Jeremías
48 Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel, káʼa̱nra ña̱yóʼo xíʼin na̱ ñuu Moab:
“Ndáʼviní ñuu Nebo, saáchi ndi̱ʼi-xa̱ʼa̱ña.
Sa̱kúkaʼanna nu̱ú ñuu Quiryataim ta ku̱chiñuna nda̱kiʼinnaña.
Sa̱kúkaʼanna nu̱ú veʼe ña̱ súkunní ta sa̱ndíʼi-xa̱ʼa̱naña.
2 Kǒo nda̱a̱ ni iinka na̱ káʼa̱n va̱ʼa xa̱ʼa̱ ñuu Moab.
Chí Hesbón nda̱kutáʼanna ta ni̱ka̱ʼa̱nna ña̱ sandíʼi-xa̱ʼa̱naña, ka̱china:
‘Naʼandó, ná sandíʼi-xa̱ʼa̱yó ñuu yóʼo tasaá va̱ása kookaña’.
Saátu yóʼó Madmén, táxi̱n koún,
saáchi ndíku̱ntu espada sa̱tá yóʼóva.
3 Nda̱a̱ chí Horonaim táku̱ ña̱ ndáʼyi̱ kóʼóna* xa̱ʼa̱ tu̱ndóʼo ña̱ ki̱xi nu̱ú ñuu kán, xa̱ʼa̱ ña̱ ndi̱ʼi-xa̱ʼa̱ ndiʼiña.
4 Ndi̱ʼi-xa̱ʼa̱ ñuu Moab.
Ndeéní xáku na̱ va̱lí ñuu kán.
5 Ndeéní xáku na̱ yiví nani xíkana ku̱a̱ʼa̱nna chí Luhit.
Chí yichi̱ chí nu̱ú núu na̱ yiví chí Horonaim, táku̱ ña̱ ndáʼyi̱ kóʼóna xa̱ʼa̱ ña̱ xóʼvi̱na* xa̱ʼa̱ tu̱ndóʼo ña̱ ku̱u.
6 Kunundó ña̱ va̱ʼa ka̱kundó.
Xíniñúʼu xa̱a̱ndó koondó nda̱a̱ táki̱ʼva íyo tú enebro tú íyo nu̱ú ñuʼú yi̱chí.
7 Saátu ndakiʼinna yóʼó xa̱ʼa̱ ña̱ ndáa-iniún ña̱ʼa ña̱ ke̱ʼún
xíʼin ña̱ ku̱i̱ká ña̱ kúúmiíún.
Ta ndióxi̱ Kemós ndakiʼinnaña ku̱ʼu̱nña inka ñuu,
ta saátu na̱ su̱tu̱ xíʼin na̱ kúúmií chiñu ña̱ ndáyáʼvi nu̱úña.
8 Ta̱ sándiʼi-xa̱ʼa̱, ki̱ʼvira ndiʼi ñuu
ta va̱ása ka̱ku nda̱a̱ ni iin ña̱yóʼo.
Yoso̱ nda̱a̱ táki̱ʼva koo ña̱ kuvi saá kooña
ta ñuʼú ña̱ nda̱a̱ nu̱ú ndiʼi-xa̱ʼa̱vaña, nda̱a̱ táki̱ʼva ni̱ka̱ʼa̱n Jehová.
9 Chikaa̱ndó iin señal ñuu Moab,
saáchi tá ná ndiʼi-xa̱ʼa̱ña kunuvaña,
ta ndiʼina yi̱ʼvínína tá ná kunina ñuu ña̱ xi̱kuumiíña,
ta kǒoka na̱ kundoo nu̱úña.
10 Na̱ va̱ása kéʼé chiñu* ña̱ xa̱ʼnda Jehová xíʼin ndinuʼu-inina ná ndakiʼinna chiʼña.
Na̱ va̱ása xíín kuniñúʼu espadana ña̱ kaʼnína ná ndakiʼinna chiʼña.
11 Nda̱a̱ tá válíví na̱ moabita va̱ʼaní ndóona,
íyona nda̱a̱ táki̱ʼva íyo vino tá nda̱kuʼun nda̱a̱ kaʼa̱ ki̱si.
