Jeremías

29 Ña̱yóʼo kúú tu̱ʼun ña̱ va̱xi nu̱ú carta ña̱ ka̱ʼyi ta̱ profeta Jeremías, ña̱ carta yóʼo ke̱eña chí ñuu Jerusalén ta ku̱a̱ʼa̱nña chí Babilonia nu̱ú na̱ xi̱niʼi yichi̱ nu̱ú na̱ ñuu,* nu̱ú na̱ su̱tu̱, nu̱ú na̱ profeta xíʼin nu̱ú ndiʼika na̱ ñuu na̱ nda̱kiʼin ta̱ Nabucodonosor ku̱a̱ʼa̱n xíʼinra, 2 chi̱ndaʼáraña tá xa̱a̱ ndi̱ʼi ki̱ta ta̱ rey Jeconías chí ñuu Jerusalén, saátu siʼí ta̱ rey yóʼo, na̱ xi̱kuumií chiñu ña̱ ndáyáʼvi nu̱úra, na̱ xi̱niʼi yichi̱ nu̱ú na̱ ñuu Judá xíʼin na̱ ñuu Jerusalén, na̱ xi̱xini̱ní keʼé ku̱a̱ʼá ña̱ʼa ta saátu na̱ xi̱kachíñu xíʼin ka̱a. 3 Chi̱ndaʼára carta yóʼo ku̱a̱ʼa̱nña xíʼin ta̱ Elasá se̱ʼe ta̱ Safán ta saátu xíʼin ta̱ Guemarías se̱ʼe ta̱ Hilquías, na̱ chi̱ndaʼá ta̱ rey Sedequías ta̱ ñuu Judá ku̱a̱ʼa̱nna chí Babilonia nu̱ú ta̱ rey Nabucodonosor. Carta yóʼo xi̱kachiña:

4 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, xíʼin ndiʼi na̱ nda̱kiʼinna ku̱a̱ʼa̱n inka ñuu na̱ ta̱vái̱ chí ñuu Jerusalén ta chi̱ndaʼíi̱na ku̱a̱ʼa̱nna chí Babilonia: 5 ‘Ixava̱ʼandó veʼe ta kundoondó iniña, chiʼindó yitu̱n ta kaxíndó ku̱i̱ʼi ña̱ kana ndaʼa̱nú. 6 Tindaʼa̱ndó ta koo se̱ʼeta̱andó xíʼin se̱ʼe-síʼindó; satíndaʼa̱ndó se̱ʼeta̱andó ta saátu se̱ʼe-síʼindó ña̱ va̱ʼa saátu na̱yóʼo ná koo se̱ʼeta̱ana xíʼin se̱ʼe-síʼina. Ku̱i̱na̱ndó kán ña̱ va̱ʼa ku̱a̱ʼáníka ná koondó ta va̱ása loʼo kuití koondó. 7 Chikaa̱ndó ndee̱ ña̱ vií kundoondó ñuu nu̱ú chi̱ndaʼíi̱ ndóʼó ku̱a̱ʼa̱nndó ta ka̱ʼa̱nndó xíʼin Jehová xa̱ʼa̱ña, saáchi tá va̱ʼa ná koo ñuu kán va̱ʼa kundoo miívandó. 8 Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Kǒo taxindó ña̱ sandáʼvi na̱ profeta ndóʼó, ni na̱ ndáku* na̱ ndóo xíʼinndó ta ni va̱ása kuniso̱ʼondó ña̱ káʼa̱nna xa̱ʼa̱ xa̱ni ña̱ kúúmiína. 9 Saáchi ‘xíniñúʼuna ki̱víi̱ ña̱ ka̱ʼa̱nna ña̱ vatá* xíʼinndó. Su̱ví yi̱ʼi̱ kúú ta̱ níchindaʼána’, káchi Jehová”’”.

10 “Saáchi ña̱yóʼo kúú ña̱ káʼa̱n Jehová: ‘Tá ná xi̱nu 70 ku̱i̱ya̱ ña̱ kundoondó chí Babilonia, yi̱ʼi̱ ndakaʼíi̱n xa̱ʼa̱ndó ta saxínuvai̱ ña̱ ni̱ka̱ʼi̱n ña̱ taxi tukui̱ ndikóndó ñuu yóʼo’.

