Jeremías
46 Jehová ni̱ka̱ʼa̱nra xíʼin ta̱ profeta Jeremías xa̱ʼa̱ ña̱ kundoʼo na̱ ñuu. 2 Ña̱yóʼo kúú tu̱ʼun ña̱ ku̱a̱ʼa̱n nu̱ú na̱ ñuu Egipto, xa̱ʼa̱ na̱ soldado ta̱ faraón Nekó ta̱ rey ñuu Egipto, ta̱ ni̱xi̱yo yatin yuʼú yu̱ta Éufrates, ta̱ ku̱chiñu ta̱ rey Nabucodonosor* ta̱ ñuu Babilonia ka̱nitáʼanra xíʼin chí Carquemis tá xa̱a̱ ku̱mí ku̱i̱ya̱ xáʼndachíñu ta̱ Jehoiaquim se̱ʼe ta̱ Josías, ta̱ rey ñuu Judá:
3 “Ixatu̱ʼvandó escudondó ña̱ náʼnu xíʼin ña̱ válí,*
ta kúáʼanndó kanitáʼanndó.
4 Ndóʼó na̱ yósó* kuáyi̱, ixatu̱ʼvandórí ta kosondórí.*
Xa̱a̱ koo tu̱ʼvandó ta chinúundó casco xi̱níndó.
Ndasaxi̱ínndó* nu̱ú lanzandó ta ndakundixindó ka̱a ña̱ ndási kándíkandó.
5 ‘¿Nda̱chun xítoi̱ ña̱ yíʼviní na̱kán?
Nda̱kiʼinna ku̱a̱ʼa̱nna, na̱ kánitáʼan xa̱ʼa̱na va̱ása níkuchiñuna.
Yíʼvikavína xínuna ku̱a̱ʼa̱nna, na̱ kánitáʼan xa̱ʼa̱na ni va̱ása ndándikóna xítona ndáaña kúu chí sa̱tána.
Ndiʼina yíʼvinína’, káchi Jehová.
6 ‘Va̱ása kívi kunu na̱ kamaní xínu ta ni na̱ kánitáʼan va̱ása kívi kununa.
Ka̱chiʼina* ta nda̱kavana chí norte,
chí yuʼú yu̱ta Éufrates’.
7 ¿Ndáana kúú na̱ ku̱a̱ndaa nda̱a̱ táki̱ʼva ndáa yu̱ta Nilo,
nda̱a̱ táki̱ʼva íyo yu̱ta tá ndeéní kánda̱ nu̱ú?
8 Na̱ ñuu Egipto ndáana nda̱a̱ táki̱ʼva ndáa yu̱ta Nilo,
nda̱a̱ táki̱ʼva íyo yu̱ta tá ndeéní kánda̱ nu̱ú,
ta káchina: ‘Ndaandi̱ ta ndakutúndi̱ iníísaá nu̱ú ñuʼú.
Sandíʼi-xa̱ʼa̱ndi̱ ndiʼi ñuu xíʼin na̱ ndóo nu̱úña’.
9 Ndóʼó na̱ yósó kuáyi̱, kúáʼanndó nu̱ú ku̱a̱chi.
Ndóʼó na̱ káva carreta, kavandó nda̱a̱ táki̱ʼva káva na̱ sána.
Ná ku̱ʼu̱n na̱ xíni̱ní kanitáʼan,
na̱ ta̱a na̱ ñuu Cus xíʼin na̱ ta̱a na̱ ñuu Put na̱ xíni̱ kuniñúʼu escudo,
ta saátu na̱ ludim na̱ xíni̱ kuniñúʼu kuxu̱n* ta xíni̱na ixatu̱ʼvananú.
10 ”Ki̱vi̱ yóʼo kúú ki̱vi̱ táta káʼnu Jehová, ña̱ ndatiinra ku̱a̱chi xíʼin na̱ sáa̱-ini xíniñaʼá. Espada kúú ña̱ sandíʼi-xa̱ʼa̱ na̱yóʼo, xa̱a̱-iniña* xíʼinna ta saátu xa̱a̱-iniña xíʼin ni̱i̱na, saáchi táta káʼnu Jehová ta̱ xáʼndachíñu nu̱ú na̱ ángel, xa̱a̱ i̱xatu̱ʼvara nu̱ú kaʼnírana chí nu̱ú ñuʼú ña̱ íyo chí norte, yatin yuʼú yu̱ta Éufrates.
