Jeremías

35 Tá xi̱xaʼndachíñu ta̱ Jehoiaquim se̱ʼe ta̱ Josías ta̱ rey ñuu Judá, Jehová ni̱ka̱ʼa̱nra ña̱yóʼo xíʼin ta̱ Jeremías: 2 “Kúáʼan kotoún na̱ veʼe na̱ recabita ta ka̱ʼún xíʼinna ña̱ ná ku̱ʼu̱nna xíʼún chí veʼe Jehová, iin cuarto nu̱ú ndákutáʼanna xíxina ta taxiún vino koʼona”.

3 Xa̱ʼa̱ ña̱kán nda̱kiʼii̱n ta̱ Jaazanías se̱ʼe ta̱ Jeremías, se̱ʼe ta̱ Habazinías, na̱ ñanira, ndiʼi na̱ se̱ʼera ta saátu ndiʼi na̱ familia na̱ recabita ku̱a̱ʼa̱n xíʼi̱n 4 chí veʼe Jehová. Ni̱xa̱ʼa̱nna xíʼi̱n chí cuarto nu̱ú xi̱xixi na̱ se̱ʼe ta̱ Hanán se̱ʼe ta̱ Igdalías, iin ta̱a ta̱ káchíñu nu̱ú Ndióxi̱ ta̱ nda̱a̱, ña̱ xi̱kindo̱o síi̱n* cuarto nu̱ú xi̱xixi na̱ xi̱kuumií iin chiñu ña̱ ndáyáʼvi ta xi̱kindo̱oña chí xi̱ní veʼe nu̱ú xi̱xixi ta̱ Maaseya se̱ʼe ta̱ Salum, ta̱ xi̱ndaa yéʼé. 5 Tasaá ka̱tai̱ vaso xíʼin copa ña̱ chútú vino nu̱ú na̱ ta̱a na̱ veʼe na̱ recabita ta ni̱ka̱ʼi̱n xíʼinna: “Koʼondó vino”.

6 Soo na̱yóʼo ni̱ka̱ʼa̱nna: “Va̱ása koʼondi̱ vino, saáchi ta̱ Jehonadab* se̱ʼe ta̱ Recab ta̱ táʼanndi̱ ta̱ ni̱xi̱yo xi̱naʼá, xa̱ʼndara chiñu yóʼo nu̱úndi̱: ‘Nda̱a̱ ni iin yichi̱ va̱ása koʼondó vino, ni miíndó ni na̱ se̱ʼendó. 7 Saátu kǒo ixava̱ʼandó veʼe ta kǒo chiʼindó nda̱a̱ ni iin nu̱ú si̱ʼva̱ ni inkaka ña̱ʼa, ni kǒo kuumiíndó ñuʼú nu̱ú íyo tú uva. Nu̱úka ña̱yóʼo, ndiʼi tiempo kundoondó ini veʼe válí, ña̱ va̱ʼa ku̱a̱ʼání tiempo kundoondó nu̱ú ñuʼú nda̱a̱ táki̱ʼva kéʼé na̱ ki̱xaa̱ ndóo naʼa’.* 8 Ña̱kán ndákundeéndi̱ ndíku̱nndi̱ ndiʼi ña̱ ni̱ka̱ʼa̱n ta̱ Jehonadab se̱ʼe ta̱ Recab, ta̱ táʼanndi̱ ta̱ ni̱xi̱yo xi̱naʼá; ña̱kán nda̱a̱ ni iin yichi̱ va̱ása xíʼindi̱ vino, ni miíndi̱ ni ná síʼindi̱, ni se̱ʼeta̱andi̱ ni se̱ʼe-síʼindi̱. 9 Ta saátu kǒo íxava̱ʼandi̱ veʼe nu̱ú kundoondi̱, kǒo tú uva kúúmiíndi̱, ni ñuʼú ni si̱ʼva̱. 10 Ndákundeéndi̱ ndóondi̱ ini veʼe válí ta saátu ndákundeéndi̱ kándíxandi̱ ndiʼi ña̱ ni̱ka̱ʼa̱n ta̱ Jehonadab,* ta̱ táʼanndi̱ ta̱ ni̱xi̱yo xi̱naʼá. 11 Soo tá ki̱xaa̱ ta̱ Nabucodonosor* ta̱ ñuu Babilonia ña̱ kanitáʼanra xíʼin na̱ ndóo país yóʼo, ka̱chindi̱: ‘Ná ku̱ʼu̱nyó, ná ki̱ʼviyó ñuu Jerusalén ña̱ va̱ʼa ka̱kuyó nu̱ú na̱ soldado na̱ caldeo xíʼin na̱ sirio’. Ña̱kán kúú ña̱ ndóondi̱ ñuu Jerusalén vitin”.

