Jeremías

42 Tasaá ndiʼi na̱ níʼi yichi̱ nu̱ú na̱ soldado, ta̱ Johanán se̱ʼe ta̱ Caréah, ta̱ Jezanías se̱ʼe ta̱ Hosaya xíʼin ndiʼi na̱ yiví, nda̱a̱ na̱ va̱lí iinsaá nda̱a̱ na̱ chée, ku̱yatinna 2 nu̱ú ta̱ profeta Jeremías ta ni̱ka̱ʼa̱nna xíʼinra: “Ixaún ña̱ ma̱ní, kuniso̱ʼo ña̱ káʼa̱n-ndáʼvindi̱ xíʼún. Ka̱ʼa̱n xíʼin Jehová Ndióxi̱yó xa̱ʼa̱ndi̱ ta saátu xa̱ʼa̱ ndiʼika na̱ kíndo̱o, saáchi nda̱a̱ táki̱ʼva xítoún ku̱a̱ʼákava xi̱kuundi̱ soo vitin ndáa loʼova kúúndi̱ kíndo̱o. 3 Ta Jehová Ndióxi̱yó ná ka̱ʼa̱nra xíʼinndi̱ ndáa yichi̱ kúú ña̱ ku̱ʼu̱nndi̱ ta ndáaña keʼéndi̱”.

4 Ta̱ profeta Jeremías ni̱ka̱ʼa̱nra xíʼinna: “Va̱ʼava. Ka̱ʼi̱n xíʼin Jehová Ndióxi̱yó xa̱ʼa̱ndó, nda̱a̱ táki̱ʼva ni̱ka̱ʼa̱nndó xíʼi̱n, tasaá natúʼi̱n xíʼinndó xa̱ʼa̱ ndiʼi ña̱ ná ka̱ʼa̱n Jehová. Kǒo kasi yuʼíi̱ xa̱ʼa̱ nda̱a̱ ni iin tu̱ʼun”.

5 Ta na̱kán nda̱kuiinna yuʼú ta̱ Jeremías: “Mií Jehová ná koo testigo ta̱ káʼa̱n ña̱ nda̱a̱ ta ná taxira castigo ndaʼa̱ndi̱ tá ná kǒo saxínundi̱ ndiʼi ña̱ ná ka̱ʼa̱n Jehová Ndióxi̱yó xíʼún ka̱ʼún xíʼinndi̱. 6 Ni kúúña ña̱ va̱ʼa á ña̱ va̱ása va̱ʼa, soo ndi̱ʼi̱ kuniso̱ʼovandi̱ ña̱ ná ka̱ʼa̱n Jehová Ndióxi̱yó, ta̱ chíndaʼándi̱ yóʼó ku̱ʼún ka̱ʼún xíʼin. Tasaá ndakiʼinndi̱ ña̱ va̱ʼa tá ná kuniso̱ʼondi̱ ña̱ káʼa̱n Jehová Ndióxi̱yó”.

7 Tá ni̱ya̱ʼa u̱xu̱ ki̱vi̱, saá nda̱kuiin Jehová yuʼú ta̱ Jeremías. 8 Ña̱kán ka̱nara ta̱ Johanán se̱ʼe ta̱ Caréah, ndiʼi na̱ níʼi yichi̱ nu̱ú na̱ soldado na̱ xi̱kitáʼan xíʼinra ta saátu ndiʼika na̱ yiví, nda̱a̱ na̱ va̱lí iinsaá nda̱a̱ na̱ chée. 9 Ta ni̱ka̱ʼa̱nra xíʼinna: “Ña̱yóʼo kúú ña̱ káʼa̱n Jehová Ndióxi̱ na̱ ñuu Israel, ta̱ chi̱ndaʼándó yi̱ʼi̱ nu̱ú ña̱ va̱ʼa ku̱ʼi̱n ka̱ʼi̱n xíʼinra xa̱ʼa̱ ña̱ ni̱ka̱ʼa̱n-ndáʼvindó xíʼi̱n: 10 ‘Tá ndóʼó ná kindo̱ondó país yóʼo, yi̱ʼi̱ sandáʼi̱ ndóʼó ta va̱ása sandúvai̱ ndóʼó, chiʼii̱ ndóʼó ta kǒo tuʼi̱n ndóʼó, saáchi kusuchí-inii̱ xa̱ʼa̱ ña̱ chi̱ndaʼíi̱ tu̱ndóʼo nu̱úndó. 11 Va̱ása yi̱ʼvíndó nu̱ú ta̱ rey ñuu Babilonia, ta̱ yíʼviníndó xínindó’.

