Jeremías
49 Ña̱yóʼo kúú ña̱ káʼa̱n Jehová xíʼin na̱ ammonita:
“¿Á kǒova na̱ se̱ʼe ta̱ Israel?
¿Á kǒova na̱ ndakiʼin herenciara?
¿Nda̱chun nda̱kiʼin ña̱ ndióxi̱ Malcam* ñuʼú ña̱ kúú kuenta ta̱ Gad?
¿Nda̱chun ndóo na̱ yiví na̱ ndásakáʼnu ña̱yóʼo ñuu ña̱ kúú kuenta na̱ ñuu Israel?”.
2 “‘Xa̱ʼa̱ ña̱kán, kotondó, xa̱a̱ ku̱yatin ki̱vi̱, káchi Jehová,
ña̱ taxii̱ ña̱ kuniso̱ʼona ña̱ xa̱a̱ ki̱xáʼa ku̱a̱chi* xíʼin na̱ ndóo chí ñuu Rabá, ña̱ kúú kuenta na̱ ammonita.
Ndiʼi-xa̱ʼa̱ va̱ʼaña, ta ñuu ña̱ íyo yatin kán, kaʼminaña xíʼin ñuʼu̱’.
‘Na̱ ñuu Israel ndakiʼinna ña̱ʼa na̱ nda̱kiʼin ña̱ʼana’, káchi Jehová.
3 ‘Kuaku ndóʼó na̱ ndóo chí Hesbón, saáchi xa̱a̱ ndi̱ʼi-xa̱ʼa̱va ñuu Hai.
Nda̱ʼyi̱ kóʼó* ndóʼó na̱ ndóo ñuu válí ña̱ íyo yatin chí Rabá.
Ndakundixindó ti̱ko̱to̱ ndayí.*
Kuakundó ta kakandó kunundó ini corra ña̱ yu̱u̱,*
saáchi ndakiʼinna ña̱ ndióxi̱ Malcam ku̱ʼu̱nña inka ñuu
xíʼin na̱ su̱tu̱ ta saátu na̱ kúúmií chiñu ña̱ ndáyáʼvi na̱ káchíñu nu̱úña.
4 ¿Nda̱chun ni̱nuní kúniún xa̱ʼa̱ yoso̱ ña̱ kúúmiíún,
yoso̱ ña̱ va̱ʼaní ni̱ko̱so̱na, yóʼó ñá loʼo ñá va̱ása nda̱kú-ini?
Ndáaní-iniún ña̱ ku̱i̱ká ña̱ kúúmiíún
ta káchiún: “¿Ndáana kixi kanitáʼan xíʼi̱n?”’”.
5 “‘Chindaʼíi̱ iin tu̱ndóʼo káʼnuní nu̱ún, káchi táta káʼnu Jehová, ta̱ xáʼndachíñu nu̱ú na̱ ángel;
ta na̱ ndóo yatin xíʼún kúú na̱ keʼé ña̱yóʼo xíʼún.
Ndóʼó xa̱a̱ síín síín chí nu̱ú kunundó ku̱ʼu̱nndó,
ta kǒo na̱ sandákutáʼan ndiʼi na̱ xi̱nu ku̱a̱ʼa̱n’”.
6 “‘Soo tá ná ndiʼi, yi̱ʼi̱ sandákutáʼi̱n na̱ ammonita na̱ nda̱kiʼinna ku̱a̱ʼa̱n inka ñuu’, káchi Jehová”.
7 Jehová ta̱ xáʼndachíñu nu̱ú na̱ ángel káʼa̱nra ña̱yóʼo xíʼin na̱ ñuu Edom:
“¿Á kǒokava na̱ ndíchi íyo chí ñuu Temán?
¿Á kǒokava na̱ táxi consejo ña̱ va̱ʼaní?
¿Á ni̱ta̱ʼyi̱va ña̱ ndíchi ña̱ kúúmiína?
8 Ndikóko̱ondó ta kunundó.
Ndóʼó na̱ íyo chí Dedán, kúáʼanndó ta kundoondó chí nu̱ú íyo kavá ña̱ kúnúní.
Saáchi chindaʼíi̱ iin tu̱ndóʼo nu̱ú ta̱ Esaú
tá ná kixaa̱ tiempo ña̱ taxii̱ castigo ndaʼa̱ra.
