Jeremías
38 Ta̱ Sefatías se̱ʼe ta̱ Matán, ta̱ Guedalías se̱ʼe ta̱ Pasjur, ta̱ Jucal se̱ʼe ta̱ Selemías xíʼin ta̱ Pasjur se̱ʼe ta̱ Malkiya xi̱niso̱ʼona tu̱ʼun ña̱ ni̱ka̱ʼa̱n ta̱ Jeremías xíʼin na̱ ñuu: 2 “Ña̱yóʼo kúú ña̱ káʼa̱n Jehová: ‘Na̱ ná kindo̱o ñuu yóʼo kuvina xíʼin espada, xíʼin so̱ko ta saátu xíʼin kue̱ʼe̱. Soo na̱ ná ndataxi mií ndaʼa̱ na̱ caldeo kutakuvana; ña̱ tákuna kooña nda̱a̱ táki̱ʼva íyo ña̱ʼa ña̱ ndáyáʼviní ña̱ ndákiʼin na̱ xáʼa̱n nu̱ú ku̱a̱chi ta kutakuvana’. 3 Ña̱yóʼo kúú ña̱ káʼa̱n Jehová: ‘Ndataxii̱ ñuu yóʼo ndaʼa̱ ta̱ rey ñuu Babilonia, ta ta̱kán ndakiʼinraña’”.
4 Na̱ ta̱a na̱ kúúmií chiñu ña̱ ndáyáʼvi ni̱ka̱ʼa̱nna xíʼin ta̱ rey: “Ixaún ña̱ ma̱ní, taxi ná kaʼnína ta̱ ta̱a yóʼo, saáchi xíʼin ña̱ʼa ña̱ káʼa̱nra sáyi̱ʼvíra na̱ soldado na̱ kíndo̱o ñuu yóʼo ta saátu sáyi̱ʼvíra ndiʼi na̱ ñuu. Saáchi ta̱ ta̱a yóʼo va̱ása kúni̱ra ña̱ vií ná kundoo na̱ ñuu yóʼo, chi ña̱ kúni̱ra kúú ña̱ ná xo̱ʼvi̱na”.* 5 Ta̱ rey Sedequías ni̱ka̱ʼa̱nra xíʼinna: “Kotondó, ndaʼa̱ miívandó íyora, saáchi yi̱ʼi̱ kǒo nda̱a̱ ni iin ña̱ʼa kivi keʼíi̱ ña̱ kasii̱ nu̱úndó”.
6 Xa̱ʼa̱ ña̱kán ti̱inna ta̱ Jeremías ta chi̱kaa̱nara ini pozo ta̱ Malkiya se̱ʼe ta̱ rey, ña̱ íyo chí Yéʼé na̱ Soldado; ta sa̱núunara xíʼin yoʼo̱ iniña. Kǒo ti̱kui̱í níxi̱ñuʼu ini pozo kán saáchi nina nda̱ʼyi̱ xi̱ñuʼu iniña, ta ta̱ Jeremías ki̱xáʼara sáʼvira ti̱xin nda̱ʼyi̱.
7 Ta̱ Ébed-Mélec iin ta̱ etíope ta̱ xi̱kachíñu* veʼe* ta̱ rey, ku̱ndaa̱-inira ña̱ chi̱kaa̱na ta̱ Jeremías ini pozo. Ta̱ rey íyora chí Yéʼé ta̱ Benjamín, 8 xa̱ʼa̱ ña̱kán ta̱ Ébed-Mélec ki̱tara chí veʼe ta̱ rey ta ni̱ka̱ʼa̱nra xíʼinra: 9 “Táta rey, ña̱ ke̱ʼé na̱ ta̱a kán xíʼin ta̱ profeta Jeremías su̱ví ña̱ va̱ʼa kúúña. Chi̱kaa̱nara ini pozo ta kán kuvivara so̱ko, saáchi kǒoka si̱ta̱váʼa ñuu yóʼo”.
