Jeremías
37 Ta̱ rey Sedequías se̱ʼe ta̱ Josías nda̱kiʼinra xáʼndachíñura nu̱ú ta̱ Conías* se̱ʼe ta̱ Jehoiaquim, saáchi ta̱ rey Nabucodonosor* ta̱ ñuu Babilonia nda̱sarara rey chí ñuu Judá. 2 Soo ta̱ rey yóʼo, na̱ káchíñu nu̱úra xíʼin ndiʼi na̱ yiví na̱ ndóo ñuu kán kǒo níkandíxana tu̱ʼun Jehová ña̱ ni̱ka̱ʼa̱nra xíʼin ta̱ profeta Jeremías ka̱ʼa̱nra xíʼinna.
3 Ta̱ rey Sedequías xa̱ʼndara chiñu nu̱ú ta̱ Jehucal se̱ʼe ta̱ Selemías xíʼin ta̱ Sofonías se̱ʼe ta̱ Maaseya, ta̱ kúú su̱tu̱, ña̱ ná ku̱ʼu̱nna nu̱ú ta̱ Jeremías ta ka̱ʼa̱nna xíʼinra: “Ixaún ña̱ ma̱ní, ka̱ʼa̱n xa̱ʼa̱ndi̱ xíʼin Jehová Ndióxi̱yó”. 4 Ta̱ Jeremías va̱ʼa ni̱xi̱kara ñuu kán, chi ta̱ʼán chikaa̱nara veʼeka̱a. 5 Na̱ soldado ta̱ faraón ke̱ena ñuu Egipto ta ku̱a̱ʼa̱nna chí Jerusalén, ta tá ku̱ndaa̱-ini na̱ soldado caldeo na̱ ni̱xa̱a̱ ndóo iníí sa̱tá ñuu Jerusalén xa̱ʼa̱ ña̱yóʼo, sa̱ndákoona ñuu Jerusalén ta nda̱kiʼinna ku̱a̱ʼa̱nna. 6 Tasaá ni̱ka̱ʼa̱n Jehová ña̱yóʼo xíʼin ta̱ profeta Jeremías: 7 “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: ‘Ña̱yóʼo kúú ña̱ xíniñúʼu ka̱ʼa̱nndó xíʼin ta̱ rey ñuu Judá, ta̱ chi̱ndaʼá ndóʼó va̱xindó nu̱úi̱: “Kotondó, na̱ soldado ta̱ faraón na̱ va̱xi chindeétáʼan xíʼinndó ndikóvana chí Egipto, país nu̱ú ke̱ena. 8 Ta na̱ caldeo ndikóvana ta kanitáʼanna xíʼin na̱ ndóo ñuu yóʼo, kuchiñuna ndakiʼinnaña ta kaʼminaña”. 9 Ña̱yóʼo kúú ña̱ káʼa̱n Jehová: “Kǒo sandáʼvindó miíndó ta kachindó ‘Sana ku̱ʼu̱nva na̱ caldeo ta kǒo kanitáʼankana xíʼinyó’, saáchi na̱yóʼo va̱ása ku̱ʼu̱nna. 10 Ni tá ná kuchiñundó kanitáʼanndó xíʼin ndiʼi na̱ soldado na̱ caldeo na̱ ki̱xaa̱ kánitáʼan xíʼinndó ta ndáa na̱ tu̱kue̱ʼe̱ kuití ná kindo̱o, na̱yóʼo keena ini veʼe válína ta kaʼmina ñuu yóʼo”’”.
