Jeremías
30 Jehová ni̱ka̱ʼa̱nra xíʼin ta̱ Jeremías: 2 “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: ‘Nu̱ú iin libro kaʼyiún ndiʼi ña̱ ná ka̱ʼi̱n xíʼún. 3 Saáchi “xa̱a̱ ku̱yatin ki̱vi̱, káchi Jehová, ña̱ ndakayai̱ ndiʼi na̱ ñui̱ Israel xíʼin na̱ ñui̱ Judá na̱ nda̱kiʼinna ku̱a̱ʼa̱n xíʼinna inka ñuu, káchi Jehová, taxii̱ ña̱ ná ndikóna nu̱ú ñuʼúna ña̱ ta̱xii̱ ndaʼa̱ na̱ táʼanna na̱ xi̱ndoo xi̱naʼá ta kuenta miína koo tukuña”’”.
4 Ña̱yóʼo kúú ña̱ ni̱ka̱ʼa̱n Jehová xíʼin na̱ ñuu Israel ta saátu xíʼin na̱ ñuu Judá.
5 Ña̱yóʼo kúú ña̱ káʼa̱n Jehová:
“Ndóʼó xíniso̱ʼondó ña̱ ndáʼyi̱ kóʼóna* xa̱ʼa̱ ña̱ yíʼvina;
nina na̱ yíʼviva kúúndó ta va̱ása va̱ʼa ndóondó.
6 Ixandó ña̱ ma̱ní nda̱ka̱tu̱ʼunndó á kivi kaku se̱ʼe iin ta̱a.
Tá saá, ¿nda̱chun xítoi̱ ndiʼi na̱ ta̱a na̱ ndakúní ña̱ tíinndaana ti̱xinna
nda̱a̱ táki̱ʼva kéʼé iin ñaʼá ñá káku se̱ʼe?
¿Nda̱chun ku̱yaa ndiʼi nu̱úna?
7 Kininí koo ki̱vi̱ kán.
Kǒo inka ña̱ koo táki̱ʼva íyo ña̱yóʼo.
Tiempo kán xo̱ʼvi̱ní* ta̱ Jacob.
Soo ka̱kuvara”.
8 “Ta ki̱vi̱ kán ka̱ʼnu̱i̱ yókóún* ta va̱ása kunúukanú si̱kíún* ta kaʼnda savai̱ yoʼo̱ ña̱ núʼniún, káchi Jehová ta̱ xáʼndachíñu nu̱ú na̱ ángel; va̱ása kachíñundáʼvikara* nu̱ú na̱ ke̱e inka ñuu. 9 Na̱kán kachíñuna nu̱ú Jehová Ndióxi̱na ta saátu nu̱ú ta̱ David ta̱ kúú rey nu̱úna, ta̱ taxii̱ ña̱ kaʼndachíñura nu̱úna”.
10 “Ta yóʼó ta̱ Jacob ta̱ káchíñu nu̱úi̱, va̱ása yi̱ʼvíún, káchi Jehová,
va̱ása yi̱ʼvíníún Israel.
Saáchi ni xíkání íyoún sakǎkuvai̱ yóʼó,
ta saátu ndiʼi na̱ se̱ʼún na̱ nda̱kiʼinna ku̱a̱ʼa̱n xíʼinna inka ñuu.
Ta̱ Jacob ndikóvara ta va̱ása kundi̱ʼi-inira,
va̱ʼaní koora ta kǒo nda̱a̱ ni iin na̱ sayíʼvi-ñaʼá”.
11 “Saáchi yi̱ʼi̱ íyovai̱ xíʼún ña̱ va̱ʼa sakǎkui̱ yóʼó, káchi Jehová.
Soo sandíʼi-xa̱ʼa̱vai̱ ndiʼi ñuu nu̱ú chi̱ndaʼíi̱ yóʼó ku̱a̱ʼún;
soo va̱ása sandíʼi-xa̱ʼa̱víi̱ yóʼó.
Ndakiʼinvaún consejo* ña̱ xíniñúʼu ndakiʼún;
ña̱ taxii̱ kúúva castigo ndaʼún”.
12 Saáchi ña̱yóʼo kúú ña̱ káʼa̱n Jehová:
“Kǒo kivi ndaʼa nu̱ú tu̱kue̱ʼún.
Kǒo ta̱tánña.
13 Kǒo nda̱a̱ ni iin na̱ ndakiʼin tu̱ʼún,
va̱ása kivi ndaʼa ndi̱ʼi táʼyi ña̱ ka̱na ku̱ñún.
Kǒo ña̱ kivi sandáʼa yóʼó.
14 Ndiʼi na̱ ta̱ni̱ún na̱ xi̱kuni̱ní xi̱xini yóʼó na̱ndósova-inina xa̱ʼún.
Va̱ása nándukúkana yóʼó.