11 Kúáʼan chí Galaad ta ndukún bálsamo,*
yóʼó ñá loʼo kúa̱an se̱ʼe ñuu Egipto.
Ni ndúkún ku̱a̱ʼání ña̱ kivi sandáʼa yóʼó,
soo kǒo nda̱a̱ ni iin ña̱ kivi ndaʼún xíʼin.
12 Na̱ ñuu xi̱niso̱ʼona xa̱ʼa̱ ña̱ kaʼanní nu̱ú ndo̱ʼún,
ta iníísaá nu̱ú ñuʼú xíniso̱ʼona ña̱ ndáʼyi̱ kóʼún.*
Saáchi iin ta̱ xíni̱ní kanitáʼan káchiʼira xíʼin inkara,
ta inkáchi kóyo u̱vi̱ saára”.
13 Ña̱yóʼo kúú ña̱ ni̱ka̱ʼa̱n Jehová xíʼin ta̱ profeta Jeremías xa̱ʼa̱ ña̱ kixi ta̱ rey Nabucodonosor* ta̱ ñuu Babilonia ña̱ kanitáʼanra xíʼin na̱ ñuu Egipto:
14 “Ka̱ʼa̱nndó xa̱ʼa̱ ña̱yóʼo chí Egipto ta ka̱ʼa̱nndóña chí Migdol.
Ka̱ʼa̱nndóña chí Nof ta saátu chí Tahpanhés.
Kachindó: ‘Xa̱a̱ koo tu̱ʼvandó kanitáʼanndó
saáchi iin espada sandíʼi-xa̱ʼa̱ña yatin nu̱ú ndóondó.
15 ¿Nda̱chun ndi̱ʼi-xa̱ʼa̱ na̱ ta̱a na̱ ndakúní na̱ xáʼa̱n kánitáʼan xa̱ʼa̱ndó?
Va̱ása níkundeéna,
saáchi sa̱ndíʼi-xa̱ʼa̱ Jehová na̱yóʼo.
16 Ku̱a̱ʼání kúú na̱ káchiʼi ta kóyona.
Káʼa̱nna xíʼin táʼanna:
“Ná ndikóyó ñuuyó ta saátu nu̱ú ñuʼúyó,
ná kunuyó nu̱ú na̱ kúni̱ kaʼní miíyó xíʼin espada”’.
17 Ta kán ni̱ka̱ʼa̱nna ña̱yóʼo:
‘Ta̱ faraón ta̱ rey ñuu Egipto, káʼa̱nnívara soo kǒo mií ña̱ kéʼévíra.
Ta̱xira ña̱ ni̱ya̱ʼa tiempo ta kǒo ni iin ña̱ níkeʼéra’.
18 ‘Chínaʼíi̱* xa̱ʼa̱ miíi̱, káchi ta̱ Rey, ta̱ naní Jehová ta̱ xáʼndachíñu nu̱ú na̱ ángel,
ta̱yóʼo* kixira ta koora nda̱a̱ táki̱ʼva íyo Tabor ma̱ʼñú yuku̱
ta koora nda̱a̱ táki̱ʼva íyo yuku̱ Carmelo yatin yuʼú tá Mar.
19 Ixatu̱ʼvandó ña̱ʼa ña̱ ku̱ʼu̱n xíʼinndó chi ndakiʼinna ndóʼó ku̱ʼu̱nndó inka ñuu,
ndóʼó na̱ ñuu Egipto.
Saáchi kaʼmina* ñuu Nof ta kǒoka na̱ yiví kundoo nu̱úña,
ta na̱ ná kuniña yi̱ʼvínína.
20 Saáchi na̱ ñuu Egipto íyona nda̱a̱ táki̱ʼva íyo iin si̱ndi̱ki̱ yúta̱* tí liviní.
Soo nda̱a̱ chí norte kée ndikama tí xáxiñaʼá.
