Jeremías
31 “Tiempo kán, káchi Jehová, yi̱ʼi̱ xa̱i̱ koi̱ Ndióxi̱ ndiʼi na̱ familia na̱ ñuu Israel ta na̱yóʼo koona na̱ ñui̱”.
2 Ña̱yóʼo kúú ña̱ káʼa̱n Jehová:
“Chí nu̱ú ñuʼú yi̱chí ni̱na̱ʼi̱ ña̱ va̱ʼa íyo inii̱ xíʼin na̱ yiví na̱ kǒo níxaʼnína xíʼin espada,
tá xíka na̱ ñuu Israel ku̱a̱ʼa̱nna chí nu̱ú ndakindee̱na”.
3 Nda̱a̱ xíká ki̱ta Jehová nu̱úi̱ ta ni̱ka̱ʼa̱nra xíʼi̱n:
“Ni̱kuʼvi̱ní-inii̱ xi̱nii̱ yóʼó ta ndiʼi tiempo kuʼvi̱-inii̱ kunii̱ yóʼó.
Ta xa̱ʼa̱ ña̱kán kúú ña̱ ka̱nai̱ yóʼó ña̱ kixiún nu̱úi̱ chi ndixaní kúʼvi̱-inii̱* xínii̱ yóʼó.
4 Sandáʼa tukui̱ yóʼó ta xa̱a̱ tukún koún iin ñuu.
Yóʼó ñá loʼo kúa̱an ñuu Israel, ndakiʼin tukún pandereta
ta kusi̱íní-iniún kitaún tixáʼún.*
5 Chiʼi tukún tú uva yuku̱ ña̱ íyo chí Samaria;
ta na̱ ná chiʼi túyóʼo kusi̱íní-inina kaxína ku̱i̱ʼi ña̱ kana ndaʼa̱nú.
6 Saáchi kixaa̱ ki̱vi̱ ña̱ ndiʼi na̱ ndáa chí yuku̱ ña̱ íyo chí nu̱ú ñuʼú ta̱ Efraín ndeéní ka̱ʼa̱nna:
‘Naʼandó, ná ku̱ʼu̱nyó chí Sion nu̱ú íyo Jehová Ndióxi̱yó’”.
7 Saáchi ña̱yóʼo kúú ña̱ káʼa̱n Jehová:
“Ndeéní nda̱ʼyi̱ndó xa̱ʼa̱ ña̱ kúsi̱í-inindó nu̱ú ta̱ Jacob.
Ndeéní nda̱ʼyi̱ndó xa̱ʼa̱ ña̱ kúsi̱í-inindó saáchi ndóʼó ndáyáʼviníkandó nu̱ú ndiʼika na̱ ñuu.
Ka̱ʼa̱nndó xa̱ʼa̱ña; ndasakáʼnundó Ndióxi̱ ta kachindó:
‘Jehová, sakǎku na̱ ñuún, na̱ ñuu Israel na̱ kíndo̱o’.
8 Ku̱ʼi̱n ndakiʼii̱n ndóʼó nda̱a̱ chí ñuu ña̱ íyo chí norte ña̱ va̱ʼa ndikóndó,
ndakayai̱ ndóʼó ni xíkání ndóondó.
Ta xíʼin na̱yóʼo kutáʼan na̱ kúáa nu̱ú* ta saátu na̱ kǒo kívi kaka,
ná ñúʼu se̱ʼe ta saátu ná xa̱a̱ ku̱nu̱mí kaku se̱ʼe, inkáchi kutáʼan ndiʼina.
Ku̱a̱ʼání koona tá ná ndikóna yóʼo.
9 Kuakuna ndikóna.
Yi̱ʼi̱ kuniʼii̱ yichi̱ nu̱úna nani káʼa̱n-ndáʼvina xíʼi̱n.
Ku̱ʼi̱n xíʼinna nda̱a̱ nu̱ú yáʼa ku̱a̱ʼání ti̱kui̱í
chí yichi̱ ña̱ nda̱a̱, nu̱ú kǒo nda̱a̱ ni iin ña̱ʼa sandákava miína.
Saáchi yi̱ʼi̱ kúú yivá ta̱ Israel, ta ta̱ Efraín kúú se̱ʼenu̱úi̱”.
10 Ndóʼó na̱ ñuu kuniso̱ʼondó ña̱ káʼa̱n Jehová,
ta ka̱ʼa̱nndó xa̱ʼa̱ña chí isla ña̱ xíkání íyo:
“Ta̱ chi̱ndaʼá na̱ ñuu Israel ku̱a̱ʼa̱nna inka ñuu ndakayarana.
