Jeremías
47 Ña̱yóʼo kúú tu̱ʼun ña̱ ni̱ka̱ʼa̱n Jehová xíʼin ta̱ profeta Jeremías xa̱ʼa̱ na̱ filisteo, tá kúma̱níka ku̱ʼu̱n ta̱ faraón kanitáʼanra xíʼin na̱ ñuu Gaza. 2 Ña̱yóʼo kúú ña̱ káʼa̱n Jehová:
“Koto, chí norte ke̱e ku̱a̱ʼání ti̱kui̱í va̱xirá.
Kuaʼnunírá ta nda̱a̱ keerá yu̱ta.
Iníí país yóʼo xíʼin ndiʼi ña̱ʼa ña̱ íyo nu̱úña sa̱ʼviña ti̱xinrá,
ta saátu iníí ñuu yóʼo xíʼin ndiʼi na̱ yiví na̱ ndóo nu̱úña.
Na̱ ta̱a nda̱ʼyi̱ kóʼóna,*
ta ndiʼi na̱ ndóo ñuu yóʼo kuakunína.
3 Tá ná kuniso̱ʼona ña̱ ndeéní káni chíi̱n tí kuáyi̱ nu̱ú ñuʼú,
ña̱ ndeéní níʼi va̱xi carreta tú xáʼa̱n nu̱ú ku̱a̱chi
ta saátu ña̱ ndeéní níʼi llanta xa̱ʼa̱nú,
na̱ íyo se̱ʼe kununa ku̱ʼu̱nna
ta ni va̱ása kuumiíkana ndee̱ ña̱ sakǎkuna se̱ʼena;
4 saáchi xa̱a̱ ku̱yatin kixaa̱ ki̱vi̱ ña̱ ndiʼi-xa̱ʼa̱ ndiʼi na̱ filisteo,
ndiʼi-xa̱ʼa̱ ndiʼi na̱ ñuu Tiro xíʼin na̱ ñuu Sidón na̱ kítáʼan xíʼinna.
Saáchi Jehová sandíʼi-xa̱ʼa̱ra na̱ filisteo na̱ kíndo̱o,
na̱ kúú táʼan na̱ yiví na̱ ke̱e chí isla ña̱ Caftor.*
5 Kuchálá ndiʼi xi̱ní na̱ ndóo chí Gaza.*
Ku̱táxi̱n chí Asquelón.
Ndiʼi ndóʼó na̱ ndóo chí yoso̱,
¿nda̱a̱ ama sandákoondó ña̱ kaʼndandó ku̱ñundó?
6 Espada Jehová,
¿nda̱a̱ ama koo táxi̱ún?
Ndikó nu̱ú xi̱ndikaa̱va̱ʼún.
Ndakindee̱ ta táxi̱n koún.
7 Va̱ása kindo̱o táxi̱nvíña, saáchi mií Jehová kúú ta̱ xa̱ʼnda chiñu nu̱úña.
Chi̱ndaʼáraña ña̱ ku̱ʼu̱nña kanitáʼanña xíʼin na̱ ndóo chí Asquelón
ta saátu xíʼin na̱ ndóo chí nu̱ú ñuʼú ña̱ íyo chí yuʼú mar”.