Jeremías

36 Tá xa̱a̱ ku̱mí ku̱i̱ya̱ xáʼndachíñu ta̱ Jehoiaquim se̱ʼe ta̱ Josías ta̱ rey ñuu Judá, Jehová ni̱ka̱ʼa̱nra xíʼin ta̱ Jeremías: 2 “Kiʼin iin rollo ta nu̱ú ña̱yóʼo kaʼyiún ndiʼi ña̱ ni̱ka̱ʼi̱n contra na̱ ñuu Israel, na̱ ñuu Judá xíʼin ndiʼika na̱ ñuu, ña̱ ni̱ka̱ʼi̱n xíʼún nda̱a̱ tá ki̱vi̱ nu̱ú tá ki̱xáʼíi̱ káʼi̱n xíʼún, tá tiempo ña̱ ni̱xi̱yo ta̱ Josías iinsaá nda̱a̱ vitin. 3 Tá ná kuniso̱ʼo na̱ ñuu Judá xa̱ʼa̱ ndiʼi tu̱ndóʼo ña̱ ndákanixi̱níi̱ chindaʼíi̱ nu̱úna, sana nasamana yichi̱ ña̱ va̱ása va̱ʼa ku̱a̱ʼa̱nna ta koo káʼnu-inii̱ xa̱ʼa̱ ña̱ va̱ása va̱ʼa kéʼéna ta saátu xa̱ʼa̱ ku̱a̱china”.

4 Ta̱ Jeremías ka̱nara ta̱ Baruc se̱ʼe ta̱ Nerías ta ni̱ka̱ʼa̱nra xíʼinra ndiʼi tu̱ʼun ña̱ ni̱ka̱ʼa̱n Jehová xíʼinra, ta ta̱ Baruc ka̱ʼyira ña̱yóʼo nu̱ú rollo. 5 Tasaá ni̱ka̱ʼa̱n ta̱ Jeremías xíʼin ta̱ Baruc ña̱ ná keʼéra ña̱yóʼo: “Yi̱ʼi̱ kǒo kívi ki̱ʼvii̱ chí nu̱ú íyo veʼe Jehová, 6 ña̱kán yóʼó kúú ta̱ xíniñúʼu ki̱ʼvi ta ndeé va̱ʼa kaʼviún tu̱ʼun Jehová ña̱ va̱xi nu̱ú rollo, ña̱ ni̱ka̱ʼi̱n xíʼún kaʼyiún. Ta iin ki̱vi̱ tá kǒo níxixi* na̱ ñuu saá kúú ña̱ kaʼviún ña̱yóʼo nu̱úna chí veʼe Jehová; kaʼviúnña nu̱ú na̱ ñuu Judá ta saátu nu̱ú ndiʼi na̱ ke̱e inka ñuu. 7 Saáchi sana ña̱ ka̱ʼa̱n-ndáʼvina xa̱a̱ña nu̱ú Jehová ta iin tá iinna sandákoona yichi̱ ña̱ va̱ása va̱ʼa ku̱a̱ʼa̱nna, saáchi xa̱ʼa̱ ña̱ ndeéní sáa̱ Jehová taxira castigo ndaʼa̱ na̱ ñuu yóʼo”.

8 Ña̱kán ta̱ Baruc se̱ʼe ta̱ Nerías ke̱ʼéra ndiʼi ña̱ xa̱ʼnda ta̱ profeta Jeremías nu̱úra; ndeéní ka̱ʼvira tu̱ʼun Jehová ña̱ va̱xi nu̱ú rollo* chí veʼe Jehová.

9 Tá xa̱a̱ u̱ʼu̱n ku̱i̱ya̱ xáʼndachíñu ta̱ Jehoiaquim se̱ʼe ta̱ Josías ta̱ rey ñuu Judá, tá yo̱o̱ 9, ndiʼi na̱ yiví na̱ ñuu Jerusalén xíʼin ndiʼi na̱ yiví na̱ ke̱e ndiʼi ñuu ña̱ íyo chí Judá ta ni̱xa̱a̱na chí Jerusalén, xa̱ʼndana chiñu nu̱úna ña̱ ná kǒo kuxuna iníí ki̱vi̱* ta ná kuni Jehová ña̱ keʼéna ña̱yóʼo. 10 Tasaá ni̱xa̱ʼa̱n ta̱ Baruc chí veʼe Jehová ta ndeéní ka̱ʼvira ña̱ va̱xi nu̱ú rollo,* ña̱ ni̱ka̱ʼa̱n ta̱ Jeremías xíʼinra kaʼyira. Ka̱ʼviraña nu̱ú ndiʼi na̱ ñuu na̱ nda̱kutáʼan chí cuarto* ta̱ Guemarías se̱ʼe ta̱ Safán ta̱ xi̱xini̱ní kaʼyi ley* chí patio ña̱ káʼnu va̱ʼa, chí nu̱ú ni̱xi̱yo yéʼé xa̱á nu̱ú xi̱kiʼvina veʼe Jehová.