Kundaarana nda̱a̱ táki̱ʼva kéʼé iin ta̱ pastor xíʼin ndikachi* sa̱na̱ra.
11 Saáchi Jehová ka̱ʼa̱n ku̱a̱chira xa̱ʼa̱ ta̱ Jacob
ta sakǎkurara nu̱ú na̱ ndakúka nu̱úra.
12 Kixina ta nda̱a̱ chí Sion ndeéní nda̱ʼyi̱na xa̱ʼa̱ ña̱ kusi̱í-inina,
kusi̱íkaví-inina xa̱ʼa̱ ña̱ va̱ʼaní-ini Jehová xíʼinna,*
xa̱ʼa̱ ña̱ taxira trigo, vino xa̱á xíʼin aceite ndaʼa̱na,
saátu xa̱ʼa̱ se̱ʼe ndikachi sa̱na̱na xíʼin si̱ndi̱ki̱ sa̱na̱na.
Koona nda̱a̱ táki̱ʼva íyo iin jardín ña̱ va̱ʼaní kóso̱na,
ta nda̱a̱ ni iin yichi̱ va̱ása ndiʼi ndee̱na”.
13 “Tiempo kán, ñá loʼo kúa̱an kusi̱íní-iniñá tixáʼañá
ta saátu kusi̱íní-ini na̱ va̱lí xíʼin na̱ xi̱kuaʼa̱.
Taxii̱ ña̱ ná kusi̱í-inina nu̱úka ña̱ kusuchí-inina.
Sandíkoi̱-inina ta nu̱úka ña̱ xo̱ʼvi̱na* kusi̱íva-inina.
14 Taxii̱ ña̱ ku̱a̱ʼání koo ña̱ʼa kuxu na̱ su̱tu̱,
ta na̱ ñui̱ va̱ʼaní kunina xa̱ʼa̱ ndiʼi ña̱ʼa va̱ʼa ña̱ taxii̱ ndaʼa̱na”, káchi Jehová.
15 “Ña̱yóʼo kúú ña̱ káʼa̱n Jehová:
‘Chí ñuu Ramá táku̱ ta̱chí iin na̱ yiví, kúsuchíní-inina ta xákunína;
ñá Raquel kúú ñá xákuní xa̱ʼa̱ na̱ se̱ʼeñá.
Nda̱a̱ ni iinna kǒo kívi sandíko-iniñá
saáchi kǒoka na̱ se̱ʼeñá íyo xíʼinñá’”.
16 Ña̱yóʼo kúú ña̱ káʼa̱n Jehová:
“‘Va̱ása kuakukaún ta ná va̱ása ko̱yoka ti̱kui̱í nu̱ún,
saáchi ndakiʼinvaún ña̱ va̱ʼa xa̱ʼa̱ ña̱ ke̱ʼún’, káchi Jehová.
‘Ni ndóovana nu̱ú ñuʼú na̱ sáa̱-ini xíniñaʼá, ndikóvana’.
17 ‘Ta íyova iin ña̱ va̱ʼa ndátún ndakiʼún chí nu̱únínu’, káchi Jehová.
‘Na̱ se̱ʼún ndikóna nu̱ú ñuʼúna’”.
18 “Káxiní xi̱niso̱ʼi̱ ña̱ ndándikóní-ini ta̱ Efraín ta káchira:
‘Ta̱xiún castigo ndaʼíi̱ ta na̱samavai̱ ña̱ kéʼíi̱,
nda̱a̱ táki̱ʼva kéʼéna xíʼin iin si̱ndi̱ki̱ loʼo tí ta̱ʼán kumáso.
Kana yi̱ʼi̱ ña̱ ná ndikói̱ ta ndikóvai̱,
saáchi yóʼó kúú Jehová Ndióxi̱ miíi̱.
19 Tá xa̱a̱ ndi̱kói̱ ni loʼo va̱ása va̱ʼa níkunii̱;
tá xa̱a̱ ni̱na̱ʼún nu̱úi̱ ña̱ va̱ása va̱ʼa íyo ña̱ ke̱ʼíi̱, ka̱nii̱ si̱ʼii̱n ña̱ va̱ʼa na̱ʼi̱ ña̱ kúsuchí-inii̱.
