Jeremías

44 Ndióxi̱ ni̱ka̱ʼa̱nra ña̱yóʼo xíʼin ta̱ Jeremías xa̱ʼa̱ ndiʼi na̱ judío na̱ xi̱ndoo chí Egipto, na̱ xi̱ndoo chí Migdol, chí Tahpanhés, chí Nof ta saátu chí nu̱ú ñuʼú ña̱ Patrós: 2 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Ndóʼó xi̱nindó ndiʼi tu̱ndóʼo ña̱ chi̱ndaʼíi̱ nu̱ú ñuu Jerusalén ta saátu nu̱ú ndiʼi ñuu ña̱ íyo chí Judá, ta vitin ndi̱ʼi-xa̱ʼa̱ña ta kǒoka na̱ ndóo nu̱úña. 3 Ña̱yóʼo ku̱uña xa̱ʼa̱ ña̱ʼa ña̱ va̱ása va̱ʼa ke̱ʼéndó chi sa̱sáa̱ndó yi̱ʼi̱ xa̱ʼa̱ ña̱ ni̱so̱kóndó ña̱ʼa nu̱ú* inkaka ndióxi̱, ta xi̱ndasakáʼnundó inkaka ndióxi̱ ña̱ kǒo níxi̱xini̱ndó ni na̱ táʼanndó na̱ xi̱ndoo xi̱naʼá. 4 Yi̱ʼi̱ tuku ta tuku xi̱chindaʼíi̱ ndiʼi na̱ profeta na̱ xi̱kachíñu nu̱úi̱ ña̱ ku̱ʼu̱nna ka̱ʼa̱nna xíʼinndó: “Ixandó ña̱ ma̱ní, kǒo keʼéndó ña̱ʼa ña̱ kininí ña̱ sáa̱-inii̱ xínii̱”. 5 Soo ndóʼó va̱ása níxiniso̱ʼondó, kǒo níkandíxandó ta ni kǒo nísandákoondó ña̱ keʼéndó ña̱ʼa ña̱ va̱ása va̱ʼa; saáchi nda̱kundeévandó ni̱so̱kóndó ña̱ʼa nu̱ú inkaka ndióxi̱. 6 Xa̱ʼa̱ ña̱kán ni̱sa̱a̱níi̱ xíʼinndó ta ta̱xii̱ castigo ndaʼa̱ ñuu ña̱ íyo chí Judá ta saátu chí Jerusalén, ña̱kán ndi̱ʼi-xa̱ʼa̱ña ta ki̱ndoo miíña nda̱a̱ táki̱ʼva íyoña vitin’.

7 ”Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘¿Nda̱chun ndúkú miíndó iin tu̱ndóʼo ña̱ kundoʼondó tasaá kuvi ndiʼi na̱ ta̱a, ná ñaʼá, na̱ va̱lí ta saátu na̱ lée válí na̱ ñuu Judá ta nda̱a̱ ni iinkandó va̱ása kindo̱o? 8 ¿Nda̱chun sása̱a̱ndó yi̱ʼi̱ xíʼin ña̱ʼa ña̱ i̱xava̱ʼandó xíʼin ndaʼa̱ndó ta sóko̱ndó ña̱ʼa nu̱ú inkaka ndióxi̱ chí Egipto, nu̱ú ni̱xa̱a̱ndó ndóondó? Ndóʼó kuvivandó ta ndiʼi na̱ ñuu na̱ íyo nu̱ú ñuʼú yóʼo na̱ ná kunda̱a̱-ini xa̱ʼa̱ ña̱yóʼo sakúisochiʼñana* ndóʼó ta kusi̱kindaana ndóʼó. 9 ¿Á xa̱a̱ na̱ndósova-inindó xa̱ʼa̱ ndiʼi ña̱ʼa ña̱ va̱ása va̱ʼa ña̱ ke̱ʼé na̱ táʼanndó na̱ xi̱ndoo xi̱naʼá, ña̱ va̱ása va̱ʼa ña̱ ke̱ʼé na̱ rey ñuu Judá, ña̱ va̱ása va̱ʼa ña̱ ke̱ʼé ná síʼina, ña̱ va̱ása va̱ʼa ña̱ ke̱ʼé miíndó xíʼin ná síʼindó, ña̱ va̱ása va̱ʼa ña̱ ke̱ʼéna nu̱ú ñuʼú ña̱ íyo chí Judá ta saátu chí calle ñuu Jerusalén? 10 Ta nda̱a̱ ki̱vi̱ vitin, ta̱ʼán na̱ʼa̱ndó ña̱ vitá íyo inindó, ni ta̱ʼán na̱ʼa̱ndó ña̱ yíʼvindó xínindó yi̱ʼi̱,* ta ni va̱ása ndíku̱nndó ley ña̱ ta̱xii̱ ndaʼa̱ndó, ni chiñu ña̱ xa̱ʼndai̱ nu̱úndó xíʼin na̱ táʼanndó na̱ xi̱ndoo xi̱naʼá’.

