Jeremías
5 Kúáʼanndó kotondó ndiʼi calle ña̱ ñuu Jerusalén.
Koto va̱ʼandó ndiʼi lugar.
Kotondó chí nu̱ú ndákutáʼan ku̱a̱ʼá na̱ yiví,
á kivi ndani̱ʼíndó iin na̱ yiví na̱ kúni̱ keʼé ña̱ va̱ʼa,
iin na̱ kúni̱ nda̱kú koo ini,
tasaá yi̱ʼi̱ ixakáʼnu-inii̱ xa̱ʼa̱ ñuu yóʼo.
2 Ni ná ka̱ʼa̱nna “Chínaʼándi̱* xa̱ʼa̱ Jehová, Ndióxi̱ ta̱ táku”,
soo ña̱ vatáva* kúú ña̱ chinaʼána.
3 Táta Jehová, ¿á su̱ví ña̱ kúni̱ún kúú ña̱ nda̱kú ná koo inina?
Ka̱niúnna, soo kǒo nínasamana ña̱ kéʼéna.
Ni si̱lóʼo sandíʼi-xa̱ʼúnna, soo kǒo nísakúaʼana xíʼin ña̱ ndo̱ʼona.
So̱ʼoní* ni̱xi̱yona* ta va̱ása níxiinna ndikóna nu̱ún.
4 Soo saá nda̱kanixi̱níi̱: “Na̱ yiví yóʼo va̱ása xíni̱na.
Kéʼéna nda̱a̱ táki̱ʼva kéʼé na̱ kíʼví saáchi kǒo xíni̱na yichi̱ Jehová,
kǒo kúnda̱a̱-inina ña̱ ndatiin Ndióxi̱na ku̱a̱chi xíʼinna.
5 Ku̱ʼi̱n ka̱ʼi̱n xíʼin na̱ ta̱a na̱ ndáyáʼvi,
saáchi na̱yóʼo xi̱niñúʼu kundiku̱nvana yichi̱ Jehová,
chi xi̱kunda̱a̱-inina ña̱ ndatiin Ndióxi̱na ku̱a̱chi xíʼinna.
6 Xa̱ʼa̱ ña̱yóʼo, iin ndikaʼa* kítarí chí yuku̱ ta xáʼnírína,
iin tí lobo tí íyo nu̱ú yoso̱ yi̱chí kítarí ta sákuachi ndiʼirína,
iin tí leopardo ndítorí ndáturína chí yéʼé ñuu.
Ndiʼi na̱ kée ñuu kán, sákuachi ndiʼirína.
Saáchi ku̱a̱ʼání ku̱a̱chi ni̱ki̱ʼvina;
ku̱a̱ʼání yichi̱ va̱ása nda̱kú níxi̱yo inina.
7 ¿Ndáa ki̱ʼva ixakáʼnu-inii̱ xa̱ʼún xa̱ʼa̱ ña̱ ke̱ʼún ña̱yóʼo?
Na̱ se̱ʼún sa̱ndákoona yi̱ʼi̱
ta chi̱naʼána xa̱ʼa̱ na̱ su̱ví ndixa kúú Ndióxi̱.
Ta̱xii̱ ndiʼi ña̱ xi̱xiniñúʼuna ta kǒo ni iin ña̱ʼa níxi̱kuma̱ní nu̱úna,
soo na̱yóʼo va̱ása nísandákoona ña̱ ku̱su̱nna xíʼin na̱ kǒo nítindaʼa̱ xíʼinna
ta iin tiʼvi kítáʼanna ni̱xa̱ʼa̱nna veʼe ñaʼá ñá kísi̱ xíʼin ku̱a̱ʼání ta̱a.
8 Íyona nda̱a̱ táki̱ʼva íyo kuáyi̱ tí kúni̱ní ku̱i̱n;
iin tá iinna iin ndáʼyi̱ kóʼóna* xíkana xa̱ʼa̱ ñá síʼi inka ta̱a.
9 “¿Á va̱ása xíniñúʼu ndatii̱n ku̱a̱chi xíʼinndó xa̱ʼa̱ ña̱yóʼo?”, káchi Jehová.
“¿Á va̱ása xíniñúʼu ndatii̱n ku̱a̱chi xíʼin iin ñuu káʼnu xa̱ʼa̱ ña̱yóʼo?”.
10 “Kúáʼanndó chí nu̱ú íyo tú uva ñuu Jerusalén ta sandíʼi-xa̱ʼa̱ndónú,
soo kǒo sandíʼi-xa̱ʼa̱ va̱ʼandónú.
