Jeremías

33 Jehová ndi̱kó tukura ni̱ka̱ʼa̱nra xíʼin ta̱ Jeremías tá ndásikara chí Yéʼé na̱ Soldado: 2 “Ña̱yóʼo kúú ña̱ káʼa̱n Jehová ta̱ i̱xava̱ʼa ñuʼú, Jehová ta̱ i̱xava̱ʼaña ta kútu̱ní chi̱ndúʼúra xa̱ʼa̱ña; ki̱vi̱ra kúú Jehová: 3 ‘Kana yi̱ʼi̱ chi ndakuiinvai̱ yuʼún ta natúʼi̱n xíʼún xa̱ʼa̱ ña̱ʼa ña̱ ndáyáʼviní ña̱ kǒo kúnda̱a̱-inina xíʼin, ña̱ʼa ña̱ kǒo níxi̱xini̱ún xa̱ʼa̱’”.

4 “Saáchi ña̱yóʼo kúú ña̱ káʼa̱n Jehová Ndióxi̱ na̱ ñuu Israel xa̱ʼa̱ veʼe ña̱ íyo ñuu yóʼo ta saátu xa̱ʼa̱ veʼe na̱ rey ñuu Judá ña̱ sa̱ndíʼi-xa̱ʼa̱na ña̱ va̱ʼa kuniñúʼuna ña̱ʼa ña̱ kana yóʼo ña̱ ndakiʼinna tu̱ʼunna xa̱ʼa̱ ña̱ va̱xi na̱ sáa̱-ini xíniñaʼá kanitáʼanna xíʼinna ta saátu xa̱ʼa̱ ña̱ chi̱ndoona iin koʼndo ñuʼú xíʼin yu̱u̱ sa̱tá nama̱ ñuu yóʼo, 5 xa̱ʼa̱ ndiʼi na̱ va̱xi kanitáʼan xíʼin na̱ caldeo, ta saátu xa̱ʼa̱ veʼe ña̱ chu̱tú xíʼin na̱ xa̱ʼníi̱ xa̱ʼa̱ ña̱ sáa̱níi̱, chi xa̱ʼa̱ ña̱ ndi̱va̱ʼaní-inina kúú ña̱ sa̱ndákoondaʼíi̱ ñuu yóʼo: 6 ‘Sandáʼi̱ ñuu yóʼo ta ndikó tukuña va̱ʼa kooña; sandáʼi̱na ta taxii̱ ña̱ vií kundoona ta kǒo ña̱ʼa sayíʼvi-ñaʼá. 7 Ta taxii̱ ña̱ ná ndikó tuku na̱ ñuu Judá xíʼin na̱ ñuu Israel na̱ nda̱kiʼinna ku̱a̱ʼa̱n inka ñuu, ta taxii̱ ña̱ va̱ʼa ndaʼa̱na nda̱a̱ táki̱ʼva ke̱ʼíi̱ tá xa̱ʼa̱. 8 Ta yi̱ʼi̱ ndasandii̱na* xa̱ʼa̱ ndiʼi ku̱a̱chi ña̱ ni̱ki̱ʼvina nu̱úi̱, ta koo káʼnu-inii̱ xa̱ʼa̱ ku̱a̱china ta saátu xa̱ʼa̱ ña̱ va̱ása va̱ʼa ke̱ʼéna nu̱úi̱. 9 Tá ná kuniso̱ʼi̱ ki̱vi̱ ñuu yóʼo kusi̱í-inii̱ ta ndiʼi na̱ ñuu na̱ ndóo nu̱ú ñuʼú yóʼo kuniso̱ʼona xa̱ʼa̱ ndiʼi ña̱ va̱ʼa ña̱ keʼíi̱ xa̱ʼa̱ ñui̱, ta ndasakáʼnuna yi̱ʼi̱ ta ka̱ʼa̱n va̱ʼana xa̱ʼíi̱. Ta na̱ inka ñuu yi̱ʼvína ta nda̱a̱ kisina xa̱ʼa̱ ña̱ va̱ʼa ña̱ keʼíi̱ xa̱ʼa̱ na̱ ñuu yóʼo ta saátu xa̱ʼa̱ ña̱ taxii̱ ña̱ va̱ʼaní kundoona’”.

10 “Ña̱yóʼo kúú ña̱ káʼa̱n Jehová: ‘Ñuʼú ña̱ ka̱ʼa̱nndó xa̱ʼa̱ ña̱ kúúña iin ñuʼú yi̱chí (nu̱ú kǒo na̱ yiví ni kití), ñuu ña̱ íyo chí Judá xíʼin calle ñuu Jerusalén (nu̱ú kǒo nda̱a̱ ni iin na̱ yiví ni kití) kuniso̱ʼo tukuna 11 ña̱ ndáʼyi̱ kóʼó* na̱ yiví xa̱ʼa̱ ña̱ kúsi̱í-inina, kuniso̱ʼona ta̱chí ta̱ ti̱ndaʼa̱ xíʼin ñá ti̱ndaʼa̱ ta saátu ta̱chí na̱ káʼa̱n: “Taxindó tíxa̱ʼvi ndaʼa̱ Jehová ta̱ xáʼndachíñu nu̱ú na̱ ángel, saáchi Jehová va̱ʼaní-inira; ndiʼi tiempo náʼa̱ra ña̱ ndixaní kúʼvi̱-inira* xínira inkana”’.

”‘Na̱kán kuniʼina ña̱ʼa ku̱ʼu̱nna veʼe yi̱ʼi̱ Jehová, ña̱ so̱kónaña nu̱úi̱* ña̱ va̱ʼa taxina tíxa̱ʼvi ndaʼíi̱, saáchi yi̱ʼi̱ taxi tukui̱ ña̱ ná ndikó na̱ nda̱kiʼinna ku̱a̱ʼa̱n inka ñuu, nda̱a̱ táki̱ʼva ni̱xi̱yona tá xa̱ʼa̱’, káchi Jehová”.