11 ”Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Xa̱a̱ chi̱kaa̱-inii̱ ña̱ chindaʼíi̱ iin tu̱ndóʼo nu̱úndó ta sandíʼi-xa̱ʼíi̱ iníí ñuu Judá. 12 Ta ndiʼika na̱ yiví na̱ ñuu Judá na̱ chi̱kaa̱-ini ña̱ ku̱ʼu̱nna kundoona ñuu Egipto, tii̱nna ta kuvina nu̱ú ñuʼú na̱ ñuu Egipto. Kaʼnínana xíʼin espada ta kuvina xíʼin so̱ko, nda̱a̱ na̱ va̱lí iinsaá nda̱a̱ na̱ chée, kuvina xíʼin espada ta saátu xíʼin so̱ko. Ta sakúisochiʼñanana, kundasína kuninana, kusi̱kindaanana ta ku̱a̱kundaanana. 13 Taxii̱ castigo ndaʼa̱ na̱ ku̱a̱ʼa̱n kundoo ñuu Egipto nda̱a̱ táki̱ʼva ta̱xii̱ castigo ndaʼa̱ na̱ xi̱ndoo ñuu Jerusalén, na̱yóʼo ni̱xi̱ʼi̱na xíʼin espada, xíʼin so̱ko ta saátu xíʼin kue̱ʼe̱. 14 Ta ndiʼika na̱ yiví na̱ ñuu Judá na̱ nda̱kiʼin ku̱a̱ʼa̱n kundoo chí ñuu Egipto va̱ása ka̱kuna ta ni va̱ása kivi ndikóna ñuu Judá. Kuni̱vana ndikóna kundoona kán, soo va̱ása ndikóna, ndáa loʼo kuití kúú na̱ ka̱ku’”.

15 Ku̱a̱ʼání xi̱kuu na̱ ta̱a na̱ xi̱ndita kán na̱ xi̱kunda̱a̱-ini ña̱ xi̱sokó ná síʼina ña̱ʼa nu̱ú inka ndióxi̱ ta kán xi̱nditatu ná síʼina, ta saátu ndiʼi na̱ yiví na̱ xi̱ndoo chí Patrós ña̱ xi̱kindo̱o chí Egipto, ta ndiʼina ni̱ka̱ʼa̱nna ña̱yóʼo xíʼin ta̱ Jeremías: 16 “Va̱ása kandíxavíndi̱ tu̱ʼun ña̱ ni̱ka̱ʼún xíʼinndi̱ xíʼin ki̱vi̱ Jehová. 17 Nu̱úka ña̱yóʼo, saxínundi̱ ña̱ ki̱ndoondi̱: ña̱ so̱kóndi̱ ña̱ʼa nu̱ú ñá kúú Reina chí ndiví* ta saátu so̱kóndi̱ vino nu̱úñá, nda̱a̱ táki̱ʼva ke̱ʼé miíndi̱, saátu na̱ táʼanndi̱ na̱ xi̱ndoo xi̱naʼá, na̱ xi̱kuu rey nu̱úndi̱ xíʼin na̱ xi̱niʼi yichi̱ nu̱úndi̱ chí ñuu ña̱ íyo chí Judá ta saátu chí calle ñuu Jerusalén, tá ni̱xi̱yo ku̱a̱ʼání ña̱ʼa ña̱ xi̱xixindi̱* ta kǒo nda̱a̱ ni iin ña̱ʼa níxi̱kuma̱ní nu̱úndi̱, ta kǒo nda̱a̱ ni iin tu̱ndóʼo níxi̱kuumiíndi̱. 18 Ta nani tá sa̱ndákoondi̱ ña̱ so̱kóndi̱ ña̱ʼa nu̱ú ñá kúú Reina chí ndiví ta saátu ña̱ so̱kóndi̱ vino nu̱úñá, ku̱a̱ʼání ña̱ʼa kúma̱ní nu̱úndi̱ ta ndiʼi na̱ táʼanndi̱ ni̱xi̱ʼi̱na xíʼin espada ta saátu xíʼin so̱ko”.

