Jeremías

41 Tá yo̱o̱ u̱xa̱, ta̱ Ismael se̱ʼe ta̱ Netanías, se̱ʼe ta̱ Elisamá, ta̱ ki̱xi ti̱xin na̱ veʼe ta̱ rey xíʼin iin ta̱a ta̱ xi̱kitáʼan xíʼin na̱ ta̱a na̱ xi̱kuumií chiñu ña̱ ndáyáʼvi nu̱ú ta̱ rey, ni̱xa̱a̱na xíʼin u̱xu̱ na̱ ta̱a ña̱ kotona ta̱ Guedalías se̱ʼe ta̱ Ahicam chí Mizpá. Tá ndóona xíxina chí Mizpá, 2 ta̱ Ismael se̱ʼe ta̱ Netanías xíʼin u̱xu̱ saá na̱ ta̱a na̱ xi̱kitáʼan xíʼinra nda̱kunditana ta xa̱ʼnína ta̱ Guedalías se̱ʼe ta̱ Ahicam, se̱ʼe ta̱ Safán xíʼin espada. Saá kúú ña̱ xa̱ʼnína ta̱ nda̱kaxin ta̱ rey ñuu Babilonia ña̱ kiʼinra kuenta xíʼin país kán. 3 Ta ta̱ Ismael xa̱ʼnítura ndiʼi na̱ judío na̱ xi̱ndoo xíʼin ta̱ Guedalías chí Mizpá ta saátu xa̱ʼníra ndiʼi na̱ soldado caldeo na̱ xi̱ndoo kán.

4 Tá xa̱a̱ ni̱ya̱ʼa iin ki̱vi̱* ña̱ xa̱ʼnína ta̱ Guedalías, tá kúma̱níka kunda̱a̱-ini inkana ña̱ xa̱ʼnína ta̱yóʼo, 5 ni̱xa̱a̱ 80 na̱ ta̱a na̱ ke̱e chí Siquem, chí Siló xíʼin Samaria. Ni̱ta̱ʼnda̱ ixí* yuʼúna, ni̱nda̱ta̱ ti̱ko̱to̱na ta xa̱ʼndana ku̱ñuna ta níʼina olíbano xíʼin harina ña̱ ku̱ʼu̱nna ndakana veʼe Jehová. 6 Tasaá, ta̱ Ismael se̱ʼe ta̱ Netanías ki̱tara chí Mizpá ta xákura ku̱a̱ʼa̱nra ndakutáʼanra xíʼinna. Tá ni̱xa̱a̱ra nu̱úna, ni̱ka̱ʼa̱nra xíʼinna: “Naʼandó kotondó ta̱ Guedalías se̱ʼe ta̱ Ahicam”. 7 Soo tá ni̱ki̱ʼvina chí ñuu, ta̱ Ismael se̱ʼe ta̱ Netanías xíʼin na̱ ta̱a na̱ kítáʼan xíʼinra xa̱ʼnínana ta xa̱tanana ini iin cisterna.

8 Soo u̱xu̱ na̱ ta̱a yóʼo ni̱ka̱ʼa̱nna xíʼin ta̱ Ismael: “Va̱ása kaʼníún ndi̱ʼi̱ saáchi chí yuku̱ ta̱ánse̱ʼéndi̱ trigo, cebada, aceite xíʼin ñu̱ñú”. Xa̱ʼa̱ ña̱kán kǒo níxaʼnírana xíʼin na̱ ñanina. 9 Ta̱ Ismael xa̱tara ndiʼi na̱ ta̱a na̱ xa̱ʼníra ini iin cisterna ña̱ káʼnuní, ña̱ i̱xava̱ʼa ta̱ rey Asá tá ka̱nitáʼanra xíʼin ta̱ rey Baasá ta̱ ñuu Israel. Ini cisterna yóʼo kúú nu̱ú ta̱án ta̱ Ismael se̱ʼe ta̱ Netanías ndiʼi na̱ ta̱a na̱ xa̱ʼníra.