11 ”‘Saáchi xa̱a̱ xíni̱va̱ʼavai̱ ndáaña kúú ña̱ kúni̱i̱ keʼíi̱ xa̱ʼa̱ndó, káchi Jehová. Kúni̱i̱ ña̱ vií ná kundoondó ta kǒo nda̱a̱ ni iin ña̱ʼa kundoʼondó. Ta kǒo kaka-inindó ña̱ ndakiʼinvandó iin ña̱ va̱ʼa chí nu̱únínu. 12 Ndóʼó kanandó yi̱ʼi̱, ka̱ʼa̱nndó xíʼi̱n ti̱xin oración ta yi̱ʼi̱ kuniso̱ʼovai̱ ndóʼó’.

13 ”‘Ndóʼó nandukúndó yi̱ʼi̱, ta ndani̱ʼívandó yi̱ʼi̱ saáchi nandukúndó yi̱ʼi̱ xíʼin ndiʼi níma̱ndó. 14 Ta taxivai̱ ña̱ ná ndani̱ʼíndó yi̱ʼi̱, káchi Jehová. Sandákutáʼi̱n ndiʼi ndóʼó na̱ nda̱kiʼinna ku̱a̱ʼa̱n inka ñuu ta saátu ndiʼika lugar nu̱ú chi̱ndaʼíi̱ ndóʼó ku̱a̱ʼa̱nndó, káchi Jehová. Ta taxi tukui̱ ña̱ ná ndikóndó nu̱ú ñuʼú nu̱ú ta̱vái̱ ndóʼó’.

15 ”Soo ndóʼó ni̱ka̱ʼa̱nndó: ‘Jehová ta̱xira ña̱ ná kuumiíyó na̱ profeta chí Babilonia’.

16 ”Ña̱yóʼo kúú ña̱ káʼa̱n Jehová xíʼin ta̱ rey ta̱ íyo nu̱ú trono ta̱ David ta saátu xíʼin ndiʼi na̱ yiví na̱ ndóo ñuu Jerusalén yóʼo, na̱ táʼanndó na̱ ta̱ʼán ndakiʼinna ku̱ʼu̱n xíʼinna inka ñuu: 17 ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: “Chindaʼíi̱ na̱ sáa̱-ini xíniñaʼá ña̱ kanitáʼanna xíʼinna, koo so̱ko xíʼin kue̱ʼe̱ nu̱úna, ta xa̱a̱na koona nda̱a̱ táki̱ʼva íyo higo tí ni̱ta̱ʼyi̱* tí kǒo kívi kaxína xa̱ʼa̱ ña̱ ni loʼo va̱ása va̱ʼakarí”’.

18 ”‘Chindaʼíi̱ na̱ sáa̱-ini xíniñaʼá ña̱ kanitáʼanna xíʼinna, koo so̱ko xíʼin kue̱ʼe̱ nu̱úna ta ndiʼi na̱ ñuu na̱ íyo nu̱ú ñuʼú yóʼo kundasína kuninana, sakúisochiʼñanana,* ndakanda̱-inina* xíʼin ña̱ ndo̱ʼona, kusi̱kindaanana ta ka̱ʼa̱n-ndi̱va̱ʼana xíʼinna ndiʼi ñuu nu̱ú chindaʼíi̱na ku̱ʼu̱nna, 19 saáchi na̱kán kǒo níxiinna kuniso̱ʼona ña̱ ni̱ka̱ʼi̱n xíʼin na̱ profeta na̱ xi̱kachíñu nu̱úi̱ ña̱ ná ka̱ʼa̱nna xíʼinna, na̱ tuku ta tuku xi̱chindaʼíi̱ ña̱ ku̱ʼu̱nna nu̱úna, káchi Jehová’.

”‘Soo ndóʼó kǒo níxiinndó kandíxandó’, káchi Jehová.

20 ”Xa̱ʼa̱ ña̱kán kuniso̱ʼondó ña̱ káʼa̱n Jehová, ndiʼi ndóʼó na̱ nda̱kiʼinna ku̱a̱ʼa̱n inka ñuu, ndóʼó na̱ ta̱vái̱ chí ñuu Jerusalén ta chi̱ndaʼíi̱ ndóʼó ku̱a̱ʼa̱nndó chí ñuu Babilonia. 21 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, xa̱ʼa̱ ta̱ Acab se̱ʼe ta̱ Colaya ta saátu xa̱ʼa̱ ta̱ Sedequías se̱ʼe ta̱ Maaseya, na̱ xíniñúʼu ki̱víi̱ ña̱ ka̱ʼa̱nna ña̱ vatá xíʼinndó: ‘Ndataxii̱na ndaʼa̱ ta̱ rey Nabucodonosor* ta̱ ñuu Babilonia ta kuninu̱úndó ña̱ kaʼníra na̱yóʼo. 22 Ndiʼi na̱ ñuu Judá na̱ nda̱kiʼinna ku̱a̱ʼa̱n chí ñuu Babilonia ka̱ʼa̱nna xa̱ʼa̱ ña̱ ndo̱ʼo na̱yóʼo tá ná sakúisochiʼñana inkana, kachina: “Nda̱a̱ táki̱ʼva ndo̱ʼo ta̱ Sedequías xíʼin ta̱ Acab saá ná keʼé Jehová xíʼún, na̱ xa̱ʼmi ta̱ rey ñuu Babilonia nu̱ú ñuʼu̱”. 23 Saáchi ke̱ʼéna iin ña̱ kaʼanní nu̱ú chí ñuu Jerusalén chi ni̱ki̱si̱na xíʼin ñá síʼi inka na̱ ta̱a, ta xi̱niñúʼuna ki̱víi̱ ña̱ ka̱ʼa̱nna xa̱ʼa̱ ña̱ vatá ña̱ kǒo níxaʼndai̱ chiñu nu̱úna ka̱ʼa̱nna xa̱ʼa̱.