19 Ta ná ñaʼá ni̱ka̱ʼa̱nkaná: “Tá xi̱sokóndi̱ ña̱ʼa nu̱ú ñá kúú Reina chí ndiví ta saátu tá xi̱sokóndi̱ vino nu̱úñá, tá xi̱keʼéndi̱ si̱ta̱váʼa ta xi̱sokóndi̱ña nu̱úñá, ña̱ náʼa̱ nda̱a̱ táki̱ʼva náʼa̱ miíñá ta xi̱sokótundi̱ vino nu̱úñá, ni̱ka̱ʼa̱nvandi̱ xíʼin na̱ yii̱ndi̱ xa̱ʼa̱ ña̱yóʼo”.

20 Tasaá ni̱ka̱ʼa̱n ta̱ Jeremías ña̱yóʼo xíʼin ndiʼi na̱ yiví kán, xíʼin na̱ ta̱a ta saátu xíʼin ná síʼina ta saátu xíʼin ndiʼika na̱ yiví na̱ xi̱kaʼa̱n xíʼinra: 21 “Ndiʼi ña̱ʼa ña̱ ni̱so̱kó miíndó, na̱ táʼanndó na̱ xi̱ndoo xi̱naʼá, na̱ xi̱kuu rey nu̱úndó, na̱ xi̱niʼi yichi̱ nu̱úndó xíʼin ña̱ ni̱so̱kó ndiʼika na̱ yiví chí ñuu ña̱ ni̱xi̱yo chí Judá ta saátu chí calle ñuu Jerusalén, Jehová va̱ása nínandóso-inira xa̱ʼa̱ña ta ndákaʼánvara xa̱ʼa̱ña. 22 Tándi̱ʼi, Jehová va̱ása níkundeéka-inira xíʼin ña̱ʼa ña̱ va̱ása va̱ʼa ña̱ kéʼéndó ni xíʼin ña̱ʼa ña̱ kini ña̱ xi̱keʼéndó, ta ñuʼú nu̱ú xi̱ndoondó ndi̱ʼi-xa̱ʼa̱ ndiʼiña vitin, ndiʼi na̱ xíniña yíʼvinína, sákuisochiʼñanaña ta kǒoka na̱ yiví ndóo nu̱úña, nda̱a̱ táki̱ʼva xíto miíndó vitin. 23 Ndóʼó ni̱so̱kóndó ña̱ʼa kán ta ni̱ki̱ʼvindó ku̱a̱chi nu̱ú Jehová, xa̱ʼa̱ ña̱ kǒo níkandíxandó ña̱ ni̱ka̱ʼa̱n Jehová xíʼinndó ta kǒo níxindiku̱nndó ley ña̱ ta̱xira ndaʼa̱ndó ni chiñu ña̱ xa̱ʼndara nu̱úndó, xa̱ʼa̱ ña̱kán ki̱xi tu̱ndóʼo yóʼo nu̱úndó, nda̱a̱ táki̱ʼva xítondó ku̱u vitin”.