12 Tasaá ni̱ka̱ʼa̱n Jehová ña̱yóʼo xíʼin ta̱ Jeremías: 13 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Kúáʼan ta ka̱ʼún xíʼin na̱ ta̱a na̱ ñuu Judá ta saátu xíʼin na̱ ndóo chí Jerusalén: “¿Á su̱ví xa̱a̱ tuku ta tuku káʼa̱nna xíʼinndó ña̱ ná kandíxandó ña̱ káʼi̱n?, káchi Jehová. 14 Ta̱ Jehonadab se̱ʼe ta̱ Recab xa̱ʼndara chiñu nu̱ú na̱ se̱ʼera ña̱ ná va̱ása koʼona vino, ta na̱yóʼo ka̱ndíxana ña̱ ni̱ka̱ʼa̱nra saáchi kǒo xíʼina vino nda̱a̱ ki̱vi̱ vitin; tasaá kúú ña̱ sáxi̱nuna chiñu ña̱ xa̱ʼnda ta̱ táʼanna ta̱ ni̱xi̱yo xi̱naʼá. Ta yi̱ʼi̱ tuku ta tuku káʼi̱n xíʼinndó soo ndóʼó kǒo xíínndó kandíxandó ña̱ káʼi̱n. 15 Tuku ta tuku xi̱chindaʼíi̱ ndiʼi na̱ profeta na̱ káchíñu nu̱úi̱ ña̱ ka̱ʼa̱nna xíʼinndó: ‘Ixandó ña̱ ma̱ní, iin tá iinndó sandákoondó yichi̱ ña̱ va̱ása va̱ʼa ku̱a̱ʼa̱nndó ta keʼéndó ña̱ va̱ʼa. Kǒo kundiku̱nndó inka ndióxi̱ ta kǒo kachíñundó nu̱úña, saá kúú ña̱ kivi ndakundeéndó kundoondó nu̱ú ñuʼú ña̱ ta̱xii̱ ndaʼa̱ndó ta saátu ndaʼa̱ na̱ táʼanndó na̱ xi̱ndoo xi̱naʼá’. Soo ndóʼó kǒo níxiniso̱ʼondó ña̱ ni̱ka̱ʼi̱n ta kǒo níkandíxandó yi̱ʼi̱. 16 Na̱ se̱ʼe ta̱ Jehonadab se̱ʼe ta̱ Recab, ta̱ táʼanna ta̱ ni̱xi̱yo xi̱naʼá, sáxi̱nuvana chiñu ña̱ xa̱ʼndara nu̱úna, soo na̱ ñuu yóʼo kǒo xíínna kandíxana ña̱ káʼi̱n xíʼinna”’”.

17 “Xa̱ʼa̱ ña̱kán, ña̱yóʼo kúú ña̱ káʼa̱n Jehová Ndióxi̱ ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Chindaʼíi̱ tu̱ndóʼo ña̱ xa̱a̱ ni̱ka̱ʼi̱n xa̱ʼa̱ nu̱ú na̱ ñuu Judá ta saátu nu̱ú ndiʼi na̱ ndóo chí ñuu Jerusalén, saáchi xi̱kaʼi̱n xíʼinna soo kǒo níxi̱kandíxana yi̱ʼi̱ ta xi̱kanai̱na soo kǒo níxi̱ndakuiinna yuʼíi̱’”.

18 Ta̱ Jeremías ni̱ka̱ʼa̱nra xíʼin na̱ veʼe na̱ recabita: “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: ‘Xa̱ʼa̱ ña̱ kándíxandó chiñu ña̱ xa̱ʼnda ta̱ Jehonadab ta̱ táʼanndó ta̱ ni̱xi̱yo xi̱naʼá, ta ndákundeéndó viíní ndíku̱nndó ndiʼi chiñu ña̱ xa̱ʼndara ta kéʼéndóña, 19 ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Ndiʼi tiempo koo iin se̱ʼe ta̱ Jehonadab* se̱ʼe ta̱ Recab, ta̱ kachíñu nu̱úi̱”’”.