Jeremías

39 Tá xa̱a̱ 9 ku̱i̱ya̱ xáʼndachíñu ta̱ rey Sedequías ta̱ ñuu Judá, tá yo̱o̱ u̱xu̱, ta̱ rey Nabucodonosor* ta̱ ñuu Babilonia ki̱xaa̱ra chí ñuu Jerusalén xíʼin ndiʼi na̱ soldado na̱ kúúmiíra ta xi̱kundoona sa̱táña.

2 Tá xa̱a̱ 11 ku̱i̱ya̱ xáʼndachíñu ta̱ Sedequías, tá ki̱vi̱ 9 tí yo̱o̱ ku̱mí, ka̱anna iin ya̱vi̱ kándíka nama̱ ñuu yóʼo ta ni̱ki̱ʼvina. 3 Ta ndiʼi na̱ xi̱kuumií chiñu ña̱ ndáyáʼvi nu̱ú ta̱ rey ñuu Babilonia ni̱ki̱ʼvina ta xi̱kundoona Yéʼé ña̱ ni̱xi̱yo chí ma̱ʼñú. Na̱yóʼo xi̱kuu ta̱ samgar* Nergal-Sarézer, ta̱ rabsarís* Nebo-Sarsekim,* ta̱ rabmag* Nergal-Sarézer xíʼin ndiʼika na̱ xi̱kuumií chiñu ña̱ ndáyáʼvi nu̱ú ta̱ rey ñuu Babilonia.

4 Tá xi̱ni ta̱ rey Sedequías ta̱ ñuu Judá ta saátu tá xi̱ni ndiʼi na̱ soldado na̱yóʼo, sa̱ndákoona ñuu kán ta xi̱nuna. Ke̱ena tá ñuú chí jardín ta̱ rey, chí yéʼé ña̱ ni̱xi̱yo ma̱ʼñú u̱vi̱ saá nama̱ ta nda̱kiʼinna ku̱a̱ʼa̱nna chí yichi̱ ña̱ ku̱a̱ʼa̱n chí Arabá. 5 Soo na̱ soldado na̱ caldeo xi̱ndiku̱nna ni̱xa̱ʼa̱nna sa̱tána ta nda̱kutáʼanna xíʼin ta̱ Sedequías chí yoso̱ yi̱chí ña̱ íyo chí Jericó. Ti̱innara ta ni̱xa̱ʼa̱nna xíʼinra nu̱ú ta̱ rey Nabucodonosor* ta̱ ñuu Babilonia chí Riblá, chí nu̱ú ñuʼú ña̱ Hamat, ta kán ni̱ka̱ʼa̱nra ndáaña keʼéna xíʼinra. 6 Ta̱ rey ñuu Babilonia ni̱ka̱ʼa̱nra ña̱ ná kaʼnína na̱ se̱ʼe ta̱ Sedequías chí Riblá, ta xi̱ninu̱úra ku̱u ña̱yóʼo. Ta saátu ni̱ka̱ʼa̱n ta̱ rey ñuu Babilonia ña̱ ná kaʼnína ndiʼi na̱ ta̱a na̱ ndáyáʼvi na̱ ñuu Judá. 7 Tándi̱ʼi, sa̱kúára nu̱ú ta̱ Sedequías ta ta̱ánra ka̱a ña̱ cobre ndaʼa̱ra ña̱ va̱ʼa ndakiʼinrara ku̱ʼu̱n xíʼinra chí ñuu Babilonia.

8 Tasaá xa̱ʼmi na̱ caldeo veʼe* ta̱ rey xíʼin ndiʼi veʼe ña̱ íyo ñuu kán ta sa̱ndíʼi-xa̱ʼa̱na nama̱ ñuu Jerusalén. 9 Ta̱ Nebuzaradán ta̱ níʼi yichi̱ nu̱ú na̱ soldado ta̱ rey Nabucodonosor, nda̱kiʼinra ndiʼi na̱ yiví na̱ xi̱kindo̱o ñuu kán ku̱a̱ʼa̱n xíʼinra chí ñuu Babilonia, ndiʼi na̱ nda̱kutáʼan xíʼinra ta saátu ndiʼika na̱ xi̱kindo̱o.