24 Ta̱ Jeremías nda̱kundeéra ni̱ka̱ʼa̱nra ña̱yóʼo xíʼin ndiʼi na̱ ñuu ta saátu xíʼin ná ñaʼá: “Ndiʼi ndóʼó na̱ yiví na̱ ñuu Judá na̱ ndóo nu̱ú ñuʼú na̱ ñuu Egipto, kuniso̱ʼondó ña̱ káʼa̱n Jehová. 25 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Ña̱ʼa ña̱ ki̱ndoo miíndó keʼéndó ta saátu ná síʼindó sa̱xínuvandóña, saáchi ka̱chindó: “Saxínuvandi̱ ña̱ ki̱ndoondi̱ keʼéndi̱, ña̱ so̱kóndi̱ ña̱ʼa nu̱ú ñá kúú Reina chí ndiví ta saátu ña̱ so̱kóndi̱ vino nu̱úñá”. Ndóʼó ná ñaʼá, saxínuvandó ña̱ ki̱ndoondó keʼéndó ta saátu ña̱ chi̱naʼándó* xa̱ʼa̱’.

26 ”Xa̱ʼa̱ ña̱kán, ndiʼi ndóʼó na̱ yiví na̱ ñuu Judá na̱ ndóo nu̱ú ñuʼú na̱ ñuu Egipto, kuniso̱ʼondó ña̱ káʼa̱n Jehová: ‘“Chínaʼíi̱ xa̱ʼa̱ ki̱víi̱ ña̱ ndáyáʼviní, káchi Jehová, ña̱ nda̱a̱ ni iinka na̱ ta̱a na̱ ñuu Judá na̱ ndóo nu̱ú ñuʼú na̱ ñuu Egipto va̱ása kuniñúʼukana ki̱víi̱ ña̱ chinaʼána xa̱ʼa̱ iin ña̱ʼa ta kachina ‘Chínaʼíi̱ xa̱ʼa̱ táta káʼnu Jehová, Ndióxi̱ ta̱ táku’. 27 Xa̱a̱ íyo tu̱ʼvai̱ ña̱ chindaʼíi̱ tu̱ndóʼo nu̱úna, ta su̱ví ña̱ʼa ña̱ va̱ʼa chindaʼíi̱ nu̱úna; ndiʼi na̱ ta̱a na̱ ñuu Judá na̱ ndóo nu̱ú ñuʼú na̱ ñuu Egipto kuvina xíʼin espada ta saátu xíʼin so̱ko, nda̱a̱ ná kǒoka nda̱a̱ ni iinna kindo̱o. 28 Loʼo kuití kúú na̱ va̱ása kuvi xíʼin espada chí Egipto ta ndikó tukuna nu̱ú ñuʼú ña̱ íyo chí Judá. Ta ndiʼika na̱ ñuu Judá na̱ ná kindo̱o, na̱ ki̱xaa̱ ndóo nu̱ú ñuʼú na̱ ñuu Egipto, kunda̱a̱-inina ndáa tu̱ʼun kúú ña̱ ni̱xi̱nu: tu̱ʼun ña̱ ni̱ka̱ʼa̱n yi̱ʼi̱, á tu̱ʼun ña̱ ni̱ka̱ʼa̱n miína”’”.

29 “‘Ta ña̱yóʼo kúú señal nu̱ú ndóʼó, káchi Jehová, ña̱ taxivai̱ castigo ndaʼa̱ndó ñuu yóʼo, ña̱ va̱ʼa ná kunda̱a̱-inindó ña̱ ndiʼi tu̱ndóʼo ña̱ ni̱ka̱ʼi̱n chindaʼíi̱ nu̱úndó xi̱nuvaña. 30 Ña̱yóʼo kúú ña̱ káʼa̱n Jehová: “Ndataxii̱ ta̱ faraón Hofrá, ta̱ kúú rey ñuu Egipto ndaʼa̱ na̱ sáa̱-ini xíniñaʼá ta saátu ndaʼa̱ na̱ kúni̱ kaʼní-ñaʼá, nda̱a̱ táki̱ʼva nda̱taxii̱ ta̱ rey Sedequías ta̱ ñuu Judá ndaʼa̱ ta̱ rey Nabucodonosor* ta̱ ñuu Babilonia, ta̱ xi̱saa̱-ini xi̱xiniñaʼá ta xi̱kuni̱ra kaʼnírara”’”.