Jeremías

32 Tá xa̱a̱ 10 ku̱i̱ya̱ xáʼndachíñu ta̱ Sedequías ta̱ ñuu Judá, á tá xa̱a̱ 18 ku̱i̱ya̱ xáʼndachíñu ta̱ rey Nabucodonosor,* Jehová ni̱ka̱ʼa̱nra xíʼin ta̱ Jeremías. 2 Tá tiempo saá, na̱ soldado ta̱ rey ñuu Babilonia xi̱ndoona iníí sa̱tá ñuu Jerusalén, ta ta̱ Jeremías xi̱ndasira chí Yéʼé na̱ Soldado chí veʼe* ta̱ rey ñuu Judá. 3 Saáchi ta̱ rey Sedequías ta̱ ñuu Judá nda̱kasirara kán ta xi̱kachira: “¿Nda̱chun káʼún ña̱ kuu ña̱yóʼo? Yóʼó káchiún: ‘Ña̱yóʼo kúú ña̱ káʼa̱n Jehová: “Ndataxii̱ ñuu yóʼo ndaʼa̱ ta̱ rey ñuu Babilonia ta ta̱kán ndakiʼinraña, 4 ta ta̱ rey Sedequías ta̱ ñuu Judá kǒo kuchiñura ka̱kura nu̱ú na̱ caldeo, saáchi ta̱ rey ñuu Babilonia ndakiʼinvara ta̱yóʼo; ndakutáʼanra, ka̱ʼa̱nra xíʼin táʼanra ta koto nu̱ú táʼanra”’. 5 ‘Ta̱kán ndakiʼinra ta̱ Sedequías ku̱ʼu̱n xíʼinra chí ñuu Babilonia ta kán ki̱ndoora nda̱a̱ ná ndakaʼán tukui̱ xa̱ʼa̱ra, káchi Jehová. Ni ná ndakundeéndó kanitáʼanndó xíʼin na̱ caldeo kǒo kuchiñundó xíʼinna’”.

6 Ta̱ Jeremías ni̱ka̱ʼa̱nra: “Ña̱yóʼo kúú ña̱ ni̱ka̱ʼa̱n Jehová xíʼi̱n: 7 ‘Ta̱ Hanamel se̱ʼe xitoún* ta̱ Salum kixira ta ka̱ʼa̱nra xíʼún: “Satá* ñuʼú ña̱ kúúmiíi̱ chí Anatot, saáchi yóʼó kúú ta̱ nu̱ú ta̱ kúúmií derecho ña̱ ndasatáúnña”’”.*

8 Ta nda̱a̱ táki̱ʼva ni̱ka̱ʼa̱n Jehová xíʼi̱n, ta̱ Hanamel se̱ʼe xitoi̱ ki̱xira nu̱úi̱ chí Yéʼé na̱ Soldado ta ni̱ka̱ʼa̱nra xíʼi̱n: “Ixaún ña̱ ma̱ní satá ñuʼú ña̱ kúúmiíi̱ chí Anatot chí nu̱ú ñuʼú na̱ tribu ta̱ Benjamín, saáchi yóʼó kúú ta̱ kúúmií derecho ña̱ kindo̱ún xíʼinña ta ndasatáúnña. Ña̱kán satáña”. Ndi̱ku̱n saá ku̱ndaa̱-inii̱ ña̱ mií Jehová kúú ta̱ ni̱ka̱ʼa̱n tu̱ʼun yóʼo.

9 Ña̱kán sa̱távai̱* ñuʼú ña̱ xi̱kuumií ta̱ Hanamel se̱ʼe xitoi̱ chí Anatot. Ta̱xii̱ u̱xu̱ xu̱ʼún ña̱ plata ndaʼa̱ra ta saátu inka 80 gramo* ña̱yóʼo. 10 Tasaá ka̱ʼyii̱ xa̱ʼa̱ ña̱yóʼo nu̱ú iin tutu ta chi̱kai̱ selloña, ka̱nai̱ na̱ testigo tasaá ka̱tai̱ xu̱ʼún nu̱ú ña̱ʼa ña̱ xíniñúʼuna ña̱ kátanaña. 11 Ki̱ʼii̱n tutu ña̱ kúúmií sello ña̱ káʼa̱n ña̱ sa̱tái̱ ñuʼú, nda̱a̱ táki̱ʼva káʼa̱n ley ña̱ xíniñúʼu keʼéna tá sátána ñuʼú. Ta saátu ki̱ʼii̱n tutu ña̱ kǒo sello kúúmií, 12 ta ta̱xii̱ña ndaʼa̱ ta̱ Baruc se̱ʼe ta̱ Nerías, se̱ʼe ta̱ Mahseya, ta xi̱ni ta̱ Hanamel se̱ʼe xitoi̱ ke̱ʼíi̱ ña̱yóʼo, saátu na̱ testigo na̱ chi̱kaa̱ firma nu̱ú tutu ña káʼa̱n ña̱ sa̱tái̱ ñuʼú yóʼo xíʼin ndiʼi na̱ judío na̱ xi̱ndoo chí Yéʼé na̱ Soldado.