Íyona nda̱a̱ táki̱ʼva íyo vino tá ta̱ʼán nasa̱ma ini inka ki̱si,
ta nda̱a̱ ni iin yichi̱ ta̱ʼán ku̱ʼu̱nna kundoona inka ñuu.
Íyona nda̱a̱ táki̱ʼva íyo vino tá ta̱ʼán nasa̱ma xiko̱
ta ni va̱ása va̱ʼa xíʼirá.*
12 ”‘Xa̱ʼa̱ ña̱kán, xa̱a̱ ku̱yatin ki̱vi̱, káchi Jehová, ña̱ chindaʼíi̱ na̱ ta̱a na̱ sandúva ndóʼó nda̱a̱ táki̱ʼva sánduvana ki̱si nu̱ú ñúʼu vino ta katana ña̱ʼa ña̱ ñúʼu ini ki̱sindó ta sakúachi válína ndiʼi ki̱si náʼnu ña̱ kúúmiíndó. 13 Ta na̱ moabita kukaʼan nu̱úna xíʼin ndióxi̱na Kemós, nda̱a̱ táki̱ʼva ku̱kaʼan nu̱ú na̱ ñuu Israel xíʼin Betel, ña̱ xi̱ndaaní-inina.
14 ¿Nda̱chun káʼa̱nndó “Ndi̱ʼi̱ xíni̱níndi̱ kanitáʼanndi̱, ta xa̱a̱ íyo tu̱ʼvandi̱ ña̱ ku̱ʼu̱nndi̱ nu̱ú ku̱a̱chi”?’.
15 ‘Ñuu Moab ndi̱ʼi-xa̱ʼa̱vaña,
ni̱ki̱ʼvina ndiʼi ñuu ña̱ xi̱kuumiíña,
ta xa̱ʼnína ndiʼi na̱ ta̱a na̱ válí na̱ ndakúní’,
káchi ta̱ Rey, ta̱ naní Jehová ta̱ xáʼndachíñu nu̱ú na̱ ángel.
16 Xa̱a̱ ku̱yatin ndiʼi-xa̱ʼa̱ na̱ moabita,
si̱lóʼoní kúma̱ní ña̱ ndiʼi-xa̱ʼa̱na.
17 Ndiʼi na̱ ndóo yatin xíʼinna kundáʼvi-inina kuninana,
ndiʼi na̱ xíni̱ ki̱vi̱na.
Ka̱ʼa̱nndó xíʼinna: ‘Kotondó ndáa ki̱ʼva ni̱ta̱ʼnu̱ yitu̱n tú ndakúní, karroti* tú liviní’.
18 Kúánuundó nu̱ú va̱ʼaní ndóondó
ta kuyichi̱ndó* kundoondó,* ndóʼó na̱ ndóo chí Dibón,
saáchi ta̱ sa̱ndíʼi-xa̱ʼa̱ ñuu Moab va̱xira kanitáʼanra xíʼinndó
ta sandíʼi-xa̱ʼa̱ra ndiʼi veʼe ña̱ kútu̱ní ku̱vaʼa ña̱ kúúmiíndó.
19 Ndóʼó na̱ ndóo chí Aroer, ndakunditandó chí yuʼú yichi̱ ta kotondó.
Nda̱ka̱tu̱ʼunndó ta̱a ta̱ xínu ta saátu ñaʼá ñá xínu: ‘¿Ndáaña ku̱u?’.
20 Sa̱kúkaʼanna nu̱ú ñuu Moab ta yíʼviníña.
Kuakundó ta nda̱ʼyi̱ kóʼóndó.
Ka̱ʼa̱nndó chí Arnón ña̱ sa̱ndíʼi-xa̱ʼa̱na ñuu Moab.
21 ”Ndatiinna ku̱a̱chi xíʼin ñuʼú ña̱ íyo chí yoso̱, xíʼin Holón, Jáhaz ta saátu xíʼin Mefaat; 22 xíʼin Dibón, Nebo ta saátu xíʼin Bet-Diblataim; 23 xíʼin Quiryataim, Bet-Gamul ta saátu xíʼin Bet-Meón; 24 xíʼin Queriyot, Bozrá ta saátu xíʼin ndiʼika ñuu ña̱ íyo nu̱ú ñuʼú na̱ ñuu Moab, ña̱ íyo yatin xíʼin ña̱ íyo xíká.