”’“Yi̱ʼi̱ xi̱nii̱ tá ke̱ʼéna ña̱yóʼo, ta yi̱ʼi̱ kúú testigo”, káchi Jehová’”.

24 “Ña̱yóʼo ka̱ʼún xíʼin ta̱ Semaya ta̱ ñuu Nehelam: 25 ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Chi̱ndaʼún carta ndaʼa̱ na̱ yiví na̱ ndóo chí ñuu Jerusalén, ndaʼa̱ ta̱ Sofonías se̱ʼe ta̱ Maaseya ta̱ kúú su̱tu̱ ta saátu ndaʼa̱ ndiʼika na̱ su̱tu̱. Ña̱yóʼo xi̱kachiña: 26 ‘Jehová nda̱kaxinra yóʼó ña̱ ndakiʼún koún su̱tu̱ nu̱ú ta̱ Jehoiadá ta kiʼún kuenta xíʼin veʼe Jehová, tasaá kotoún ndáa na̱ sána kúú na̱ kéʼé nda̱a̱ táki̱ʼva kéʼé na̱ profeta ta katúnna xíʼin yitu̱n; 27 tá saá, ¿nda̱chun ta̱ʼán taxiún castigo ndaʼa̱ ta̱ Jeremías ta̱ ñuu Anatot, ta̱ káʼa̱n xíʼinndó xa̱ʼa̱ ña̱ kuu nda̱a̱ táki̱ʼva kéʼé na̱ profeta? 28 Saáchi nda̱a̱ chi̱ndaʼára na̱ ni̱ka̱ʼa̱n ña̱yóʼo xíʼinndi̱ chí Babilonia: “Ku̱a̱ʼáníva tiempo ya̱ʼa. Ixava̱ʼandó veʼe ta kundoondó iniña, chiʼindó yitu̱n ta kaxíndó ku̱i̱ʼi ña̱ kana ndaʼa̱nú”’”’”.

29 Tá ka̱ʼvi ta̱ su̱tu̱ Sofonías ña̱ káʼa̱n carta yóʼo nu̱ú ta̱ Jeremías, 30 Jehová ni̱ka̱ʼa̱nra ña̱yóʼo xíʼin ta̱ Jeremías: 31 “Ka̱ʼa̱n xa̱ʼa̱ ña̱yóʼo xíʼin ndiʼi na̱ nda̱kiʼinna ku̱a̱ʼa̱n inka ñuu: ‘Ña̱yóʼo kúú ña̱ káʼa̱n Jehová xa̱ʼa̱ ta̱ Semaya ta̱ ñuu Nehelam: “Xa̱ʼa̱ ña̱ ni̱ka̱ʼa̱n ta̱ Semaya xíʼinndó xa̱ʼa̱ ña̱ kuu ta su̱ví yi̱ʼi̱ kúú ta̱ níchindaʼára ta xi̱kuni̱ra ña̱ ná kandíxandó ña̱ vatá ña̱ káʼa̱nra, 32 ña̱yóʼo kúú ña̱ káʼa̱n Jehová: ‘Taxii̱ castigo ndaʼa̱ ta̱ Semaya ta̱ ñuu Nehelam ta saátu ndaʼa̱ na̱ se̱ʼera. Nda̱a̱ ni iin na̱ ta̱a na̱ veʼera va̱ása ka̱kuna; ta kǒo kunikara ña̱ va̱ʼa ña̱ keʼíi̱ xa̱ʼa̱ na̱ ñui̱, káchi Jehová, saáchi chi̱kaa̱ra-ini na̱ ñuu ña̱ koona contra yi̱ʼi̱ Jehová’”’”.