Kaʼndandó ndaʼa̱nú ña̱ va̱xi kána,
saáchi su̱ví kuenta Jehová kúúña.
11 Saáchi na̱ ñuu Israel xíʼin na̱ ñuu Judá
sa̱ndáʼvina yi̱ʼi̱”, káchi Jehová.
12 “Kǒo níxiinna kandíxana ña̱ ni̱ka̱ʼa̱n Jehová ta xíkana káʼa̱nna:
‘Kǒo ña̱ keʼévíra xíʼinyó.*
Va̱ása kixiví nda̱a̱ ni iin tu̱ndóʼo nu̱úyó;
va̱ása kuniyó ku̱a̱chi ni so̱ko’.
13 Ña̱ káʼa̱n na̱ profeta va̱ása ndáyáʼviña,
ta kǒo tu̱ʼun Ndióxi̱ kúúmiína.
Na̱ ndiʼi-xa̱ʼa̱va kúúna, nda̱a̱ táki̱ʼva íyo tu̱ʼun ña̱ káʼa̱nna saá koona”.
14 Ña̱kán ña̱yóʼo kúú ña̱ káʼa̱n Jehová, Ndióxi̱ ta̱ xáʼndachíñu nu̱ú na̱ ángel:
“Xa̱ʼa̱ ña̱ káʼa̱n na̱ ta̱a yóʼo saá,
taxii̱ ña̱ nda̱a̱ táki̱ʼva íyo ñuʼu̱ saá ná koo tu̱ʼi̱n yuʼún,
ta na̱ ñuu yóʼo koona nda̱a̱ táki̱ʼva íyo titu̱n,
ta ñuʼu̱ yóʼo kaʼmi ndiʼiñana”.
15 “Na̱ ñuu na̱ chindaʼíi̱ ña̱ xa̱a̱na kanitáʼanna xíʼin ndóʼó na̱ israelita, xíkání keena”, káchi Jehová.
“Ñuu yóʼo xa̱a̱ ku̱a̱ʼání tiempo íyoña.
Iin ñuu ña̱ yatání kúúña,
tu̱ʼun ña̱ káʼa̱n na̱ ñuu yóʼo va̱ása xíni̱únña,
ña̱kán tá káʼa̱nna kǒo kúnda̱a̱-iniún.
16 Na̱yóʼo xa̱ʼnína ku̱a̱ʼání na̱ yiví xíʼin flechana;
ndiʼi na̱yóʼo xíni̱nína kakana nu̱ú ku̱a̱chi.
17 Ndakiʼinna ndiʼi ña̱ chi̱ʼún ta saátu si̱ta̱váʼún.
Kaʼnína se̱ʼeta̱ún xíʼin se̱ʼe-síʼún.
Kaʼnína kití sa̱na̱ún xíʼin si̱ndi̱ki̱ sa̱na̱ún.
Sandíʼi-xa̱ʼa̱na tú uva tú kúúmiíún ta saátu tú higo.
Xíʼin espada kaʼnína na̱ yiví na̱ ndóo ñuu ña̱ kútu̱ní ndási ña̱ xi̱ndaa-iniún”.
18 “Soo ni tá ná kixaa̱ ki̱vi̱ ña̱ kuu ña̱yóʼo, káchi Jehová, kǒo sandíʼi-xa̱ʼa̱ va̱ʼavíi̱ ndóʼó. 19 Tá ná nda̱ka̱tu̱ʼunna ‘¿Nda̱chun ke̱ʼé Jehová Ndióxi̱ndi̱ ndiʼi ña̱yóʼo xíʼinndi̱?’, xíniñúʼu ka̱ʼún xíʼinna ‘Nda̱a̱ táki̱ʼva sa̱ndákoondó yi̱ʼi̱ ña̱ va̱ʼa ndasakáʼnundó ndióxi̱ na̱ inka ñuu tá xi̱ndoondó nu̱ú ñuʼú miíndó, saátu kachíñundó nu̱ú na̱ inka ñuu tá ná kundoondó nu̱ú iin ñuʼú ña̱ va̱ása kúú kuentandó’”.
20 Ka̱ʼa̱nndó xa̱ʼa̱ ña̱yóʼo xíʼin na̱ se̱ʼe ta̱ Jacob
ta natúʼunndó xa̱ʼa̱ña chí Judá. Ka̱ʼa̱nndó ña̱yóʼo:
21 “Kuniso̱ʼondó ña̱yóʼo, ndóʼó na̱ ñuu kíʼví, na̱ va̱ása ndíchi,*
íyo nduchúnu̱úndó soo va̱ása xítondó,
íyo so̱ʼondó soo va̱ása xíniso̱ʼondó.