25 ‘Sa̱ndíʼina ndee̱ ña̱ kúúmií ñuu Moab;
ni̱xa̱ʼnu̱na ndaʼa̱ña’, káchi Jehová.
26 ‘Saxíniindó ñuu Moab, saáchi ni̱nuní kúniña nu̱ú Jehová.
Tíviníʼniña* nu̱ú ndu̱xanña
ta kúsi̱kindaanaña.
27 ¿Á su̱ví ñuu Israel kúú ña̱ ku̱sikindaaníún?
¿Á nda̱ni̱ʼínana ña̱ xíkana íxakuíʼnána ña̱kán káʼa̱nníún xa̱ʼa̱na
ta sákuikóún* xi̱níún?
28 Ndóʼó na̱ ñuu Moab, keendó ñuundó ta kúáʼanndó kundoondó chí nu̱ú íyo kavá,
koondó nda̱a̱ táki̱ʼva íyo paloma tí íxava̱ʼa chi̱ʼyo̱ sa̱tá taʼvi̱’”.
29 “Xi̱niso̱ʼondi̱ ña̱ ni̱nuní kúni ñuu Moab, kúta̱aní-iniña
ta ndákanixi̱níña ña̱ ndáyáʼviníkaña”.
30 “‘Kúnda̱a̱-inii̱ ña̱ sáa̱nína, káchi Jehová,
soo tu̱ʼun ña̱ káʼa̱nna va̱ása ndáyáʼvivíña.
Kǒo nda̱a̱ ni iin ña̱ʼa keʼéna.
31 Xa̱ʼa̱ ña̱kán kuakui̱ xa̱ʼa̱ Moab,
nda̱ʼyi̱ kóʼi̱ xa̱ʼa̱ ndiʼi na̱ ñuu Moab
ta tanai̱ xa̱ʼa̱ ndiʼi na̱ ta̱a na̱ ñuu Quir-Heres.
32 Kuakuníkai̱ xa̱ʼa̱ yóʼó, yitu̱n tú uva tú íyo chí Sibmá
nu̱úka ña̱ xa̱kui̱ xa̱ʼa̱ Jazer.
Ndaʼún ña̱ liviní ni̱xa̱a̱ña nda̱a̱ nu̱ú íyo mar.
Ni̱xa̱a̱ña nda̱a̱ nu̱ú íyo mar, nda̱a̱ chí Jazer.
Ta̱ sáa̱-ini xíni yóʼó ki̱xaa̱ra sandíʼi-xa̱ʼa̱ra ku̱i̱ʼún tí kána tiempo yi̱chí
ta saátu uva tí kúúmiíún.
33 Kǒoka na̱ kúsi̱í-ini chí nu̱ú chíʼina
ni iníí nu̱ú ñuʼú na̱ ñuu Moab.
Va̱ása nítaxikai̱ ña̱ kee vino chí nu̱ú xáñi̱na* tí uva.
Nda̱a̱ ni iinna va̱ása nda̱ʼyi̱ kóʼókana xa̱ʼa̱ ña̱ kúsi̱í-inina xáñi̱na tí uva.
Xa̱ʼa̱ inka ña̱ʼava kúú ña̱ nda̱ʼyi̱ kóʼóna’”.
34 “‘Táku̱ ña̱ ndáʼyi̱ kóʼó iinna nda̱a̱ chí Hesbón iinsaá nda̱a̱ Elealé.
Ndeéníka ndáʼyi̱na chí Jáhaz,
chí Zóar iinsaá nda̱a̱ Horonaim ta saátu nda̱a̱ Eglat-Selisiyá.
Nda̱a̱ ti̱kui̱í tá ñúʼu chí Nimrim yi̱chi̱ ndiʼirá.
35 Ndiʼi na̱ sóko̱* ña̱ʼa chí nu̱ú lugar ña̱ súkun*
ta saátu na̱ sóko̱ ña̱ʼa nu̱ú ndióxi̱na,
va̱ása taxikai̱ ña̱ koona chí Moab, káchi Jehová.
36 Xa̱ʼa̱ ña̱kán, níma̱i̱ kuakuña xa̱ʼa̱ na̱ ñuu Moab nda̱a̱ táki̱ʼva kéʼé iin flauta,*
níma̱i̱ kuakuña xa̱ʼa̱ na̱ ta̱a na̱ Quir-Heres nda̱a̱ táki̱ʼva kéʼé iin flauta.*
Saáchi ña̱ ku̱i̱ká ña̱ kúúmiína ndi̱ʼi-xa̱ʼa̱vaña.