13 Ta nu̱ú ndiʼi na̱yóʼo ni̱ka̱ʼi̱n xíʼin ta̱ Baruc: 14 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Kiʼin tutu ña̱ kúúmií sello xíʼin ña̱ kǒo sello kúúmií, ta taúnña ini iin ki̱si ña̱ ñuʼú ña̱ va̱ʼa ná kǒo ndiʼi-xa̱ʼa̱ña ta kooña ku̱a̱ʼá tiempo’. 15 Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Ndikó tukuna satána veʼe ñuu yóʼo, satána ñuʼú ta saátu nu̱ú íyo tú uva’”.

16 Tándi̱ʼi ta̱xii̱ tutu ña̱ káʼa̱n xa̱ʼa̱ ña̱ sa̱tái̱ ñuʼú ndaʼa̱ ta̱ Baruc se̱ʼe ta̱ Nerías, ni̱ka̱ʼi̱n ña̱yóʼo xíʼin Jehová: 17 “Táta káʼnu Jehová, yóʼó kúú ta̱ ke̱ʼé ndiví xíʼin ñuʼú xa̱ʼa̱ ña̱ íyoní ndee̱ ndaʼún ta ndakúníún. Kǒo nda̱a̱ ni iin ña̱ʼa ña̱ yo̱ʼvi̱ní* nu̱ún. 18 Yóʼó náʼún ña̱ ndixaní kúʼvi̱-iniún* xíniún ku̱a̱ʼánína, soo tá iin na̱ íyo se̱ʼe kíʼvina ku̱a̱chi táxiún castigo ndaʼa̱ se̱ʼena. Yóʼó kúú Ndióxi̱ ta̱ nda̱a̱ ta̱ káʼnuní ta̱ ndakúní, ta ki̱vi̱ún kúú Jehová ta̱ xáʼndachíñu nu̱ú na̱ ángel. 19 Va̱ʼaní consejo táxiún ta xíʼin ndeún kéʼún ña̱yóʼo. Nduchúnu̱ún xítoña ña̱ kéʼé iin tá iin na̱ yiví, ta nda̱a̱ táki̱ʼva íyona saá koo ña̱ ndakiʼinna ta saátu nda̱a̱ táki̱ʼva íyo ña̱ kéʼéna saá koo ña̱ ndakiʼinna. 20 Chí ñuu Egipto ke̱ʼún ku̱a̱ʼání milagro ta nda̱a̱ vitin kúnda̱a̱-inina xa̱ʼa̱ ña̱yóʼo, ta ndiʼi na̱ ñuu Israel ni̱xa̱a̱na ku̱ndaa̱-inina xa̱ʼa̱ ki̱vi̱ún ta saátu ndiʼika na̱ ndóo nu̱ú ñuʼú nda̱a̱ táki̱ʼva kúú ki̱vi̱ vitin. 21 Ta ta̱váún na̱ ñuún Israel chí nu̱ú ñuʼú na̱ ñuu Egipto xíʼin ndeún, ke̱ʼún ku̱a̱ʼání milagro ta saátu ña̱ʼa ña̱ i̱yoní.

22 ”Tá ni̱ya̱ʼa tiempo ta̱xiún ñuʼú yóʼo ndaʼa̱na, nda̱a̱ táki̱ʼva ki̱ndoún xíʼin na̱ táʼanna na̱ xi̱ndoo xi̱naʼá, ta̱xiún iin ñuʼú nu̱ú íyoní leche xíʼin ñu̱ñú ndaʼa̱na. 23 Na̱yóʼo ni̱ki̱ʼvina ta xi̱kundoona nu̱úña, soo kǒo níxiniso̱ʼona ña̱ ni̱ka̱ʼún ta ni kǒo níxi̱ndiku̱nna ley ña̱ ta̱xiún. Va̱ása níkeʼéna nda̱a̱ ni iin ña̱ xa̱ʼndaún nu̱úna, ta xa̱ʼa̱ ña̱kán kúú ña̱ chi̱ndaʼún ndiʼi tu̱ndóʼo yóʼo nu̱úna. 24 Kotondó, ki̱xaa̱ na̱ ta̱a ta chi̱ndoona iin koʼndo ñuʼú xíʼin yu̱u̱ sa̱tá nama̱ ñuu yóʼo ña̱ va̱ʼa ki̱ʼvina ta ndakiʼinnaña. Ta na̱ caldeo na̱ kánitáʼan xíʼin ñuu yóʼo kuchiñuvana ndakiʼinnaña xa̱ʼa̱ ña̱ íyo ku̱a̱chi, so̱ko xíʼin kue̱ʼe̱; ña̱kán nda̱a̱ táki̱ʼva xítoún, ndiʼi ña̱ ni̱ka̱ʼún ni̱xi̱nuvaña. 25 Soo yóʼó, táta káʼnu Jehová ni̱ka̱ʼún xíʼi̱n ‘Satá ñuʼú xíʼin xu̱ʼún ta kana na̱ koo testigo’, ni kúnda̱a̱ káxi iniún ña̱ ndakiʼin na̱ caldeo ñuu yóʼo”.