21 Nda̱a̱ na̱ soldado na̱ cha̱ʼvina ña̱ kanitáʼanna xa̱ʼa̱na íyona nda̱a̱ táki̱ʼva íyo si̱ndi̱ki̱ yúta̱ tí nduʼú,
soo saátu na̱yóʼo xi̱nuna ku̱a̱ʼa̱nna.
Va̱ása níkundeéna,
saáchi ki̱xaa̱ ki̱vi̱ ña̱ ndiʼi-xa̱ʼa̱na,
tiempo ña̱ ndatiinna ku̱a̱chi xíʼinna’.
22 ‘Nda̱a̱ táki̱ʼva káʼa ku̱a̱ʼa̱n ko̱o̱ tí ñúu* mií saá káʼa ku̱a̱ʼa̱n na̱yóʼo,
saáchi na̱kán ndeéní kundiku̱nna ku̱ʼu̱nna sa̱tána xíʼin yácha,
nda̱a̱ táki̱ʼva kéʼé na̱ ta̱a na̱ xáʼnda yitu̱n.*
23 Kaʼndana ndiʼi yitu̱n tú íyo yuku̱ kán, káchi Jehová, ni xi̱naʼa̱ ña̱ va̱ása kivi ki̱ʼvina nu̱úña.
Saáchi na̱kán ku̱a̱ʼání kúúna, ku̱a̱ʼáníka kúúna nu̱ú ti̱ka náʼnu.
24 Sakúkaʼanna nu̱ú na̱ ñuu Egipto.
Ndataxinana ndaʼa̱ na̱ ñuu na̱ íyo chí norte’.
25 ”Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, káchira: ‘Vitin taxii̱ castigo ndaʼa̱ ñuu Amón ña̱ ndíkaa̱ chí No,* ndaʼa̱ ta̱ faraón, ndaʼa̱ na̱ ñuu Egipto, ndaʼa̱ ndióxi̱na ta saátu ndaʼa̱ na̱ xáʼndachíñu nu̱úna; ndaʼa̱ ta̱ faraón ta saátu ndaʼa̱ ndiʼi na̱ ndáa-ini xíniñaʼá’.
26 ”‘Ndataxii̱na ndaʼa̱ ta̱ kúni̱ kaʼní-ñaʼá, ndaʼa̱ ta̱ rey Nabucodonosor* ta̱ ñuu Babilonia ta saátu ndaʼa̱ na̱ káchíñu nu̱úra. Soo tándi̱ʼi, ndakundoo tukuvana nu̱úña nda̱a̱ táki̱ʼva xi̱ndoona xi̱naʼá’, káchi Jehová.
27 ‘Soo yóʼó ta̱ Jacob ta̱ káchíñu nu̱úi̱, va̱ása yi̱ʼvíún,
va̱ása yi̱ʼvíníún Israel.
Saáchi ni xíkání íyoún sakǎkuvai̱ yóʼó,
ta saátu ndiʼi na̱ se̱ʼún na̱ nda̱kiʼinna ku̱a̱ʼa̱n xíʼinna inka ñuu.
Ta̱ Jacob ndikóvara ta va̱ása kundi̱ʼi-inira,
va̱ʼaní koora ta kǒo nda̱a̱ ni iin na̱ sayíʼvi-ñaʼá.
28 Ña̱kán yóʼó ta̱ Jacob ta̱ káchíñu nu̱úi̱, va̱ása yi̱ʼvíún, káchi Jehová, saáchi yi̱ʼi̱ íyovai̱ xíʼún.
Sandíʼi-xa̱ʼa̱vai̱ ndiʼi ñuu nu̱ú chi̱ndaʼíi̱ yóʼó ku̱a̱ʼún,
soo va̱ása sandíʼi-xa̱ʼa̱víi̱ yóʼó.
Ndakiʼinvaún consejo* ña̱ xíniñúʼu ndakiʼún,
ta ña̱ taxii̱ kúúva castigo ndaʼún’”.