10 Xa̱ʼa̱ ña̱kán, ta̱ rey xa̱ʼndara chiñu yóʼo nu̱ú ta̱ Ébed-Mélec ta̱ etíope: “Ná ku̱ʼu̱n 30 na̱ ta̱a xíʼún ta taváún ta̱ profeta Jeremías ini pozo ña̱ va̱ʼa ná kǒo kuvira”. 11 Xa̱ʼa̱ ña̱kán, ta̱ Ébed-Mélec nda̱kiʼinra na̱ ta̱a kán ku̱a̱ʼa̱n xíʼinra ta ni̱xa̱ʼa̱nra veʼe ta̱ rey, ini iin cuarto ña̱ ndíkaa̱ chí ti̱xin veʼe nu̱ú táanva̱ʼana* ña̱ʼa ña̱ ndáyáʼvi, ta nda̱kiʼinna sava ti̱ko̱to̱ yatá xíʼin savaka ti̱ko̱to̱ ña̱ ni̱nda̱ta̱ ku̱a̱ʼa̱n xíʼinna, ta ka̱túnnaña xíʼin yoʼo̱ ta sa̱núunaña ini pozo nu̱ú ndíkaa̱ ta̱ Jeremías. 12 Tasaá, ta̱ Ébed-Mélec ta̱ etíope ni̱ka̱ʼa̱nra xíʼin ta̱ Jeremías: “Ixaún ña̱ ma̱ní, taán ti̱ko̱to̱ ña̱ ni̱nda̱ta̱ xíʼin ti̱ko̱to̱ yatá ti̱xin se̱ʼún ta saátu keʼún xíʼin yoʼo̱”. Ta ta̱ Jeremías ke̱ʼévara ña̱yóʼo, 13 ta na̱kán ni̱xi̱tánara xíʼin yoʼo̱ ta ta̱vánara ini pozo. Ta ta̱ Jeremías ki̱ndoora chí Yéʼé na̱ Soldado.
14 Ta̱ rey Sedequías chi̱ndaʼára na̱ ku̱a̱ʼa̱n ndakiʼin ta̱ profeta Jeremías ña̱ ku̱ʼu̱nra chí yéʼé ña̱ u̱ni̱, ña̱ ni̱xi̱yo chí veʼe Jehová, ta ta̱ rey ni̱ka̱ʼa̱nra xíʼin ta̱ Jeremías: “Kúni̱i̱ nda̱ka̱tu̱ʼíi̱n yóʼó xa̱ʼa̱ iin ña̱ʼa. Ta kǒo kasi yuʼún xa̱ʼa̱ nda̱a̱ ni iin ña̱ʼa nu̱úi̱”. 15 Tasaá ni̱ka̱ʼa̱n ta̱ Jeremías xíʼin ta̱ Sedequías: “Tá ná ka̱ʼi̱n xíʼún xa̱ʼa̱ña, kaʼnívaún yi̱ʼi̱. Ta tá ná taxii̱ iin consejo ndaʼún, va̱ása kuniso̱ʼovíún yi̱ʼi̱”. 16 Xa̱ʼa̱ ña̱kán, ta̱ Sedequías chi̱naʼá* se̱ʼéra xa̱ʼa̱ ña̱yóʼo nu̱ú ta̱ Jeremías, ta ni̱ka̱ʼa̱nra: “Chínaʼíi̱ xa̱ʼa̱ Jehová Ndióxi̱ ta̱ táku ta̱ ta̱xi ña̱ tákuyó, ña̱ kǒo kaʼnívíi̱ yóʼó ta ni va̱ása ndataxii̱ yóʼó ndaʼa̱ na̱ ta̱a na̱ kúni̱ kaʼní yóʼó”.
17 Tasaá ni̱ka̱ʼa̱n ta̱ Jeremías xíʼin ta̱ Sedequías: “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Tá ná ndataxiún miíún ndaʼa̱ na̱ ta̱a na̱ kúúmií chiñu ña̱ ndáyáʼvi nu̱ú ta̱ rey ñuu Babilonia, kutakuvaún, kǒo kaʼmina ñuu yóʼo, ta miíún xíʼin na̱ veʼún va̱ása kuvindó. 18 Soo tá ná kǒo ndataxiún miíún ndaʼa̱ na̱ ta̱a na̱ kúúmií chiñu ña̱ ndáyáʼvi nu̱ú ta̱ rey ñuu Babilonia, ndataxii̱ ñuu yóʼo ndaʼa̱ na̱ caldeo ta na̱kán kaʼminaña ta yóʼó va̱ása kuchiñún ka̱kuún nu̱úna’”.