”‘Va̱ása yi̱ʼvíndó kunindóra, káchi Jehová, saáchi yi̱ʼi̱ íyoi̱ xíʼinndó ña̱ sakǎkui̱ ndóʼó ta ndatavái̱ ndóʼó ndaʼa̱ra. 12 Na̱ʼi̱ ña̱ kúndáʼvi-inii̱ xínii̱ ndóʼó ta ta̱kán kundáʼvi-inira kunira ndóʼó ta taxira ña̱ ná ndikóndó país nu̱ú ke̱endó.

13 ”’Soo tá ndóʼó ná ka̱ʼa̱nndó “Va̱ása kindo̱ondi̱ país yóʼo” ta kǒo xíínndó kuniso̱ʼondó ña̱ káʼa̱n Jehová Ndióxi̱ndó 14 ta káchindó “Nu̱úka ña̱yóʼo, ku̱ʼu̱nndi̱ chí nu̱ú ñuʼú ña̱ íyo chí Egipto, nu̱ú va̱ása kunindi̱ ku̱a̱chi, ni kǒo kuniso̱ʼondi̱ ña̱ tívina ndiki̱ ta ni va̱ása koo so̱ko nu̱úndi̱; kán kúú nu̱ú kundoondi̱”, 15 tá saá ná keʼéndó, kuniso̱ʼondó ña̱ káʼa̱n Jehová, ndóʼó na̱ ñuu Judá na̱ kíndo̱o. Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Tá ndóʼó ndáka̱xinndó ña̱ ku̱ʼu̱nndó chí ñuu Egipto, ta ku̱a̱ʼa̱nndó kundoondó kán,* 16 espada ña̱ yíʼviníndó xínindó kundiku̱nña ku̱ʼu̱nña sa̱tándó nda̱a̱ nu̱ú ñuʼú ña̱ íyo chí Egipto ta saátu so̱ko ña̱ yíʼviníndó nu̱ú kundiku̱nña ku̱ʼu̱nña sa̱tándó, ta kán kuvindó. 17 Ta ndiʼi na̱ ta̱a na̱ chi̱kaa̱-ini ña̱ ku̱ʼu̱nna kundoona chí ñuu Egipto kuvina xíʼin espada, so̱ko xíʼin kue̱ʼe̱. Ta nda̱a̱ ni iinna va̱ása ka̱ku nu̱ú tu̱ndóʼo ña̱ chindaʼíi̱ nu̱úna”’.

18 ”Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Nda̱a̱ táki̱ʼva chi̱ndaʼíi̱ tu̱ndóʼo nu̱ú ndiʼi na̱ xi̱ndoo chí ñuu Jerusalén xa̱ʼa̱ ña̱ ni̱sa̱a̱níi̱, saátu chindaʼíi̱ tu̱ndóʼo nu̱úndó tá ná ku̱ʼu̱nndó chí Egipto. Ta ndiʼi na̱ ná kunda̱a̱-ini xa̱ʼa̱ ña̱yóʼo sakúisochiʼñana* ndóʼó, kundasína kunina ndóʼó, kusi̱kindaana ndóʼó, ku̱a̱ku̱ndaana ndóʼó ta kǒo ndikókandó kunindó ñuu yóʼo’.

19 ”Jehová xa̱a̱ ni̱ka̱ʼa̱nvara xíʼin ndóʼó na̱ ñuu Judá na̱ kíndo̱o ndáaña kundoʼondó. Va̱ása ku̱ʼu̱nndó chí Egipto. Kǒo nandóso-inindó xa̱ʼa̱ ña̱ ni̱ka̱ʼi̱n xíʼinndó vitin 20 ña̱ kuvivandó tá ná keʼéndó ña̱ va̱ása va̱ʼa. Saáchi ndóʼó chi̱ndaʼándó yi̱ʼi̱ ña̱ nda̱ka̱tu̱ʼíi̱n Jehová Ndióxi̱yó, ta ña̱yóʼo ni̱ka̱ʼa̱nndó xíʼi̱n: ‘Ka̱ʼa̱n xíʼin Jehová Ndióxi̱yó xa̱ʼa̱ndi̱ ta ka̱ʼún xíʼinndi̱ xa̱ʼa̱ ndiʼi ña̱ ná ka̱ʼa̱n Jehová Ndióxi̱yó xíʼún, ta ndi̱ʼi̱ keʼévandi̱ña’. 21 Ta vitin ni̱ka̱ʼi̱n xíʼinndó xa̱ʼa̱ ña̱yóʼo, soo ndóʼó kǒo kandíxavíndó ña̱ ni̱ka̱ʼa̱n Jehová Ndióxi̱yó ta ni va̱ása keʼéndó ndiʼi ña̱ ni̱ka̱ʼa̱nra xíʼi̱n ka̱ʼi̱n xíʼinndó. 22 Xa̱ʼa̱ ña̱kán, káxi va̱ʼa kunda̱a̱-inindó chi kuvivandó xíʼin espada, so̱ko xíʼin kue̱ʼe̱ chí ñuu nu̱ú kúni̱ndó ku̱ʼu̱nndó kundoondó”.