10 Soo ta̱ Nebuzaradán ta̱ níʼi yichi̱ nu̱ú na̱ soldado ta̱ rey nda̱koora sava na̱ yiví na̱ ndáʼvi chí ñuu Judá, na̱ kǒo nda̱a̱ ni iin ña̱ʼa kúúmií. Ta ki̱vi̱ kán ta̱xira ñuʼú nu̱ú íyo tú uva ndaʼa̱na ta saátu ñuʼú nu̱ú chiʼina, ña̱ va̱ʼa kachíñuna.*

11 Soo ta̱ rey Nabucodonosor* ta̱ ñuu Babilonia ni̱ka̱ʼa̱nra xíʼin ta̱ Nebuzaradán ta̱ níʼi yichi̱ nu̱ú na̱ soldado ta̱ rey ndáaña xíniñúʼu keʼéra xíʼin ta̱ Jeremías, ni̱ka̱ʼa̱nra xíʼinra: 12 “Kúáʼan nandukúnra ta kundaúnra; va̱ása ixandi̱va̱ʼún xíʼinra ta ndiʼi ña̱ ná ndukúra nu̱ún taxiúnña ndaʼa̱ra”.

13 Xa̱ʼa̱ ña̱kán, ta̱ Nebuzaradán ta̱ níʼi yichi̱ nu̱ú na̱ soldado ta̱ rey, ta̱ rabsarís* Nebusazbán, ta̱ rabmag* Nergal-Sarézer xíʼin ndiʼika na̱ ta̱a na̱ xi̱kuumií chiñu ña̱ ndáyáʼvi nu̱ú ta̱ rey ñuu Babilonia xa̱ʼndana chiñu 14 ña̱ ná ku̱ʼu̱nna ndakiʼinna ta̱ Jeremías chí Yéʼé na̱ Soldado, ta nda̱taxinara ndaʼa̱ ta̱ Guedalías se̱ʼe ta̱ Ahicam, se̱ʼe ta̱ Safán, ña̱ va̱ʼa ná ndakiʼinrara ku̱ʼu̱n xíʼinra veʼera. Xa̱ʼa̱ ña̱kán ni̱xi̱yo tuku ta̱ Jeremías xíʼin na̱ ñuu.

15 Tá xi̱ndasi ta̱ Jeremías chí Yéʼé na̱ Soldado, Jehová ni̱ka̱ʼa̱nra ña̱yóʼo xíʼinra: 16 “Kúáʼan ta ka̱ʼún xíʼin ta̱ Ébed-Mélec ta̱ etíope: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Saxínuvai̱ tu̱ʼun ña̱ ni̱ka̱ʼi̱n xa̱ʼa̱ ñuu yóʼo, ña̱ kuu tu̱ndóʼo ta su̱ví ña̱ʼa va̱ʼa, ta kunivaún xi̱nu ña̱yóʼo ki̱vi̱ kán”’.

17 ”‘Soo yi̱ʼi̱ sakǎkuvai̱ yóʼó ki̱vi̱ kán, ta kǒo ndataxii̱ yóʼó ndaʼa̱ na̱ ta̱a na̱ yíʼviún xíniún’, káchi Jehová.

18 ”‘Saáchi sakǎkuvai̱ yóʼó ta va̱ása kaʼnína yóʼó xíʼin espada. Ña̱ tákún kooña nda̱a̱ táki̱ʼva íyo iin ña̱ʼa ña̱ ndáyáʼviní ña̱ ndákiʼún tá xáʼún nu̱ú ku̱a̱chi, saáchi xi̱ndaa-iniún yi̱ʼi̱’, káchi Jehová”.