 13 ¿Nda̱chun xíniñúʼu kuvi miíún ta saátu na̱ ñuún xíʼin espada, xíʼin so̱ko ta saátu xíʼin kue̱ʼe̱, nda̱a̱ táki̱ʼva ni̱ka̱ʼa̱n Jehová kundoʼo na̱ kǒo xíín kachíñu nu̱ú ta̱ rey ñuu Babilonia? 14 Kǒo kuniso̱ʼondó tá káʼa̱n na̱ profeta ña̱yóʼo ‘Ndóʼó kǒo kachíñuvíndó nu̱ú ta̱ rey ñuu Babilonia’, saáchi ña̱ vatáva kúú ña̱ káʼa̱nna xíʼinndó.

15 ”‘Saáchi su̱ví yi̱ʼi̱ kúú ta̱ níchindaʼána, káchi Jehová; na̱yóʼo xíniñúʼuna ki̱víi̱ ña̱ ka̱ʼa̱nna ña̱ vatá ta xa̱ʼa̱ ña̱ kéʼéna ña̱yóʼo, miíndó ta saátu na̱ profeta na̱ káʼa̱n xíʼinndó taxii̱ ña̱ ná ta̱ni̱ndó* ku̱ʼu̱nndó ta kuvindó’”.

16 Ta ni̱ka̱ʼi̱n xíʼin na̱ su̱tu̱ ta saátu xíʼin ndiʼi na̱ ñuu: “Ña̱yóʼo kúú ña̱ káʼa̱n Jehová: ‘Kǒo kuniso̱ʼondó tu̱ʼun ña̱ káʼa̱n na̱ profeta xíʼinndó tá káʼa̱nna “Kotondó, si̱lóʼo kúma̱ní ta ndiʼi ña̱ʼa ña̱ ni̱xi̱yo veʼe Jehová ña̱ nda̱kiʼinna ku̱a̱ʼa̱n xíʼinna chí Babilonia ndikóvaña”, saáchi ña̱ vatáva kúú ña̱ káʼa̱nna xíʼinndó. 17 Kǒo kuniso̱ʼondó ña̱ káʼa̱nna xíʼinndó. Kachíñundó nu̱ú ta̱ rey ñuu Babilonia tasaá va̱ása kuvindó. ¿Nda̱chunví xíniñúʼu ndiʼi-xa̱ʼa̱ ñuu yóʼo? 18 Soo tá ndixa profeta kúúna ta tá ni̱ka̱ʼa̱n Jehová xíʼinna, ná ixaana ña̱ ma̱ní ka̱ʼa̱n-ndáʼvina xíʼin Jehová ta̱ xáʼndachíñu nu̱ú na̱ ángel ña̱ va̱ʼa ná kǒo ndakiʼinna ndiʼika ña̱ʼa ña̱ kíndo̱o veʼe Jehová ku̱ʼu̱n xíʼinna chí ñuu Babilonia, ni ña̱ ndóo veʼe* ta̱ rey ñuu Judá xíʼin ñuu Jerusalén’.

19 ”Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel xa̱ʼa̱ nama̱,* Mar ña̱ cobre,* carro válí xíʼin inkaka ña̱ʼa ña̱ kíndo̱o ñuu yóʼo, 20 ña̱ va̱ása níndakiʼin ta̱ rey Nabucodonosor ta̱ ñuu Babilonia ku̱ʼu̱n xíʼinra, tá nda̱kiʼinra ta̱ Jeconías se̱ʼe ta̱ Jehoiaquim ta̱ kúú rey ñuu Judá ku̱a̱ʼa̱n xíʼinra chí Babilonia, ta saátu ndiʼika na̱ ta̱a na̱ kúúmií chiñu ña̱ ndáyáʼvi ñuu Judá xíʼin ñuu Jerusalén; 21 ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, xa̱ʼa̱ ña̱ʼa ña̱ kíndo̱o veʼe Jehová, veʼe ta̱ rey ñuu Judá xíʼin ñuu Jerusalén: 22 ‘“Ndakiʼinnaña ku̱ʼu̱n xíʼinna chí Babilonia ta kán kundooña nda̱a̱ ki̱vi̱ ná ndakaʼíi̱n xa̱ʼa̱ña, káchi Jehová. Tasaá ndakiʼii̱nña ta chindoo tukui̱ña lugar yóʼo”’”.