10 Ta̱ Ismael nda̱kiʼinra ndiʼi na̱ yiví na̱ ñuu Mizpá ku̱a̱ʼa̱n xíʼinra saátu ná se̱ʼe-síʼi ta̱ rey xíʼin ndiʼika na̱ yiví na̱ ki̱ndoo chí Mizpá. Na̱yóʼo xi̱kuu na̱ xi̱kiʼin ta̱ Guedalías se̱ʼe ta̱ Ahicam kuenta xíʼin, saáchi ta̱ Nebuzaradán ta̱ níʼi yichi̱ nu̱ú na̱ soldado ta̱ rey ni̱ka̱ʼa̱nra xíʼinra ña̱ ná kiʼinra kuenta xíʼinna. Ta̱ Ismael se̱ʼe ta̱ Netanías nda̱kiʼinra na̱yóʼo ku̱a̱ʼa̱n xíʼinra, tasaá nda̱kiʼinna ku̱a̱ʼa̱nna chí nu̱ú ñuʼú na̱ ammonita.

11 Tá ku̱ndaa̱-ini ta̱ Johanán se̱ʼe ta̱ Caréah xíʼin ndiʼi na̱ níʼi yichi̱ nu̱ú na̱ soldado na̱ xi̱kitáʼan xíʼinra ña̱ kininí íyo ña̱ ke̱ʼé ta̱ Ismael se̱ʼe ta̱ Netanías, 12 ni̱xa̱ʼa̱nna xíʼin ndiʼi na̱ ta̱a na̱ kítáʼan xíʼinna ña̱ kanitáʼanna xíʼin ta̱ Ismael se̱ʼe ta̱ Netanías, ta nda̱ni̱ʼínara chí nu̱ú ñúʼu ku̱a̱ʼání ti̱kui̱í* chí Gabaón.

13 Ndiʼi na̱ yiví na̱ ku̱a̱ʼa̱n xíʼin ta̱ Ismael ni̱kusi̱íní-inina tá xi̱nina ta̱ Johanán se̱ʼe ta̱ Caréah ta saátu ndiʼi na̱ níʼi yichi̱ nu̱ú na̱ soldado na̱ ku̱a̱ʼa̱n xíʼinra. 14 Tasaá ndiʼi na̱ yiví na̱ ñuu Mizpá na̱ nda̱kiʼin ta̱ Ismael ku̱a̱ʼa̱n xíʼinra, ndi̱kóna ta nda̱kutáʼanna xíʼin ta̱ Johanán se̱ʼe ta̱ Caréah. 15 Soo ta̱ Ismael se̱ʼe ta̱ Netanías xíʼin u̱na̱ na̱ ta̱a na̱ xi̱kitáʼan xíʼinra ku̱chiñuna xi̱nuna nu̱ú ta̱ Johanán, ta nda̱kiʼinna ku̱a̱ʼa̱nna chí nu̱ú ñuʼú na̱ ammonita.

16 Ta̱ Johanán se̱ʼe ta̱ Caréah xíʼin ndiʼi na̱ xi̱niʼi yichi̱ nu̱ú na̱ soldado na̱ xi̱kitáʼan xíʼinra, nda̱kiʼinna ndiʼi na̱ yiví ñuu Mizpá na̱ ku̱chiñuna sa̱kǎkuna, saáchi na̱yóʼo kúú na̱ nda̱kiʼin ta̱ Ismael se̱ʼe ta̱ Netanías ku̱a̱ʼa̱n xíʼinra tándi̱ʼi xa̱ʼníra ta̱ Guedalías se̱ʼe ta̱ Ahicam. Nda̱kiʼinna na̱ ta̱a, na̱ soldado, ná ñaʼá, na̱ va̱lí xíʼin na̱ xi̱kuumií chiñu ña̱ ndáyáʼvi chí Gabaón ku̱a̱ʼa̱n xíʼinna. 17 Tasaá ni̱xa̱a̱na ta xi̱kundoona veʼe ña̱ xi̱kuumií ta̱ Kimham, nu̱ú kíndo̱o na̱ va̱xi inka ñuu, ña̱ ni̱xi̱yo yatin Belén, saáchi ña̱ xi̱kuni̱na kúú ña̱ ku̱ʼu̱nna nda̱a̱ xa̱a̱na chí Egipto, 18 chi xi̱yiʼvína nu̱ú na̱ caldeo. Saáchi ta̱ Ismael se̱ʼe ta̱ Netanías xa̱ʼníra ta̱ Guedalías se̱ʼe ta̱ Ahicam ta̱ nda̱kaxin ta̱ rey ñuu Babilonia ña̱ kiʼinra kuenta xíʼin país kán.