Saáchi ka̱nii̱ yóʼó nda̱a̱ táki̱ʼva kéʼé iin na̱ sáa̱-ini xíni yóʼó,
ta ta̱xii̱ castigo ndaʼún nda̱a̱ táki̱ʼva kéʼé iin na̱ yiví na̱ ndi̱va̱ʼaní-ini,
xa̱ʼa̱ ña̱ ku̱a̱ʼání ku̱a̱chi ni̱ki̱ʼviún ta saátu xa̱ʼa̱ ndiʼi ña̱ va̱ása va̱ʼa ke̱ʼún.
15 ¿Nda̱chun káʼa̱nkúáchiún* xa̱ʼa̱ tu̱ndóʼo ña̱ ndóʼún?
Va̱ása sandákoovíún ña̱ xo̱ʼvi̱ún.
Ke̱ʼíi̱ ña̱yóʼo xíʼún xa̱ʼa̱ ku̱a̱chi ña̱ ni̱ki̱ʼviún
ta saátu xa̱ʼa̱ ndiʼi ña̱ va̱ása va̱ʼa ke̱ʼún.
16 Ña̱kán taxii̱ ña̱ ná sandíʼi-xa̱ʼa̱na ndiʼi na̱ kánitáʼan xíʼún,
ta ndiʼi na̱ sáa̱-ini xíni yóʼó ndakiʼinnana ku̱ʼu̱nna kundoona inka ñuu.
Na̱ kíndaa ña̱ʼa ña̱ kúúmiíún kindaana ña̱ʼana,
ta ndiʼi na̱ íxakuíʼná ña̱ʼa ña̱ kúúmiíún ixakuíʼnána ña̱ʼana”.
17 “Soo taxi tukui̱ ña̱ va̱ʼa ná kuniún ta sandáʼi̱ nu̱ú tu̱kue̱ʼún, káchi Jehová,
ni ni̱ka̱ʼa̱nvana xa̱ʼún ña̱ ni̱ndo̱ondaʼún tá ka̱china:
‘Sion, ña̱ kǒo nda̱a̱ ni iinna ndíʼi̱-ini xa̱ʼa̱’”.
18 Ña̱yóʼo kúú ña̱ káʼa̱n Jehová:
“Ndakayai̱ ndiʼi na̱ xi̱ndoo veʼe válí ta̱ Jacob na̱ nda̱kiʼinna ku̱a̱ʼa̱n xíʼinna inka ñuu,
ta kundáʼvi-inii̱ kunii̱ tabernáculo ña̱ kúúmiína.
Ndasava̱ʼa tukuna ñuuna chí koʼndo nu̱ú ni̱xi̱yoña
ta veʼe súkun ña̱ kútu̱ní ndási kundichiña nu̱ú xi̱ndichiña.
19 Ta kutaku̱ iniña ña̱ ndeéní xítana ña̱ táxina tíxa̱ʼvi ta xáku̱na xa̱ʼa̱ ña̱ kúsi̱í-inina.
Va̱ása loʼo kuití koona chi taxii̱ ña̱ ku̱i̱na̱na;
taxii̱ ña̱ ku̱a̱ʼání koona,* ta kundayáʼvinína.
20 Na̱ se̱ʼera koona nda̱a̱ táki̱ʼva ni̱xi̱yona tá ya̱chi̱,
ta ndiʼi na̱ ñuura ndiʼi tiempo koona nu̱úi̱.
Miíi̱ xíni̱ ndáaña keʼíi̱ xíʼin na̱ íxandi̱va̱ʼa xíʼinna.
21 Ta̱ ndáyáʼviní ta̱ kuniʼi yichi̱ nu̱úna koora iin ta̱ táʼan miína,
ta ti̱xin na̱ ñuu miína kana ta̱ kaʼndachíñu nu̱úna.
Yi̱ʼi̱ taxii̱ ña̱ ná kuyatinra ta ta̱kán kuyatinvara nu̱úi̱”.
“Saáchi tá ná kǒo keʼíi̱ ña̱yóʼo, ¿ndáana kúú na̱ ndakú koo ini ña̱ kuyatinna nu̱úi̱?”, káchi Jehová.
22 “Ta ndóʼó koondó na̱ ñui̱ ta yi̱ʼi̱ koi̱ Ndióxi̱ndó”.
23 Kotondó, ña̱ sáa̱ Jehová kooña nda̱a̱ táki̱ʼva íyo ta̱chí ña̱ ndeéní káni,
nda̱a̱ táki̱ʼva kéʼé ta̱chí ña̱ káva̱ saá keʼéña nuuña xi̱ní na̱ ndi̱va̱ʼaní-ini.
24 Nda̱a̱ ná xi̱nu ña̱ kúni̱ Jehová keʼéra xíʼin ndiʼi níma̱ra ta saátu nda̱a̱ tá ná sandíʼira keʼéraña, saá kúú ña̱ va̱ása sa̱a̱kara.
Ndóʼó kunda̱a̱ va̱ʼa inindó xa̱ʼa̱ ña̱yóʼo ki̱vi̱ so̱ndíʼi.