Jeremías

40 Ta̱ Nebuzaradán ta̱ níʼi yichi̱ nu̱ú na̱ soldado ta̱ rey sa̱ñára ta̱ Jeremías chí Ramá, ta tá xa̱a̱ sa̱ñárara saá kúú ña̱ ni̱ka̱ʼa̱n Jehová xíʼinra. Xi̱nuʼni ndaʼa̱ ta̱ Jeremías ni̱xa̱ʼa̱nra xíʼin ta̱ Nebuzaradán nda̱a̱ Ramá, ta xi̱kitáʼanra xíʼin ndiʼi na̱ ñuu Jerusalén ta saátu xíʼin na̱ ñuu Judá na̱ nda̱kiʼinna ku̱a̱ʼa̱n xíʼinna chí ñuu Babilonia. 2 Tasaá, ta̱ Nebuzaradán ta̱ níʼi yichi̱ nu̱ú na̱ soldado ta̱ rey, ta̱vára ta̱ Jeremías iin táʼví ta ni̱ka̱ʼa̱nra xíʼinra: “Jehová Ndióxi̱ún ni̱ka̱ʼa̱nra ña̱ kuu tu̱ndóʼo yóʼo ñuu yóʼo, 3 ta Jehová chi̱ndaʼávaraña nda̱a̱ táki̱ʼva ni̱ka̱ʼa̱nra, saáchi ndóʼó ni̱ki̱ʼvindó ku̱a̱chi nu̱ú Jehová ta kǒo níxiinndó kuniso̱ʼondó ña̱ ni̱ka̱ʼa̱nra. Xa̱ʼa̱ ña̱kán ndo̱ʼondó ña̱yóʼo. 4 Vitin tavái̱ ka̱a ña̱ núʼni ndaʼún. Tá kúni̱ún kivi ku̱ʼún xíʼi̱n chí Babilonia ta yi̱ʼi̱ kundaa yóʼó. Soo tá kǒo kúni̱ún ku̱ʼún xíʼi̱n chí Babilonia, va̱ása ku̱ʼún. Koto, ndíka̱níva país yóʼo ta kivi ku̱ʼún nda̱a̱ ndáaka nu̱ú kúni̱ miíún”.

5 Ta̱ʼán ku̱ʼu̱nví ta̱ Jeremías tá ni̱ka̱ʼa̱n ta̱ Nebuzaradán ña̱yóʼo xíʼinra: “Ndikó chí nu̱ú íyo ta̱ Guedalías se̱ʼe ta̱ Ahicam, se̱ʼe ta̱ Safán, ta̱ ta̱xi ta̱ rey ñuu Babilonia chiñu ndaʼa̱ ña̱ kiʼinra kuenta xíʼin ndiʼi ñuu ña̱ íyo chí Judá ta kindo̱ún koún xíʼinra ñuu yóʼo; á ku̱ʼún nda̱a̱ ndáaka nu̱ú kúni̱ miíún”.

Tasaá, ta̱ Nebuzaradán ta̱ níʼi yichi̱ nu̱ú na̱ soldado ta̱ rey ta̱xira ña̱ʼa ña̱ kuxura ta saátu ta̱xira iin regalo ndaʼa̱ra, ta nda̱kiʼinra ku̱a̱ʼa̱nra. 6 Xa̱ʼa̱ ña̱kán, ta̱ Jeremías nda̱kiʼinra ku̱a̱ʼa̱nra chí Mizpá nu̱ú íyo ta̱ Guedalías se̱ʼe ta̱ Ahicam, ta kán ki̱ndoora ni̱xi̱yora xíʼinra xíʼin ndiʼika na̱ yiví na̱ xi̱kindo̱o país kán.