Ku̱kaʼanní nu̱úi̱ xa̱ʼa̱ ndiʼi ña̱ va̱ása va̱ʼa ke̱ʼíi̱ tá ni̱xi̱yo loʼi̱’”.
20 “¿Á su̱ví ta̱ Efraín kúú se̱ʼi̱ ta̱ kúni̱níi̱ xínii̱ ta sákusi̱íra-inii̱?
Saáchi ni ku̱a̱ʼání ña̱ʼa ná ka̱ʼi̱n contrara, ndákaʼánvai̱ xa̱ʼa̱ra.
Xa̱ʼa̱ ña̱kán kundáʼviva-inii̱ kunii̱ra.
Mií ña̱ nda̱a̱ kundáʼviva-inii̱ kunii̱ra”, káchi Jehová.
21 “Chindoo koʼndoún yu̱u̱ chí yichi̱
ta kataún señal.
Kiʼin va̱ʼún kuenta ndáa yichi̱ kúú ña̱ ku̱ʼún.
Ndikó ñá loʼo kúa̱an ñuu Israel. Ndikó ñuún.
22 ¿Nda̱a̱ ama sandákoún ña̱ kaka-iniún, yóʼó ñá loʼo ñá va̱ása nda̱kú-ini?
Saáchi Jehová i̱xava̱ʼara iin ña̱ʼa xa̱á nu̱ú ñuʼú:
iin ñá ñaʼá nandukúníñá iin ta̱ ta̱a”.
23 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Na̱kán ndikó tukuna ka̱ʼa̱nna tu̱ʼun yóʼo chí nu̱ú ñuʼú ña̱ íyo chí Judá xíʼin ñuu ña̱ íyo kán tá ná ndikó tuku na̱ nda̱kiʼinna ku̱a̱ʼa̱n inka ñuu: ‘Mií Jehová ná taxi ña̱ va̱ʼa ndaʼún yuku̱ ña̱ yi̱i̱ nu̱ú ndóo na̱ kéʼé ña̱ nda̱kú’. 24 Ta chí ñuu Judá xíʼin ñuu ña̱ íyo yatin kán ndakundoo na̱ yiví, saáchi kán kundoo na̱ chíʼi ta saátu na̱ ndáa kití. 25 Saáchi taxii̱ ndee̱ ndaʼa̱ na̱ ku̱naa ta saátu taxii̱ ndiʼi ña̱ xíniñúʼu na̱ ku̱vitá xa̱ʼa̱ ña̱ kǒo ña̱ kuxuna”.
26 Tasaá nda̱káxí-inii̱* ta nda̱kunái̱ nduchúnu̱úi̱; va̱ʼakaví ni̱xa̱níi̱.
27 “Xa̱a̱ ku̱yatin ki̱vi̱, káchi Jehová, ña̱ taxii̱ ña̱ ku̱a̱ʼání ná xa̱a̱ na̱ ta̱a ñuu Israel koona ta saátu na̱ ñuu Judá ta ku̱a̱ʼánítu xa̱a̱ kití sa̱na̱na koorí”.
28 “Saáchi nda̱a̱ táki̱ʼva ni̱xi̱yo tu̱ʼvai̱ ña̱ tuʼii̱nna, ña̱ sakuachii̱na, ña̱ sandúvai̱na, ña̱ sandíʼi-xa̱ʼíi̱na ta saátu ña̱ saxóʼvi̱i̱na, saátu koo tu̱ʼvai̱ ña̱ ndachiʼii̱na* ta sandáʼi̱na, káchi Jehová. 29 Ki̱vi̱ saá va̱ása ka̱ʼa̱nkana: ‘Na̱ yivána kúú na̱ xa̱xí uva tí iyá soo se̱ʼevana kúú na̱ ni̱xi̱yá nu̱ʼu’. 30 Nu̱úka ña̱yóʼo iin tá iinna kuvina xa̱ʼa̱ ku̱a̱chi ña̱ ni̱ki̱ʼvina. Tá iinna xa̱xína uva tí iyá miína ku̱i̱yá nu̱ʼu”.