26 Tasaá ni̱ka̱ʼa̱n Jehová xíʼin ta̱ Jeremías: 27 “Yi̱ʼi̱ kúú Jehová, Ndióxi̱ ndiʼi na̱ ndóo nu̱ú ñuʼú. ¿Á íyo iin ña̱ʼa ña̱ yo̱ʼvi̱ní nu̱ú yi̱ʼi̱? 28 Xa̱ʼa̱ ña̱kán, ña̱yóʼo kúú ña̱ káʼa̱n Jehová: ‘Ndataxii̱ ñuu yóʼo ndaʼa̱ na̱ caldeo ta saátu ndaʼa̱ ta̱ rey Nabucodonosor* ta̱ ñuu Babilonia ta kuchiñura ndakiʼinraña. 29 Ta na̱ caldeo na̱ kánitáʼan xíʼin na̱ ñuu yóʼo ki̱ʼvina ta kaʼminaña. Kaʼminaña xíʼin ndiʼi veʼe ña̱ nda̱a na̱ yiví xi̱ní ta ni̱so̱kóna ña̱ʼa nu̱ú* ña̱ Baal ta ni̱so̱kótuna vino nu̱ú inkaka ndióxi̱ ña̱ va̱ʼa sasáa̱na yi̱ʼi̱’.

30 ”‘Saáchi na̱ yiví ñuu Israel ta saátu na̱ ñuu Judá nda̱a̱ tá válívína ki̱xáʼana kéʼéna nina ña̱ʼa ña̱ va̱ása va̱ʼa nu̱úi̱; na̱ ñuu Israel ndákundeéna sása̱a̱na yi̱ʼi̱ xíʼin ña̱ʼa ña̱ i̱xava̱ʼana xíʼin ndaʼa̱na, káchi Jehová. 31 Saáchi nda̱a̱ tá ki̱vi̱ ña̱ ki̱xáʼa íyo ñuu yóʼo iinsaá nda̱a̱ vitin ña̱ kéʼéña kúú ña̱ ndákundeéña sása̱a̱ña yi̱ʼi̱, xa̱ʼa̱ ña̱kán kúú ña̱ xíniñúʼu ku̱taʼaña nu̱úi̱, 32 xa̱ʼa̱ ndiʼi ña̱ ke̱ʼé na̱ yiví na̱ ñuu Israel xíʼin na̱ ñuu Judá ña̱ va̱ʼa sasáa̱na yi̱ʼi̱, ña̱ ke̱ʼé miína, na̱ kúú rey nu̱úna, na̱ níʼi yichi̱ nu̱úna, na̱ su̱tu̱, na̱ profeta xíʼin na̱ ta̱a ñuu Judá xíʼin na̱ ndóo ñuu Jerusalén. 33 Nu̱úka ña̱ kuyatinna nu̱úi̱ na̱ ku̱xíkava kúúna; yi̱ʼi̱ tuku ta tuku xi̱kunii̱ sanáʼi̱na soo kǒo níxiinna kuniso̱ʼona, ni kǒo níxiinna ndakiʼinna consejo* ña̱ ta̱xii̱ ndaʼa̱na. 34 Ta chi̱ndoona ña̱ʼa ña̱ kini ña̱ xi̱ndasakáʼnuna ini veʼe nu̱ú ndásakáʼnuna ki̱víi̱ ña̱ va̱ʼa ixayaku̱a̱naña. 35 Ta saátu i̱xava̱ʼana nu̱ú* ndasakáʼnuna ña̱ Baal chí yoso̱ ña̱ Hinón,* ña̱ va̱ʼa kaʼmina se̱ʼeta̱ana xíʼin se̱ʼe-síʼina ta so̱kónana nu̱ú ña̱ Mólek, soo yi̱ʼi̱ va̱ása níxaʼndai̱ chiñu nu̱úna ña̱ keʼéna ña̱yóʼo. Ni loʼo kǒo níndakanixi̱níi̱ ña̱ ka̱ʼi̱n xíʼinna ña̱ keʼéna iin ña̱ʼa ña̱ kininí, ta xa̱ʼa̱ ña̱ ke̱ʼéna ña̱yóʼo ni̱ki̱ʼvi na̱ ñuu Judá ku̱a̱chi nu̱úi̱’.