12 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Nu̱ú ñuʼú yi̱chí yóʼo, nu̱ú kǒo ni iin na̱ yiví ni kití, xíʼin ndiʼi ñuu ña̱ íyo yóʼo koo tuku yita* ña̱ va̱ʼa ku̱ʼu̱n na̱ pastor xíʼin kití sa̱na̱na ña̱ ndakindee̱rí’.

13 ”‘Chí ñuu ña̱ íyo chí yuku̱, ñuu ña̱ íyo chí yoso̱, ñuu ña̱ íyo chí sur, ñuu ña̱ íyo chí nu̱ú ñuʼú na̱ tribu ta̱ Benjamín, ñuu ña̱ íyo yatin ñuu Jerusalén xíʼin ndiʼi ñuu ña̱ íyo chí Judá, na̱ pastor ndakaʼvi tukuna ndikachi* tí kúúmiína’, káchi Jehová”.

14 “‘Koto, xa̱a̱ ku̱yatin ki̱vi̱, káchi Jehová, ña̱ saxínui̱ ndiʼi ña̱ va̱ʼa ña̱ ni̱ka̱ʼi̱n xa̱ʼa̱ na̱ ñuu Israel ta saátu xa̱ʼa̱ na̱ ñuu Judá. 15 Ki̱vi̱ kán xíʼin tiempo kán, taxii̱ ña̱ ti̱xin veʼe ta̱ David ná kixi iin ta̱ keʼé ña̱ nda̱kú, nina ña̱ nda̱kú keʼéra xíʼin na̱ ndóo nu̱ú ñuʼú. 16 Ki̱vi̱ kán ka̱ku na̱ ñuu Judá ta na̱ ñuu Jerusalén va̱ʼaní kundoona. Ta siaʼa kúú ña̱ kunaníña: Jehová táxira ña̱ nda̱kú koo iniyó’”.

17 “Saáchi ña̱yóʼo kúú ña̱ káʼa̱n Jehová: ‘Ndiʼi tiempo koo iin na̱ se̱ʼe ta̱ David nu̱ú trono na̱ ñuu Israel, 18 ta na̱ su̱tu̱ levita ndiʼi tiempo kuumiína iin ta̱a ta̱ kachíñu nu̱úi̱ ña̱ va̱ʼa kaʼmira kití* ta so̱kórarí nu̱úi̱, kaʼmira harina ta so̱kóraña nu̱úi̱ ta saátu so̱kóra inkaka ña̱ʼa’”.

19 Ta ni̱ka̱ʼa̱n tuku Jehová xíʼin ta̱ Jeremías: 20 “Ña̱yóʼo kúú ña̱ káʼa̱n Jehová: ‘Tá ndóʼó ná kuchiñundó sandíʼi-xa̱ʼa̱ndó ki̱ʼva ña̱ ni̱ka̱ʼi̱n koo káʼñu* xíʼin ñuú (tasaá ñuú xíʼin káʼñu va̱ása kookaña ki̱ʼva ña̱ ni̱ka̱ʼi̱n kooña), 21 saá kúú ña̱ ndiʼi-xa̱ʼa̱ trato ña̱ ke̱ʼíi̱ xíʼin ta̱ David ta̱ xi̱kachíñu nu̱úi̱, ta va̱ása koo iin se̱ʼera ta̱ kaʼndachíñu ña̱ koora rey ta koora nu̱ú trono, ta saátu ndiʼi-xa̱ʼa̱ trato ña̱ ke̱ʼíi̱ xíʼin na̱ su̱tu̱ levita na̱ káchíñu nu̱úi̱. 22 Nda̱a̱ táki̱ʼva kǒo kívi ndakaʼvina ki̱mi tí íyo chí ndiví ni yu̱ti ña̱ íyo yuʼú mar, saá ku̱a̱ʼání ndasai̱ na̱ se̱ʼe ta̱ David ta̱ xi̱kachíñu nu̱úi̱ ta saátu na̱ levita na̱ káchíñu nu̱úi̱’”.

23 Ta ni̱ka̱ʼa̱n tuku Jehová xíʼin ta̱ Jeremías: 24 “¿Á xa̱a̱ xi̱niso̱ʼún ña̱ káʼa̱n na̱ yiví yóʼo? Káchina: ‘Jehová kundasínu̱úra kunira u̱vi̱ saá na̱ familia na̱ nda̱kaxinra’. Kǒo íxato̱ʼóna na̱ ñui̱ ta ni kǒo kúni̱na ña̱ ndikóna koona iin ñuu káʼnu.

25 ”Ña̱yóʼo kúú ña̱ káʼa̱n Jehová: ‘Nda̱a̱ táki̱ʼva ni̱ka̱ʼi̱n ña̱ viíní koo ñuú xíʼin káʼñu, ña̱ koo iin ley ña̱ kundiku̱n ndiví xíʼin ñuʼú, 26 yi̱ʼi̱ kǒo kundasínu̱úi̱ kunii̱ na̱ se̱ʼe ta̱ Jacob ni na̱ se̱ʼe ta̱ David ta̱ xi̱kachíñu nu̱úi̱; ndakundeíi̱ ndaka̱xii̱n na̱ se̱ʼera ña̱ koona na̱ kaʼndachíñu nu̱ú na̱ se̱ʼe ta̱ Abrahán, ta̱ Isaac xíʼin ta̱ Jacob. Saáchi taxii̱ ña̱ ná ndikó na̱ nda̱kiʼinna ku̱a̱ʼa̱n inka ñuu, ta kundáʼvi-inii̱ kunii̱na’”.