Jeremías

43 Tá sa̱ndiʼi ta̱ Jeremías ni̱ka̱ʼa̱nra xíʼin ndiʼi na̱ yiví xa̱ʼa̱ ña̱ ni̱ka̱ʼa̱n Jehová Ndióxi̱na (iin tá iin tu̱ʼun ña̱ ni̱ka̱ʼa̱n Jehová Ndióxi̱na xíʼinra ña̱ ka̱ʼa̱nra xíʼinna), 2 ta̱ Azarías se̱ʼe ta̱ Hosaya, ta̱ Johanán se̱ʼe ta̱ Caréah xíʼin ndiʼika na̱ ta̱a na̱ ni̱nuní xi̱kuni ni̱ka̱ʼa̱nna xíʼin ta̱ Jeremías: “Ña̱ vatáva* kúú ña̱ káʼún. Jehová Ndióxi̱yó kǒo níka̱ʼa̱nra xíʼún ña̱ ka̱ʼún, ‘Va̱ása ku̱ʼu̱nndó kundoondó chí Egipto’. 3 Saáchi ta̱ Baruc se̱ʼe ta̱ Nerías kúú ta̱ kúni̱ ña̱ ná ndakiʼin na̱ caldeo ndi̱ʼi̱ ta kaʼnína ndi̱ʼi̱ á ndakiʼinna ndi̱ʼi̱ ku̱ʼu̱n xíʼinna chí ñuu Babilonia”.

4 Ña̱kán ta̱ Johanán se̱ʼe ta̱ Caréah, ndiʼi na̱ níʼi yichi̱ nu̱ú na̱ soldado ta saátu ndiʼi na̱ yiví kǒo níxiinna kuniso̱ʼona ña̱ ni̱ka̱ʼa̱n Jehová ta va̱ása níkindo̱ona kundoona chí nu̱ú ñuʼú ña̱ íyo chí Judá. 5 Nu̱úka ña̱yóʼo, ta̱ Johanán se̱ʼe ta̱ Caréah xíʼin na̱ níʼi yichi̱ nu̱ú na̱ soldado nda̱kiʼinna ndiʼi na̱ yiví na̱ xi̱kindo̱o chí ñuu Judá ku̱a̱ʼa̱n xíʼinna, na̱ ni̱xa̱ʼa̱n xi̱ndoo inkaka ñuu ta ndi̱kóna nda̱kundoona chí Judá. 6 Nda̱kiʼinna na̱ ta̱a, ná ñaʼá, na̱ va̱lí, ná se̱ʼe-síʼi ta̱ rey xíʼin ndiʼika na̱ yiví na̱ sa̱ndákoo ta̱ Nebuzaradán ndaʼa̱ ta̱ Guedalías se̱ʼe ta̱ Ahicam, se̱ʼe ta̱ Safán, ña̱ kiʼinra kuenta xíʼinna, ta saátu nda̱kiʼinna ta̱ profeta Jeremías xíʼin ta̱ Baruc se̱ʼe ta̱ Nerías ku̱a̱ʼa̱n xíʼinna. 7 Ni̱ki̱ʼvina chí nu̱ú ñuʼú ña̱ íyo chí Egipto saáchi kǒo níkandíxana ña̱ ni̱ka̱ʼa̱n Jehová ta ni̱xa̱a̱na nda̱a̱ chí Tahpanhés.

8 Tá xa̱a̱ ni̱xa̱a̱na chí Tahpanhés, Jehová ni̱ka̱ʼa̱nra ña̱yóʼo xíʼin ta̱ Jeremías: 9 “Kiʼin sava yu̱u̱ ña̱ náʼnu ta ndakasiún sa̱táña xíʼin ña̱ʼa ña̱ íyo nda̱a̱ táki̱ʼva íyo cemento chí nu̱ú ñuʼú nu̱ú chi̱ndoona ndo̱ʼo yéʼé ta̱ faraón chí Tahpanhés, ta ná kuni ndiʼi na̱ ta̱a ñuu Judá keʼún ña̱yóʼo. 10 Tándi̱ʼi ka̱ʼún xíʼinna: ‘Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Kanai̱ ta̱ rey Nabucodonosor* ta̱ ñuu Babilonia, ta̱ káchíñu nu̱úi̱, ta sa̱tá yu̱u̱ yóʼo kanindichii̱ tronora ta ta̱kán kanindichira veʼe loʼora sa̱tá yu̱u̱ yóʼo. 11 Ta̱kán kixira ta kanitáʼanra xíʼin na̱ ndóo chí nu̱ú ñuʼú ña̱ íyo chí Egipto. Savana kuvina xíʼin kue̱ʼe̱ ña̱ ndeéní. Savana ndakiʼinnana ku̱ʼu̱n xíʼinna inka ñuu. Ta savana kuvina xíʼin espada. 12 Ta yi̱ʼi̱ kaʼmii̱ templo ndióxi̱ na̱ ñuu Egipto; ta̱kán kaʼmirana ta ndakiʼinrana ku̱ʼu̱n xíʼinra. Nda̱a̱ táki̱ʼva ndákasi iin ta̱ pastor miíra xíʼin iin ti̱ko̱to̱ saá ndakasira miíra xíʼin ñuʼú ña̱ íyo chí Egipto, ta kǒo nda̱a̱ ni iin ña̱ kundoʼora tá ná ku̱ʼu̱nra. 13 Ta sakúachi válíra nama̱* ña̱ íyo chí Bet-Semes* ña̱ kíndo̱o chí nu̱ú ñuʼú ña̱ ñuu Egipto ta kaʼmira templo ndióxi̱ na̱ ñuu Egipto”’”.