9 Tá ná kixi na̱ ndákaya uva chí nu̱ú ñuʼún,
¿á su̱ví sandákoovana savarí ña̱ va̱ʼa ndakaya inkanarí?
Tá ná kixi na̱ kui̱ʼná tá ñuú,
nda̱saa ña̱ kúni̱ miívana sandíʼi-xa̱ʼa̱na.
10 Soo yi̱ʼi̱ sandákoo chálái̱ ta̱ Esaú.
Taxii̱ ña̱ ná kunina nu̱ú íyo se̱ʼéra*
ña̱ va̱ʼa kǒo kivi koose̱ʼékara.
Na̱ se̱ʼera, na̱ ñanira ta saátu ndiʼi na̱ yiví na̱ ndóo yatin xíʼinra ndiʼi-xa̱ʼa̱ ndiʼina,
ta kǒokara koo.
11 Sandákoo na̱ va̱lí na̱ ni̱xi̱ʼi̱ yivá,
ta yi̱ʼi̱ taxii̱ ña̱ ná kutakuna,
ta ná ñaʼá ná ni̱xi̱ʼi̱ yii̱ kundaa-inina yi̱ʼi̱”.
12 Saáchi ña̱yóʼo kúú ña̱ káʼa̱n Jehová: “Koto, tá nda̱a̱ na̱ va̱ása níndakiʼin castigo ña̱ koʼona copa xíniñúʼu koʼonaña, ¿á ka̱kuva ndóʼó nu̱úña túvindó? Ndakiʼinvandó castigo, saáchi xíniñúʼu koʼovandó copa”.
13 “Saáchi xa̱a̱ chi̱naʼíi̱* xa̱ʼa̱ miíi̱, káchi Jehová, ña̱ ndiʼi na̱ ná kuni ñuu Bozrá yi̱ʼvínína, kusi̱kindaanaña, sakúisochiʼñanaña* ta ndiʼi-xa̱ʼa̱ña; ta ndiʼi ñuu ña̱ kúúmiíña ndiʼi-xa̱ʼa̱ va̱ʼaña”.
14 Saáchi xa̱a̱ xi̱niso̱ʼi̱ xa̱ʼa̱ iin ña̱ ni̱ka̱ʼa̱n Jehová,
ta xa̱a̱ chi̱ndaʼára iin ta̱ ku̱a̱ʼa̱n ka̱ʼa̱n xa̱ʼa̱ ña̱yóʼo xíʼin na̱ ñuu:
“Ndakutáʼanndó ta kúáʼanndó;
xa̱a̱ koo tu̱ʼvandó ña̱ ku̱ʼu̱nndó nu̱ú ku̱a̱chi”.
15 “Saáchi nda̱sai̱ yóʼó iin ñuu ña̱ ni loʼo kǒo ndáyáʼvi nu̱ú inkaka ñuu,
ta na̱ yiví* kúndasína xínina yóʼó.
16 Sa̱ndáʼviún miíún xa̱ʼa̱ ña̱ yíʼvi inkana xínina yóʼó
ta saátu xa̱ʼa̱ ña̱ ni̱nuní kúniún,
yóʼó ñuu ña̱ íyo chí nu̱ú íyo kavá, chí xi̱kí ña̱ súkunní.
Ni súkunní ná keʼún chi̱ʼyo̱ún nda̱a̱ táki̱ʼva kéʼé tí ta̱sú,*
sanúuvai̱ yóʼó”, káchi Jehová.
17 “Ndiʼi na̱ ná kuni ñuu Edom kundasína kuninaña. Ta ndiʼi na̱ ná ya̱ʼa kán yi̱ʼvínína tá ná kuninaña ta kusi̱kindaanaña xa̱ʼa̱ ña̱ ndo̱ʼoña. 18 Ndiʼi-xa̱ʼa̱ ñuu Edom nda̱a̱ táki̱ʼva ndi̱ʼi-xa̱ʼa̱ ñuu Sodoma xíʼin Gomorra ta saátu ndiʼi ñuu ña̱ ni̱xi̱yo yatin kán, káchi Jehová, kǒoka na̱ kundoo nu̱úña, nda̱a̱ ni iinka yichi̱ va̱ása ndikóka na̱ yiví kundoona nu̱úña.