7 Tá ni̱ya̱ʼa tiempo, ndiʼi na̱ níʼi yichi̱ nu̱ú na̱ soldado na̱ xi̱ndoo chí yuku̱ xíʼin ndiʼi na̱ ta̱a na̱ xi̱kitáʼan xíʼinna, ku̱ndaa̱-inina ña̱ ta̱xi ta̱ rey ñuu Babilonia chiñu ndaʼa̱ ta̱ Guedalías se̱ʼe ta̱ Ahicam ña̱ kiʼinra kuenta xíʼin país kán, ta saátu ta̱xira chiñu ndaʼa̱ra ña̱ kiʼinra kuenta xíʼin na̱ ta̱a, ná ñaʼá xíʼin na̱ va̱lí na̱ nda̱ʼví na̱ kǒo níndakiʼinna ku̱ʼu̱n xíʼinna chí ñuu Babilonia. 8 Xa̱ʼa̱ ña̱kán ni̱xa̱ʼa̱nna xi̱tona ta̱ Guedalías chí Mizpá. Ta̱ ni̱xa̱ʼa̱n xi̱kuu ta̱ Ismael se̱ʼe ta̱ Netanías, ta̱ Johanán xíʼin ta̱ Jonatán se̱ʼe ta̱ Caréah, ta̱ Seraya se̱ʼe ta̱ Tanhúmet, na̱ se̱ʼe ta̱ Efái ta̱ netofatita xíʼin ta̱ Jezanías se̱ʼe ta̱ maacatita, ta ni̱xa̱ʼa̱ntu na̱ soldadona xíʼinna. 9 Ta̱ Guedalías se̱ʼe ta̱ Ahicam, se̱ʼe ta̱ Safán, chi̱naʼára* iin ña̱ʼa nu̱úna ta saátu nu̱ú na̱ ta̱a na̱ kítáʼan xíʼinna. Ni̱ka̱ʼa̱nra xíʼinna: “Va̱ása yi̱ʼvíndó ña̱ kachíñundó nu̱ú na̱ caldeo. Ñuu yóʼo kundoondó kachíñundó nu̱ú ta̱ rey ñuu Babilonia ta kǒo ña̱ kundoʼovíndó. 10 Soo yi̱ʼi̱ kindo̱i̱ chí Mizpá ña̱ va̱ʼa ka̱ʼi̱n xa̱ʼa̱ndó xíʼin na̱ caldeo na̱ ná kixi. Soo ndóʼó xíniñúʼu ndataánva̱ʼandó* vino, ku̱i̱ʼi ña̱ kána tiempo yi̱chí xíʼin aceite ini ki̱si ñuʼú, ta kundoondó ñuu ña̱ xa̱a̱ nda̱kaxinndó kundoondó”.

11 Ta ndiʼika na̱ judío na̱ xi̱ndoo chí Moab, Ammón, Edom xíʼin inkaka país ku̱ndaa̱-inina ña̱ ta̱xi ta̱ rey ñuu Babilonia ña̱ ná kindo̱o savaka na̱ yiví chí ñuu Judá, ta saátu ku̱ndaa̱-inina ña̱ ta̱xira chiñu ndaʼa̱ ta̱ Guedalías se̱ʼe ta̱ Ahicam, se̱ʼe ta̱ Safán ña̱ ná kiʼinra kuenta xíʼin na̱yóʼo. 12 Xa̱ʼa̱ ña̱kán ndiʼi na̱ judío na̱ nda̱kiʼin ku̱a̱ʼa̱n kundoo inkaka ñuu, ndi̱kóna chí nu̱ú ñuʼú ña̱ íyo chí Judá ta ni̱xa̱ʼa̱nna chí Mizpá nu̱ú íyo ta̱ Guedalías. Ta nda̱taánva̱ʼana ku̱a̱ʼání vino xíʼin ku̱i̱ʼi tí kána tiempo yi̱chí.

13 Ta̱ Johanán se̱ʼe ta̱ Caréah xíʼin ndiʼi na̱ níʼi yichi̱ nu̱ú na̱ soldado na̱ xi̱ndoo chí yuku̱ ni̱xa̱ʼa̱nna xi̱tona ta̱ Guedalías chí Mizpá. 14 Na̱yóʼo ni̱ka̱ʼa̱nna xíʼinra: “Ta̱ Baalís ta̱ rey na̱ ammonita chi̱ndaʼára ta̱ Ismael se̱ʼe ta̱ Netanías ña̱ va̱xira kaʼníra yóʼó, ¿á kǒo kúnda̱a̱va-iniún xa̱ʼa̱ ña̱yóʼo?”. Soo ta̱ Guedalías se̱ʼe ta̱ Ahicam kǒo níkandíxara ña̱ ni̱ka̱ʼa̱nna.

15 Tasaá ta̱ Johanán se̱ʼe ta̱ Caréah ni̱ka̱ʼa̱n se̱ʼéra xíʼin ta̱ Guedalías chí Mizpá: “Kúni̱i̱ ku̱ʼi̱n kaʼníi̱ ta̱ Ismael se̱ʼe ta̱ Netanías; kǒo nda̱a̱ ni iinna kunda̱a̱-ini xa̱ʼa̱ ña̱yóʼo. ¿Nda̱chun taxiyó ña̱ ná kaʼníra yóʼó? ¿Nda̱chun taxiyó ña̱ ná ku̱ʼu̱n ndiʼi tuku na̱ yiví na̱ ñuu Judá na̱ ki̱xaa̱ nda̱kutáʼan xíʼún? ¿Nda̱chun taxiyó ña̱ ná ndiʼi-xa̱ʼa̱ ndiʼi na̱ ñuu Judá na̱ kíndo̱o?”. 16 Soo ta̱ Guedalías se̱ʼe ta̱ Ahicam ni̱ka̱ʼa̱nra xíʼin ta̱ Johanán se̱ʼe ta̱ Caréah: “Va̱ása keʼúnña, saáchi ña̱ káʼún xa̱ʼa̱ ta̱ Ismael ña̱ vatáva* kúúña”.