Jeremías
4 “Tá ná ndikóún nu̱úi̱ ñuu Israel, káchi Jehová,
tá ná ndikóún nu̱úi̱ ta sakútaʼún ndiʼi ña̱ʼa ña̱ kini ña̱ ndásakáʼnún,
saá va̱ása kunukaún kakaún nu̱úi̱.
2 Tá ná ka̱ʼún ña̱ nda̱a̱ ta keʼún ña̱ nda̱kú, ta kachiún:
‘Chínaʼíi̱* xa̱ʼa̱ Jehová Ndióxi̱ ta̱ táku’,
saá taxira ña̱ va̱ʼa ndaʼa̱ ndiʼi na̱ ñuu,
ta xa̱ʼa̱ ña̱ keʼéra ña̱yóʼo ka̱ʼa̱n va̱ʼana xa̱ʼa̱ra”.
3 Saáchi ña̱yóʼo kúú ña̱ káʼa̱n Jehová xíʼin na̱ ta̱a na̱ ñuu Judá ta saátu xíʼin na̱ ñuu Jerusalén:
“Nu̱ú ñuʼú va̱ʼa taʼvíndó ta chiʼindó ta kǒo chiʼikandó tañu tú iñú.
4 Ndasandiindó* miíndó* ña̱ kachíñundó nu̱ú Jehová
ta saátu ndasandiindó níma̱ndó,
ndóʼó na̱ ta̱a na̱ ñuu Judá xíʼin na̱ ñuu Jerusalén,
ña̱ va̱ʼa kǒo sa̱íi̱ xíʼinndó nda̱a̱ táki̱ʼva ndeéní ndákoko ñuʼu̱
ta kǒo nda̱a̱ ni iin na̱ kívi ndaʼvaña,
xa̱ʼa̱ ña̱ʼa ña̱ va̱ása va̱ʼa kéʼéndó”.
5 Ka̱ʼa̱nndó xa̱ʼa̱ ña̱yóʼo chí ñuu Judá ta saátu chí ñuu Jerusalén.
Ndeéní nda̱ʼyi̱ndó ta tivindó ndiki̱ iníí ñuu.
Ndeé va̱ʼa ka̱ʼa̱nndó ña̱yóʼo:
“Ndakutáʼanndó ta ná kunuyó ku̱ʼu̱nyó ñuu ña̱ kútu̱ní ndási.
6 Kanindichindó iin poste tú koto chí Sion
ña̱ va̱ʼa kunda̱a̱-inindó ndáa yichi̱ kúú ña̱ ku̱ʼu̱nndó.
Nandukúndó nu̱ú kivi ka̱kundó ta ndakundeéndó ku̱ʼu̱nndó nda̱a̱ xa̱a̱ndó kán”,
saáchi nda̱a̱ chí norte chindaʼíi̱ iin tu̱ndóʼo kixiña nu̱úndó ta ku̱a̱ʼáníndó sandíʼi-xa̱ʼa̱ña.
7 Ta̱kán xa̱a̱ ki̱tara nda̱a̱ táki̱ʼva kíta iin ndikaʼa* tañu yitu̱n;
ta̱ sándiʼi-xa̱ʼa̱ ku̱a̱ʼá ñuu xa̱a̱ ki̱tara.
Ki̱tara nu̱ú ndíkaa̱ra ña̱ va̱ʼa sandíʼi-xa̱ʼa̱ra ñuʼún
ta ndiʼi na̱ ná kuniña yi̱ʼvínína.
Ndiʼi ñuʼún ndiʼi-xa̱ʼa̱ ndiʼiña ta nda̱a̱ ni iinna kǒo kundooka nu̱úña.
8 Xa̱ʼa̱ ña̱kán ndakundixindó ti̱ko̱to̱ ndayí,*
kusuchí-inindó* ta nda̱ʼyi̱ kóʼóndó* xa̱ʼa̱ ña̱ xóʼvi̱ndó,*
saáchi Jehová sáa̱níkavara xíʼinyó.
9 “Ki̱vi̱ kán, ta̱ rey yi̱ʼvíníra, káchi Jehová,
ta saátu na̱ níʼi yichi̱ nu̱ú na̱ ñuu;
na̱ su̱tu̱ yi̱ʼvínína ta na̱ profeta ndakanda̱ní-inina”.*
10 Tasaá ni̱ka̱ʼi̱n: “Táta káʼnu Jehová, sa̱ndáʼvivaún na̱ ñuu yóʼo ta saátu na̱ ñuu Jerusalén tá ni̱ka̱ʼún ‘Va̱ʼava kundoondó’, saáchi xa̱a̱ yatin su̱kúnvandi̱ tánii espada”.