19 ”Kotondó, iinna ku̱ʼu̱nna sandíʼi-xa̱ʼa̱na yita* nu̱ú kǒo nda̱a̱ ni iin ña̱ʼa kivi kundoʼo ndikachi* chí Edom, keʼéna nda̱a̱ táki̱ʼva kéʼé iin tí ndikaʼa* tá kítarí chí nu̱ú íyo ku̱ʼu̱ ña̱ íyo chí yuʼú yu̱ta Jordán, soo yi̱ʼi̱ ndi̱ku̱n taxíi̱nna. Ta yi̱ʼi̱ taxii̱ ña̱ ná kaʼndachíñu ta̱ nda̱kaxii̱n nu̱úña. Saáchi, ¿ndáana íyo nda̱a̱ táki̱ʼva íyo yi̱ʼi̱ ta ndáana kúú na̱ kivi koo contra xíʼi̱n? ¿Ndáana pastor kúú na̱ kivi kanitáʼan xíʼi̱n? 20 Ña̱kán, kuniso̱ʼondó ña̱ nda̱kaxin Jehová keʼéra xíʼin na̱ ñuu Edom ta saátu ña̱ nda̱kanixi̱níra keʼéra xíʼin na̱ ndóo chí Temán:
Se̱ʼe kití sa̱na̱na kañuunarí* ku̱ʼu̱n xíʼinna.
Xa̱ʼa̱ ña̱ ke̱ʼéna, taxira ña̱ ná kindo̱o vichí* ñuu nu̱ú xi̱ndoona.
21 Ndeéní ni̱ni̱ʼi tá nda̱kavaña, nda̱a̱ ñuʼú ni̱ka̱nda̱.
Ndeéní táku̱ ña̱ ndáʼyi̱ kóʼóna.
Nda̱a̱ nu̱ú ndíkaa̱ mar Rojo táku̱ ña̱ ndáʼyi̱na.
22 Kotondó, nda̱a̱ táki̱ʼva kéʼé iin ta̱sú tá ku̱a̱ʼa̱nrí tiinrí iin kití, saá keʼé ta̱ sáa̱-ini xíniñaʼá
ta sakáa̱ra ndi̱xi̱nra sa̱tá ñuu Bozrá.
Ki̱vi̱ kán, na̱ ta̱a na̱ ñuu Edom na̱ ndakúní
yi̱ʼvínína nda̱a̱ táki̱ʼva ndóʼo iin ñá ñaʼá ñá káku se̱ʼe”.
23 Ña̱yóʼo kúú ña̱ káʼa̱nra xa̱ʼa̱ na̱ ñuu Damasco:
“Na̱ ñuu Hamat xíʼin na̱ ñuu Arpad ku̱kaʼanní nu̱úna
chi su̱ví ña̱ va̱ʼa kúú ña̱ xi̱niso̱ʼona.
Yíʼvinína.
Tá mar ndeéní kánda̱rá ta kǒo kívi ya̱a̱rá.
24 Na̱ ñuu Damasco va̱ása ndakúka-inina.
Xa̱a̱ ndi̱kóko̱ona ña̱ kununa ku̱ʼu̱nna, soo yíʼvinína.
Ndíʼi̱ní-inina ta xóʼvi̱nína* nda̱a̱ táki̱ʼva ndóʼó iin ñaʼá ñá káku se̱ʼe.
25 ¿Nda̱chun ta̱ʼán sandákoondaʼa̱na ñuu ña̱ xi̱kaʼa̱n va̱ʼanína xa̱ʼa̱,
ñuu nu̱ú si̱íní ni̱xi̱yona?
26 Saáchi kuvi na̱ va̱lí kúa̱an kundoona chí nu̱ú ndákutáʼan ku̱a̱ʼá na̱ yiví,
ta ki̱vi̱ kán kuvi ndiʼi na̱ soldado”, káchi Jehová ta̱ xáʼndachíñu nu̱ú na̱ ángel.
27 “Kaʼmii̱ nama̱ ña̱ íyo ñuu Damasco,
ta ñuʼu̱ yóʼo kaʼmiña veʼe súkun ña̱ kútu̱ní ndási ña̱ kúú kuenta ta̱ Ben-Hadad”.