19 Tasaá ni̱ka̱ʼa̱n ta̱ rey Sedequías xíʼin ta̱ Jeremías: “Yíʼviníi̱ nu̱ú na̱ judío na̱ nda̱kutáʼan xíʼin na̱ caldeo. Saáchi tá ná ndataxina yi̱ʼi̱ ndaʼa̱na, sana ixandi̱va̱ʼanína xíʼi̱n”. 20 Soo ta̱ Jeremías ni̱ka̱ʼa̱nra xíʼinra: “Kǒo ndataxivína yóʼó ndaʼa̱na. Ixaún ña̱ ma̱ní, kuniso̱ʼo ña̱ káʼa̱n Jehová ta keʼún ña̱ káʼi̱n xíʼún; tasaá vií koún ta va̱ása kuviún. 21 Soo tá ná kǒo kandíxaún ndataxiún miíún ndaʼa̱na, Jehová ni̱ka̱ʼa̱nra xíʼi̱n ña̱ kuu ña̱yóʼo: 22 tavána ndiʼi ná ñaʼá ná kíndo̱o veʼe ta̱ rey ñuu Judá ta ku̱ʼu̱nna xíʼinná nu̱ú na̱ kúúmií chiñu ña̱ ndáyáʼvi nu̱ú ta̱ rey ñuu Babilonia, ta nákán ka̱ʼa̱nná ña̱yóʼo nani ku̱a̱ʼa̱nná:
‘Na̱ ta̱a na̱ xi̱ndaa-iniún sa̱ndáʼvina yóʼó ta ku̱chiñuna xíʼún.
Sa̱tíinna xa̱ʼún ti̱xin nda̱ʼyi̱.
Ta vitin ndi̱kóko̱ona ku̱a̱ʼa̱nna’.
23 Ta ndataxina ndiʼi ná síʼún xíʼin na̱ se̱ʼún ndaʼa̱ na̱ caldeo. Ta yóʼó kǒo kuchiñún ka̱kuún nu̱úna, saáchi ta̱ rey ñuu Babilonia tiinra yóʼó ta xa̱ʼa̱ ku̱a̱chiún kaʼmina ñuu yóʼo”.
24 Tándi̱ʼi, ta̱ Sedequías ni̱ka̱ʼa̱nra xíʼin ta̱ Jeremías: “Va̱ása ka̱ʼún xíʼin nda̱a̱ ni iinna xa̱ʼa̱ ña̱yóʼo ña̱ va̱ʼa ná kǒo kaʼnína yóʼó. 25 Tá ná kunda̱a̱-ini na̱ kúúmií chiñu ña̱ ndáyáʼvi ña̱ ni̱ka̱ʼi̱n xíʼún ta va̱xina káʼa̱nna ña̱yóʼo xíʼún ‘Ixaún ña̱ ma̱ní natúʼun xíʼinndi̱ ndáaña ni̱ka̱ʼún xíʼin ta̱ rey. Kǒo kasi yuʼún xa̱ʼa̱ nda̱a̱ ni iin ña̱ʼa tasaá va̱ása kaʼníndi̱ yóʼó. ¿Ta ndáaña ni̱ka̱ʼa̱n ta̱ rey xíʼún?’, 26 xíniñúʼu ka̱ʼún xíʼinna ‘Ni̱ka̱ʼi̱n xíʼin ta̱ rey ña̱ ná kǒo taxira ña̱ ndikói̱ chí veʼe ta̱ Jehonatán ña̱ kuvii̱ kán’”.
27 Tá ni̱ya̱ʼa tiempo, ndiʼi na̱ kúúmií chiñu ña̱ ndáyáʼvi ni̱xa̱ʼa̱nna xi̱tona ta̱ Jeremías ta ni̱nda̱ka̱tu̱ʼunnara. Ta̱kán ni̱ka̱ʼa̱nra xíʼinna ndiʼi ña̱ ni̱ka̱ʼa̱n ta̱ rey xíʼinra ña̱ ná ka̱ʼa̱nra xíʼinna. Xa̱ʼa̱ ña̱kán kǒo nínda̱ka̱tu̱ʼunkanara, saáchi nda̱a̱ ni iinna va̱ása níxiniso̱ʼona tá na̱túʼunra xíʼin ta̱ rey. 28 Ta̱ Jeremías ki̱ndoora ni̱xi̱yora chí Yéʼé na̱ Soldado, nda̱a̱ tá ki̱vi̱ ña̱ ku̱chiñuna nda̱kiʼinna ñuu Jerusalén; ni̱xi̱yokara kán tá xa̱a̱ nda̱kiʼinna ñuu Jerusalén.