11 Tiempo kán ka̱ʼa̱nna ña̱yóʼo xíʼin na̱ ñuu yóʼo ta saátu xíʼin na̱ ñuu Jerusalén:
“Iin ta̱chí ña̱ niʼníní keeña chí xi̱kí nu̱ú kǒo nda̱a̱ ni iin yitu̱n íyo,
ña̱ kíndo̱o chí nu̱ú ñuʼú yi̱chí ta kaniña sa̱tá ñá loʼo se̱ʼe na̱ ñui̱;
su̱ví ña̱ va̱xi ndativi ña̱ʼa kúúña ta ni su̱ví ña̱ va̱xi ndaya̱kún kúúña.
12 Ta̱chí yóʼo ndeéní va̱xiña saáchi miíi̱ kúú ta̱ chíndaʼáña.
Saáchi ka̱ʼi̱n xíʼinna ndáaña kúú ña̱ kundoʼona.
13 Ta̱kán va̱xira nda̱a̱ táki̱ʼva va̱xi vi̱kó ndáá tá kúun sa̱vi̱,
ta carretara va̱xinú nda̱a̱ táki̱ʼva va̱xi ta̱chí tá ndeéní kúun sa̱vi̱.
Kuáyi̱ sa̱na̱ra kamaníkarí nu̱ú ta̱sú.*
Ndáʼviníyó, ndiʼi-xa̱ʼa̱vayó vitin.
14 Tavá ña̱ va̱ása va̱ʼa ndíkaa̱ níma̱ún ñuu Jerusalén, ña̱ va̱ʼa ka̱kuún.
¿Nda̱a̱ amaví sandákoún ña̱ ndakanixi̱níún xa̱ʼa̱ ña̱ʼa ña̱ va̱ása va̱ʼa?
15 Saáchi nda̱a̱ chí nu̱ú ndóo na̱ tribu ta̱ Dan ke̱e iin na̱ káʼa̱n xa̱ʼa̱ ña̱ kuu
ta nda̱a̱ nu̱ú ñuʼú nu̱ú íyo yuku̱ ña̱ kúú kuenta na̱ tribu ta̱ Efraín
káʼa̱nna xa̱ʼa̱ tu̱ndóʼo ña̱ kuu.
16 Ka̱ʼa̱nndó xa̱ʼa̱ña xíʼin ndiʼi na̱ ñuu;
ka̱ʼa̱nndó ña̱ kundoʼo na̱ ñuu Jerusalén ña̱yóʼo”.
“Xíkání ke̱e na̱ va̱xi kotona̱ní* ñuu yóʼo
ta ndeéní nda̱ʼyi̱na tá ná kanitáʼanna xíʼin ñuu ña̱ íyo chí Judá.
17 Ni̱xa̱a̱na xi̱kundoona iníí sa̱tá ñuu
nda̱a̱ táki̱ʼva kéʼé na̱ ndáa nu̱ú iin ñuʼú nu̱ú chi̱ʼina,
saáchi na̱ ñuu kán va̱ása níxiinna kandíxana yi̱ʼi̱”, káchi Jehová.
18 “Miíún kúúmií ku̱a̱chi xa̱ʼa̱ ña̱ ke̱ʼún ta saátu xa̱ʼa̱ ki̱ʼva ña̱ ni̱xi̱yoún.
Yo̱ʼvi̱kaví* tu̱ndóʼo ña̱ kundoʼún,
saáchi nda̱a̱ níma̱ún xa̱a̱ña”.
19 Ndíʼi̱ní-inii̱, ndíʼi̱ní-inii̱.
Xóʼvi̱ní níma̱i̱.
Iin kánditani̱nu níma̱i̱.
Xíniñúʼu ka̱ʼa̱nvai̱ xa̱ʼa̱ ña̱yóʼo,
saáchi xa̱a̱ xi̱niso̱ʼi̱ ña̱ tívina ndiki̱,
ta ña̱yóʼo náʼa̱ña ña̱ xa̱a̱ kixáʼava ku̱a̱chi.*
20 Tuku ta tuku tu̱ndóʼo kúu,
saáchi xa̱a̱ ndi̱ʼi-xa̱ʼa̱ ndiʼi ñuu yóʼo.
Iin kama kuití ndi̱ʼi-xa̱ʼa̱ veʼe válíi̱
ta iin kama kuití ndi̱ʼi-xa̱ʼa̱ ti̱ko̱to̱ ña̱ ku̱vaʼa veʼe loʼi̱.
21 ¿Nda̱a̱ ama ndakundeíi̱ kotoi̱ poste tú ka̱nindichina?
¿Nda̱a̱ ama sandákoi̱ ña̱ kuniso̱ʼi̱ ña̱ tívina ndiki̱?