22 ‘¿Á va̱ása yíʼvindó xínindó yi̱ʼi̱?’, káchi Jehová.
‘¿Á kǒo xíniñúʼu yi̱ʼvíndó kunindó yi̱ʼi̱ ta nda̱a̱ kisindó nu̱úi̱?
Yi̱ʼi̱ kúú ta̱ ta̱xi ña̱ ná koo yu̱ti yuʼú tá mar ña̱ va̱ʼa kasiñará,
ta ña̱yóʼo íyoña nda̱a̱ táki̱ʼva íyo iin ley,
ta tá mar va̱ása kívi ya̱ʼandosóráña.
Ni ndeéní ná kanda̱ nu̱úrá, va̱ása kivi keerá;
ni ndeéní ná ni̱ʼirá, kǒo kivi ku̱ʼu̱n xíkárá.
23 Soo níma̱ na̱ ñuu yóʼo téʼéníña* ta va̱ása xíínna kuniso̱ʼona;
ku̱xíkána ta ki̱xáʼana kéʼéna ña̱ kúni̱ miína.
24 Ta kǒo ndákanixi̱nína:
“Vitin ná yi̱ʼvíyó kuniyó* Jehová Ndióxi̱yó,
ta̱ táxi ña̱ ná kuun sa̱vi̱ mií tiempo ña̱ xíniñúʼu kuunrá,
sa̱vi̱ tá nu̱ú xíʼin sa̱vi̱ tá kuee,
ta̱ táxi ña̱ ná sakéeyó* mií tiempo ña̱ xíniñúʼu keʼéyóña”.
25 Xa̱ʼa̱ ña̱ ke̱ʼéndó ña̱ va̱ása va̱ʼa kúú ña̱ kǒo kívi ndakiʼinndó ña̱yóʼo,
ta ku̱a̱chi ña̱ ni̱ki̱ʼvindó sa̱siña nu̱úndó ña̱ ndakiʼinndó ña̱ va̱ʼa.
26 Saáchi tañu na̱ ñui̱ íyo na̱ ta̱a na̱ ndi̱va̱ʼaní-ini.
Ñúʼu-se̱ʼéna xítona̱nína* nda̱a̱ táki̱ʼva kéʼé na̱ ku̱a̱ʼa̱n tiin saa.
Chíndúʼúna iin trampa ña̱ ndeéní.
Na̱ yiví kúú na̱ tíinna.
27 Veʼena chútúña xíʼin ña̱ vatá,
íyoña nda̱a̱ táki̱ʼva íyo iin jaula nu̱ú ñúʼu ku̱a̱ʼání saa.
Xa̱ʼa̱ ña̱kán kúú ña̱ ndu̱kúikána ta ndu̱ndakúna.
28 Ndu̱nduʼúna ta liviní náʼa̱ ku̱ñuna;
ku̱a̱ʼání ña̱ va̱ása va̱ʼa kéʼéna.
Kǒo chíndeétáʼanna xíʼin na̱ ni̱xi̱ʼi̱ yivá,
chi ña̱ kúni̱na kúú ña̱ va̱ʼa kundoo miína,
ta va̱ása vií ndátiinna ku̱a̱chi xíʼin na̱ nda̱ʼví’”.
29 “¿Á va̱ása xíniñúʼu ndatii̱n ku̱a̱chi xíʼinndó xa̱ʼa̱ ña̱yóʼo?”, káchi Jehová.
“¿Á va̱ása xíniñúʼu ndatii̱n ku̱a̱chi xíʼin iin ñuu káʼnu xa̱ʼa̱ ña̱yóʼo?
30 Ñuu yóʼo ku̱u iin ña̱ʼa ña̱ kininí ta nda̱a̱ yíʼvina xíʼinña:
31 na̱ profeta káʼa̱nna ña̱ vatá*
ta na̱ su̱tu̱ xíniñúʼuna ndee̱ ña̱ kúúmiína ña̱ kaʼndachíñuna nu̱ú inkana.
Ta na̱ ñui̱ kútóonína ña̱yóʼo.
¿Soo ndáaña keʼéndó tá ná kixaa̱ ki̱vi̱ ña̱ ndiʼi-xa̱ʼa̱ndó?”.