31 “Kotondó, xa̱a̱ ku̱yatin ki̱vi̱, káchi Jehová, ña̱ keʼíi̱ iin trato xa̱á xíʼin na̱ ñuu Israel ta saátu xíʼin na̱ ñuu Judá. 32 Va̱ása kooña nda̱a̱ táki̱ʼva ni̱xi̱yo trato ña̱ ke̱ʼíi̱ xíʼin na̱ táʼanna na̱ xi̱ndoo xi̱naʼá, tá ti̱ii̱n ndaʼa̱na ña̱ va̱ʼa tavái̱na ñuu Egipto, ‘trato ña̱ ke̱ʼíi̱ xíʼinna ña̱ sa̱ndíʼi-xa̱ʼa̱na ni kuenta miívai̱ xi̱kuuna’,* káchi Jehová”.
33 “Saáchi ña̱yóʼo kúú trato ña̱ keʼíi̱ xíʼin na̱ ñuu Israel tá ná ya̱ʼa ki̱vi̱ kán, káchi Jehová. Nda̱a̱ inina ma̱á chikai̱ ley ña̱ ta̱xii̱ ndaʼa̱na ta kaʼyii̱ña níma̱na. Yi̱ʼi̱ koi̱ Ndióxi̱na ta na̱kán koona na̱ ñui̱”.
34 “Ta nda̱a̱ ni iinna va̱ása sanáʼa̱kana na̱ táʼanna á na̱ ñanina ta kachina: ‘Kuxini̱ndó Jehová’, saáchi ndiʼina kuxini̱vana yi̱ʼi̱, nda̱a̱ na̱ va̱lí iinsaá nda̱a̱ na̱ chée, káchi Jehová. Ta yi̱ʼi̱ koo káʼnu-inii̱ xa̱ʼa̱ ña̱ va̱ása va̱ʼa kéʼéna ta kǒo ndakaʼánkai̱ xa̱ʼa̱ ku̱a̱china”.
35 Ña̱yóʼo kúú ña̱ káʼa̱n Jehová,
ta̱ táxi ñu̱ʼu* ña̱ kutuu̱nña káʼñu,*
ta saátu chi̱ndúʼúra ley ña̱ kundiku̱n yo̱o̱ xíʼin ki̱mi ña̱ va̱ʼa kutuu̱nrí tá ñuú,
ta̱ sáka̱nda̱ nu̱ú tá mar ta iin níʼi káni nu̱úrá,
ta naníra Jehová ta̱ xáʼndachíñu nu̱ú na̱ ángel:
36 “‘Tá ná kǒo kuuka ña̱yóʼo, káchi Jehová,
saá kúú ña̱ sandákoo na̱ se̱ʼe ta̱ Israel ña̱ koona iin ñuu nu̱úi̱ ndiʼi tiempo’”.
37 Ña̱yóʼo kúú ña̱ káʼa̱n Jehová: “‘Tá ná kuchiñu iin na̱ yiví chuʼunna ndiví ña̱ íyo chí ni̱nu ta saátu ña̱ kotona ndiʼi ña̱ʼa ña̱ íyo nu̱ú ka̱na xa̱ʼa̱ ñuʼú, nda̱a̱ saáví kúú ña̱ sandákoondaʼíi̱ na̱ se̱ʼe ta̱ Israel xa̱ʼa̱ ndiʼi ña̱ ke̱ʼéna’, káchi Jehová”.
38 “Koto, xa̱a̱ ku̱yatin ki̱vi̱, káchi Jehová, ña̱ sandáʼa tukuna ñuu yóʼo ta kooña kuenta Jehová, sandáʼana nda̱a̱ chí Veʼe súkun ta̱ Hananel iinsaá nda̱a̱ chí Yéʼé ña̱ íyo chí ti̱tu̱n. 39 Ta yoʼo̱ ña̱ xíniñúʼuna ña̱ távána ki̱ʼva, nda̱kúní kataʼnunaña* nda̱a̱ chí xi̱kí ña̱ Gareb tasaá ndikóko̱oña ku̱ʼu̱nña chí Goá. 40 Ta iníí yoso̱ nu̱ú xi̱xatana na̱ ni̱xi̱ʼi̱ ta saátu ya̱a̱* xíʼin iníí xa̱ʼa̱ yuku̱ ña̱ xáa̱ nda̱a̱ chí yoso̱ ña̱ Cedrón ta saátu nda̱a̱ ti̱tu̱n nu̱ú íyo Yéʼé kuáyi̱ ña̱ íyo chí táʼví este,* kooña ña̱ yi̱i̱ nu̱ú Jehová. Nda̱a̱ ni iinka yichi̱ va̱ása ta̱ni̱ ñuu yóʼo ta nda̱a̱ ni iinka yichi̱ va̱ása ndiʼi-xa̱ʼa̱ña”.