11 Tá xi̱niso̱ʼo ta̱ Micaya se̱ʼe ta̱ Guemarías, se̱ʼe ta̱ Safán ndiʼi tu̱ʼun Jehová ña̱ va̱xi nu̱ú rollo,* 12 ni̱xa̱ʼa̱nra chí veʼe* ta̱ rey, chí cuarto ta̱ secretario. Ta kán ndóo ndiʼi na̱ kúúmií chiñu ña̱ ndáyáʼvi: ta̱ secretario Elisamá, ta̱ Delayá se̱ʼe ta̱ Semaya, ta̱ Elnatán se̱ʼe ta̱ Acbor, ta̱ Guemarías se̱ʼe ta̱ Safán, ta̱ Sedequías se̱ʼe ta̱ Hananías xíʼin ndiʼika na̱ kúúmií chiñu ña̱ ndáyáʼvi. 13 Ta̱ Micaya ni̱ka̱ʼa̱nra xíʼinna xa̱ʼa̱ ndiʼi ña̱ xi̱niso̱ʼora tá ka̱ʼvi ta̱ Baruc ña̱ va̱xi nu̱ú rollo* nu̱ú ndiʼi na̱ ñuu.

14 Tasaá ndiʼi na̱ kúúmií chiñu ña̱ ndáyáʼvi chi̱ndaʼána ta̱ Jehudí se̱ʼe ta̱ Netanías, se̱ʼe ta̱ Selemías, se̱ʼe ta̱ Cusí ña̱ va̱ʼa ku̱ʼu̱nra ka̱ʼa̱nra xíʼin ta̱ Baruc: “Naʼa ta kuniʼún rollo ña̱ ka̱ʼviún nu̱ú ndiʼi na̱ ñuu”. Ña̱kán ta̱ Baruc se̱ʼe ta̱ Nerías ki̱ʼinra rollo ta ku̱a̱ʼa̱nra chí nu̱ú ndóona. 15 Ta na̱yóʼo ni̱ka̱ʼa̱nna xíʼinra: “Ixaún ña̱ ma̱ní, koo ta kaʼviún ña̱yóʼo nu̱úndi̱”. Tasaá ta̱ Baruc ka̱ʼviraña nu̱úna.

16 Tá xi̱niso̱ʼona ndiʼi tu̱ʼun yóʼo, ni̱yi̱ʼvínína ta nda̱koto nu̱ú táʼanna ta ni̱ka̱ʼa̱nna xíʼin ta̱ Baruc: “Xíniñúʼu ka̱ʼa̱nndi̱ xíʼin ta̱ rey xa̱ʼa̱ ndiʼi tu̱ʼun yóʼo”. 17 Tasaá ni̱nda̱ka̱tu̱ʼunna ta̱ Baruc: “Ixaún ña̱ ma̱ní, ka̱ʼa̱n xíʼinndi̱ ndáa ki̱ʼva ka̱ʼyiún ndiʼi tu̱ʼun yóʼo. ¿Á ta̱kán ni̱ka̱ʼa̱n xíʼún ña̱ kaʼyiún ndiʼi ña̱yóʼo?”. 18 Ta̱ Baruc nda̱kuiinra yuʼúna: “Ta̱kán ni̱ka̱ʼa̱n xíʼi̱n ndiʼi tu̱ʼun yóʼo ta yi̱ʼi̱ ka̱ʼyii̱ña xíʼin tinta nu̱ú rollo* yóʼo”. 19 Ta na̱ kúúmií chiñu ña̱ ndáyáʼvi ni̱ka̱ʼa̱nna xíʼin ta̱ Baruc: “Kúáʼanndó ta koose̱ʼéndó,* miíún xíʼin ta̱ Jeremías; nda̱a̱ ni iinna ná kǒo kunda̱a̱-ini ndáa míí ñúʼundó”.

20 Tasaá ni̱xa̱ʼa̱nna nu̱ú ta̱ rey chí yéʼé veʼera. Chi̱kaa̱va̱ʼana* rollo ini cuarto ta̱ secretario Elisamá ta na̱túʼunna xíʼin ta̱ rey xa̱ʼa̱ ndiʼi ña̱ xi̱niso̱ʼona.

