Jeremías

45 Tá xa̱a̱ ku̱mí ku̱i̱ya̱ xáʼndachíñu ta̱ Jehoiaquim se̱ʼe ta̱ Josías, ta̱ xi̱kuu rey ñuu Judá, tá káʼyi ta̱ Baruc se̱ʼe ta̱ Nerías ña̱ ni̱ka̱ʼa̱n ta̱ profeta Jeremías xíʼinra nu̱ú iin libro, ta̱ Jeremías ni̱ka̱ʼa̱nra ña̱yóʼo xíʼinra:

2 “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel xa̱ʼa̱ yóʼó ta̱ Baruc: 3 ‘Yóʼó ni̱ka̱ʼún: “Ndáʼviníi̱ saáchi xóʼvi̱níi̱* ta sákusuchíníka Jehová inii̱. Xa̱a̱ ku̱nai̱ xa̱ʼa̱ ña̱ xákuníi̱ ta va̱ása kívi ndi̱ko-inii̱”’.

4 ”Ña̱yóʼo xíniñúʼu ka̱ʼún xíʼinra: ‘Ña̱yóʼo kúú ña̱ káʼa̱n Jehová: “Koto, sandúvai̱ ña̱ xa̱a̱ i̱xava̱ʼi̱ ta tuʼi̱n ña̱ xa̱a̱ chi̱ʼii̱, ña̱yóʼo kúú ña̱ keʼíi̱ iníísaá ñuu yóʼo. 5 Soo yóʼó ndákundeún nándukún ña̱ʼa ña̱ ndáyáʼviní xa̱ʼa̱ miíún. Va̱ása nandukúkaún ña̱ʼa yóʼo”’.

”‘Saáchi chindaʼíi̱ iin tu̱ndóʼo nu̱ú ndiʼi na̱ yiví yóʼo, káchi Jehová, soo taxii̱ ña̱ ná kutakún nda̱a̱ ndáaka nu̱ú ná ku̱ʼún’”.