36 ”Xa̱ʼa̱ ña̱kán, ña̱yóʼo kúú ña̱ káʼa̱n Jehová Ndióxi̱ na̱ ñuu Israel xa̱ʼa̱ ñuu ña̱ káʼa̱nndó ndakiʼin ta̱ rey ñuu Babilonia xa̱ʼa̱ ña̱ íyo ku̱a̱chi, so̱ko xíʼin kue̱ʼe̱: 37 ‘Ndakayai̱ ndiʼi ndóʼó na̱ chi̱ndaʼíi̱ ku̱a̱ʼa̱n inka ñuu tá ni̱sa̱a̱níi̱ saáchi kǒo níkutói̱ ña̱ ke̱ʼéndó; taxii̱ ña̱ ná ndikóndó ñuu yóʼo ta saátu taxii̱ ña̱ va̱ʼaní kundoondó. 38 Na̱kán koona na̱ ñui̱ ta yi̱ʼi̱ koi̱ Ndióxi̱na. 39 Ta taxii̱ ña̱ iin kuití ná koo níma̱na ta iin yichi̱ kuití ná ku̱ʼu̱nna, ña̱ va̱ʼa ná yi̱ʼvína kunina yi̱ʼi̱* ndiʼi tiempo, xa̱ʼa̱ ña̱ va̱ʼa miína ta saátu xa̱ʼa̱ ña̱ va̱ʼa na̱ se̱ʼena na̱ kundoo chí nu̱únínu. 40 Ta keʼíi̱ iin trato xíʼinna ña̱ koo ndiʼi tiempo, ta kǒo sandákoi̱ ña̱ keʼíi̱ ña̱ʼa va̱ʼa xa̱ʼa̱na; ta chikai̱-inina ña̱ ná yi̱ʼvína kunina yi̱ʼi̱ ña̱ va̱ʼa ná kǒo kuxíkána nu̱úi̱. 41 Kusi̱íní-inii̱ ña̱ keʼíi̱ ña̱ va̱ʼa xa̱ʼa̱na ta taxii̱ ña̱ ndiʼi tiempo ná kundoona nu̱ú ñuʼú yóʼo, ta keʼíi̱ ña̱yóʼo xíʼin ndiʼi níma̱i̱ ta saátu xíʼin ndiʼi ña̱ tákui̱’”.*

42 “Saáchi ña̱yóʼo kúú ña̱ káʼa̱n Jehová: ‘Nda̱a̱ táki̱ʼva chi̱ndaʼíi̱ ndiʼi tu̱ndóʼo yóʼo nu̱ú ñuu yóʼo, saátu chindaʼíi̱ ndiʼi ña̱ va̱ʼa nu̱úna ña̱ xa̱a̱ ni̱ka̱ʼi̱n xa̱ʼa̱ xíʼinna. 43 Ta ndikó tukuna satána ñuʼú ña̱ íyo ñuu yóʼo ni ndóʼó káchindó: “Iin ñuʼú yi̱chíva kúúña, kǒoka na̱ yiví nu̱úña ni kití, ta na̱ caldeo kúú na̱ xa̱a̱ nda̱kiʼinña”’.

44 ”‘Na̱ yiví ndikó tukuna satána ñuʼú xíʼin xu̱ʼún, ta kaʼyina tutu ña̱ káʼa̱n xa̱ʼa̱ ña̱yóʼo ta chikaa̱na sello nu̱úña, ta kanana na̱ ndóo chí nu̱ú ñuʼú na̱ tribu ta̱ Benjamín ña̱ koona testigo, na̱ ndóo yatin chí Jerusalén, na̱ ndóo ñuu ña̱ íyo chí Judá, ñuu ña̱ íyo chí yuku̱, ñuu ña̱ íyo chí yoso̱ ta saátu ñuu ña̱ íyo chí sur, saáchi taxii̱ ña̱ ná ndikó ndiʼi na̱ nda̱kiʼinna ku̱a̱ʼa̱n inka ñuu’, káchi Jehová”.