28 Ña̱yóʼo kúú ña̱ káʼa̱n Jehová xíʼin na̱ ñuu Quedar ta saátu xíʼin na̱ ndóo chí Hazor, na̱ ku̱chiñu ta̱ rey Nabucodonosor* ta̱ ñuu Babilonia nda̱kiʼinra:
“Kúáʼanndó chí Quedar
ta sandíʼi-xa̱ʼa̱ndó ndiʼi na̱ ndóo chí nu̱ú kána ñu̱ʼu.*
29 Ndakiʼinndó veʼe válína xíʼin kití sa̱na̱na,
saátu ti̱ko̱to̱ ña̱ ku̱vaʼa veʼe válína xíʼin ndiʼi ña̱ʼa va̱ʼa ña̱ kúúmiína.
Ndakiʼinndó camello sa̱na̱na ta ndeéní ka̱ʼa̱nndó xíʼinna: ‘Iníí kúu ña̱ va̱ása va̱ʼa’”.
30 “Kunundó, ta xíkáva̱ʼa ku̱ʼu̱nndó.
Ndóʼó na̱ ndóo chí Hazor kúáʼanndó ta kundoondó ini kavá ña̱ kúnúva̱ʼa”, káchi Jehová.
“Saáchi ta̱ rey Nabucodonosor* ta̱ ñuu Babilonia xa̱a̱ nda̱kanixi̱níra ndáa ki̱ʼva kanitáʼanra xíʼinndó,
ta saátu xa̱a̱ nda̱kanixi̱níra ndáa ki̱ʼva tiinra ndóʼó”.
31 “Kúáʼanndó ta kanitáʼanndó xíʼin na̱ ñuu na̱ kǒo ku̱a̱chi nu̱ú,
na̱ va̱ʼaní ndóo”, káchi Jehová.
“Kǒo tú yéʼéna, ni kǒo ña̱ʼa* ña̱ ndási yéʼéna; kǒo na̱ ndóo yatin xíʼinna.
32 Ndakiʼinndó camello sa̱na̱na,
ta saátu ku̱a̱ʼání kití sa̱na̱na.
Ndiʼi na̱ xáʼnda ixí* xa̱ʼa̱-sóʼo
xa̱a̱ síín síín nu̱ú chindaʼíi̱na ku̱ʼu̱nna,
ta xa̱a̱ síín síín táʼví kixi tu̱ndóʼo nu̱úna”, káchi Jehová.
Kǒoka na̱ kundoo nu̱úña,
nda̱a̱ ni iinka yichi̱ va̱ása ndikóka na̱ yiví kundoona nu̱úña”.
34 Tá ki̱xáʼa xáʼndachíñu ta̱ rey Sedequías ta̱ ñuu Judá, Jehová ni̱ka̱ʼa̱nra ña̱yóʼo xíʼin ta̱ profeta Jeremías ña̱ ka̱ʼa̱nra xa̱ʼa̱ ñuu Elam: 35 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Ka̱ʼnu̱i̱ kuxu̱n* na̱ ñuu Elam, saáchi túyóʼo kúú tú táxi ndee̱ ndaʼa̱na. 36 Ta chindaʼíi̱ ku̱mí ta̱chí nu̱ú na̱ ñuu Elam, ña̱ íyo ku̱mí saá ti̱tu̱n ndiví, ta taxii̱ ña̱ ná ta̱ni̱* ndiʼina ku̱ʼu̱nna chí nu̱ú ku̱a̱ʼa̱n ta̱chí yóʼo. Na̱ ñuu Elam ndiʼi ñuu ta̱ni̱na ku̱ʼu̱nna’”.
37 “Sakúachi válíi̱ na̱ elamita nu̱ú na̱ sáa̱-ini xíniñaʼá ta saátu nu̱ú na̱ kúni̱ kaʼní-ñaʼá; xa̱ʼa̱ ña̱ sáa̱níi̱ chindaʼíi̱ iin tu̱ndóʼo nu̱úna, káchi Jehová. Ta chindaʼíi̱ espada ña̱ ná ku̱ʼu̱nña sa̱tána nda̱a̱ ná kaʼníña ndiʼina”.
38 “Kanindichii̱ tronoi̱ chí ñuu Elam ta sandíʼi-xa̱ʼíi̱ ta̱ kúú rey nu̱úna xíʼin na̱ níʼi yichi̱ nu̱úna”, káchi Jehová.
39 “Soo ki̱vi̱ nu̱ú ndíʼi, sandákutáʼi̱n ndiʼi na̱ ñuu Elam na̱ nda̱kiʼinna ku̱a̱ʼa̱n inka ñuu”, káchi Jehová.