Jeremías

34 Tá ki̱xáʼa ta̱ rey Nabucodonosor* ta̱ ñuu Babilonia kánitáʼanra xíʼin na̱ ñuu Jerusalén ta saátu xíʼin ñuu ña̱ kúúmiíña, ta xi̱kitáʼan ndiʼi na̱ soldadora xíʼinra, ndiʼi na̱ ñuu na̱ íyo nu̱ú ñuʼú na̱ xáʼndachíñura nu̱ú xíʼin ndiʼika na̱ ñuu, saá ni̱ka̱ʼa̱n Jehová xíʼin ta̱ Jeremías:

2 “Ña̱yóʼo kúú ña̱ káʼa̱n Jehová Ndióxi̱ na̱ ñuu Israel: ‘Kúáʼan ta ka̱ʼún xíʼin ta̱ rey Sedequías ta̱ ñuu Judá. Ña̱yóʼo ka̱ʼún xíʼinra: “Ña̱yóʼo kúú ña̱ káʼa̱n Jehová: ‘Ndataxii̱ ñuu yóʼo ndaʼa̱ ta̱ rey ñuu Babilonia ta ta̱kán kaʼmiraña. 3 Ta yóʼó kǒo kuchiñún ka̱kuún nu̱úra, saáchi tiinna yóʼó ta ndataxina yóʼó ndaʼa̱ra. Koto káxiún nu̱ú ta̱ rey ñuu Babilonia ta ta̱kán ka̱ʼa̱nra xíʼún, ta ndakiʼinra yóʼó ku̱ʼún chí Babilonia’. 4 Soo yóʼó ta̱ rey Sedequías ta̱ ñuu Judá, kuniso̱ʼo ña̱ káʼa̱n Jehová: ‘Ña̱yóʼo kúú ña̱ káʼa̱n Jehová xa̱ʼún: “Va̱ása kaʼnína yóʼó xíʼin espada. 5 Viíva koo ña̱ kuviún, ta tá ná sandúxu̱nna yóʼó kaʼmina ñuʼu̱ nda̱a̱ táki̱ʼva ke̱ʼéna xíʼin na̱ yiváún, na̱ xi̱kuu rey tá kúma̱níka koún rey, ta kusuchíní-inina xa̱ʼún ta kachina ‘Ndáʼviníún táta rey’. Ta ‘yi̱ʼi̱ kúú ta̱ ni̱ka̱ʼa̱n tu̱ʼun yóʼo’, káchi Jehová”’”’”.

6 Ta̱ profeta Jeremías ni̱ka̱ʼa̱nra xa̱ʼa̱ ndiʼi ña̱yóʼo xíʼin ta̱ rey Sedequías ta̱ ñuu Judá chí ñuu Jerusalén 7 tá xi̱kanitáʼan na̱ soldado ta̱ rey ñuu Babilonia xíʼin ñuu Jerusalén ta saátu xíʼin ndiʼi ñuu ña̱ íyo chí Judá ña̱ xi̱kindo̱o, xíʼin ñuu Lakís ta saátu Azecá; saáchi ndáa ña̱yóʼo xi̱kuu ñuu ña̱ kútu̱ní ndási ña̱ xi̱kindo̱o nu̱ú ndiʼika ñuu ña̱ ni̱xi̱yo chí Judá.

8 Jehová ni̱ka̱ʼa̱nra xíʼin ta̱ Jeremías tá sa̱ndíʼi ta̱ rey Sedequías ke̱ʼéra iin trato xíʼin ndiʼi na̱ yiví chí ñuu Jerusalén, ña̱ va̱ʼa ná sañána na̱ káchíñundáʼvi nu̱úna. 9 Iin tá iinna xi̱niñúʼu sañána na̱ hebreo na̱ káchíñundáʼvi nu̱úna, kúúna ta̱a á ñaʼá, tasaá nda̱a̱ ni iin na̱ judío kǒo kachíñundáʼvi nu̱úna. 10 Ta ndiʼi na̱ níʼi yichi̱ nu̱ú na̱ ñuu ta saátu ndiʼi mií na̱ ñuu ka̱ndíxavana. Ta ki̱ndoona ña̱ saxínuna trato ña̱ káʼa̱n xa̱ʼa̱ ña̱ sañána na̱ ta̱a xíʼin ná ñaʼá na̱ káchíñundáʼvi nu̱úna, tasaá va̱ása kachíñundáʼvika na̱yóʼo nu̱úna. Xi̱niso̱ʼovana ta sa̱ñávanana. 11 Soo tá ni̱ya̱ʼa tiempo, ni̱xa̱ʼa̱n tukuna nda̱kiʼinna na̱ ta̱a xíʼin ná ñaʼá na̱ xi̱kachíñundáʼvi nu̱úna, na̱ xa̱a̱ sa̱ñána, ta i̱xandúxana xíʼinna ña̱ kachíñu tukuna nu̱úna. 12 Xa̱ʼa̱ ña̱kán ni̱ka̱ʼa̱n tuku Jehová xíʼin ta̱ Jeremías. Ña̱yóʼo kúú ña̱ ni̱ka̱ʼa̱n Jehová xíʼinra:

13 “Ña̱yóʼo kúú ña̱ káʼa̱n Jehová Ndióxi̱ na̱ ñuu Israel: ‘Tá ki̱vi̱ ña̱ ta̱vái̱ na̱ táʼanndó na̱ xi̱ndoo xi̱naʼá chí ñuu Egipto nu̱ú xi̱kuuna na̱ xi̱kachíñundáʼvi, yi̱ʼi̱ ke̱ʼíi̱ iin trato xíʼinna ta ni̱ka̱ʼi̱n ña̱yóʼo xíʼinna: 14 “Tá ná ya̱ʼa u̱xa̱ ku̱i̱ya̱, ndiʼi ndóʼó xíniñúʼu sañándó iin tá iin na̱ ñanindó na̱ hebreo na̱ sa̱tándó,* ta ka̱chíñuna i̱ñu̱ ku̱i̱ya̱ nu̱úndó; xíniñúʼu sañándóna”. Soo na̱ táʼanndó na̱ xi̱ndoo xi̱naʼá va̱ása níkandíxana yi̱ʼi̱ ta ni kǒo níxiniso̱ʼona ña̱ ni̱ka̱ʼi̱n xíʼinna. 15 Soo sa̱kán íyo loʼo tiempo, ndóʼó na̱samandó ki̱ʼva ña̱ íyondó ta ke̱ʼéndó ña̱ va̱ʼa nu̱úi̱ chi sa̱ñándó na̱ táʼanndó. Ke̱ʼéndó iin trato nu̱úi̱ chí nu̱ú íyo veʼe nu̱ú ndásakáʼnuna ki̱víi̱. 16 Soo tá ni̱ya̱ʼa loʼo tiempo, ki̱xáʼa tukundó kéʼéndó ña̱ va̱ása va̱ʼa ta i̱xayaku̱a̱ndó ki̱víi̱, saáchi nda̱kiʼin tukundó na̱ ta̱a xíʼin ná ñaʼá na̱ xi̱kachíñundáʼvi nu̱úndó, na̱ xa̱a̱ sa̱ñándó ña̱ va̱ʼa ku̱ʼu̱nna nu̱ú kúni̱ miína, ta i̱xandúxandó xíʼinna ña̱ ndikó tukuna kachíñundáʼvina nu̱úndó’.

17 ”Xa̱ʼa̱ ña̱kán, ña̱yóʼo kúú ña̱ káʼa̱n Jehová: ‘Ndóʼó kǒo níxiniso̱ʼondó ña̱ ni̱ka̱ʼi̱n xíʼinndó ta va̱ása nísañándó na̱ ñanindó ni na̱ táʼanndó. Xa̱ʼa̱ ña̱kán, yi̱ʼi̱ sañávai̱ ndóʼó, káchi Jehová, sañái̱ ndóʼó ña̱ va̱ʼa kaʼnína ndóʼó xíʼin espada, kuvindó xíʼin kue̱ʼe̱ ta saátu xíʼin so̱ko ta taxii̱ ña̱ ndiʼi na̱ ñuu na̱ íyo nu̱ú ñuʼú yóʼo ná kundasína kunina ndóʼó. 18 Ta ña̱yóʼo kúú ña̱ kundoʼo na̱ ta̱a na̱ sa̱ndíʼi-xa̱ʼa̱ tratoi̱, chi kǒo nísaxínuna tu̱ʼun ña̱ ni̱ka̱ʼa̱nna tá ke̱ʼéna trato nu̱úi̱, tá xa̱ʼnda savana iin si̱ndi̱ki̱ loʼo ta ni̱ya̱ʼana ma̱ʼñú u̱vi̱ saá táʼví tíyóʼo, 19 na̱ níʼi yichi̱ nu̱ú na̱ ñuu Judá, na̱ níʼi yichi̱ nu̱ú na̱ ñuu Jerusalén, na̱ kúúmií chiñu ña̱ ndáyáʼvi, na̱ su̱tu̱ xíʼin ndiʼi na̱ yiví na̱ ñuu yóʼo, na̱ ni̱ya̱ʼa ma̱ʼñú u̱vi̱ saá táʼví tí si̱ndi̱ki̱ loʼo yóʼo: 20 ndataxii̱na ndaʼa̱ ndiʼi na̱ sáa̱-ini xíniñaʼá ta saátu ndaʼa̱ ndiʼi na̱ kúni̱ kaʼní-ñaʼá, ta kití tí ndáchí chí ndiví xíʼin kití tí íyo nu̱ú ñuʼú kúú tí kaxí ku̱ñuna. 21 Ta ndataxii̱ ta̱ rey Sedequías ta̱ ñuu Judá xíʼin na̱ níʼi yichi̱ nu̱ú na̱ ñuu ndaʼa̱ na̱ sáa̱-ini xíniñaʼá xíʼin na̱ kúni̱ kaʼní-ñaʼá, ta saátu ndaʼa̱ na̱ soldado ta̱ rey ñuu Babilonia na̱ xa̱a̱ nda̱kiʼin ku̱a̱ʼa̱n’.

22 ”‘Kaʼndai̱ chiñu, káchi Jehová, ta taxii̱ ña̱ ná ndikó tukuna ñuu yóʼo ta na̱kán kanitáʼan tukuna xíʼin ñuu yóʼo, ndakiʼinnaña ta kaʼminaña; ta ndiʼi ñuu ña̱ íyo chí Judá taxii̱ ña̱ ná nduuña ñuʼú yi̱chí ta kǒoka na̱ kundoo nu̱úña’”.