22 “Saáchi na̱ ñui̱ na̱ kíʼvíva kúúna;
ta kǒo xíínna kandíxana ña̱ káʼi̱n.
Na̱ se̱ʼi̱ yóʼo, nda̱a̱ ni loʼo ña̱ ndíchi kǒo kúúmiína ta ni va̱ása kúnda̱a̱-inina.
Xíni̱nívana ndáa ki̱ʼva keʼéna ña̱ʼa ña̱ va̱ása va̱ʼa,
soo kǒo kúnda̱a̱-inina ndáa ki̱ʼva keʼéna ña̱ va̱ʼa”.
23 Nda̱kotoi̱ nu̱ú ñuʼú yóʼo ta ki̱ʼii̱n kuenta ña̱ ndi̱ʼi-xa̱ʼa̱ ndiʼiña
ta kǒoka nda̱a̱ ni iin ña̱ʼa níkindo̱o nu̱úña.
Nda̱kotoi̱ chí ndiví ta ki̱ʼii̱n kuenta ña̱ ku̱naa nu̱úña.
24 Nda̱kotoi̱ chí yuku̱ ta ki̱ʼii̱n kuenta ña̱ kísiña,
ta kánda̱ní xi̱kí.
25 Nda̱kotoi̱ ta kǒoka nda̱a̱ ni iinna níxinii̱
ta ndiʼi kití tí íyo chí ndiví nda̱chí ndiʼirí ku̱a̱ʼa̱nrí.
26 Nda̱kotoi̱ ta ki̱ʼii̱n kuenta ña̱ iin ñuʼú yi̱chí ndu̱u ñuʼú nu̱ú chi̱ʼina,
ta ndiʼi ñuu ndi̱ʼi-xa̱ʼa̱ ndiʼiña.
Jehová kúú ta̱ ke̱ʼé ña̱yóʼo,
ke̱ʼéraña xa̱ʼa̱ ña̱ ni̱sa̱a̱níra.
27 Ña̱yóʼo kúú ña̱ káʼa̱n Jehová: “Iin ñuʼú yi̱chí ndasai̱ ñuʼú yóʼo,
soo va̱ása sandíʼi-xa̱ʼa̱ ndiʼivíi̱ña.
28 Xa̱ʼa̱ ña̱yóʼo, ñuʼú yóʼo kusuchíní-iniña,
ta kunaa chí ndiví.
Saáchi xa̱a̱ ni̱ka̱ʼi̱nña, ta xa̱a̱ saá íyo ña̱ nda̱kaxii̱n keʼíi̱,
kǒo nasamai̱ ña̱ xa̱a̱ nda̱kaxii̱n ta kǒo ndikó-inii̱ xa̱ʼa̱ña.
Na̱ yiví xi̱koose̱ʼéna* chí nu̱ú íyo ku̱ʼu̱
ta saátu chí nu̱ú íyo yu̱u̱ náʼnu.
Ndiʼi ñuu ni̱ndo̱o miíña
ta kǒoka nda̱a̱ ni iinna ndóo nu̱úña”.
30 ¿Ndáaña keʼún vitin ña̱ ndi̱ʼi-xa̱ʼa̱ ndiʼún?
Tá ya̱chi̱ xi̱ndixiún ti̱ko̱to̱ ña̱ kúáʼa ña̱ yéʼe̱ní,
xi̱xiniñúʼún ña̱ʼa ña̱ oro
ta xi̱ndakaʼyiún nduchúnu̱ún xíʼin ña̱ʼa ña̱ ndáá.*
Soo ni xi̱ndasaliviún miíún, kǒo níchindeétáʼanvíña xíʼún
saáchi ndiʼi na̱ xi̱kuni̱ní xi̱xini yóʼó kúndasína xínina yóʼó;
ta vitin kúni̱na kaʼnína yóʼó.
31 Xi̱niso̱ʼi̱ ña̱ ndeéní ndáʼyi̱ iinna, nda̱a̱ táki̱ʼva ndeéní ndáʼyi̱ iin ñaʼá ñá xóʼvi̱ní,
nda̱a̱ táki̱ʼva xóʼvi̱ iin ñaʼá ñá káku se̱ʼenu̱ú, saá xóʼvi̱na;
ñá se̱ʼe ñuu Sion ndeéní ndáʼyi̱ñá, ta nda̱a̱ kǒo kívi ndakiʼinñá ta̱chíñá.
Tá sáka̱a̱ñá ndaʼa̱ñá, káchiñá:
“Ndáʼviníi̱, ku̱naaníi̱ i̱xaa na̱ kúni̱ kaʼní yi̱ʼi̱”.