37 Ni̱xa̱tá ndiʼina xi̱nína
ta xa̱ʼnda ndiʼina ixí* yuʼúna.
Náʼa̱ ña̱ xa̱ʼndana ndiʼi ndaʼa̱na
ta núʼni ti̱ko̱to̱ ndayí* tokóna’”.
38 “‘Ndiʼi xi̱ní veʼe na̱ ñuu Moab
ta saátu chí calle
nina na̱ xáku kúúna.
Saáchi sa̱kúachi válíi̱ ñuu Moab
nda̱a̱ táki̱ʼva íyo iin ki̱si ña̱ sa̱kánana’, káchi Jehová.
39 ‘Yíʼviníña. Kuakundó.
Ku̱kaʼanní nu̱ú ñuu Moab nda̱kiʼinña ku̱a̱ʼa̱nña.
Ndiʼina kúsi̱kindaa ñuu Moab,
ta ndiʼi na̱ ndóo yatin xíʼinña yíʼvinína tá xíninaña’”.
40 “Saáchi ña̱yóʼo kúú ña̱ káʼa̱n Jehová:
‘Koto, nda̱a̱ táki̱ʼva kéʼé iin ta̱sú* tá ku̱a̱ʼa̱nrí tiinrí iin kití, saá keʼé ta̱ sáa̱-ini xíniñaʼá
ta sakáa̱ra ndi̱xi̱nra sa̱tá ñuu Moab.
41 Kuchiñuna ndakiʼinna ñuu ña̱ íyo kán
ta saátu veʼe ña̱ súkunní.
Saáchi ki̱vi̱ kán, na̱ ta̱a na̱ ndakúní na̱ ñuu Moab yi̱ʼvínína nda̱a̱ táki̱ʼva ndóʼo iin ñaʼá ñá káku se̱ʼe’”.
42 “‘Ndiʼi-xa̱ʼa̱ ñuu Moab ta va̱ása kookaña iin ñuu,
saáchi nu̱ú Jehová kúú ña̱ ni̱nuní ku̱niña.
43 Ndóʼó na̱ ndóo ñuu Moab
yi̱ʼvíníndó, ko̱yondó ini ya̱vi̱ ta tiinna ndóʼó’, káchi Jehová.
44 ‘Na̱ ná kunu xa̱ʼa̱ ña̱ yíʼvina ko̱yona ini ya̱vi̱, ta na̱ ná kee ini ya̱vi̱ tiinnana’.
‘Saáchi kixaa̱ ku̱i̱ya̱ ña̱ taxii̱ castigo ndaʼa̱ ñuu Moab’, káchi Jehová.
45 ‘Ndiʼi na̱ xínu ku̱a̱ʼa̱n chí Hesbón ña̱ va̱ʼa ka̱kuna, kǒoví na̱ chindeétáʼan xíʼinna.
Saáchi chí Hesbón kana ñuʼu̱,
chí ma̱ʼñú Sehón kana iin ñuʼu̱
ta kaʼmiña ta̱ʼya̱* na̱ ñuu Moab
ta saátu xi̱ní se̱ʼe ndiʼi na̱ kútóoní kanitáʼan’.
46 ‘Ndáʼviníún ñuu Moab.
Ña̱ ndióxi̱ Kemós ndi̱ʼi-xa̱ʼa̱vaña.
Saáchi na̱ se̱ʼeta̱ún nda̱kiʼinnana ku̱a̱ʼa̱n xíʼinna
ta ná se̱ʼe-síʼún nda̱kiʼinnaná ku̱a̱ʼa̱nná kundooná inka ñuu.
47 Soo ki̱vi̱ nu̱ú ndíʼi, sandákutáʼi̱n ndiʼi na̱ ñuu Moab na̱ nda̱kiʼinna ku̱a̱ʼa̱n xíʼinna inka ñuu’, káchi Jehová.
‘Yóʼo ndi̱ʼi ña̱ káʼa̱n xa̱ʼa̱ castigo ña̱ ndakiʼin na̱ ñuu Moab’”.