11 Tá sa̱ndákoo na̱ soldado caldeo ñuu Jerusalén ta ke̱ena ku̱a̱ʼa̱nna xa̱ʼa̱ ña̱ va̱xi na̱ soldado ta̱ faraón, 12 ta̱ Jeremías ke̱era chí Jerusalén ta nda̱kiʼinra ku̱a̱ʼa̱nra chí nu̱ú íyo ñuʼú na̱ tribu ta̱ Benjamín ña̱ va̱ʼa ndakiʼinra herencia ña̱ xíniñúʼu ndakiʼinra xíʼin na̱ ñuu kán. 13 Soo tá ni̱xa̱a̱ra chí Yéʼé ta̱ Benjamín, iin ta̱ soldado ta̱ xi̱kiʼin kuenta xíʼin inkaka na̱ soldado, ta̱ xi̱naní Iriya ta̱ xi̱kuu se̱ʼe ta̱ Selemías, se̱ʼe ta̱ Hananías, ti̱inra ta̱ profeta Jeremías ta ni̱ka̱ʼa̱nra xíʼinra: “Yóʼó xíʼin na̱ caldeova nda̱kutáʼún”. 14 Soo ta̱ Jeremías ni̱ka̱ʼa̱nra xíʼinra: “Su̱ví ña̱ ndixaví kúú ña̱ káʼún. Va̱ása níndakutáʼanvíi̱ xíʼin na̱ caldeo”. Soo ta̱ Iriya kǒo níkandíxara ña̱ ni̱ka̱ʼa̱nra, ña̱kán ti̱inra ta̱ Jeremías ta ni̱xa̱ʼa̱nra xíʼinra nu̱ú na̱ kúúmií chiñu ña̱ ndáyáʼvi. 15 Ta na̱ kúúmií chiñu ña̱ ndáyáʼvi ni̱sa̱a̱nína xíʼin ta̱ Jeremías, ka̱ninara ta chi̱kaa̱nara veʼeka̱a chí veʼe ta̱ secretario Jehonatán, saáchi nda̱sana ña̱yóʼo veʼeka̱a. 16 Chi̱kaa̱na ta̱ Jeremías ini veʼeka̱a ña̱ íyo ti̱xin ñuʼú ta ku̱a̱ʼání ki̱vi̱ xi̱ndikaa̱ra kán.
17 Tasaá chi̱ndaʼá ta̱ rey Sedequías na̱ ku̱a̱ʼa̱n ndakiʼin ta̱ Jeremías ta ni̱nda̱ka̱tu̱ʼun se̱ʼérara chí veʼera.* Ka̱chira: “¿Á xa̱a̱ nda̱kuiin Jehová yuʼún?”. Ta ta̱ Jeremías ni̱ka̱ʼa̱nra: “Xa̱a̱ nda̱kuiinvara”. Ta ni̱ka̱ʼa̱nkara: “Ta̱ rey ñuu Babilonia ndakiʼinra yóʼó ku̱ʼu̱n xíʼinra”.
18 Ta saátu ni̱ka̱ʼa̱n ta̱ Jeremías xíʼin ta̱ rey Sedequías: “¿Ndáa ku̱a̱chi ni̱ki̱ʼvii̱ nu̱ún, nu̱ú na̱ káchíñu nu̱ún ta saátu nu̱ú na̱ ñuu yóʼo ña̱kán chi̱kaa̱na yi̱ʼi̱ veʼeka̱a? 19 ¿Ndáa míí ku̱a̱ʼa̱n na̱ xi̱kaʼa̱n xíʼinndó ‘Ta̱ rey ñuu Babilonia kǒo kixira kanitáʼanra xíʼinndó ni xíʼin país yóʼo’? 20 Soo vitin ixaún ña̱ ma̱ní kuniso̱ʼún yi̱ʼi̱ táta rey. Káʼa̱n-ndáʼvii̱ xíʼún ña̱ ná keʼún ña̱ ndúkúi̱ nu̱ún. Kǒo taxiún ña̱ ndikó tukui̱ veʼe ta̱ secretario Jehonatán, chi kuvivai̱ kán”. 21 Ña̱kán ta̱ rey Sedequías xa̱ʼndara chiñu ña̱ ná kundaana ta̱ Jeremías chí Yéʼé na̱ Soldado, ta ndiʼi ki̱vi̱ xi̱taxina iin si̱ta̱váʼa ña̱ ti̱ku̱i̱ta̱* xi̱xixira, ña̱ xi̱kee chí calle nu̱ú xi̱ndoo na̱ xi̱xi̱íko* si̱ta̱váʼa, nda̱a̱ tá ndi̱ʼi si̱ta̱váʼa ñuu kán. Ta ta̱ Jeremías ki̱ndoora chí Yéʼé na̱ Soldado.