21 Ña̱kán ta̱ rey xa̱ʼndara chiñu nu̱ú ta̱ Jehudí ña̱ ná ku̱ʼu̱nra ndakiʼinra rollo. Tasaá ta̱ Jehudí ni̱xa̱ʼa̱nra nda̱kiʼinraña chí cuarto ta̱ secretario Elisamá, ta ki̱xáʼara káʼviraña nu̱ú ta̱ rey ta saátu nu̱ú ndiʼi na̱ kúúmií chiñu ña̱ ndáyáʼvi na̱ xi̱ndita xíʼin ta̱ rey. 22 Ña̱yóʼo ku̱uña tá yo̱o̱ 9* tá íyo ta̱ rey veʼe nu̱ú xíyora tá tiempo vi̱xin ta íyora chí nu̱ú xíxi̱ ñuʼu̱. 23 Tá xi̱sandíʼi ta̱ Jehudí xi̱kaʼvira u̱ni̱ á ku̱mí táʼví ña̱yóʼo, ta̱ rey xi̱xaʼndaraña xíʼin cuchillo ña̱ xíniñúʼu na̱ secretario ta xi̱chikaa̱raña nu̱ú ñuʼu̱, tasaá ke̱ʼéra xíʼin rollo yóʼo nda̱a̱ tá ni̱xi̱xi̱ ndiʼiña. 24 Ni mií ta̱ rey ta ni na̱ káchíñu nu̱úra na̱ xi̱niso̱ʼo ndiʼi tu̱ʼun yóʼo kǒo níyi̱ʼvína ta ni kǒo níndatána ti̱ko̱to̱na. 25 Ni ni̱ka̱ʼa̱n-ndáʼvi ta̱ Elnatán, ta̱ Delayá xíʼin ta̱ Guemarías xíʼin ta̱ rey ña̱ ná kǒo kaʼmiraña, soo kǒo níxiniso̱ʼora ña̱ ni̱ka̱ʼa̱nna. 26 Ta nda̱a̱ xa̱ʼnda ta̱ rey chiñu nu̱ú ta̱ Jerahmeel se̱ʼe ta̱ rey, ta̱ Seraya se̱ʼe ta̱ Azriel xíʼin ta̱ Selemías se̱ʼe ta̱ Abdeel ña̱ ná ku̱ʼu̱nna tiinna ta̱ Baruc xíʼin ta̱ profeta Jeremías, soo Jehová chi̱se̱ʼérana.

27 Tándi̱ʼi xa̱ʼmi ta̱ rey rollo nu̱ú va̱xi tu̱ʼun ña̱ ni̱ka̱ʼa̱n ta̱ Jeremías xíʼin ta̱ Baruc, Jehová ni̱ka̱ʼa̱n tukura xíʼin ta̱ Jeremías: 28 “Ndukú inka rollo ta tuku kaʼyiún tu̱ʼun ña̱ ka̱ʼyiún nu̱ú rollo ña̱ nu̱ú, ña̱ xa̱ʼmi ta̱ rey Jehoiaquim ta̱ ñuu Judá. 29 Ta ka̱ʼún ña̱yóʼo contra ta̱ rey Jehoiaquim ta̱ ñuu Judá: ‘Ña̱yóʼo kúú ña̱ káʼa̱n Jehová: “Yóʼó xa̱ʼmiún rollo yóʼo ta ni̱ka̱ʼún: ‘¿Nda̱chun ka̱ʼyiún ña̱ kixi ta̱ rey ñuu Babilonia ta sandíʼi-xa̱ʼa̱ra ñuu yóʼo ta va̱ása kooka nda̱a̱ ni iin na̱ yiví ni kití nu̱úña?’. 30 Xa̱ʼa̱ ña̱kán, ña̱yóʼo kúú ña̱ káʼa̱n Jehová contra ta̱ Jehoiaquim ta̱ rey ñuu Judá: ‘Kǒo nda̱a̱ ni iin na̱ se̱ʼera koo nu̱ú trono ta̱ David, tá ná kuvira niʼníní kandúʼúra tá káʼñu* ta vi̱xinní kandúʼúra tá ñuú. 31 Ndatii̱n ku̱a̱chi xíʼinra xa̱ʼa̱ ña̱ va̱ása va̱ʼa kéʼé miíra, na̱ se̱ʼera xíʼin na̱ káchíñu nu̱úra. Ta chindaʼíi̱ ndiʼi tu̱ndóʼo ña̱ ni̱ka̱ʼi̱n xa̱ʼa̱ nu̱ú miína, nu̱ú na̱ ñuu Jerusalén ta saátu nu̱ú na̱ ta̱a ñuu Judá, xa̱ʼa̱ ña̱ kǒo níxiinna kuniso̱ʼona’”’”.

32 Tasaá, ta̱ Jeremías ndu̱kúra inka rollo ta ta̱xiraña ndaʼa̱ ta̱ Baruc se̱ʼe ta̱ Nerías, ta ta̱yóʼo ka̱ʼyira nu̱úña ndiʼi ña̱ ni̱ka̱ʼa̱n ta̱ Jeremías xíʼinra: ndiʼi tu̱ʼun ña̱ ki̱xi nu̱ú rollo* ña̱ xa̱ʼmi ta̱ rey Jehoiaquim ta̱ ñuu Judá ta saátu ka̱ʼyira nu̱úña ku̱a̱ʼáka tu̱ʼun ña̱ ni̱ka̱ʼa̱n Ndióxi̱.